ꓟ-ꓢ-ꓒꓳꓸ ꓢꓶꓽ (ꓢ:-ꓒꓳ; ꓢꓶꓽ) ꓜꓲ ꓔꓶ ꓚꓱꓹ

ꓟ-ꓢ-ꓒꓳꓸ ꓢꓶꓽ (ꓢ:-ꓒꓳ; ꓢꓶꓽ) ꓔꓯ ꓖꓴ ꓟꓶꓸ America꓾ ꓖꓴ ꓪꓴꓸ America ꓐꓰ ꓐꓶ ꓓꓵꓽ India ꓟꓵꓽ ꓗꓪ ꓥ ꓡꓳ ꓐꓰ ꓚꓬꓹ ꓪˍ ꓡꓳ= ꓟ-ꓢ-ꓒꓳꓸ ꓢꓶꓽ (ꓢ:-ꓒꓳ; ꓢꓶꓽ) ꓠꓬ ꓞꓻ ꓟꓵꓽ ꓡꓱꓻ ꓟꓵꓽ ꓜꓲ ꓢꓲꓹ ꓢꓶꓽ ꓥ ꓢꓲ ꓞꓻ ꓟꓵꓽ ꓡꓱꓻ ꓟꓵꓽ ꓗꓪ ꓔꓶˍ ꓡꓳ= ꓟꓬ-ꓟ ꓗꓴꓷꓼ ꓗꓪˍ ꓟꓲ ꓕꓲ ꓖ ꓡꓰ ꓕꓲ ꓖ ꓗꓪ ꓔꓶ ꓔꓬ ꓡꓳ=

ꓟ-ꓢ-ꓒꓳꓸ ꓢꓶꓽ (ꓢ:-ꓒꓳ; ꓢꓶꓽ) ꓜꓲ ꓗꓪ ꓬꓲꓸ ꓒꓽ ꓜꓲ꓾ ꓬꓲ ꓟ ꓜꓲ ꓐꓰ ꓬꓲ ꓒ ꓬꓲ ꓟ ꓠꓬꓲꓽ ꓫꓵꓽ ꓡꓱꓸꓼ ꓙꓳˍ ꓟ ꓬꓲꓸ ꓜꓲ ꓐꓯ ꓢꓲ ꓢ ꓫꓵꓽ ꓙꓳˍ ꓡꓳ= ꓬꓲ ꓒ ꓜꓲ ꓗꓪ ꓬꓲꓸ ꓢꓶꓽ ꓓꓱꓼˍ ꓟ ꓠꓬ ꓟꓽ ꓙꓳ ꓐꓯ ꓠ ꓛꓲ ꓥꓳ= ꓬꓲꓸ ꓟ ꓜꓲ ꓐꓰ ꓬꓲ ꓒ ꓬꓲ ꓟ ꓠꓬꓲꓽ ꓙꓰꓽ ꓡꓱꓸꓼ ꓙꓳˍ ꓟ ꓬꓲ ꓜꓲ ꓗꓪ ꓡꓰꓽ ꓬꓲ ꓢꓶꓽ ꓓꓱꓼˍ ꓡꓳ=

ꓬꓲ ꓒ ꓜꓲ - ꓬꓲ ꓒ ꓜꓲ ꓗꓪ ꓟꓬꓽ ꓠꓬꓲ ꓠꓬ ꓬꓲꓸ ꓪꓰꓻ ꓠꓯꓼ ꓠꓯꓼ ꓓꓳ ꓡ ꓢꓲ ꓬꓲꓸ ꓞꓪꓸ ꓞꓪꓸ ꓪꓰˍ ꓡꓳ= ꓬꓲ ꓒ ꓜꓲ ꓗꓪ ꓠꓻ ꓓꓴ ꓙꓳ ꓡꓰ ꓠꓬ꓾ ꓬꓲ ꓜꓲ ꓕꓯꓽ ꓢꓲ ꓕꓲ ꓔꓳꓸ ꓓꓶ ꓗꓷ ꓠꓬ ꓬꓲ ꓒ ꓪꓰ ꓠꓬ ꓬꓲ ꓟ ꓪꓰ ꓒꓬꓱꓼ ꓡ ꓢꓲ ꓬꓲ ꓢꓶꓽ ꓤ ꓤ ꓓꓰꓼ ꓡ ꓗꓴˍ ꓡꓳ=   

ꓬꓲ ꓟ ꓜꓲ - ꓬꓲ ꓟ ꓜꓲ ꓗꓪ ꓬꓲ ꓪꓰ ꓠꓬ ꓬꓲꓸ ꓞꓪꓸ ꓞꓪꓸ ꓟꓽ ꓪꓰ ꓪꓰ ꓕꓲ ꓗꓸ ꓗꓪ ꓕꓲ ꓪꓰˍ ꓡꓰꓽ ꓪꓰˍ ꓡꓳ=

ꓬꓲꓸ ꓒ ꓬꓲꓸ ꓟ ꓠꓬꓲꓽ ꓙꓰꓽ ꓡꓱꓸꓼ ꓙꓳˍ ꓟ ꓜꓲ - ꓬꓲꓸ ꓒ ꓬꓲꓸ ꓟ ꓠꓬꓲꓽ ꓙꓰꓽ ꓡꓱꓸꓼ ꓙꓳˍ ꓟ ꓜꓲ ꓗꓪ ꓠꓬ ꓕꓲ ꓗꓸ ꓗꓪ ꓠꓬꓲꓽ ꓪꓰ ꓗꓪ ꓐꓰ ꓢ ꓪꓰ ꓪꓰˍ ꓡꓳ= ꓟꓵꓽ ꓘꓳꓼ ꓗꓪ ꓡꓳꓸ ꓢꓲ ꓬꓲ ꓒ ꓪꓰ ꓬꓲ ꓟ ꓪꓰ ꓪꓰ ꓡˍ ꓡꓳ=

ꓔꓶˍ ꓟ ꓟꓲ ꓛꓬ ꓐꓰ ꓟꓵꓽ ꓘꓳꓼ

ꓟ-ꓢ-ꓒꓳꓸ ꓢꓶꓽ (ꓢ:-ꓒꓳ; ꓢꓶꓽ) ꓜꓲ ꓠꓬ ꓡꓱꓻ ꓢꓲ ꓟꓵꓽ ꓟꓽ ꓙꓴꓺ ꓟ ꓗꓪ ꓔꓶ ꓒꓬꓱꓼ ꓡ ꓢˍ ꓡꓳ= ꓟꓬ-ꓟ ꓗꓴꓷꓼ ꓗꓪ 3000' ꓕꓯ ꓢꓲꓺ ꓟꓴˍ ꓟ ꓪꓽ ꓚꓲ ꓟꓵꓽ ꓙꓬꓻ ꓝꓲ ꓗꓪ ꓠꓬ ꓙꓬꓻ ꓢꓯꓼ ꓟꓬꓽ꓾ ꓡꓴꓸ ꓫꓴꓽ ꓖꓪ꓾ ꓠꓲꓺ ꓖꓪˍ ꓟ ꓪꓴꓸ ꓠꓬꓲ ꓬꓲ ꓜꓲ ꓫꓵꓻ ꓗꓴˍ ꓡꓳ=

ꓬꓲ ꓜꓲ ꓠꓬ ꓟꓵꓽ ꓛꓲ꓾ ꓩꓴ-ꓛꓲ ꓟꓵꓽ ꓛꓵꓽ ꓙꓲˍ ꓠꓬ ꓙꓲˍ ꓡꓰ ꓮ ꓡꓰ ꓗꓪˍ ꓟꓲ ꓔꓶ ꓒꓬꓱꓼ ꓡˍ ꓡꓳ= ꓖꓳ ꓡꓱ ꓥˍ ꓟꓲ ꓟꓲ ꓛꓬ ꓠꓬꓼ ꓡꓯꓼ꓾ ꓬꓲꓻ ꓙꓬ ꓐꓱˍ ꓟ ꓐꓰ ꓬꓲꓻ ꓙꓬ ꓢꓯꓼ ꓟꓬꓽˍ ꓟ ꓗꓪ ꓔꓶ ꓒꓬꓱꓼ ꓡ ꓫˍ ꓡꓳ=

ꓬꓲ ꓜꓲ ꓔꓶˍ ꓟ ꓐꓰ ꓬꓲ ꓟꓲ ꓫꓬꓹ ꓚꓱꓹ

ꓟ-ꓢ-ꓒꓳꓸ ꓢꓶꓽ (ꓢ:-ꓒꓳ; ꓢꓶꓽ) ꓜꓲ ꓔꓯ ꓟꓬꓽ ꓠꓬꓲ ꓠꓬ ꓬꓲꓸ ꓫꓵꓸ ꓗꓪ ꓐꓰ ꓬꓲ ꓜꓲ ꓡꓲꓸ ꓤ ꓫꓬꓹ ꓢꓲ ꓔꓶˍ ꓡꓳ= ꓬꓲ ꓜꓲ ꓕꓲ ꓐꓱ ꓠꓬ ꓕꓲ ꓖ ꓕꓲ ꓧꓪꓹ ꓬꓲꓸ ꓧꓹ ꓓꓳ ꓡ ꓢꓲ꓾ ꓓꓳ ꓡꓹ ꓟ ꓬꓲ ꓧꓹ ꓔꓯ ꓬꓲ ꓚꓰꓺ ꓗꓪ ꓛꓲ ꓓꓶ ꓣꓴ ꓗꓷ ꓢꓲ꓾ ꓬꓲ ꓚꓰꓺ ꓣꓱꓻ ꓡ ꓠ ꓫꓬꓹ ꓢꓲ ꓔꓶ ꓐ ꓡˍ ꓡꓳ=

ꓟ-ꓢ-ꓒꓳꓸ ꓢꓶꓽ (ꓢ:-ꓒꓳ; ꓢꓶꓽ) ꓜꓲ ꓔꓶ ꓓꓴ ꓐꓱ ꓶ ꓬꓲ ꓟꓲ꓾ ꓢꓲꓹ ꓖꓶꓽ ꓤ ꓤ꓾ ꓬꓲ ꓜꓲ ꓔꓶ ꓓꓴ Plastic ꓬꓲꓸ ꓫꓵꓽ ꓬꓲꓸ ꓙꓰꓽ ꓣꓱꓽ ꓓꓹ ꓡꓳ= ꓔꓶˍ ꓟ ꓬꓲ ꓟꓲ ꓠꓬ ꓮꓸ ꓠꓬꓲꓽ ꓛꓲꓽ ꓛꓵꓽ꓾ ꓧꓶꓽ ꓚꓲ꓾ ꓠꓱꓸ ꓦꓱ ꓐꓴ ꓔꓯ ꓕꓲ ꓪ ꓑꓯꓸ ꓗꓷ ꓫꓳꓽ ꓗꓷ ꓔ ꓠꓯꓹ ꓡꓳ=

ꓬꓲꓸ ꓫꓵꓸ ꓔꓶˍ ꓕꓯ ꓮ ꓠꓯꓸ ꓠꓯꓸ ꓔꓶ ꓪ ꓡꓰ ꓠꓬ꓾ ꓥ ꓠꓬ꓾ ꓬꓲꓸ ꓫꓵꓸ ꓕꓯꓽ ꓢꓲ ꓗꓪ ꓟꓲ ꓛꓬ ꓮ ꓠꓯꓸ ꓠꓯꓸ ꓑꓲꓸ ꓪ ꓡꓰ ꓠꓬ ꓬꓲꓸ ꓫꓵꓸ ꓛꓵꓽ ꓡꓰ ꓢꓲ꓾ ꓬꓲ ꓜꓲ ꓣꓱꓻ ꓡˍ ꓟꓲ ꓟꓽ ꓪꓴꓽ ꓡ=

ꓬꓲ ꓫꓵꓸ ꓔꓯ ꓬꓲ ꓟꓲ ꓕꓯꓽ ꓢꓲ ꓕꓲꓽ ꓚꓬꓸ ꓐꓰ ꓕꓲ ꓚꓬꓸ 6" ꓗꓶ ꓢꓲ꓾ ꓕꓲ ꓜꓲ ꓐꓰ ꓕꓲ ꓜꓲ 4" ꓛꓲ ꓗꓶ ꓢꓲ ꓠꓬꓲ ꓔꓶ ꓠꓯ ꓡꓳ= ꓕꓯꓽ ꓢꓲ ꓗꓪ ꓫꓵꓸ ꓙꓴꓺ꓾ ꓟꓳꓼ ꓙꓴꓺ ꓐꓽ ꓐꓽˍ ꓡꓰꓽ ꓧꓳꓽ ꓗꓷ ꓑꓲꓸ ꓗꓷ ꓢꓲ ꓬꓲꓻ ꓙꓬ ꓧꓳꓽ ꓖꓶ ꓠꓯꓹ ꓥ=

ꓟ-ꓢ-ꓒꓳꓸ ꓢꓶꓽ (ꓢ:-ꓒꓳ; ꓢꓶꓽ) ꓜꓲ ꓔꓶ ꓢꓲ ꓶꓻ ꓡꓯꓼ ꓬꓰ ꓢꓴ ꓕꓲ ꓐꓱ ꓠꓬ ꓔꓶˍ ꓕꓯ ꓑꓲꓹ-ꓕꓲꓼ (ꓡꓰꓸ ꓒꓲꓽ) ꓔꓯ ꓬꓲꓸ ꓓꓳ ꓗꓪ ꓗꓶ ꓢꓲ꓾ ꓖꓳ ꓟ ꓕꓯꓽ ꓢꓲ ꓗꓪ ꓟꓲ ꓛꓬ 4" ꓛꓲ ꓧꓳꓽ ꓢꓲ ꓔꓶˍ ꓡꓳ= ꓬꓲ ꓒ ꓜꓲ ꓠꓬ ꓬꓲ ꓟ ꓜꓲ ꓕꓯꓽ ꓢꓲ ꓪꓴꓽ ꓡ ꓢˍ ꓟ ꓪꓴꓸ ꓠꓬꓲ ꓬꓲꓸ ꓚꓰꓺ ꓠꓬ ꓬꓲꓸ ꓓꓳ ꓗꓪ ꓘꓳꓽ ꓔ ꓟ ꓑꓲꓹ-ꓕꓲꓼ(ꓡꓰꓸ ꓒꓲꓽ) ꓔꓯ ꓠꓯꓼ ꓠꓯ ꓕꓲꓺ ꓡꓰ ꓠꓬꓲ ꓬꓲ ꓜꓲ ꓡꓲꓸ ꓤ ꓚꓵꓹ ꓔꓶˍ ꓕꓯ ꓬꓲ ꓒ ꓜꓲ ꓠꓬ ꓪꓰꓼ ꓡꓰˍ ꓡꓳ= ꓬꓲ ꓒ ꓜꓲ ꓐꓰ ꓬꓲ ꓟ ꓜꓲ ꓔꓯ ꓡꓳꓸˍ ꓟ ꓗꓪ ꓕꓱ ꓕꓲ ꓚꓱꓹ ꓔꓯ ꓟꓬꓽ ꓠꓬꓲ ꓣꓱꓽˍ ꓟ ꓥ ꓡꓳ=

ꓬꓲꓸ ꓫꓵꓸ ꓫꓵꓸ ꓗꓷ ꓟ ꓦ ꓐ ꓕꓲ ꓟ ꓐꓶꓽ ꓗꓪ ꓐꓰ ꓠꓬꓲꓽ ꓟ ꓐꓶꓽ ꓛꓲ ꓙꓳ ꓡˍ ꓠꓬ ꓬꓲ ꓟꓲꓺ ꓗꓪ ꓚꓵꓹ ꓔꓶ ꓐ ꓡˍ ꓡꓳ=

ꓬꓲ ꓟꓲ ꓫꓬꓹ ꓖꓶˍ ꓟ

ꓬꓲ ꓜꓲ ꓔꓶ ꓓꓴ ꓪꓹ ꓘꓴ ꓚꓴꓸ ꓖꓴ ꓠꓬ ꓬꓲꓻ ꓙꓬ ꓟꓽ ꓐꓱ ꓖꓴ ꓥ ꓠꓯꓹ ꓡꓳ= ꓪꓹ ꓘꓴ ꓕꓲ ꓘꓴ ꓐꓰ ꓕꓲ ꓘꓴ ꓔꓯ ꓬꓲ ꓜꓲ ꓬꓲꓸ ꓓꓽ ꓟ ꓝꓳꓽ꓾ ꓬꓲ ꓤ ꓤ ꓝꓳꓽ ꓔꓯ ꓡꓳꓸ ꓢꓲ 8' ꓗꓪ ꓐꓰ 12' ꓗꓪ ꓛꓲꓺ ꓓꓵꓽ ꓠꓯꓹ ꓡꓳ= ꓟꓶꓽ ꓦ ꓟꓬꓽˍ ꓟ ꓟꓵꓽ ꓗꓪ ꓠꓬ ꓬꓲꓸ ꓘꓴ ꓔꓯ 1' ꓖ ꓡꓯꓼ ꓖ ꓙꓲ ꓓꓵꓽ ꓠꓯꓹ ꓡꓳ= ꓬꓲ ꓘꓴ ꓕꓲ ꓘꓴ ꓗꓪ ꓩꓲꓸ-ꓛꓲꓻ ꓟꓵꓽ ꓛꓵꓽ ꓮ ꓟꓬꓹ ꓧꓳꓽ ꓖꓶ ꓠꓯꓹ ꓥ=

ꓚꓽ ꓔꓶ ꓚꓵꓹ ꓔꓶ ꓚꓱꓹ

ꓔꓶ ꓓꓴ ꓐꓱ ꓶ ꓓꓵꓽ ꓦ ꓔ ꓟ ꓬꓲ ꓘꓴ ꓗꓪ ꓕꓲ ꓜꓲ ꓔꓶ ꓢꓲ꓾ ꓬꓲ ꓒ ꓬꓲ ꓟ ꓜꓲ ꓐꓰ ꓟꓽ ꓚꓬꓹ ꓪ ꓟ꓾ ꓬꓲ ꓒ ꓜꓲ ꓬꓲ ꓟ ꓜꓲ ꓐꓯ ꓢꓲ ꓢꓷꓸ ꓟꓽ ꓓ ꓟ ꓬꓲ ꓜꓲ ꓥ ꓕꓯ ꓠꓽ ꓕꓲ ꓘꓴ ꓗꓪ ꓠꓬꓲꓽ ꓜꓲ ꓔꓶ ꓗꓷ ꓠꓯꓹ ꓡꓳ= ꓬꓲ ꓜꓲ ꓔꓶˍ ꓕꓯ ꓮ ꓘꓶꓸ ꓔꓵꓸ ꓡꓰ ꓠ ꓔꓶ ꓟꓽ ꓓ= ꓝꓮꓲ ꓬꓲꓻ ꓙꓬ ꓮꓽ ꓟꓬꓹ ꓧꓳꓽ ꓖꓶ ꓠꓯꓹ ꓡꓳ= ꓬꓲ ꓜꓲ ꓡꓲꓸ ꓤ ꓔꓶˍ ꓟ ꓟꓽ ꓥ ꓥ꓾ ꓬꓲꓸ ꓫꓵꓸ ꓔꓯ ꓔꓶˍ ꓠꓬ ꓕꓲ ꓘꓴ ꓕꓲ ꓘꓴ ꓗꓪ ꓬꓲ ꓫꓵꓸ ꓮ ꓟꓬꓹ ꓧꓳꓽ ꓢꓲ ꓔꓶ ꓠꓯꓹ ꓡꓳ=

ꓬꓲ ꓜꓲ ꓫꓬꓹ ꓡꓲꓸ ꓖꓶˍ ꓟ

ꓬꓲ ꓜꓲ ꓡꓲꓸ ꓤ ꓚꓵꓹ ꓔꓶ ꓗꓷ ꓗꓸ ꓠꓯꓸ ꓕꓲꓽ ꓠꓽ ꓘꓴꓽ ꓗꓪ ꓬꓲ ꓜꓲ ꓫꓵꓻˍ ꓟ ꓙꓳˍ ꓠꓬ ꓞ ꓞ ꓚꓵꓹ ꓦ ꓗꓷ ꓢꓲ ꓬꓲ ꓫꓵꓼ ꓚꓵꓹ ꓔꓶ ꓖꓶ= ꓔꓶ ꓗꓷ ꓢꓲ ꓠꓬꓲꓽ ꓠꓽ ꓘꓴꓽ ꓗꓪ ꓬꓲꓻ ꓙꓬ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓽ ꓠꓽ ꓠꓽ ꓧꓳꓽ ꓖꓶꓽ ꓠꓯꓹ ꓥ= ꓬꓲ ꓜꓲ ꓔꓲꓺ ꓗꓪ ꓬꓲꓻ ꓙꓬ ꓮ ꓟꓬꓹ ꓟꓽ ꓐꓱ ꓠꓹ ꓟ ꓤ ꓟꓳ ꓠ ꓔ ꓡꓳ=

ꓩꓲꓸ-ꓛꓲꓻ ꓟꓵꓽ ꓛꓵꓽ

ꓬꓲ ꓜꓲ ꓚꓵꓹ ꓔꓶ ꓗꓷ ꓢꓲ ꓬꓲꓸ ꓚꓰꓺ ꓕꓶ ꓡꓰˍ ꓕꓯ ꓡꓰ ꓪꓴꓸ ꓔꓴ ꓢꓲ ꓦ ꓐ (6) ꓟ ꓕꓲ ꓧꓪꓹ ꓩꓲꓸ-ꓛꓲꓻ ꓟꓵꓽ ꓛꓵꓽ ꓧꓳꓽ ꓖꓶ ꓠꓯꓹ ꓡꓳ= ꓩꓲꓸ-ꓛꓲꓻ ꓟꓵꓽ ꓛꓵꓽ ꓧꓳꓽ ꓗꓷ ꓠꓬ ꓬꓲꓻ ꓙꓬ ꓮ ꓟꓬꓹ ꓧꓳꓽ ꓖꓶ ꓠꓯꓹ ꓥ=

ꓬꓲ ꓢꓶꓽ ꓫˍ ꓟ

ꓬꓲ ꓜꓲ ꓡꓲꓸ ꓤ ꓔꓯ ꓬꓲ ꓟꓲꓺ ꓗꓪ ꓚꓵꓹ ꓔꓶ ꓗꓷ ꓗꓸ ꓠꓯꓸ ꓦ ꓐ ꓡꓲꓸ ꓟ ꓐꓰ ꓥꓪꓽ ꓟ ꓛꓲ ꓙꓳ ꓡ ꓠꓬ ꓬꓲ ꓪꓰ ꓪꓰ ꓡ ꓢꓲ꓾ ꓦ ꓐ ꓛꓳꓼ ꓟ ꓛꓲꓺ ꓙꓳ ꓡˍ ꓕꓯ ꓬꓲꓸ ꓢꓶꓽ ꓓꓱꓼ ꓪꓴꓸ ꓔꓴˍ ꓡꓳ= ꓬꓲ ꓜꓲ ꓠꓬ ꓢ ꓘꓳꓼ ꓗꓪ ꓛꓲꓺ ꓬꓲꓸ ꓢꓶꓽ ꓮ ꓟꓬꓹ ꓓꓱꓼˍ ꓟ ꓥꓳ=