ꓓꓵꓽ ꓙꓽ ꓒꓳꓹ ꓡꓰꓼˍ ꓟ ꓚꓱꓹ

ꓘꓴ-ꓜꓲ-ꓞꓳ ꓟꓶꓽ ꓘꓳꓼ ꓠꓯꓸꓼ ꓗꓪ 3 ꓫꓵꓽ ꓠꓽ

ꓬꓳ-ꓠ ꓕꓳꓽ ꓶ 3: 1-5ꓹ 10

ꓖꓳ ꓡꓱ ꓠꓬ ꓬꓰ-ꓧꓳ-ꓧꓪ ꓐꓯ ꓘꓶ ꓠꓬꓲꓽ ꓧꓪꓹ ꓕꓲ ꓧꓪꓹ ꓬꓳ-ꓠ ꓔꓯ ꓛꓲ ꓡ ꓢꓲ ꓕꓱ ꓡꓱ ꓐꓯ_ ꓡꓳ꓾ꓔꓴ꓾ ꓠꓲ-ꓠꓲ-ꓪꓱ ꓡꓳ ꓒꓱ ꓓꓽ ꓟ ꓗꓪ ꓙꓰ ꓢꓲ꓾ ꓥꓪ ꓠꓴꓻ ꓔꓯ ꓐꓯ ꓖꓶ_ ꓟ ꓟꓸ ꓟꓲ ꓬꓲ ꓪ ꓔꓯ ꓚ ꓟꓸ ꓖꓶ꓾ ꓐꓯ_ ꓡꓳ꓿ꓖꓳ ꓡꓱ ꓠꓬ ꓬꓳ-ꓠ ꓔꓴ ꓢꓲ꓾ ꓬꓰ-ꓧꓳ-ꓧꓪ ꓐꓯ ꓘꓶ ꓔꓯ ꓛꓳ ꓢꓲ ꓠꓬꓲ꓾ ꓠꓲ-ꓠꓲ-ꓪꓱ ꓡꓳ ꓒꓱ ꓗꓪ ꓙꓰ_ ꓡꓳ꓿ ꓠꓲ-ꓠꓲ-ꓪꓱ ꓠꓬ ꓮ ꓘꓶ ꓪꓴꓽ_ ꓟ ꓡꓳ ꓒꓱ ꓓꓽ ꓟ ꓥ ꓢꓲ꓾ ꓢꓽ ꓠꓬꓲ ꓙ ꓖꓴ ꓙꓳ_ ꓡꓳ꓿ꓬꓳ-ꓠ ꓠꓬ ꓡꓳ ꓒꓱ ꓗꓪ ꓓꓵ ꓙꓰ ꓢꓲ꓾ ꓕꓲ ꓠꓬꓲ ꓫꓱꓽ ꓗꓷ ꓠꓬ ꓕꓱ ꓡꓱ ꓘꓴ_ ꓡꓳ꓾ ꓝꓮꓲ ꓡꓲꓺ ꓞꓲ ꓠꓬꓲ ꓠꓬ ꓠꓲ-ꓠꓲ-ꓪꓱ ꓔꓯ ꓐꓱꓽ ꓗꓷ ꓝꓲ_ ꓥꓳ꓾ ꓐꓯ_ ꓡꓳ꓿ꓖꓳ ꓡꓱ ꓠꓬ ꓠꓲ-ꓠꓲ-ꓪꓱ ꓗꓪ ꓟ ꓑ ꓫꓬꓼ꓾ ꓪꓴꓽ ꓢꓴ ꓗꓪ ꓐꓰ ꓣꓳ ꓢꓴ ꓗꓪ ꓛꓲ꓾ ꓪꓴ-ꓢ ꓔꓯ ꓙꓵꓻ ꓢꓲ꓾ ꓜ ꓓꓴ ꓟꓽ ꓜ ꓬꓰ ꓠꓹ ꓟ ꓐꓯ ꓘꓶ ꓚ ꓟꓸ ꓖꓶ ꓢꓲ ꓠꓬꓲ꓾ ꓓꓸ ꓖꓶ ꓟꓶ ꓐꓵ ꓞꓶ ꓖꓪ_ ꓡꓳ꓿ꓖꓳ ꓡꓱ ꓠꓬ ꓬꓲ ꓪ ꓥꓶ_ ꓟ ꓚꓱꓹ ꓗꓪ ꓐꓰ ꓒꓳꓹ ꓬꓲꓼ ꓡ_ ꓟ_ ꓐꓰ꓾ ꓬꓲ ꓪ ꓬꓰ_ ꓟ ꓔꓯ ꓪꓴ-ꓢ ꓟꓳ ꓗꓷ ꓠꓬ꓾ ꓪꓴ-ꓢ ꓡꓰ ꓬꓲ ꓪ ꓔꓯ ꓥꓶ_ ꓟ ꓬꓰ ꓖꓶ_ ꓥꓳ꓾ ꓐꓰ ꓐꓯ_ ꓟ ꓗꓪ ꓐꓰ ꓙꓽ ꓡꓰꓼ ꓡ ꓢꓲ꓾ ꓟꓽ ꓬꓰꓳ꓿

1 ꓘꓳ-ꓡꓴ-ꓕꓴ 7ꓽ 29-31

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓥꓪ ꓕꓱ ꓡꓱ ꓐꓯˍ ꓟ ꓠꓬ ꓬꓲ ꓙꓵꓹ ꓓꓴꓸ ꓡꓰ ꓔꓬ ꓠꓬꓲ ꓐꓯˍ ꓟ ꓥ ꓡꓳ꓿ ꓕꓱ ꓡꓱ ꓖꓳ ꓑꓳ꓾ ꓤꓽ ꓟꓶ ꓙꓳ ꓢꓴ ꓠꓬ ꓟꓽ ꓙꓳ ꓢꓴˍ ꓡꓰ ꓐꓰ꓾ 30 ꓥꓴꓻ ꓢꓴ ꓠꓬ ꓟꓽ ꓥꓴ ꓢꓴˍ ꓡꓰ ꓐꓰ꓾ ꓗꓹ ꓛꓲ ꓢꓴ ꓠꓬ ꓟꓽ ꓗꓹ ꓛꓲ ꓢꓴˍ ꓡꓰ ꓐꓰ꓾ ꓕꓲ ꓫꓵ ꓪꓴꓻ ꓟꓶ ꓢꓴ ꓠꓬ ꓮꓸ ꓫꓵ ꓟꓽ ꓙꓳ ꓢꓴˍ ꓡꓰ ꓐꓰ꓾ 31 ꓟꓲ ꓠꓯ ꓗꓪ ꓟ ꓣꓱꓽ ꓓꓴ ꓣꓱꓽ ꓢꓴ ꓠꓬ ꓣꓱꓽ ꓓꓴ ꓖꓳ ꓟ ꓡꓰ ꓟꓽ ꓙꓲꓽ ꓧꓪꓸ ꓡꓰ ꓝꓲˍ ꓐꓰ ꓔꓬ ꓠ ꓗꓹ ꓥꓳ꓿ ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓕꓱ ꓟ ꓠꓽ ꓡꓳꓹ ꓬꓰ ꓔꓬ ꓡꓳ꓿  

ꓟ-ꓘꓳ 1ꓽ 14-20

ꓬꓳ-ꓦ ꓔꓯ ꓐꓱꓻ ꓗꓷ ꓗꓸ ꓠꓯꓸ꓾ ꓬꓰ-ꓢꓴ ꓠꓬ ꓖ-ꓡꓲ-ꓡꓲ ꓟꓵ ꓗꓪ ꓓꓵꓽ ꓡ ꓢꓲ꓾ ꓪꓴ-ꓢ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ ꓢꓲ ꓠꓬꓲ꓾ 15 ꓦꓬꓼ ꓠꓬꓲ ꓐꓲ ꓡꓺꓳ꓾ ꓪꓴ-ꓢ ꓗꓴꓷ ꓠꓶꓽ ꓡꓺꓳ꓾ ꓠꓴ ꓪꓽ ꓠꓲꓹ ꓟ ꓡꓶꓸ ꓢꓲ ꓶꓼ ꓓꓳ ꓫꓱꓹ ꓓꓳ ꓔꓯ ꓙꓵꓻ꓾ ꓐꓯˍ ꓡꓳ꓿ 16 ꓖ-ꓡꓲ-ꓡꓲ ꓬꓲꓻ ꓡꓴꓽ ꓐꓱ ꓘꓶꓽ ꓗꓪ ꓬꓰ-ꓢꓴ ꓫꓱꓽ ꓔꓬ ꓕꓯ꓾ ꓢꓲ-ꓟꓴˍ ꓐꓰ ꓬꓲ ꓠꓬꓲ ꓤ ꓯ-ꓓꓱ-ꓣꓴ ꓠꓬ ꓥꓪꓸ ꓧꓪ ꓢꓴ ꓥ ꓠꓬꓲ꓾ ꓬꓲꓻ ꓡꓴꓽ ꓐꓱ ꓗꓪ ꓥꓪꓸ ꓓꓳꓽ ꓔꓬ ꓟ ꓔꓯ ꓬꓲ ꓟꓳꓻˍ ꓡꓳ꓿ 17 ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓥꓪ ꓔꓯ ꓛꓳ ꓡꓯ꓾ ꓠꓴ ꓪꓽ ꓔꓯ ꓥꓪ ꓡꓰ ꓡꓽ ꓞꓳ ꓧꓪ ꓟꓶ ꓢꓴ ꓒꓬꓱꓼ ꓡ ꓝꓲˍ ꓥꓳ꓾ ꓐꓯ ꓖꓶˍ ꓡꓳ꓿ 18 ꓖꓳ ꓡꓱ ꓠꓬ ꓬꓲ ꓪꓽ ꓞꓼ ꓐꓰ ꓥꓪꓸ ꓑꓱꓸ ꓗꓶ ꓔꓸ ꓬꓰ ꓢꓲ ꓬꓲ ꓔꓯ ꓛꓳ ꓙꓰˍ ꓡꓳ꓿ 19 ꓝꓮꓲ ꓕꓲ ꓑꓹ ꓤ ꓙꓰ ꓗꓷ ꓠꓬ꓾ ꓜꓲ-ꓐꓱ-ꓓꓲ ꓬꓲ ꓮ ꓐꓲ ꓬ-ꓗꓴˍ ꓐꓰ ꓬꓲ ꓠꓬꓲ ꓤ ꓬꓳ-ꓦ ꓠꓬ ꓡꓲ ꓗꓪ ꓥꓪꓸ ꓑꓱꓸ ꓑꓱꓺ ꓔꓬ ꓟ ꓔꓯ ꓬꓲ ꓟꓳꓻˍ ꓡꓳ꓿ 20 ꓖꓳ ꓕꓲꓽ ꓑꓹ ꓗꓪ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓘꓴꓻ ꓗꓷ ꓠꓬ꓾ ꓬꓲ ꓪꓽ ꓠꓽ ꓬꓲ ꓪꓽ ꓐꓹ ꓐ ꓜꓲ-ꓐꓱ-ꓓꓲ ꓔꓯ꓾ ꓡꓲ ꓗꓪ ꓪꓽ ꓗꓴꓸ ꓔ ꓢꓴ ꓐꓴˍ ꓐꓰ ꓔꓲꓹ ꓬꓰ ꓝꓲ ꓢꓲ꓾ ꓬꓰ-ꓢꓴ ꓔꓯ ꓛꓳ ꓙꓰˍ ꓡꓳ꓿