ꓚꓲꓸ ꓛꓬ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓐꓰ ꓮ ꓙꓵ ꓔꓯ ꓒꓰꓹ ꓗꓷ ꓐ ꓡꓰ ꓡ꓾ ꓟꓲ ꓠꓯ ꓒꓴ ꓫꓵꓻ ꓗꓪ ꓐꓰ ꓡꓰ ꓠꓲꓹ ꓥꓳ ꓔꓬ ꓡ꓾

ꓚꓲꓸ ꓛꓬ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓐꓰ ꓮ ꓙꓵ ꓔꓯ ꓒꓰꓹ ꓗꓷ ꓐ ꓡꓰ ꓡ꓾ ꓟꓲ ꓠꓯ ꓒꓴ ꓫꓵꓻ ꓗꓪ ꓐꓰ ꓡꓰ ꓠꓲꓹ ꓥꓳ ꓔꓬ ꓡ꓾

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓙꓲꓺ ꓢꓴ ꓢꓲ ꓤ ꓐꓴ ꓔꓯ ꓢꓲꓺ ꓒ ꓬꓰ-ꓢꓴ ꓠꓬ ꓒꓴ ꓫꓵꓻ ꓐꓰ ꓡꓳꓸ ꓐꓲ_ ꓟ ꓔꓯ ꓮ ꓡꓰ ꓐꓰ ꓗꓳꓸ ꓙꓰ ꓐ ꓡ ꓟ ꓚꓱꓹ ꓔꓯ ꓢꓳꓺ ꓣꓴ ꓠꓹ ꓟ ꓢꓯꓼ ꓖꓶ ꓔ ꓟ ꓥꓳ= ꓢꓲꓺ ꓒ ꓬꓰ-ꓢꓴ ꓡꓰ ꓐꓰ ꓮ ꓙꓵ ꓔꓯ ꓒꓰꓹ ꓗꓷ ꓐ ꓡꓰ ꓡ?꓾ ꓟꓲ ꓠꓯ ꓒꓴ ꓫꓵꓻ ꓗꓪ ꓐꓰ ꓡꓰ ꓠꓲꓹ ꓥꓳ ꓔꓬ ꓡ꓾? ꓔꓲꓺ ꓒ ꓪ ꓔꓲ ꓡꓰ ꓡꓳꓹ ꓬꓰ ꓟ ꓕꓲ ꓫꓵ ꓠ ꓕꓯ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓠ ꓠꓬꓲ ꓡꓳꓹ ꓬꓰ ꓟ ꓥꓳ= ꓪꓴ-ꓢ ꓠꓯꓼ ꓗꓪ ꓛꓳ ꓢꓲ꓾ ꓣꓳ ꓔꓯ ꓠꓱꓸ ꓐꓯꓼ ꓡꓰ ꓙꓵꓽ ꓔꓬ ꓟ ꓗꓪ ꓐꓰ ꓡꓲꓹ ꓙꓰ ꓠꓹ ꓟ ꓬꓰ ꓠꓹ ꓟ ꓐꓯ ꓖꓶ ꓔ ꓡꓳ=

ꓖꓳ ꓕꓲ ꓠꓬꓲ ꓶꓼ ꓓꓳꓽ ꓫꓱꓸ ꓓꓳ ꓟ-ꓘꓳ ꓕꓳ ꓶ ꓗꓪ ꓐꓰ ꓔꓱꓹ ꓕ ꓢꓲ꓾ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓚꓺ ꓟꓸ ꓓꓳ ꓗꓸ ꓠꓯꓸ ꓢꓲꓺ ꓒ ꓬꓰ-ꓢꓴ ꓠꓯꓼ ꓗꓪ ꓟꓽ ꓪ_ ꓟ ꓒꓳꓹ ꓖꓶ_ ꓟ ꓮ ꓟꓬꓹ ꓙꓳ_ ꓟ ꓥꓳ꓾ ꓕꓱ ꓟ ꓗꓪ ꓐꓰ ꓬꓲ ꓫꓵ ꓤ ꓧꓪ ꓤ ꓐꓴ ꓠꓬ ꓬꓲ ꓔꓯ ꓟꓯꓹ ꓡꓰ ꓥ ꓢꓰ꓾ ꓝꓮꓲ ꓘꓴ ꓜꓲꓼ ꓞꓳ ꓗꓪ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓥ ꓟꓲ ꓕꓱ ꓟ ꓠꓬ ꓢ-ꓓꓯ ꓡꓰ ꓘꓷ ꓡꓶꓽ ꓢꓲ ꓕꓱ ꓡꓱ ꓬꓰ ꓔꓬ ꓡ ꓐꓰ ꓬꓲ ꓔꓯ ꓝꓴꓲ ꓧꓪꓹ ꓟ ꓥ ꓡꓳ ꓐꓰ ꓐꓯ ꓡꓳꓹ ꓬꓰ ꓟ ꓥꓳ= ꓠꓱꓸ ꓐꓯꓼ ꓚꓱꓹ ꓗꓪ ꓐꓰ ꓡꓳꓸ ꓠꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓢꓲ-ꓫꓬ-ꓟ-ꓦ ꓢꓯꓼ ꓪ ꓗꓪ ꓐꓰ ꓶꓼ ꓓꓳ ꓫꓱꓸ ꓓꓳ ꓚꓺ ꓟ ꓐꓰ ꓠꓻ ꓢꓴ ꓒꓬ ꓢꓴ ꓔꓯ ꓠꓻ ꓫꓬꓹ ꓖꓶ_ ꓟ ꓔꓯ ꓬꓰ ꓖꓶ_ ꓟ ꓥ ꓡꓳ= ꓕꓱ ꓢꓲ-ꓫꓬ-ꓟ-ꓦ ꓡꓰ ꓬꓲ ꓔꓯ ꓪꓴ-ꓢ ꓡꓰ ꓐꓰ ꓙꓻ ꓖꓶ ꓖꓶ_ ꓟ ꓥꓳ꓾ ꓖꓳ ꓟ ꓑꓶ ꓓꓴ ꓬꓲ ꓠꓬ ꓣꓳ ꓔꓯ ꓮ ꓕꓯ ꓟꓲ ꓠꓲꓹ ꓠꓵꓻ ꓐ ꓡ ꓟ ꓐꓰ ꓬꓰ ꓖꓶ ꓐ ꓡ ꓟ ꓥ ꓡꓳ ꓐꓰ ꓐꓯ ꓖꓶ ꓔ ꓡꓳ=

ꓔꓲꓺ ꓒ ꓪ ꓔꓲ ꓠꓬ ꓣꓳ ꓕꓲ ꓑꓹ ꓤ ꓢꓲ ꓡꓲꓹ ꓐꓰ ꓔꓬ ꓢꓲ ꓓꓵꓽ ꓙ ꓔꓱꓹ ꓕ ꓓꓴ ꓬꓰ ꓡꓯ꓾ ꓓꓽ ꓪꓴꓸ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓒꓴ ꓫꓵꓻ ꓮ ꓙꓵ ꓔꓯ ꓒꓰꓹ ꓗꓷ ꓟ ꓑꓶ ꓓꓴ ꓬꓲ ꓠꓬ ꓫꓸ ꓫꓸ ꓟꓶꓽ ꓟꓶꓽ ꓐꓰ ꓔꓬ ꓗꓷ ꓟ ꓥꓳ꓾ ꓬꓲ ꓔꓬ ꓟ ꓠꓮꓜꓮꓣꓰꓔꓧ ꓗꓪ ꓐꓰ ꓓꓳꓺ ꓙꓰ ꓟ ꓥꓳ= ꓝꓮꓲ ꓬꓲ ꓠꓬ ꓠꓻ ꓢꓴ ꓒꓬ ꓢꓴ ꓐꓰ ꓬꓲ ꓠꓯꓼ ꓗꓪ ꓡ ꓢꓲ ꓶꓽ ꓓꓰ ꓢꓴ ꓐꓴ ꓮ ꓙꓵ ꓔꓯ ꓬꓲꓸ ꓒꓵꓽ ꓟꓽ ꓣꓴ ꓣꓴ ꓠꓻ ꓫꓬꓹ ꓖꓶ_ ꓟ ꓐꓰ ꓬꓰ ꓙ_ ꓟ ꓥꓳ=

ꓞꓳ ꓤ ꓠꓲꓹ ꓫꓵ ꓓꓴ ꓟꓽ ꓙꓳ ꓥ ꓟꓲ ꓔꓱꓹ ꓟ ꓔꓯ ꓐꓯ ꓠꓹ ꓟ ꓕꓽ ꓙꓳꓺ꓾

ꓡ ꓞꓳ ꓮ ꓟꓬꓹ ꓢꓲꓺ ꓒ ꓬꓰ-ꓢꓴ ꓠꓯꓼ ꓗꓪ ꓛꓳ ꓠꓹ ꓟ ꓐꓱ ꓶ ꓘꓴ ꓕꓯ ꓬꓲ ꓠꓬ ꓮ ꓡꓰ ꓕꓲ ꓣꓳ ꓔꓯ ꓥ ꓟꓲ ꓬꓲ ꓪ ꓠꓲꓹ ꓡꓶꓽ ꓽ ꓐ ꓜꓲ ꓜꓲ ꓟꓴ ꓟꓴ ꓟꓽ ꓬꓰ ꓟ ꓡꓰ ꓐꓰ ꓬꓲ ꓔꓯ ꓬꓰ ꓙ ꓐ ꓡ ꓢꓴ ꓮ ꓡꓰ ꓕꓲ ꓣꓳ ꓗꓪ ꓐꓰ ꓥ ꓟꓲ ꓬꓰ ꓙ ꓠꓹ ꓟ ꓟꓽ ꓣꓴ꓾ ꓝꓮꓲ ꓬꓲ ꓡꓰ ꓐꓰ ꓝꓲ ꓓꓴ ꓐꓴ ꓔꓯ ꓥ ꓟꓲ ꓮ ꓕꓯ ꓟꓲ ꓣꓳꓺ ꓢꓴ ꓕꓲ ꓛꓱ ꓗꓪ ꓡꓰ ꓔꓬ ꓠꓹ ꓟ ꓟꓸ ꓖꓶ ꓔꓬ ꓟ ꓥ ꓡꓳ= ꓬꓲ ꓟꓶꓽ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓢꓲꓺ ꓒ ꓬꓰ-ꓢꓴ ꓠꓬ ꓟꓬꓱꓺ ꓪꓴꓽ ꓠꓹ ꓟ ꓐꓰ ꓢꓴ ꓡꓰ ꓢꓷꓸ ꓟ ꓢꓴ ꓡꓰ ꓠꓲꓹ ꓵ_ ꓟ ꓔꓯ ꓒꓰꓹ ꓗꓷ ꓐ ꓡ ꓡꓳ꓾ ꓖꓳ ꓟ ꓑꓶ ꓓꓴ ꓬꓲ ꓠꓬ ꓔꓱꓹ ꓟ ꓚꓱꓹ ꓔꓯ ꓡꓰ ꓚꓺ ꓖꓶ ꓠꓹ ꓟ ꓮ ꓕꓯ ꓟꓲ ꓟꓽ ꓫꓸ ꓔꓳ꓾ ꓢꓴ ꓡꓰ ꓟꓽ ꓢꓷꓸ ꓥ ꓟꓲ꓾ ꓢꓴ ꓡꓰ ꓟꓽ ꓠꓲꓹ ꓫꓵ ꓥ ꓟꓲ꓾ ꓬꓲ ꓔꓯ ꓡꓯꓽ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓔꓶꓸ ꓗꓷ ꓥ ꓟꓲ ꓬꓲ ꓠꓬ ꓮ ꓕꓯ ꓡꓰ ꓟꓽ ꓫꓸ ꓔꓳ ꓔꓳ ꓟꓽ ꓙꓳꓺ ꓙꓳꓺ ꓔꓱꓹ ꓟ ꓔꓯ ꓡꓰ ꓟꓸ ꓖꓶ ꓡꓰ ꓟ ꓥꓳ= ꓪꓴ-ꓢ ꓠꓬ ꓬꓲ ꓚꓲ ꓛꓬ ꓔꓯ ꓙꓴꓻ ꓚꓳꓹ ꓟ꓾ ꓪꓴꓽ ꓟ꓾ ꓟꓽ ꓔꓱꓹ ꓟ ꓕꓱ ꓡꓰ ꓬꓰ ꓠꓹ ꓟ ꓙꓵꓽ ꓪ ꓟꓽ ꓖꓶ ꓔ ꓟ ꓔꓯ ꓐꓯ ꓡꓳꓹ ꓬꓰ ꓟ ꓥꓳ=

ꓢꓲꓺ ꓒ ꓬꓰ-ꓢꓴ ꓠꓬ ꓕꓱ ꓟ ꓮ ꓙꓵ ꓔꓯ ꓒꓰꓹ ꓗꓷ ꓐ ꓡ ꓟ ꓡ ꓞꓳ ꓮ ꓘꓶꓸ ꓒꓵꓽ ꓡꓳꓹ ꓬꓰ ꓟ ꓔꓯ ꓟꓸ ꓖꓶ ꓡꓰ ꓟ ꓥꓳ꓾ ꓟꓽ ꓥ ꓠꓬ ꓣꓳ ꓠꓬ ꓚꓲ ꓛꓬ ꓔꓯ ꓒꓴ ꓫꓵꓻ꓾ ꓗꓹ ꓛꓲ ꓓꓴ ꓗꓪ ꓐꓰ ꓡꓰ ꓣꓳ ꓔꓬ ꓠꓬ ꓕꓱ ꓟ ꓗꓪ ꓚꓳ ꓑꓸ ꓡꓰ ꓐꓰ ꓗꓷ ꓡꓰ ꓟ ꓥꓳ꓾ ꓠꓱꓸ ꓐꓯꓼ ꓕꓲ ꓚꓱꓹ ꓗꓪ ꓐꓰ ꓡꓳꓸ ꓠꓬꓲ ꓠꓬ ꓣꓳ ꓠꓲꓹ ꓟ ꓗꓪ ꓪꓴ-ꓢ ꓠꓵꓻ ꓠꓲꓹ ꓣꓱꓽ ꓛꓱ ꓔꓯ ꓘꓳꓹ ꓣꓴ ꓢꓲ꓾ ꓟꓬ ꓡ ꓠꓹ ꓟ ꓬꓰ ꓢꓲ꓾ ꓟꓽ ꓙꓲꓻ_ ꓟ ꓔꓯ ꓒꓰꓹ ꓗꓷ ꓢꓲ ꓙꓲꓻ_ ꓟ ꓔꓯ ꓡꓰ ꓣꓳ ꓠꓶꓽ ꓛꓳ ꓕꓲ ꓛꓳ꓾ ꓣꓳ ꓕꓲ ꓦꓲꓻ ꓡ ꓞꓳ꓾ ꓣꓳ ꓫꓵ ꓤ ꓧꓪ ꓤ ꓐꓴ ꓔꓯ ꓛꓱꓻ ꓓꓳ ꓠꓹ ꓟ ꓬꓰ ꓖꓶ ꓐ ꓡ ꓟ ꓥꓳ=

ꓖꓳ ꓟ ꓑꓶ ꓓꓴ ꓔꓲꓺ ꓒ ꓪ ꓔꓲ ꓡꓰ ꓚꓲ ꓛꓬ ꓠꓬ ꓕꓱ ꓟꓲ ꓠꓯ ꓕꓲ ꓒꓳꓹ ꓔꓯ ꓒꓰꓹ ꓗꓷ ꓐ ꓡ ꓡ꓾? ꓣꓳ ꓟꓬꓱꓽ ꓬꓰ ꓟ ꓬꓲ ꓔꓶꓸ꓾ ꓣꓳ ꓔꓬ ꓟ ꓗꓪ ꓢꓲ ꓫꓬ ꓟ ꓟꓲꓽ ꓦꓲꓻ꓾ ꓔꓱꓹ ꓟ ꓔꓯ ꓡꓰ ꓛꓱꓻ ꓓꓳ ꓠ ꓬꓰ ꓡ ꓐꓰ ꓚꓲ ꓛꓬ ꓓꓵꓽ ꓙ ꓔꓱꓹ ꓕ ꓠꓹ  ꓐꓯ ꓔ ꓡꓳ꓾ ꓙꓲꓻ ꓟ ꓔꓱꓹ ꓟ ꓪꓴ-ꓢ ꓤ ꓠꓱ ꓒꓬꓱꓼ ꓡꓰ ꓠꓹ ꓟ ꓐꓱ ꓶ ꓢꓲꓺ ꓒ ꓬꓰ-ꓢꓴ ꓟꓸ ꓖꓶ ꓡꓳꓹ ꓬꓰ ꓟ ꓡꓰ ꓐꓰ ꓢꓯꓸ ꓔꓬ ꓢꓲ ꓠꓵꓻ ꓠꓲꓹ ꓐꓰ ꓬꓰ ꓙ ꓗꓴꓸ ꓢꓴ ꓗꓷ ꓡꓰ ꓠꓹ ꓟ ꓐꓱ ꓶ ꓟꓹ ꓟ ꓟ-ꓡꓲ ꓐꓰ ꓶꓽ ꓓꓰꓽ ꓪꓽ ꓘꓴ ꓙ ꓠꓹ ꓟ ꓐꓱ ꓶ ꓶꓽ ꓓꓰ ꓖꓶ ꓢꓲ ꓬꓲꓸ ꓟꓶꓽ ꓢꓰꓼ ꓗꓷ ꓟ ꓥꓳ=