ꓐꓴꓓ-ꓓ ꓙꓵ ꓠꓲꓹ (ꓓꓲꓮꓡꓳꓖꓴꓰ ꓪꓲꓔꓧ ꓳꓔꓧꓰꓣ ꓣꓰꓡꓲꓖꓲꓳꓠꓢ)

ꓖꓮꓴ-ꓔ-ꓟ ꓐꓴꓓ-ꓓ ꓠꓬ ꓢꓲꓺ ꓡꓲꓹ ꓐꓰ ꓔꓬ ꓢꓲ ꓪꓽ ꓘꓴ ꓢꓯꓼ ꓕꓵꓼ ꓠꓹ ꓟ ꓐꓱ ꓶ ꓬꓲ ꓐꓹ ꓐꓽ ꓔꓯ ꓙꓵꓽ ꓪꓽ ꓖꓶꓽ ꓡ ꓠꓹ ꓟ ꓐꓱ ꓶꓽ ꓓꓰ ꓡꓳ= ꓬꓲꓸ ꓐꓹ ꓐꓽ ꓠꓬ ꓬꓲ ꓤꓽ ꓖꓳ-ꓔ-ꓟ ꓟꓵꓽ ꓗꓪ ꓙꓲ ꓢꓲ ꓦ ꓕꓲꓽ ꓒꓳꓹ ꓔꓲꓸ ꓢꓲ ꓢꓯꓼ ꓕꓵꓼ ꓡꓰ ꓠꓹ ꓟ ꓔꓯ ꓙꓬꓽ ꓫꓸ ꓢꓲ ꓬꓲ ꓔꓯ ꓡꓳꓸ ꓢꓴ ꓟꓯꓼ ꓤꓼ ꓮ ꓟꓬꓹ ꓔꓯ ꓛꓹ ꓦꓹ ꓔ ꓡꓳ꓾ ꓡꓳꓸ ꓝꓲꓹ ꓡꓳ= ꓖꓳ-ꓔ-ꓟ ꓐꓴꓓ-ꓓ ꓠꓬ ꓬꓲ ꓛꓳꓽ ꓒꓯꓹ ꓚꓧꓮꓠ-ꓠ ꓐꓰ ꓕꓲꓽ ꓪꓼ ꓬꓲ ꓮꓸ ꓟꓳꓽ ꓥꓹ ꓟ ꓖꓮꓠ-ꓓ-ꓗ ꓐꓰ ꓕꓲꓽ ꓪꓼ ꓟꓵꓽ ꓗꓪ ꓛꓲꓹ ꓙꓰˍ ꓡꓳ= ꓖꓳ ꓡꓰ ꓖꓳ-ꓔ-ꓟ ꓛꓲꓹ ꓙꓰˍ ꓟ ꓔꓯ ꓐꓳ-ꓔꓲꓼ-ꓢꓮꓔ-ꓕ ꓓꓳ ꓙꓰꓹ ꓟ ꓚꓱꓹ ꓐꓰ ꓕꓱ ꓡꓰ ꓐꓯˍ ꓐꓶ=

ꓦ ꓕꓲꓽ ꓒꓳꓹ ꓔꓯꓸ ꓢꓲ ꓢꓯꓼ ꓕꓵꓼ ꓢꓲ ꓬꓲ ꓙꓵꓹ ꓛꓲ ꓡꓹ ꓠꓬ ꓬꓲ ꓠꓬ ꓠꓲꓹ ꓟ ꓗꓪ ꓐꓰ ꓟꓳ ꓐ ꓡꓹ ꓟ ꓠꓬꓲ ꓟꓳ ꓓꓴ ꓠꓬꓲ ꓟꓳ ꓓꓴ ꓬꓲ ꓐꓯꓹ ꓟꓶ ꓢꓲ ꓮꓻ ꓡꓰ ꓓꓴ ꓓꓽ ꓟ ꓫꓸ ꓕꓱ ꓐ ꓡˍ ꓡꓳ= ꓬꓰ ꓐ ꓡˍ ꓡꓳ= ꓬꓲ ꓟꓳꓹ ꓟ ꓚꓱꓹ ꓠꓬ ꓟꓲ-ꓢꓲ-ꓟ ꓑ-ꓔꓲ-ꓑ-ꓓ ꓐꓯꓹ ꓟ ꓮ ꓘꓶꓸ ꓫꓸ ꓠ ꓥˍ ꓟꓲ ꓟꓽ ꓥ꓾ ꓮ ꓘꓶꓸ ꓢ ꓠ ꓥˍ ꓟꓲ ꓟꓽ ꓥ ꓬꓲ ꓕꓯꓹ ꓫꓵ ꓕꓲꓽ ꓙꓶ ꓗꓪ ꓦ ꓕꓲꓽ ꓒꓳꓹ ꓕꓯꓸ ꓢꓲ ꓢꓯꓼ ꓕꓵꓼ ꓟ ꓚꓱꓹ ꓥˍ ꓐꓶ= ꓖꓳ ꓕꓲ ꓠꓬꓲ ꓗꓪ ꓚꓳꓸ ꓠꓲ ꓐꓴꓓ-ꓓ ꓗ ꓠꓯꓸ ꓢꓲ ꓗꓪ ꓛꓳ ꓢꓴ ꓮ ꓟꓬ ꓙꓳ ꓡ ꓐꓶ= ꓖꓳ ꓡꓰ ꓢꓲ ꓬꓲ ꓗꓸ ꓠꓯꓸ ꓢꓲ ꓗꓪ ꓛꓳ ꓢꓴ ꓮ ꓟꓬ ꓙꓳꓹ ꓡ ꓟ ꓡꓰ ꓐꓰ ꓐꓴꓓ-ꓓ ꓙꓵ ꓠꓲꓹ ꓐꓯ ꓢꓲ ꓕꓱ ꓡꓰ ꓙꓳ ꓡꓹ ꓟ ꓥ ꓐꓶ= ꓐꓯ ꓡꓳꓹ ꓬꓰꓹ ꓟ ꓡꓰ ꓐꓰ ꓕꓲꓽ ꓡꓲꓹ ꓮ ꓘꓶꓹ ꓫꓸ ꓠ ꓥˍ ꓟꓲ ꓟꓽ ꓥ꓾ ꓮ ꓘꓶꓸ ꓢ ꓠ ꓥˍ ꓟꓲ ꓟꓽ ꓥ ꓬꓲ ꓕꓯꓹ ꓫꓵ ꓕꓲꓽ ꓙꓶ ꓗꓪ ꓛꓳ ꓢꓲ ꓦ ꓢꓯꓼ ꓐꓯꓹ ꓟꓶ ꓠꓹ ꓟ ꓚꓱꓹ ꓕꓱ ꓟ ꓠꓬ ꓟꓽ ꓓ ꓟꓴ ꓖꓴ ꓡꓰꓹ ꓟ ꓬꓲ ꓡꓰ ꓟꓸ ꓖꓶ ꓡꓹ ꓟ ꓚꓱꓹ ꓥ ꓐꓶ= ꓮ ꓡꓰꓳ ꓐꓯ ꓠꓬ ꓬꓲ ꓠꓬ ꓦ ꓕꓲꓽ ꓒꓳꓹ ꓕꓯꓸ ꓢꓲ ꓢꓯꓼ ꓕꓵꓼ ꓕꓯ ꓜ ꓚꓵꓸ ꓚꓵꓸ ꓢꓲ ꓮ ꓘꓶꓸ ꓢꓯꓼ ꓕꓵꓼ ꓥˍ ꓟꓲ ꓦ ꓢꓯꓼ ꓟꓽ ꓟꓶ ꓡ꓾ ꓜ ꓧꓯꓼ ꓟꓶꓼ ꓢꓲ ꓦ ꓕꓲꓽ ꓒꓳꓹ ꓕꓯ ꓢꓲ ꓢꓯꓼ ꓕꓵꓼ ꓟꓽ ꓐ ꓡꓹ ꓟ ꓕꓱ ꓡꓰ ꓗꓶ ꓡꓰ ꓐꓶ= ꓜ ꓒ ꓐꓳ ꓜꓽ ꓠꓬ ꓦ ꓕꓲꓽ ꓒꓳꓹ ꓕꓯ ꓢꓲ ꓢꓯꓼ ꓕꓵꓼ ꓠꓹ ꓟ ꓠꓲꓹ ꓟ ꓟꓽ ꓙꓳ ꓡ ꓐꓶ= ꓮ ꓘꓶꓸ ꓥˍ ꓟꓲ ꓟꓽ ꓜꓽ ꓬꓲ ꓟꓳꓹ ꓤꓼ ꓜꓽ ꓢꓲ ꓠꓬꓲ ꓟꓳ ꓓꓴ ꓟꓶ ꓡꓰꓳ ꓐꓰ ꓕꓱ ꓡꓰ ꓐꓯˍ ꓡꓳ=

ꓐꓴꓓ-ꓓ ꓙꓵ ꓠꓲꓹ ꓠꓯꓸꓼ ꓗꓰ ꓕꓲꓽ ꓤꓶ ꓡꓰ ꓕꓲꓽ ꓤꓶ ꓣꓱꓽ ꓫꓶꓸ ꓡꓹ ꓟ ꓠꓯꓸꓼ ꓗꓪ ꓟꓸ ꓖꓶ ꓡꓹ ꓟ 3 ꓫꓵꓽ ꓕꓱ ꓡꓰ ꓙꓳ ꓐꓶ= ꓕꓱ ꓟ ꓠꓬ ꓮ ꓫꓵꓽ ꓥꓹ ꓡꓻ ꓐꓯ ꓠꓬ ꓚꓱꓹ ꓠꓯ ꓗꓪ ꓟ ꓟꓽ ꓓ ꓟꓳ ꓪ ꓓꓹ ꓟ ꓚꓱꓹ ꓐꓰ ꓕꓱ ꓡꓰ ꓐꓯˍ ꓐꓶ= ꓓ-ꓟꓼ ꓐꓯꓹ ꓟ ꓛꓳ ꓚꓱꓹ ꓐꓰ ꓕꓱ ꓡꓰ ꓐꓯˍ ꓐꓶ= ꓖꓳ ꓟ ꓔꓯ 1ꓸ ꓮ ꓕꓯꓽ ꓥˍ ꓟꓲ ꓤꓲ ꓞꓹ ꓟ ꓟꓽ ꓙꓳ ꓟ ꓐꓯˍ ꓟ 2ꓸ ꓫꓸ ꓓꓴ ꓟꓶꓽ ꓓꓴ 3ꓸ ꓚꓵꓸ ꓛꓬ ꓐꓱ ꓶꓽ ꓓꓰ ꓓꓵꓽ ꓙꓹ ꓟ ꓠꓬ ꓤꓲ ꓞꓹ ꓟ ꓟꓽ ꓙꓳ ꓐꓯˍ ꓟ ꓥ ꓐꓶ= ꓖꓳ ꓟ ꓔꓯ ꓮ-ꓠꓲꓗ-ꓝꓼ꓾ ꓓꓴꓗ-ꓘ꓾ ꓮ-ꓠꓼ-ꓔ ꓐꓯˍ ꓐꓶ=