ꓟꓷꓽ ꓠꓷꓹ ꓝ ꓒ ꓬ-ꓗꓴ ꓐꓰ ꓬꓲ ꓮ ꓬꓲꓼ ꓬꓲ-ꓢꓳ ꓟꓸ ꓟꓲꓽ

ꓣꓳ ꓒꓵꓽ ꓒꓽ ꓮ-ꓐ-ꓡ-ꓦ ꓠꓬ ꓞꓲꓼ ꓟꓳ ꓡꓰ ꓢꓲ ꓫꓵꓻ ꓗꓷꓳ= ꓬꓲ ꓠꓬ ꓬꓲ ꓔꓯ ꓙꓳˍ ꓟ ꓮ ꓙꓵꓽ ꓬꓲ ꓤ ꓬꓲ-ꓢ ꓔꓯ ꓖꓶꓽ ꓔꓲ ꓬꓰ ꓗꓷꓳ= ꓪꓴ-ꓢ ꓡꓰ ꓮ-ꓐ-ꓡ-ꓦ ꓔꓯ ꓪꓵꓼ ꓘꓶꓽ ꓖꓶ ꓗꓷ ꓟ ꓔꓯ ꓐꓲꓻ ꓡꓰ ꓝꓲ ꓠꓹ ꓟ ꓬꓲ-ꓢ ꓠꓬ ꓤ-ꓐꓱ-ꓘꓹ ꓐꓰ ꓡꓯꓽ ꓒꓯꓹ ꓝ ꓗꓷꓳ= ꓖꓳ ꓡꓱ ꓥˍ ꓟꓲ ꓤ-ꓐꓱ-ꓘꓹ ꓠꓬ ꓞꓳ ꓡꓱꓽ ꓟ ꓥ ꓟ ꓪꓴꓸ ꓠꓬꓲ ꓬꓲ ꓪ ꓐꓴ ꓔꓯ ꓤ ꓠꓱ ꓟꓽ ꓙꓳ ꓡꓰ= ꓖꓳ ꓕꓯ ꓬꓲ-ꓢ ꓠꓬ ꓪꓴ-ꓢ ꓔꓯ ꓪꓽ ꓘꓴˍ ꓡꓳ= ꓪꓴ-ꓢ ꓠꓬ ꓬꓲ-ꓢ ꓔꓯ ꓓꓽ ꓔꓳꓹ ꓖꓶ ꓗꓷ ꓢꓲ ꓤ-ꓐꓱ-ꓘꓹ ꓠꓬ ꓤ ꓙꓱ ꓦꓵ ꓡ ꓢꓲ ꓬꓲ ꓪꓽ ꓠꓬꓲꓽ ꓣꓳ ꓠꓬ ꓚꓲ ꓛꓬ ꓞꓳ ꓫꓵꓽ ꓐꓹ ꓐ ꓒꓬꓱꓼ ꓡˍ ꓥꓳ= ꓖꓳ ꓡꓱ ꓥˍ ꓟꓲ ꓬꓲ ꓪ ꓐꓴ ꓠꓬ ꓟꓹ ꓟ ꓤ ꓘꓶꓻ ꓗꓪ ꓔꓬ ꓕꓯ ꓡꓰ ꓶꓸ ꓡꓯꓽ ꓘꓳˍ ꓥꓳ꓾ ꓐꓰ ꓐꓯ ꓖꓶˍ ꓡꓳ=

ꓪꓴ-ꓢ ꓣꓱꓽ ꓛꓰ ꓗꓪ ꓐꓰ ꓤ-ꓐꓱ-ꓘꓹ ꓠꓬ ꓤ ꓠꓬꓲꓽ ꓣꓳ ꓦꓵꓻ ꓗꓷꓳ= ꓤ ꓪꓴꓽ ꓔꓯ ꓬꓲ-ꓢꓳ ꓟꓬꓱ ꓖꓶˍ ꓡꓳ=ꓗ ꓠꓯꓸ ꓓꓳ ꓡˍ ꓟ ꓤ ꓠꓬ ꓬꓲ-ꓢꓳ ꓛꓲ ꓟꓶ ꓓꓴꓺ ꓔꓯ ꓠꓬꓹ ꓔ ꓢꓲ ꓦꓵ ꓡˍ ꓡꓳ= ꓬꓲ ꓔꓯ ꓠꓬ ꓬ-ꓗꓴ ꓐꓰ ꓘꓴˍ ꓡꓳ=ꓬꓲ ꓪꓽ ꓠꓬꓲꓽ ꓫꓵꓸ ꓕꓲ ꓪꓺꓽ ꓦꓵꓻ ꓡˍ ꓥˍ ꓟꓲ ꓒꓬꓱꓽ ꓟꓽ ꓫꓱꓸ ꓡꓯ ꓘꓳ= ꓤ ꓪꓴꓽ ꓬꓲ-ꓢꓳ ꓠꓬ ꓖꓳ ꓓꓱꓽ ꓠꓲ ꓝꓶ ꓝꓶ ꓗ ꓢꓲ ꓕꓲ ꓖꓳ ꓓꓱ ꓡꓱꓸꓼ ꓟꓵꓺ ꓐꓵ ꓞꓶˍ ꓡꓰ ꓐꓰ ꓗˍ ꓢꓲ ꓠꓬꓲ ꓬꓲ ꓠꓬ ꓧꓪꓽ ꓧꓪ ꓒ ꓒꓬꓱꓼ ꓡˍ ꓡꓳ= ꓬꓲ ꓠꓬꓲꓺ ꓤ ꓬ-ꓗꓴ ꓠꓬ ꓮ ꓣꓳ ꓜꓴ ꓡꓳꓸ ꓢꓴ ꓒꓬꓱꓼ ꓡ ꓗꓷꓳ=

ꓬꓲ-ꓢꓳ ꓠꓬ ꓤ ꓪꓴꓽ ꓥ ꓟ ꓡꓰꓽ ꓟꓽ ꓞꓲꓺ ꓬꓲ-ꓢ ꓔꓯ ꓧꓪꓽ ꓔꓯꓹ ꓖꓶ ꓡˍ ꓠꓬꓲ ꓾ ꓬꓲ ꓠꓬ ꓬꓲ-ꓢꓳ ꓔꓯ ꓮ ꓘꓶꓸ ꓠꓲꓹ ꓠꓵˍ ꓡꓳ= ꓕꓲ ꓒꓳꓹ ꓗꓪ ꓠꓬ ꓤ-ꓐꓱ-ꓘꓹ ꓠꓬ ꓬ-ꓗꓴ ꓔꓯ ꓠꓲꓹ ꓠꓵˍ ꓡꓳ= ꓕꓲ ꓠꓬꓲ ꓙꓳˍ ꓕꓯ ꓬꓲ-ꓢꓳ ꓧꓪꓽ ꓧꓪꓺ ꓟꓽ ꓟꓶ ꓠꓬꓲ ꓦꓰꓼ ꓟꓷꓼ ꓢꓲ ꓦꓲ ꓗꓪ ꓬꓲꓼ ꓡˍ ꓕꓯ꓾ ꓬ-ꓗꓴ ꓡꓰ ꓮꓸ ꓠꓳ ꓪꓴꓽ ꓬꓲꓻ ꓚꓬꓸ ꓔꓬ ꓟ ꓔꓯ ꓟꓳˍ ꓕꓯ ꓬꓲ ꓔꓯ ꓖꓶ ꓜ ꓠꓹ ꓟ ꓐꓯ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓬ-ꓗꓴ ꓡꓰ ꓤ ꓪꓴꓽ ꓙꓵꓽ ꓪ ꓪꓴꓽ ꓖꓶ ꓡ ꓕꓯ ꓢꓲ ꓡꓰ ꓖꓶꓽ ꓜˍ ꓥꓳ ꓐꓰ ꓐꓯ ꓖꓶˍ ꓡꓳ= ꓬꓲ-ꓢꓳ ꓮ ꓘꓶꓸ ꓦꓰꓼ ꓟꓷꓼ ꓔꓬ ꓟ ꓪꓴꓸ ꓠꓬꓲ ꓤ ꓪꓴꓽ ꓙꓵꓽ ꓪ ꓠꓬ ꓮ ꓫꓵꓽ ꓣꓱꓽ ꓬꓯꓼ ꓖꓴ ꓟꓽ ꓙꓳ ꓐꓰ ꓓꓵꓽ ꓙ ꓢꓲ꓾ ꓙꓱꓽ ꓘꓶ ꓪꓵꓼ ꓖꓶ ꓢꓲ ꓬꓲ ꓤꓽ ꓪꓴꓽ ꓙꓵꓽ ꓪ ꓬ-ꓗꓴ ꓔꓯ ꓪꓴꓽ ꓖꓶ ꓗꓷˍ ꓡꓳ=

ꓬꓲ ꓦꓬꓼ ꓠꓬꓲ ꓮ ꓟꓬꓹ ꓖꓴ ꓡꓰ ꓢꓲ꓾ ꓬꓲ-ꓢ ꓞꓲꓼ ꓪꓴꓽ ꓡˍ ꓕꓯ ꓫꓵꓻ ꓠꓹ ꓟ ꓦꓬꓼ ꓠꓬꓲ ꓛꓲꓺ ꓡ ꓔꓬ ꓟ ꓔꓯ ꓢꓷˍ ꓡꓳ= ꓬꓲ ꓠꓬ ꓬꓲ ꓤ ꓪꓴꓽ ꓔꓯ ꓘꓴ ꓢꓲ꓾ ꓬꓲ ꓐꓱ ꓶꓼ ꓧꓪꓽ ꓧꓪ ꓔꓯꓹ ꓡ ꓗ ꓠꓯꓸ ꓬꓲ ꓔꓯ ꓶꓼ ꓥꓳ ꓙꓱꓽ ꓖꓶˍ ꓥꓳ ꓐꓯ ꓖꓶˍ ꓡꓳ=

ꓤ-ꓐꓱ-ꓘꓹ ꓠꓬ ꓬꓲ-ꓢ ꓐꓯˍ ꓟ ꓔꓯ ꓑ ꓙˍ ꓕꓯ ꓬꓲ ꓤ ꓬ-ꓗꓴ ꓔꓬ ꓗꓪ ꓔꓷꓹ ꓙꓰ ꓢꓲ ꓾ ꓬꓲꓸ ꓮ ꓬꓲꓼ ꓬꓲ-ꓢꓳ ꓡꓰ ꓐꓰ ꓬꓰ ꓢꓲ ꓬꓲꓸ ꓐꓹ ꓐ ꓗꓪ ꓐꓰ ꓶꓼ ꓥꓳꓽ ꓙꓱꓽ ꓟꓶ ꓠꓹ ꓟ ꓐꓯ ꓖꓶˍ ꓡꓳ=ꓖꓳ ꓟ ꓪꓴꓸ ꓠꓬꓲ ꓬꓲ ꓪ ꓠꓬꓲꓽ ꓟꓸ ꓡꓼ ꓠꓬ ꓬꓲ-ꓢꓳ ꓓꓳ ꓙꓰˍ ꓟ ꓕꓲ ꓙꓵꓹ ꓔꓯ ꓦꓴꓻ ꓠꓬ ꓔꓬ ꓡꓳ=

ꓬꓲ-ꓢ ꓠꓬ ꓟꓬ ꓢꓶꓽ ꓟꓽ ꓟꓳ ꓟ ꓪꓴꓸ ꓠꓬꓲ ꓬꓲꓹ ꓔꓯ ꓗꓶꓸ ꓐ ꓡˍ ꓥꓳ ꓐꓰ ꓤ-ꓐꓱ-ꓘꓹ ꓙꓵꓻ ꓔ ꓡꓳ= ꓖꓳ ꓡꓱ ꓥˍ ꓟꓲ ꓬ-ꓗꓴ ꓠꓬ ꓬꓲ-ꓢꓳ ꓡꓰ ꓐꓰ ꓖꓳ ꓓꓱꓽ ꓗꓪ ꓬꓲꓸ ꓟꓵꓺ ꓐꓰꓽ ꓡꓰꓽ ꓡꓰꓽ ꓟꓽ ꓗꓹ=

ꓬꓲꓸ ꓟꓹ ꓟ ꓔꓯ ꓠ ꓡꓳˍ ꓟ ꓬ-ꓗꓴ ꓠꓬ ꓟꓲꓻˍ ꓟ ꓧꓪꓽ ꓫꓬꓹ ꓠꓹ ꓟ ꓮ ꓣꓳ 2 ꓟ ꓢꓰꓼˍ ꓡꓳ= ꓬꓲ ꓟꓸ ꓟ ꓥˍ ꓟꓲ ꓬꓲ ꓤ ꓬ-ꓗꓴ ꓡꓯꓽ ꓒꓯꓹ ꓐꓰ ꓗꓶꓸ ꓝꓲꓸ ꓗꓪ ꓮ ꓛꓵꓼ ꓗꓴꓹ ꓙꓲꓻ ꓡꓲ ꓖꓶ ꓢꓲ꓾ꓬꓲ ꓫꓬꓹ ꓔ ꓟ ꓟꓲꓻˍ ꓟ ꓧꓪꓽˍ ꓐꓰ ꓑ ꓑ ꓔꓯꓹ ꓖꓶ ꓬꓰ ꓝꓲˍ ꓡꓳ=

ꓬ-ꓗꓴ ꓠꓬ ꓬꓲꓸ ꓐꓹ ꓐ ꓔꓬ ꓗꓪ ꓐꓰ ꓶꓼ ꓥꓳꓽ ꓙꓱꓽˍ ꓟ ꓟꓶ ꓠꓹ ꓟ ꓐꓱ ꓶ ꓬꓲꓸ ꓐꓹ ꓐ ꓔꓯ ꓜꓽ ꓓꓴ ꓔꓯꓹ ꓖꓶ ꓬꓰˍ ꓡꓳ= ꓬꓲ-ꓢ ꓠꓬ ꓬꓲ ꓤ ꓠꓬꓲꓽ ꓣꓳ ꓢꓯꓼ ꓔꓯ ꓦꓲꓽ ꓠꓬꓲ ꓟꓽ ꓗꓴꓸ ꓠꓬꓲ ꓫꓱꓹ ꓠꓬꓲˍ ꓡꓳ= ꓬꓲ ꓡꓯꓽ ꓒꓯꓹ ꓗꓪ ꓐꓰꓽ ꓡꓰꓽ ꓡꓰꓽ ꓗꓹ ꓟ ꓔꓯ ꓫꓱꓹ ꓟꓶ ꓡꓰ ꓠꓬ ꓬꓲ-ꓢ ꓠꓬ ꓬ-ꓗꓴ ꓔꓯ ꓶꓼ ꓥꓳꓽ ꓙꓱꓽ ꓖꓶˍ ꓡꓳ=

ꓬꓲ-ꓢ ꓡꓰ ꓬ-ꓗꓴ ꓔꓯ ꓶꓼ ꓥꓳꓽ ꓙꓱꓽ ꓖꓶ ꓗꓷ ꓢꓲ ꓬ-ꓗꓴ ꓓꓳ ꓡ ꓔꓬ ꓕꓯ ꓾ ꓬꓲ ꓮ ꓬꓲꓼ ꓬꓲ-ꓢꓳ ꓠꓬ ꓧꓪꓽ ꓧꓪ ꓙꓰ ꓟ ꓗꓪ ꓐꓰ ꓬꓲꓼ ꓛꓲ ꓡˍ ꓡꓳ= ꓬꓲ ꓠꓬ ꓡꓲ ꓛꓲ ꓧꓪꓽ ꓔꓯꓹ ꓬꓲꓼ ꓡˍ ꓟꓲ ꓾ ꓖꓼ ꓟꓽ ꓟꓶꓳ= ꓬꓲ ꓔꓯ ꓖꓶ ꓠꓯˍ ꓟ ꓶꓼ ꓤ ꓫꓱꓹ ꓤ ꓠꓬ ꓬꓲ ꓠꓬꓲ ꓤ ꓬ-ꓗꓴ ꓡꓰ ꓣꓴ ꓔꓯꓹ ꓙꓰꓳ= ꓖꓳ ꓟ ꓪꓴꓸ ꓠꓬꓲ ꓬꓲ-ꓢꓳ ꓠꓬ ꓬ-ꓗꓴˍ ꓔꓯ ꓢꓰꓼ ꓠꓲꓹ ꓫꓵˍ ꓡꓳ= ꓖꓳ ꓕꓯ ꓬꓲ ꓟꓹ ꓟ ꓡꓰ ꓬ-ꓗꓴ ꓔꓯ ꓬꓲ ꓪ ꓐꓴ ꓔꓬ ꓟꓵꓽ ꓗꓪ ꓐꓰ ꓓꓳ ꓙꓰ ꓢꓲ꓾ ꓢꓸ ꓖꓶ ꓬꓲ ꓮ ꓬꓲꓼ ꓠꓲꓹ ꓟ ꓦꓶ ꓠꓽ ꓡꓰ ꓕꓯ ꓬꓲꓼ ꓡ ꓠꓹ ꓟ ꓐꓯ ꓖꓶˍ ꓡꓳ=

ꓬ-ꓗꓴ ꓠꓱꓸ ꓐꓯꓼ ꓕꓲ ꓟꓵꓽ ꓗꓪ ꓔꓬ ꓬꓰ ꓕꓯ ꓬꓲ ꓠꓬ ꓤ ꓠꓱ ꓮ ꓟꓬꓹ ꓦꓵꓻ ꓟꓶ ꓡꓰꓳ= ꓖꓳ ꓗꓸ ꓠꓯꓸ ꓪꓴ-ꓢ ꓡꓰ ꓬ-ꓗꓴ ꓔꓯ ꓬꓲꓸ ꓐꓹ ꓐ ꓟꓵꓽ ꓗꓪ ꓬꓲꓼ ꓙꓰ ꓠꓹ ꓟ ꓐꓯ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲꓸ ꓠꓽ ꓬꓲꓸ ꓮ ꓬꓲꓼ ꓟꓽ ꓘꓳꓹ ꓣꓴ ꓟ ꓔꓯ ꓙꓳꓺ ꓔꓬ ꓢꓰꓽ ꓡꓳ=

ꓬꓲ-ꓢꓳ ꓐꓰ ꓬ-ꓗꓴ ꓟꓳ ꓡꓯꓽ ꓘꓳꓹ ꓕꓯ ꓬꓲ ꓪ ꓠꓬꓲꓽ ꓫꓵꓸ ꓠꓬ ꓫꓳꓸ ꓡꓯꓽ ꓘꓳ ꓗꓷ ꓢꓲ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓝꓴꓲꓸ ꓖꓼ ꓖꓶꓽ ꓗꓷꓳ= ꓬ-ꓗꓴ ꓥˍ ꓟꓲ ꓪꓴ-ꓢ ꓢꓲꓺ ꓚꓰꓸ ꓔ ꓟ ꓞꓳ ꓫꓵꓽ ꓕꓲ ꓣꓳˍ ꓡꓰ ꓐꓰ ꓝ ꓢꓲ ꓢꓯꓸ ꓔꓬ ꓪ ꓡꓰꓳ= ꓖꓳ ꓗꓸ ꓠꓯꓸ ꓬꓲ-ꓢꓷ-ꓡꓰ ꓟꓬꓱꓺ ꓔ ꓟ ꓞꓳ ꓫꓵꓽ ꓐꓴˍ ꓟꓲ꓾ ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓯ ꓢꓲ ꓘꓴˍ ꓟ ꓟꓶ ꓗꓷꓳ=