ꓘꓴ ꓜꓲꓼ ꓞꓳ ꓠꓬ ꓜꓲ ꓜꓲ ꓟꓴ ꓟꓴ ꓬꓰ_ ꓟ ꓗꓪ ꓐꓰ ꓢ-ꓢꓶ-ꓠ ꓟꓽ ꓪꓴ ꓟꓴ ꓡ꓾

ꓘꓴ ꓜꓲꓼ ꓞꓳ ꓠꓬ ꓜꓲ ꓜꓲ ꓟꓴ ꓟꓴ ꓬꓰ_ ꓟ ꓗꓪ ꓐꓰ ꓢ-ꓢꓶ-ꓠ ꓟꓽ ꓪꓴ ꓟꓴ ꓡ꓾

ꓔꓲꓺ ꓒ ꓪ ꓔꓲ ꓡꓰ “ꓘꓴ ꓜꓲꓼ ꓞꓳ ꓗꓪ ꓜꓲ ꓜꓲ ꓴ ꓟꓴ ꓬꓰ_ ꓟ ꓗꓪ ꓐꓰ ꓢ-ꓢꓶ-ꓠ ꓟꓽ ꓪꓴ ꓟꓴ ꓡ’’ ꓐꓰ ꓐꓯ_ ꓡꓳ= ꓕꓱ ꓟ ꓘꓶꓽ ꓔꓯ ꓔꓲꓺ ꓒ ꓪ ꓔꓲ Benedict (16) ꓐꓯ ꓘꓶꓽ ꓗꓪ ꓐꓰ ꓐꓯ ꓔ ꓟ ꓥꓳ=

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓠꓬ 2023 ꓘꓳꓼ ꓕꓲ ꓘꓳꓼ ꓡꓱꓼ ꓠꓽ ꓢ ꓠꓬꓲ ꓗꓪ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓮ ꓕꓯ ꓥ ꓟꓲ ꓟꓸ ꓖꓶ_ ꓟ ꓥꓳ= ꓡꓳꓹ ꓬꓰ_ ꓟ ꓕꓲ ꓘꓳꓼ ꓗꓪ ꓥ ꓟꓲ “discernment’’ ꓓꓵꓽ ꓙꓽ ꓚꓬꓹ ꓠꓬꓲ ꓟ ꓙ ꓜꓲꓼ ꓠꓲꓹ ꓔꓯ ꓟꓸ ꓖꓶ_ ꓟ ꓥꓳ= ꓕꓱ ꓕꓲ ꓘꓳꓼ ꓟ ꓠꓬ “evangelization’’ ꓶꓽ ꓓꓳ ꓫꓱꓸ ꓓꓳ ꓟꓬ ꓡ ꓠꓹ ꓟ ꓐꓯ ꓑꓶ ꓠꓹ ꓟ ꓚꓱꓹ ꓔꓯ ꓐꓯ ꓔ ꓡꓳ=

ꓶꓽ ꓓꓳ ꓫꓱꓸ ꓓꓳ ꓟꓬ ꓡ ꓠꓹ ꓟ ꓐꓯ ꓑꓶ_ ꓟ ꓠꓬ ꓚꓲ ꓛꓬ ꓘꓴ ꓜꓲꓼ ꓞꓳ ꓐꓱ ꓶ ꓮ ꓘꓶꓸ ꓣꓳꓸ ꓚꓵ_ ꓟ ꓟꓬꓱꓽ ꓥ ꓡꓳ= ꓕꓱ ꓡꓱ ꓟꓽ ꓬꓰ ꓠꓬ ꓢ-ꓢꓶ-ꓠ ꓠꓬ ꓪꓴ ꓟꓴ ꓡ ꓚꓱꓹ ꓟꓽ ꓙꓳ꓾ ꓶꓽ ꓓꓳ ꓫꓱꓸ ꓓꓳ ꓐꓯ ꓒꓬꓱ ꓓꓴ ꓟꓽ ꓙꓳ ꓢꓲ꓾ ꓐꓲ ꓜꓲꓼ ꓓꓴ ꓥꓳ ꓡꓳꓸ ꓔ ꓟ ꓠꓬ ꓮ ꓘꓶꓸ ꓥꓳꓽ ꓡꓰ_ ꓟ ꓥꓳ ꓡꓳꓸ ꓓꓴ ꓥ ꓡꓳ ꓐꓰ ꓐꓯ ꓟꓸ ꓖꓶ_ ꓡꓳ= ꓢ-ꓢꓶ-ꓠ ꓪꓴꓽ ꓟꓴ ꓡ ꓠꓹ ꓟ ꓬꓰ ꓙ_ ꓟ ꓠꓬ ꓠꓵ ꓠꓲꓹ ꓗꓪ ꓐꓰ ꓡꓰ ꓥ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓐꓯ ꓔ ꓡꓳ=

ꓔꓲꓺ ꓒ ꓪ ꓔꓲ Benedict (16) ꓡꓰ ꓣꓳ ꓔꓯ ꓟꓸ ꓖꓶ ꓟ ꓡꓰ ꓐꓰ ꓢ-ꓢꓶ-ꓠ ꓔꓯ ꓘꓴ ꓜꓲꓼ ꓞꓳ ꓗꓪ ꓜꓲ ꓜꓲ ꓟꓴ ꓟꓴ ꓓꓵꓽ ꓝꓲ ꓡꓰ ꓟꓽ ꓓ꓾ ꓖꓳ ꓡꓱ ꓥ ꓟꓲ ꓠꓲꓹ ꓟ ꓐ ꓡ ꓠꓹ ꓟ ꓬꓰ ꓠ ꓔ ꓟ ꓥꓳ= ꓕꓱ ꓟ ꓔꓯ ꓕꓽ ꓟꓲ ꓡꓰ ꓝꓲ= ꓕꓱ ꓟ ꓔꓯ ꓔꓲꓺ ꓒ ꓪ ꓔꓲ Benedict (16) ꓡꓰ (2007) ꓘꓳꓼ ꓡ-ꓔꓲꓸ ꓮ-ꓟꓰ-ꓣꓲ-ꓚꓮ ꓐꓰ ꓗ-ꓣꓯ-ꓐꓲ-ꓬ ꓘ-ꓕꓳ-ꓡꓲꓗ ꓔꓲꓺ ꓒ ꓓꓽ ꓐꓴ 5 ꓧꓪꓹ ꓕꓲ ꓧꓪꓹ ꓟ ꓖꓪ ꓙꓱ ꓜꓲꓼ ꓓꓴ ꓗꓪ ꓐꓯ ꓔ ꓟ ꓥ ꓡꓳ= ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓬꓲꓸ ꓚꓲ ꓛꓬ ꓥ ꓟꓲ ꓙꓲ-ꓢꓴ ꓢꓲ ꓤ ꓤꓶꓻ ꓗꓪ ꓝꓮꓲ ꓓꓵꓽ ꓙ ꓠꓹ ꓟ ꓐꓱ ꓶ ꓢꓲ ꓔ ꓟ ꓥ ꓡꓳ=

ꓘꓴ ꓜꓲꓼ ꓞꓳ ꓗꓪ ꓜꓲ ꓜꓲ ꓟꓴ ꓟꓴ ꓓꓵꓽ ꓡꓰ ꓠꓹ ꓟ ꓬꓰ_ ꓟ ꓠꓬ ꓔꓱ_ ꓟ ꓙꓲ-ꓢꓴ ꓢꓲ ꓤ ꓟꓽ ꓥ꓾ ꓪꓴ-ꓢ ꓔꓯ ꓟꓽ ꓙꓵ ꓢꓴ ꓟꓽ ꓘꓳꓹ ꓣꓴ ꓢꓴ ꓡꓰ ꓥ ꓡꓳ ꓐꓰ ꓐꓯ ꓔ ꓡꓳ= ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓕꓲ ꓑꓹ ꓢꓲ ꓡꓲꓹ ꓐꓰ ꓔꓬ ꓝꓲ ꓢꓲ Ukraine ꓐꓱ ꓶ ꓟꓹ ꓟ ꓟ-ꓡꓲ ꓔꓯ ꓪꓽ ꓘꓴ ꓖꓶ ꓠꓹ ꓟ ꓐꓯ ꓖꓶ_ ꓡꓳ=