ꓡ ꓞꓳ ꓐꓴ ꓔꓯ ꓫꓱꓸ ꓤ ꓠꓵ ꓠꓲꓹ ꓟꓬ ꓡ ꓠꓹ ꓟ

ꓡ ꓞꓳ ꓐꓴ ꓔꓯ ꓫꓱꓸ ꓤ ꓠꓵ ꓠꓲꓹ ꓟꓬ ꓡ ꓠꓹ ꓟ

8 ꓦ 19 ꓠꓬꓲ ꓠꓽ ꓡꓲꓸ ꓠꓬꓲ ꓕꓯ ꓔꓲꓺ ꓒ ꓪ ꓔꓲ ꓡꓰ ꓟꓲ ꓠꓯ ꓡ ꓞꓳ ꓐꓴ ꓔꓯ ꓫꓱꓸ ꓤ ꓠꓵ ꓠꓲꓹ ꓚꓱꓹ ꓟꓸ ꓖꓶ ꓓꓴ ꓬꓰ ꓡꓯ꓾ ꓕꓱ ꓟ ꓠꓬ ꓡ ꓞꓳ ꓐꓴ ꓕꓲ ꓣꓳ ꓐꓰ ꓕꓲ ꓣꓳ ꓪ ꓡꓯ ꓘꓳ ꓫꓱꓹ ꓡꓯ ꓘꓳ ꓢꓲ꓾ ꓫꓱꓸ ꓤ ꓠꓵ ꓠꓲꓹ ꓚꓱꓹ ꓔꓯ ꓟꓬ ꓡ ꓠꓹ ꓟ ꓥꓳ ꓐꓰ 43 ꓧꓪꓹ ꓟ ꓡ ꓞꓳ ꓐꓴ ꓠꓵ ꓠꓲꓹ ꓖꓪ ꓙꓱ ꓜꓲꓼ ꓓꓴ (43^rd Meeting of Friendship Among People) ꓗꓪ ꓜꓲꓼ ꓡ ꓢꓴ ꓐꓴ ꓔꓯ ꓢꓯꓼ ꓖꓶ ꓡꓳ=

ꓕꓱ ꓖꓪ ꓙꓱ ꓜꓲꓼ ꓓꓴ ꓔꓯ ꓠꓬ Rimini ꓗꓪ ꓬꓰ ꓢꓲ 8 ꓦ 20-25 ꓠꓬꓲ ꓗꓪ ꓛꓲ ꓬꓰ_ ꓟ ꓥ ꓡꓳ= ꓕꓱ ꓡꓱ ꓜꓲꓼ ꓢꓲ ꓖꓪ ꓙꓱ ꓜꓲꓼ ꓓꓴ ꓬꓰ_ ꓟ ꓠꓬ 1980 ꓘꓳꓼ ꓗꓪ ꓐꓰ ꓲ-ꓔ-ꓡꓲ ꓗꓴꓷꓼ ꓖꓴ ꓟꓶꓸ ꓕꓲ ꓛꓱ Rimini ꓡꓳ ꓒꓱ ꓗꓪ ꓕꓲ ꓘꓳꓼ ꓡꓲ ꓕꓲ ꓘꓳꓼ 8 ꓦ ꓕꓯ ꓬꓰ_ ꓡꓳ ꓐꓰ ꓢꓷꓸ ꓪ ꓡꓳ=

2022 ꓘꓳꓼ ꓐꓱ ꓶ ꓧꓳꓽ ꓪꓴꓸ ꓟꓴ ꓚꓱꓹ ꓠꓬ “A passion for the person” ꓡ ꓞꓳ ꓐꓴ ꓐꓱ ꓶ ꓫꓱꓸ ꓤ ꓠꓵ ꓠꓲꓹ ꓐꓰ ꓥ ꓡꓳ= ꓟꓲ ꓠꓯ ꓡ ꓞꓳ ꓐꓴ ꓔꓯ ꓡꓳꓸ ꓠꓬꓲ ꓠꓬ ꓬꓰ-ꓢꓴ ꓡꓰ ꓕꓱ ꓡ ꓞꓳ ꓐꓴ ꓔꓯ ꓚꓬꓴ ꓙ ꓠꓹ ꓟ ꓠꓬ ꓓꓵꓽ ꓙ ꓠꓬꓲ ꓕꓯ ꓟꓽ ꓒꓬꓱꓼ ꓐ ꓡ꓾ ꓬꓲ ꓡꓯ ꓒꓯꓹ ꓟꓳꓸ ꓖꓶ ꓢꓲ ꓛꓲ ꓔꓴ ꓠꓹ ꓟ ꓫꓸ ꓐꓭ ꓥꓳ ꓐꓰ ꓕꓱ ꓡꓱ ꓬꓲꓸ ꓚꓱꓹ ꓮ ꓟꓬꓹ ꓫꓵ ꓔꓯ ꓓꓵꓽ ꓙ ꓗꓴꓸ ꓠꓹ ꓟ ꓔꓲꓺ ꓒ ꓪ ꓔꓲ ꓡꓰ ꓐꓯ_ ꓡꓳ=

ꓠꓻ ꓫꓵ ꓔꓳꓹ ꓜꓳ ꓢꓴ꓾ ꓟꓯꓼ ꓢꓰꓼ ꓡꓯ ꓘꓳ ꓟ ꓑꓶ ꓓꓴ ꓠꓲꓹ ꓫꓸ ꓟꓬ ꓫꓸ ꓔꓳꓹ ꓜꓳ ꓔꓬ ꓟ ꓙꓵꓹ ꓗꓪ ꓕꓲ ꓦꓲ ꓡ ꓞꓳ ꓤ ꓠꓱ ꓤ ꓣꓳ ꓐꓹ ꓐ ꓟꓹ ꓟ ꓬꓲꓼ ꓠꓬꓲ ꓤ ꓐꓴ ꓔꓯ ꓕꓱ ꓡꓱ ꓮ ꓟꓬꓹ ꓫꓵ ꓐꓬ ꓡꓰ ꓟ ꓠꓬ ꓮ ꓘꓶꓸ ꓠꓲꓹ ꓟ ꓟꓽ ꓢ ꓚꓱꓹ ꓥ ꓡꓳ=

ꓢꓲ ꓫꓬ ꓕꓳ ꓶ ꓶ ꓓꓳ ꓫꓱꓸ ꓓꓳ ꓗꓪ ꓐꓰ ꓙꓲ_ ꓟ ꓢ-ꓟ-ꓡꓲ ꓡ ꓞꓳ ꓔꓯ ꓥꓳꓽ ꓗꓪ ꓡꓰ ꓐꓰ ꓫꓸ ꓢꓴ ꓔꓯ ꓬꓰ ꓙ ꓚꓬꓴ ꓙ ꓟ꓾ ꓡꓳꓸ ꓙ ꓐꓳ ꓙ ꓠꓹ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓐꓯ_ ꓡꓳ= ꓬꓰ-ꓢꓴ ꓐꓯ ꓘꓶꓽ ꓗꓪ ꓐꓰ ꓙꓲ_ ꓟ ꓢ-ꓟ-ꓡꓲ ꓠꓬ ꓫꓱꓸ ꓤ ꓠꓲꓹ ꓐꓰ ꓖꓴꓽ ꓙꓴꓽ ꓮ ꓙꓵꓽ ꓦꓴ ꓗꓷ ꓢꓲ꓾ ꓬꓲ ꓔꓯ ꓔꓲꓸ ꓢꓲ ꓠꓬꓲ꓾ ꓟ ꓫꓵꓻ ꓟ ꓢꓯꓸ ꓡꓳ ꓔ ꓬꓰ ꓢꓴ ꓖꓳ ꓕꓲ ꓣꓳ ꓔꓯ ꓬꓰ ꓙ_ ꓟ ꓚꓱꓹ ꓥ ꓡꓳ=

ꓠꓬꓲꓸ ꓠꓬꓲ ꓟ ꓧꓳꓽ ꓪꓴꓸ ꓟꓴ ꓚꓱꓹ ꓐꓰ ꓕꓲ ꓪꓼ ꓙꓲ_ ꓟ ꓢ-ꓟ-ꓡꓲ ꓡꓰ ꓐꓰ ꓫꓸ ꓓꓴ ꓔꓳꓹ ꓜꓳ ꓢꓴ ꓔꓯ ꓬꓰ ꓙ ꓔꓳꓹ ꓙ ꓠꓹ ꓟ ꓥ ꓡꓳ=

ꓪꓴ-ꓢ ꓡꓰ ꓣꓳ ꓔꓯ ꓢꓯꓼ ꓟꓬ ꓖꓶ ꓔ ꓟ ꓠꓬ ꓬꓲ ꓢꓯꓼ ꓟꓬ ꓔꓯ ꓖꓶ ꓔ ꓟ ꓥ ꓡꓳ= ꓣꓳ ꓥ ꓟꓲ ꓣꓳ ꓬꓲ ꓠꓬꓲ ꓤ ꓐꓴ ꓐꓱ ꓶ ꓣꓳ ꓧꓪꓽ ꓖꓳ ꓓꓱ ꓔꓯ ꓡꓯꓼ ꓙꓱ ꓖꓶ ꓠꓹ ꓟ ꓐ ꓡ ꓟ ꓕꓲ ꓒꓹ ꓗꓪ ꓐꓰ ꓟꓬꓱꓽ ꓬꓰ ꓖ ꓠꓹ ꓟ ꓥ ꓡꓳ= ꓕꓱ ꓟ ꓠꓬ ꓪꓴ-ꓢ ꓔꓯ ꓫꓸ ꓟꓳ ꓟ ꓥ ꓡꓳ= ꓡ ꓞꓳ ꓐꓴ ꓜꓴ ꓗꓪ ꓐꓰ ꓢ-ꓢꓶ-ꓠ ꓟꓬꓱꓽ ꓬꓰ_ ꓟ ꓠꓬ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯꓸ ꓔꓬ ꓟ ꓤꓶꓻ ꓔꓯ ꓫꓸ ꓪ ꓐꓰ ꓥ ꓟꓲ ꓟꓬꓱꓽ ꓗꓪ ꓐꓰ ꓥ ꓟꓲ ꓢꓷꓸ ꓙ ꓟꓳ ꓙ ꓟ ꓥꓳ=

ꓟꓲ ꓠꓯ ꓡ ꓞꓳ ꓮ ꓙꓵ ꓠꓬ ꓟꓵꓽ ꓗꓳꓸ ꓓꓵ ꓓꓵ ꓗꓪ ꓐꓰ ꓬꓲ ꓠꓬꓲ ꓤ ꓠꓲꓹ ꓟ ꓐꓰ ꓗꓹ ꓛꓲ_ ꓟ ꓶ ꓓꓳ ꓫꓱꓸ ꓓꓳ ꓐꓰ ꓙꓲ-ꓢꓴ ꓢꓲ ꓤ ꓤꓶꓻ ꓐꓰ ꓙ ꓫꓱꓽ ꓢꓲ ꓢꓷꓸ ꓙ ꓟꓳ ꓙ ꓠꓹ ꓟ ꓢꓲꓹ ꓪꓰ ꓢꓶꓸ ꓢꓶꓽ ꓓꓱꓼ ꓠꓹ ꓟ ꓥꓳ ꓐꓰ ꓔꓲꓺ ꓒ ꓪ ꓔꓲ ꓡꓰ Italy ꓗꓴꓷꓼ Ramini ꓗꓪ ꓬꓰ_ ꓟ 43 ꓧꓪꓹ ꓟ ꓡ ꓞꓳ ꓐꓴ ꓠꓵ ꓠꓲꓹ ꓖꓪ ꓙꓱ ꓜꓲꓼ ꓓꓴ ꓗꓪ ꓢꓯꓼ ꓖꓶ ꓔ ꓟ ꓥ ꓡꓳ=