ꓙꓲ-ꓢꓴ ꓢꓲ ꓤ ꓐꓴ ꓪꓽ ꓡꓯꓼ ꓘꓳ ꓫꓱꓹ ꓡꓯꓼ ꓘꓳꓽ ꓢꓲ ꓕꓲꓽ ꓠꓲꓹ ꓕꓲꓽ ꓪꓼ ꓙꓸꓹ ꓫꓱꓽ ꓠꓹ ꓟ

ꓙꓲ-ꓢꓴ ꓢꓲ ꓤ ꓐꓴ ꓪꓽ ꓡꓯꓼ ꓘꓳ ꓫꓱꓹ ꓡꓯꓼ ꓘꓳꓽ ꓢꓲ ꓕꓲꓽ ꓠꓲꓹ ꓕꓲꓽ ꓪꓼ ꓙꓸꓹ ꓫꓱꓽ ꓠꓹ ꓟ

ꓔꓲꓸꓸ ꓒ ꓪ ꓔꓲ ꓠꓬ Finland ꓗꓴꓷꓼ ꓗꓪ ꓐꓰ ꓙꓲ ꓢꓴ ꓢꓲ ꓤ ꓐꓴ ꓕꓲꓽ ꓠꓲꓹ ꓕꓲꓽ ꓪꓼ ꓔꓬ ꓠꓹ ꓟ ꓜꓴꓽ ꓐꓴ ꓐꓰ ꓜꓲ ꓡꓯꓼ ꓘꓳ_ ꓡꓳ= ꓢꓷꓸ ꓠꓲꓹ ꓙꓳ ꓒ ꓐꓴ ꓬꓰ-ꓢꓴ ꓙꓲ-ꓢꓴ ꓠꓯꓼ ꓗꓪ ꓡ ꓢꓲ ꓪꓴꓸ ꓓꓵ ꓕꓱꓼ ꓡ_ ꓟ ꓬꓲ ꓪ ꓤꓶꓸꓹ ꓗꓪ ꓐꓰ ꓚ ꓟꓸ ꓖꓶ_ ꓡꓳ= ꓬꓲ ꓪ ꓠꓬ ꓗꓴ ꓤ ꓗꓪ ꓐꓰ ꓬꓰ-ꓢꓴ ꓔꓯ ꓧꓪ ꓟꓶ_ ꓟ ꓥꓳ= ꓪꓴ-ꓢ ꓥ ꓟꓲ ꓣꓳ ꓔꓯ ꓧꓪ_ ꓡꓳ= ꓢꓷꓸ ꓠꓲꓸ ꓙꓳ ꓒ ꓐꓴ ꓡꓰ ꓐꓰ ꓣꓳ ꓥ ꓟꓲ ꓪꓴ-ꓢ ꓔꓯ ꓕꓱ ꓡꓱ ꓧꓪ ꓠ ꓔ ꓡꓳ= ꓝꓮꓲ ꓕꓲꓽ ꓠꓲꓹ ꓕꓲꓽ ꓪꓼ ꓙꓸꓹ ꓫꓱꓽ ꓠ ꓔ ꓡꓳ=

ꓕꓲ ꓠꓲꓹ ꓕꓲ ꓪꓼ ꓙꓸꓹ ꓫꓱꓽ ꓠꓹ ꓟ

ꓪꓴ-ꓢ ꓶꓽ ꓤ ꓫꓱꓸ ꓤ ꓟꓶ ꓢꓴ ꓠꓬ ꓕꓱ ꓟ ꓗꓪ ꓐꓰ ꓙꓸꓹ ꓫꓱꓽ ꓠ ꓔ ꓟ ꓥꓳ= ꓚꓲ ꓛꓬ ꓐꓱ ꓶ ꓟꓽ ꓢꓯꓸ ꓔꓬ-ꓸ ꓕꓲꓽ ꓠꓲꓹ ꓕꓲꓽ ꓪꓼ ꓙꓸꓹ ꓫꓱꓽ_ ꓟ ꓥꓳ= ꓢꓷꓸ ꓠꓲꓹ ꓙꓳ ꓒ ꓐꓴ ꓠꓬ ꓟꓽ ꓪ_ ꓟ ꓡꓲꓽ ꓒꓲꓼ ꓐꓰ ꓞꓳꓽ ꓫꓵꓽ ꓔꓯ ꓔꓯ_ ꓟ ꓡꓰ ꓐꓰ ꓮ ꓟꓶ ꓤꓶꓸꓹ ꓙꓲ-ꓢꓴ ꓢꓲ ꓤ ꓐꓴ ꓥ ꓟꓲ ꓣꓳ ꓬꓲꓼ ꓠꓬꓲ ꓐꓴ ꓐꓰ ꓕꓲ ꓪꓼ ꓙꓸꓹ ꓫꓱꓽ ꓠ ꓔ ꓡꓳ=

ꓕꓱ ꓡꓱ ꓙꓸꓹ ꓫꓱꓽ ꓔꓯ ꓟꓬ ꓠꓬꓲ ꓜꓲꓽ ꓘꓴ_ ꓟ ꓠꓲꓹ ꓟ ꓙꓳ ꓡ_ ꓥꓳ= ꓔꓯ ꓥꓳꓽ ꓫꓱꓸ ꓤ ꓟ ꓟꓬꓱꓽ ꓬꓰ ꓠꓬ ꓣꓳ ꓔꓯ ꓫꓸ ꓔꓬ ꓢꓴ ꓣꓱꓽ ꓬꓯꓼ ꓢꓴ ꓐꓴ ꓐꓰ ꓡꓰ ꓟꓽ ꓞꓲ ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓥ ꓟꓲ ꓟꓬ ꓠꓬꓲ ꓠꓶꓽ ꓞꓹ ꓡ_  ꓥꓳ= ꓕꓲꓽ ꓧꓪꓹ ꓧꓪꓹ ꓠꓬ ꓠꓲꓹ ꓟ ꓐꓬ ꓡꓰ ꓓꓴ ꓢꓯꓼ ꓐ ꓓꓴ ꓥ ꓟꓲ ꓔꓳꓹ ꓜꓳ ꓡ_ ꓥꓳ= ꓖꓳ ꓡꓱ ꓥ ꓟꓲ ꓪꓴ-ꓢ ꓢꓯꓼ ꓪ ꓗꓪ ꓐꓰ ꓙꓸꓹ ꓫꓱꓽ ꓠ ꓔ ꓡꓳ= ꓙꓸꓹ ꓫꓱꓽ_ ꓟ ꓚꓱꓹ ꓗꓪ ꓥ ꓟꓲ ꓜꓲꓽ ꓘꓴ_ ꓟ ꓠꓲꓹ ꓟ ꓙꓳ ꓠ ꓔ ꓡꓳ= ꓖꓳ ꓕꓱ ꓢꓲ ꓕꓲ ꓣꓳ ꓡꓲ ꓕꓲ ꓣꓳ ꓢꓯꓼ ꓖꓶ ꓘꓴꓸ ꓢꓴ ꓬꓰ ꓙ ꓘꓴꓸ ꓢꓴ ꓗꓷ ꓡ ꓥꓳ=

ꓣꓳꓸ ꓚꓵ_ ꓟ ꓠꓬꓲ ꓙꓵꓹ

ꓙꓲ-ꓢꓴ ꓢꓲ ꓤ ꓐꓴ ꓕꓲꓽ ꓠꓲꓹ ꓕꓲꓽ ꓪꓼ ꓙꓸꓹ ꓫꓱꓽ_ ꓟ ꓗꓪ ꓣꓳꓸ ꓚꓵ_ ꓟ ꓠꓬꓲ ꓙꓵꓹ ꓥ ꓟ (2025) ꓘꓳꓼ ꓕꓯ (1700) ꓧꓪꓹ ꓛꓲ ꓡ_ ꓟ Nicea ꓖꓪ ꓛꓱ ꓜꓲꓼ ꓓꓴ ꓐꓰ Lutheran Augsburg (500) ꓐꓲ_ ꓟ ꓘꓳꓼ ꓥ ꓡꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ= Nicea ꓖꓪ ꓛꓱ ꓜꓲꓼ ꓓꓴ ꓗꓪ ꓢꓽ ꓣꓳ ꓕꓲ ꓖꓳ ꓓꓱꓽ ꓐꓰ ꓬꓰ-ꓢꓴ ꓙꓲ ꓢꓴ ꓪꓴ-ꓢ ꓥ ꓟ ꓔꓯ ꓐꓯ ꓖꓶꓽ ꓢꓲ-ꓸ ꓖꓳ ꓓꓱ ꓔꓲꓹ ꓟꓶ ꓢꓴ ꓔꓯ ꓕꓲꓽ ꓠꓲꓹ ꓕꓲꓽ ꓪꓼ ꓗꓷ ꓡꓰ ꓝꓲ_ ꓡꓳ= ꓬꓰ-ꓢꓴ ꓙꓲ ꓢꓴ ꓠꓯꓼ ꓗꓪ ꓛꓳ ꓠꓹ ꓟ ꓥ ꓟꓲ ꓣꓳ ꓓꓵꓽ ꓙ ꓟꓶ ꓠꓹ ꓟ ꓐꓱ ꓶ ꓢꓯꓼ ꓖꓶ_ ꓡꓳ=

ꓞꓳ ꓫꓵꓽ ꓐꓴ ꓐꓱ ꓶ

ꓔꓲꓸꓸ ꓒ ꓪ ꓔꓲ ꓡꓰ Amazonia ꓖꓪ ꓛꓱ ꓜꓲꓼ ꓓꓴ ꓗꓪ ꓖꓪ ꓛꓱ ꓞꓰꓹ ꓗꓷ ꓟ ꓔꓯ ꓬꓰ ꓖꓶꓽ ꓢꓲ Finland ꓞꓳ ꓫꓵꓽ ꓐꓴ ꓔꓯ ꓥ ꓟꓲ ꓧꓳꓽ ꓖꓶ ꓡ ꓟ ꓔꓲꓸꓸ ꓒ ꓓꓽ Jukka Keskitalo ꓔꓯ ꓫꓸ ꓟꓳ ꓐꓯ_ ꓡꓳ=

ꓣꓳ ꓮ ꓕꓯ ꓢꓲ ꓕꓲꓽ ꓠꓲꓹ ꓕꓲꓽ ꓪꓼ ꓔꓬ ꓟꓶ ꓠꓯꓹ ꓡ?

ꓶꓼ ꓓꓳ ꓫꓱꓸ ꓓꓳ ꓬꓲꓸ ꓟꓶꓽ ꓗꓪ ꓠꓬ ꓔꓲꓸꓸ ꓒ ꓪ ꓔꓲ ꓡꓰ ꓠ ꓠꓬꓲ ꓘꓶꓽ ꓕꓲꓽ ꓘꓶꓽ ꓠ ꓠꓬꓲ_ ꓡꓳ= ꓮ ꓕꓯ ꓢꓲ ꓕꓲꓽ ꓠꓲꓹ ꓕꓲꓽ ꓪꓼ ꓔꓬ ꓟꓶ ꓠꓯꓹ ꓡ? ꓖꓳ ꓟ ꓡꓰ ꓐꓰ Orthodox ꓢꓷꓸ ꓠꓲꓹ ꓙꓳ ꓒ ꓕꓲ ꓣꓳ ꓐꓯ ꓘꓶꓽ ꓗꓪ ꓐꓰ ꓕꓲꓽ ꓠꓲꓹ ꓕꓲ ꓪ ꓐꓯ_ ꓟ ꓠꓬ ꓡ ꓠꓹ ꓟ ꓦꓬꓼ ꓠꓬꓲ ꓗꓪ ꓗꓷ ꓡ ꓥꓳ ꓐꓰ ꓐꓯ_ ꓟ-ꓸ ꓖꓴ ꓡꓰ_ ꓟ ꓦꓬꓼ ꓠꓬꓲ ꓗꓪ ꓪ ꓡ_ ꓟ-ꓸ ꓖꓳ ꓡꓱ ꓥ ꓟꓲ ꓕꓲꓽ ꓠꓲꓹ ꓕꓲꓽ ꓪꓼ ꓐꓯ_ ꓟ ꓕꓱ ꓟ ꓠꓬ ꓣꓳꓸ ꓚꓵ_ ꓟ ꓥꓳ= ꓪꓴ-ꓢ ꓤ ꓠꓱ ꓥ ꓟ ꓣꓳ ꓮ ꓙꓵꓽ ꓢꓴ ꓠꓬ ꓕꓲꓽ ꓠꓲꓹ ꓕꓲꓽ ꓪꓼ ꓙꓸꓹ ꓫꓱꓽ ꓠꓹ ꓟ-ꓸ ꓔꓱ_ ꓟ ꓚꓱꓹ ꓗꓪ ꓐꓰ ꓙꓸꓹ ꓫꓱꓽ ꓠꓹ ꓟ ꓐꓰ ꓣꓳ ꓠꓶꓽ ꓞꓹ ꓢꓴ ꓐꓴ ꓐꓰ ꓕꓲꓽ ꓠꓲꓹ ꓕꓲꓽ ꓪꓼ ꓪꓽ ꓘꓴ ꓓꓴ ꓬꓰ ꓡꓯ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓶꓽ ꓓꓳ ꓫꓱꓸ ꓓꓳ ꓔꓯ ꓠꓽ ꓗꓷ_ ꓡꓳ=