ꓣꓳ ꓠꓲꓹ ꓟ ꓠꓻ ꓓꓴ ꓠꓲꓹ ꓟ ꓫꓸ ꓓꓴ ꓔꓯ ꓪꓴ-ꓢ ꓐꓰ ꓛꓳꓽ ꓒꓯꓹ ꓐꓴ ꓔꓯ ꓐꓯ ꓟꓸ ꓖꓶ ꓓꓴ ꓬꓰ꓾

ꓣꓳ ꓠꓲꓹ ꓟ ꓠꓻ ꓓꓴ ꓠꓲꓹ ꓟ ꓫꓸ ꓓꓴ ꓔꓯ ꓪꓴ-ꓢ ꓐꓰ ꓛꓳꓽ ꓒꓯꓹ ꓐꓴ ꓔꓯ ꓐꓯ ꓟꓸ ꓖꓶ ꓓꓴ ꓬꓰ꓾

ꓔꓲꓺ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓦꓰꓣꓳꓠꓮ’ꓢ ꓟꓳꓠꓔꓳꓣꓲꓮ ꓐꓱ ꓓꓵ ꓗꓪ ꓚꓳ ꓙꓰ ꓢꓲ꓾ ꓖꓳ ꓗꓪ ꓔꓬ ꓢꓴ ꓐꓴ ꓔꓯ “ꓚꓲ ꓛꓬ ꓠꓲꓹ ꓟ ꓘꓴ ꓗꓪ ꓓꓵ ꓙ ꓫꓸ ꓓꓴ ꓔꓯ ꓪꓴ-ꓢ ꓔꓯ ꓟꓸ ꓖꓶ ꓢꓲ ꓠꓬꓲ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓟ ꓗꓳꓸ ꓖꓶ ꓬꓰ ꓙ ꓔꓳꓹ ꓙ ꓓꓴ ꓬꓰ ꓡꓯ꓾” ꓐꓰ ꓢꓯꓼ ꓖꓶ ꓗꓷ ꓟ ꓥꓳ꓾ ꓔꓲꓺ ꓒ ꓪ ꓔꓲ ꓠꓬ ꓬꓲ ꓙꓵꓹ ꓟꓽ ꓙꓳ ꓥ ꓟꓲ ꓟꓳꓠꓔꓳꓣꓲꓮ ꓐꓱ ꓓꓵ ꓗꓪ ꓬꓲꓸ ꓙꓵꓹ ꓖꓶ_ ꓟ ꓔꓯ ꓢꓷꓸ ꓪ ꓡꓳ= ꓔꓲꓺ ꓒ ꓪ ꓔꓲꓺ ꓚꓳ ꓙꓰ ꓡ ꓕꓯ ꓐꓱ ꓓꓵ ꓗꓪ ꓔꓬ ꓢꓴ ꓟꓽ ꓥ꓾ ꓠꓱꓸ ꓐꓯꓼ ꓢꓴ ꓥ ꓟꓲ ꓚꓲ ꓛꓬ ꓔꓬ ꓦꓲꓻ ꓗꓪ ꓐꓰ ꓠꓬꓲꓸ ꓠ ꓠ ꓠꓹ ꓔ ꓟ ꓥꓳ꓾ ꓡ ꓞꓳ ꓮ ꓟꓬꓹ ꓐꓰ ꓖꓳ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓘꓳꓹ ꓣꓴ ꓔꓬ ꓟ ꓔꓯ ꓥ ꓟꓲ ꓢꓷꓸ ꓪ ꓡꓳ=

ꓔꓲꓺ ꓒ ꓪ ꓔꓲ ꓡꓰ “ꓥꓪ ꓐꓱ ꓶ” ꓠꓬ ꓐꓱ ꓓꓵ ꓘꓴꓽ ꓗꓪ ꓓꓵ ꓠꓹ ꓟ ꓠꓬ ꓮ ꓘꓶꓸ ꓫꓸ ꓔ ꓟ ꓕꓲ ꓟ ꓥ ꓟ ꓔꓯ ꓡꓳꓸ ꓟꓳ ꓪ ꓡꓳ꓾ ꓮ ꓫꓵ ꓑꓶ ꓓꓴ ꓐꓯ ꓠꓬ ꓐꓱ ꓓꓵ ꓠꓬ ꓞꓳ ꓤ ꓔꓯ ꓞꓳ ꓤ ꓕꓲ ꓣꓳ ꓡꓰ ꓐꓰ ꓒꓳꓹ ꓖꓶ_ ꓟ ꓬꓲ ꓔꓶꓸ ꓥ ꓡꓳ꓾” ꓐꓰ ꓐꓯ ꓔ ꓡꓳ꓾ꓝꓮꓲ ꓐꓱ ꓓꓵ ꓐꓯ_ ꓟ ꓠꓬ “ꓣꓳ ꓟꓲ ꓠꓯ ꓡ ꓞꓳ ꓔꓯ ꓔꓱꓹ ꓕ ꓝꓲ_ ꓟ ꓬꓲ ꓔꓶꓸ ꓥ ꓟ꓾ ꓕꓲ ꓧꓪꓹ ꓧꓪꓸ ꓫꓸ ꓙꓵ ꓟꓷꓼ ꓙꓵ ꓓꓴ꓾ ꓝꓴꓲ ꓓꓰ ꓡꓰ ꓝꓲ_ ꓟ ꓠꓲꓹ ꓟ꓾ ꓕꓲ ꓣꓳ ꓐꓰ ꓕꓲ ꓣꓳ ꓓꓵ ꓙ ꓥꓳꓽ ꓡꓰ_ ꓟ ꓕꓱ ꓟ ꓔꓯ ꓝꓮꓲ ꓔꓱꓹ ꓕ ꓡꓰ ꓝꓲ_ ꓟ ꓥ ꓡꓳ ꓐꓰ ꓐꓯ ꓔ ꓡꓳ꓾ ꓢꓯꓼ ꓪ ꓙꓳ_ ꓟ꓾ ꓝꓴꓲ ꓣꓷꓠꓸ ꓐ ꓡ ꓟ ꓐꓰ ꓚꓲ ꓛꓬ ꓔꓯ ꓡꓲꓹ ꓙꓰ ꓠꓹ ꓟ ꓠꓲꓹ ꓟ ꓔꓯ ꓖꓶ_ ꓟ ꓬꓲꓸ ꓔꓶꓸ ꓥ ꓡꓳ꓾ ꓐꓰ ꓐꓯ ꓔ ꓡꓳ=

ꓐꓱ ꓓꓵ ꓘꓴꓽ ꓗꓪ ꓔꓬ ꓟ ꓕꓲ ꓐꓱ ꓚꓲ ꓛꓬ ꓔꓱꓹ ꓚꓲ ꓛꓬ ꓢꓰꓼ ꓫꓵꓻ ꓡꓰ ꓟ ꓔꓯ ꓑ ꓙ ꓗꓷ ꓠꓬꓲ ꓠꓲꓹ ꓟ ꓟꓽ ꓢ ꓐꓰ ꓐꓯ ꓔ ꓡꓳ꓾ ꓕꓱ ꓟ ꓡꓰ ꓐꓰ ꓗꓷ ꓡꓰ ꓟ ꓠꓬ “ꓠꓲꓹ ꓟ ꓫꓸ ꓓꓴ ꓐꓰ ꓙꓳꓺ ꓓꓴ ꓔꓳꓹ ꓜꓳ ꓟ ꓥꓳ꓾” ꓝꓮꓲ ꓕꓱ ꓟ ꓠꓬ ꓣꓳ ꓠꓲꓹ ꓟ ꓣꓳꓺ ꓔꓬ ꓟ ꓔꓯ ꓝꓮꓲ ꓒꓳꓹ ꓔꓴ ꓟꓽ ꓐ ꓡ ꓟ ꓡꓰ ꓐꓰ ꓟꓬ ꓠꓬꓲ ꓖꓳ ꓓꓱ ꓠꓯꓼ ꓗꓪ ꓠꓻ ꓡꓰ ꓝꓲ_ ꓟ ꓡꓰ ꓥ ꓟ ꓔꓯ ꓐꓯ ꓔ ꓡꓳ꓾ ꓢꓯꓸ ꓔꓬ ꓟ ꓠꓬ ꓚꓲꓸ ꓛꓬ ꓐꓱ ꓶ ꓡꓰ ꓟꓽ ꓥ꓾ ꓮ ꓙꓵ ꓐꓱ ꓶ ꓡꓯꓼ ꓫꓴꓺ ꓥ ꓡꓳ꓾ ꓣꓳ ꓔꓯ ꓮ ꓕꓯ ꓟꓲ ꓟꓽ ꓒꓰꓹ ꓗꓷ꓾ ꓣꓳ ꓔꓯ ꓠ ꓠꓹ ꓖꓶ ꓟ꓾ ꓣꓳ ꓐꓰ ꓕꓲ ꓪ ꓗꓹ ꓛꓲ ꓙ ꓟ ꓐꓰ ꓣꓳ ꓐꓰ ꓕꓲ ꓪ ꓠꓲꓹ ꓟ ꓫꓸ ꓙ ꓖꓶ_ ꓟ ꓪꓴ-ꓢ ꓔꓬ ꓟ ꓔꓯ ꓓꓵꓽ ꓙ ꓠ ꓔ ꓡꓳ= ꓣꓳ ꓠꓲꓹ ꓟ ꓘꓴꓽ ꓗꓪ ꓓꓵꓽ ꓙ ꓫꓸ ꓓꓴ ꓔꓯ ꓪꓴ-ꓢ ꓔꓯ ꓐꓯ ꓟꓸ ꓖꓶ ꓢꓲ꓾ ꓕꓲ ꓪ ꓛꓳꓽ ꓫꓱꓽ_ ꓟ ꓛꓳꓽ ꓒꓯꓹ ꓡꓰ ꓐꓰ ꓕꓲ ꓣꓳ ꓛꓳ ꓕꓲ ꓣꓳ ꓙꓻ ꓡꓯꓽ ꓘꓳ ꓠꓹ ꓟ ꓔꓯ ꓢꓯꓼ ꓖꓶ ꓔ ꓡꓳ꓾

ꓐꓱ ꓓꓵ ꓗꓪ ꓐꓰ ꓙꓵꓽ ꓪ ꓙꓳ ꓢꓴ ꓡꓰ ꓐꓯ ꓔ ꓟ ꓠꓬ ꓐꓱ ꓓꓵ ꓗꓪ ꓔꓬ ꓟ ꓞꓳ ꓤ ꓐꓴ ꓠꓬ ꓗꓴꓷꓼ 40 ꓗꓴꓷꓼ ꓗꓪ ꓐꓰ ꓙꓵꓻ ꓠꓲꓹ ꓚꓱꓹ ꓮ ꓟꓬꓹ ꓗꓪ ꓐꓰ ꓡ ꓢꓴ ꓥ ꓟ ꓔꓯ ꓐꓯ ꓔ ꓡꓳ꓾ ꓔꓲꓺ ꓒ ꓪ ꓔꓲ ꓡꓰ “ꓪꓴ-ꓢ ꓠꓬ ꓕꓲ ꓟ ꓡꓰ ꓥ ꓡꓳ꓾” ꓣꓳ ꓙꓵꓻ ꓠꓲꓹ ꓚꓱꓹ ꓗꓪ ꓐꓰ ꓛꓳ ꓢꓲ꓾ ꓬꓲ ꓔꓯ ꓬꓲꓸ ꓚꓱꓹ ꓮ ꓟꓬꓹ ꓐꓰ ꓘꓴ ꓥ ꓟꓲ ꓬꓲ ꓠꓬ ꓣꓳ ꓮ ꓙꓵ ꓐꓱ ꓶ ꓐꓹ ꓐ ꓥ ꓡꓳ꓾  ꓝꓮꓲ “ꓬꓲ ꓠꓯꓼ ꓗꓪ ꓕꓲ ꓟ ꓡꓰ ꓥꓳ꓾” ꓣꓳ ꓙꓵꓻ ꓠꓲꓹ ꓮ ꓙꓵ ꓐꓰ ꓡꓲꓽ ꓒꓰꓼ ꓗꓪ ꓐꓰ ꓪꓴ-ꓢ ꓕꓲ ꓟ ꓔꓯ ꓡꓰ ꓟꓽ ꓫꓱꓽ_ ꓟ ꓚꓱꓹ ꓗꓪ ꓐꓰ ꓙꓵꓻ ꓔꓬ ꓟ ꓥ ꓡꓳ= ꓣꓳ ꓑ ꓕꓲ ꓗꓪ ꓬꓲ ꓐꓰ ꓥ ꓠꓬ ꓣꓳ ꓤꓶꓻ ꓠꓯꓼ ꓗꓪ ꓠꓲꓹ ꓟ ꓣꓳꓺ ꓓꓴ ꓔꓯ ꓗꓳꓸ ꓙꓰ ꓐ ꓡ ꓢꓲ꓾ ꓣꓳ ꓤꓶꓻ ꓗꓪ ꓬꓲꓸ ꓙꓵꓹ ꓟꓽ ꓞꓰ ꓡꓰ ꓬꓲꓸ ꓫꓵꓼ ꓪꓴꓸ ꓔꓴ ꓐ ꓓꓴ ꓥ ꓡꓳ꓾ ꓐꓰ ꓢꓯꓼ ꓖꓶ ꓔ ꓡꓳ=