ꓟꓲ ꓠꓯ ꓗꓪ ꓟꓲꓽ ꓦꓲꓻ ꓕꓳꓽ ꓥꓳꓽ ꓡꓰ ꓐꓰ ꓤ ꓠꓬꓲ ꓫꓵ ꓠꓬꓲ ꓓꓴ ꓔꓳꓹ ꓜꓳ ꓡ ꓟ ꓙꓵꓹ ꓗꓪ ꓢꓲꓺ ꓒ ꓔꓯ ꓠꓲꓹ ꓥꓳ_ ꓡ꓾

ꓟꓲ ꓠꓯ ꓗꓪ ꓟꓲꓽ ꓦꓲꓻ ꓕꓳꓽ ꓥꓳꓽ ꓡꓰ ꓐꓰ ꓤ ꓠꓬꓲ ꓫꓵ ꓠꓬꓲ ꓓꓴ ꓔꓳꓹ ꓜꓳ ꓡ ꓟ ꓙꓵꓹ ꓗꓪ ꓢꓲꓺ ꓒ ꓔꓯ ꓠꓲꓹ ꓥꓳ_ ꓡ꓾

ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴ ꓜꓲꓼ ꓡ ꓢꓴ ꓐꓴ ꓔꓯ ꓓꓵꓽ ꓙ ꓫꓸ ꓔ ꓟ ꓐꓰ ꓙꓳꓺ ꓠ ꓗꓹ ꓟ ꓠꓬꓲꓽ ꓗꓳꓸ ꓚꓸ ꓗꓪ ꓣꓳ ꓠꓲꓹ ꓟ ꓘꓴꓽ ꓗꓪ ꓐꓰ ꓟꓲꓽ ꓦꓲꓻ ꓕꓳꓽ ꓥꓳꓽ ꓔꓯ ꓮ ꓕꓯ ꓟꓲ ꓢꓲ ꓡꓲꓹ ꓖꓶ ꓟ ꓢꓲꓺ ꓒ ꓬꓰ-ꓢꓴ ꓔꓯ ꓟꓽ ꓙꓬ ꓫꓸ ꓫꓸ ꓘꓴ ꓠꓹ ꓟ ꓥ ꓡꓳ꓾ ꓐꓰ ꓢꓯꓼ ꓖꓶ ꓔ ꓡꓳ= ꓣꓳ ꓠꓯꓼ ꓗꓪ ꓓꓵꓽ ꓙ ꓫꓸ ꓓꓴ ꓓꓵꓽ ꓙ ꓟꓬ ꓓꓴ ꓔꓳꓹ ꓜꓳ ꓡ ꓕꓯ ꓥ ꓟꓲ ꓮ ꓕꓯ ꓟꓲ ꓢꓲꓺ ꓒ ꓔꓯ ꓙꓵꓻ ꓢꓲ ꓣꓳ ꓚꓲꓸ ꓛꓬ ꓬꓲ ꓔꓯ ꓡꓯꓽ ꓛꓱ ꓠꓹ ꓟ ꓥ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓶꓽ ꓓꓳꓽ ꓫꓱꓸ ꓓꓳ ꓟ-ꓳ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ-ꓢꓴ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓚꓱꓹ ꓗꓪ ꓐꓰ ꓢꓲꓺ ꓒ ꓬꓰ-ꓢꓴ ꓐꓰ ꓬꓲ ꓛꓳꓽ ꓒꓯꓹ ꓐꓴ ꓡꓲ ꓗꓪ ꓐꓰ ꓕꓲ ꓪ ꓛꓳ ꓙꓰ ꓕꓯ ꓕꓳꓽ ꓥꓳꓽ ꓓꓽ ꓟ ꓙꓱꓼ ꓡ ꓢꓲ ꓬꓲ ꓡꓯꓼ ꓟꓰꓼ ꓓꓶꓽ ꓡ ꓠꓬꓲ꓾ ꓡꓲ ꓗꓪ ꓬꓲꓻ ꓙꓬ ꓓꓵꓽ ꓡ ꓔꓬ ꓢꓲ ꓢꓲꓺ ꓒ ꓬꓰ-ꓢꓴ ꓬꓲꓼ ꓟꓶ ꓔꓬ ꓟ ꓙꓵꓹ ꓗꓪ ꓢꓲꓺ ꓒ ꓔꓯ ꓛꓳꓽ ꓒꓯꓹ ꓐꓴ ꓡꓰ ꓡꓵꓹ ꓗꓷ ꓟ ꓚꓱꓹ ꓥ ꓡꓳ꓾ ꓖꓳ ꓡꓱ ꓠꓬꓲ ꓢꓲꓺ ꓒ ꓔꓴ ꓡ ꓢꓲ ꓮ ꓙꓵ ꓕꓯ ꓕꓼ ꓢꓲ꓾ ꓢꓲ ꓡꓲꓹ ꓐꓰ ꓠꓽ ꓡꓰ ꓝꓲ ꓢꓲ꓾ ꓬꓲ ꓪ ꓙꓵꓻ ꓠꓲꓹ ꓟꓽ ꓙꓳ ꓟ ꓑꓶ ꓓꓴ ꓥ ꓡꓳ ꓐꓰ ꓐꓯ ꓟ ꓐꓰ ꓬꓲ ꓔꓯ ꓙꓵꓻ ꓠꓲꓹ ꓙꓳ ꓠꓹ ꓟ ꓟꓸ ꓖꓶ_ ꓟ ꓥ ꓡꓳ=

ꓕꓱ ꓟ ꓗꓪ ꓐꓰ ꓔꓲꓺ ꓒ ꓪ ꓔꓲ ꓡꓰ ꓬꓲ ꓪ ꓟꓲ ꓙꓬ ꓗꓪ ꓬꓲ ꓟꓬꓱꓺ ꓗꓪ ꓐꓰ ꓪ ꓠꓬꓲ_ ꓟ ꓔꓯ ꓟꓸ ꓖꓶ_ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓙꓵꓻ ꓠꓲꓹ ꓔꓯ ꓚꓬꓹ ꓠꓬꓲ ꓠꓲꓹ ꓫꓵ_ ꓟ ꓥ ꓡꓳ ꓐꓰ ꓐꓯ ꓔ ꓡꓳ= ꓕꓱ ꓟ ꓡꓰ ꓐꓰ ꓙꓳꓺ ꓡꓰ ꓓꓴ ꓠꓬ ꓬꓲ ꓪ ꓔꓯ ꓟꓬ ꓠꓬꓲ ꓫꓸ ꓓꓴ ꓤ ꓠꓬꓲ ꓓꓴ ꓔꓳꓹ ꓜꓳ ꓡ ꓕꓯ ꓝꓮꓲ ꓪꓴ-ꓢ ꓗꓹ ꓛꓲ ꓟ ꓓꓳꓽ ꓔꓯ ꓚꓺ ꓠꓹ ꓟ꓾ ꓙꓬ ꓫꓸ ꓟ ꓙꓳꓺ ꓟ ꓠꓲꓹ ꓟ ꓔꓯ ꓑꓶꓸ ꓑꓶꓸ ꓡꓰ ꓐꓰ ꓬꓰ ꓐ ꓡ ꓠꓹ ꓟ ꓐꓱ ꓶ ꓥ ꓡꓳ ꓐꓰ ꓐꓯ ꓔ ꓡꓳ=

ꓪꓴ-ꓢ ꓠꓬ ꓮ ꓫꓵ ꓑꓶ ꓓꓴ ꓕꓱ ꓡꓱ ꓬꓰ ꓡ? ꓬꓲ ꓪ ꓙꓵꓻ ꓠꓲꓹ ꓟꓬ ꓠꓬꓲ ꓕꓷ ꓡꓰ ꓠꓹ ꓟ ꓐꓰ ꓑꓶꓸ ꓑꓶꓸ ꓡꓰ ꓬꓰ ꓐ ꓡ ꓠꓹ ꓟ ꓠꓲꓹ ꓟ ꓟꓬ ꓡ ꓠꓹ ꓟ ꓐꓱ ꓶ ꓥ ꓟꓲ ꓥ ꓟ ꓔꓯ ꓔꓲꓺ ꓒ ꓪ ꓔꓲ ꓡꓰ ꓢꓯꓼ ꓖꓶ ꓔ ꓡꓳ= “ ꓢꓲꓺ ꓒ ꓐꓰ ꓕꓲ ꓪ ꓕꓱ ꓟ ꓕꓯ ꓗꓳꓸ ꓙꓰ ꓡꓰ ꓗꓸ ꓠꓯꓸ” ꓗꓹ ꓛꓲ ꓟ ꓓꓳꓽ ꓔꓯ ꓚꓺ ꓖꓶ ꓠꓹ ꓟ ꓐꓱ ꓶ ꓡ ꓞꓳ ꓮ ꓟꓬꓹ ꓐꓰ ꓮ ꓡꓰ ꓐꓰ ꓫꓱꓹ ꓡꓯꓽ ꓘꓳ ꓗꓴꓸ ꓟ꓾ ꓮ ꓘꓶꓸ ꓟꓬꓱꓺ ꓓꓳꓽ ꓙꓳ_ ꓟ ꓡꓯꓽ ꓐꓳ ꓔꓶꓸ ꓓꓴ ꓕꓯ ꓢꓲ ꓗꓪ ꓕꓯꓼ ꓔꓶꓸ ꓫꓵꓻ ꓙ ꓗꓷ ꓟ ꓔꓯ ꓢꓷꓸ ꓠꓹ ꓟ ꓡ ꓞꓳ ꓐꓱ ꓶ ꓗꓹ ꓛꓲ ꓟ ꓶꓼ ꓓꓳꓽ ꓫꓱꓸ ꓓꓳ ꓔꓯ ꓚꓺ ꓖꓶ ꓐ ꓡ ꓓꓴ ꓥꓳ ꓐꓰ ꓐꓯ ꓔ ꓡꓳ= ꓢꓲꓺ ꓒ ꓬꓰ-ꓢꓴ ꓠꓬ ꓖꓳ ꓟ ꓡꓰ ꓐꓰ ꓣꓳ ꓔꓯ ꓥ ꓟꓲ ꓛꓳ ꓫꓱꓽ ꓠꓹ ꓟ ꓐꓱ ꓶ ꓘꓴ ꓔꓬ ꓟ ꓥ ꓡꓳ=

“ꓟꓬ ꓠꓬꓲ ꓣꓳ ꓢꓲ ꓫꓬ ꓖꓳ ꓓꓱ ꓑ ꓑ ꓗꓪ ꓔꓬ ꓟ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓚꓲꓸ ꓛꓬ ꓣꓳ ꓑ ꓕꓲ ꓗꓪ ꓔꓬ ꓡꓳ=” ꓬꓲ ꓢꓲ ꓬꓲ ꓧꓪ ꓐꓰ ꓣꓳ ꓔꓯ ꓡꓳꓸ ꓙ ꓐꓳ ꓙ ꓖꓶ_ ꓡꓳ= ꓪꓴ-ꓢ ꓠꓬ ꓣꓳ ꓑ ꓙ ꓟꓶ_ ꓟ ꓐꓰ ꓘꓳꓹ ꓣꓴ ꓟꓶ_ ꓟ ꓮ ꓙꓵ ꓔꓯ ꓞꓳ ꓤ ꓐꓴ ꓐꓰ ꓕꓲ ꓪ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯꓸ ꓔꓬ ꓟ ꓤꓶꓻ ꓗꓪ ꓫꓸ ꓓꓴ ꓔꓳꓹ ꓜꓳ ꓥ ꓟꓲ ꓕꓲ ꓪ ꓘꓳꓹ ꓣꓴ ꓟ ꓥ ꓡꓳ꓾ ꓪꓴ-ꓢ ꓠꓬ ꓣꓳ ꓠꓯꓼ ꓗꓪ ꓫꓸ ꓙꓵ ꓟꓶ ꓙꓵ ꓓꓴ ꓔꓳꓹ ꓜꓳ ꓔꓬ ꓟ ꓙꓵꓹ ꓗꓪ ꓣꓳ ꓔꓯ ꓮ ꓕꓯ ꓟꓲ ꓟꓽ ꓒꓰꓹ ꓗꓷ ꓕꓱ ꓟ ꓔꓯ ꓗꓳꓸ ꓙꓰ ꓐ ꓡ ꓠꓹ ꓟ ꓢꓯꓼ ꓪ ꓬꓰ ꓙ ꓖꓶ_ ꓡꓳ=

ꓟꓬ ꓠꓬꓲ ꓙꓲ_ ꓟ ꓚꓱꓹ ꓔꓯ ꓢꓳꓺ ꓣꓴ ꓢꓲ ꓣꓳ ꓬꓰ_ ꓟ ꓟꓬꓱꓽ ꓚꓱꓹ ꓗꓪ ꓐꓰ ꓟꓬꓹ ꓟ ꓬꓲ ꓪ ꓠꓬꓲ_ ꓟ ꓔꓯ ꓙꓵꓻ ꓢꓲ ꓠꓲꓹ ꓥꓳ ꓠꓹ ꓟ ꓛꓳ ꓫꓱꓽ ꓠꓹ ꓟ ꓐꓯ ꓔ ꓡꓳ= ꓢꓲꓺ ꓒ ꓬꓰ-ꓢꓴ ꓔꓯ ꓟꓽ ꓛꓳ ꓛꓳ ꓒꓰꓹ ꓗꓷ ꓠꓬ ꓣꓳ ꓤꓶꓻ ꓠꓯꓼ ꓗꓪ ꓮ ꓡꓰ ꓗꓷ ꓡꓰ ꓡ ꓟ ꓔꓯ ꓟꓽ ꓢꓷꓸ ꓔ ꓟ ꓡꓰ ꓐꓰ ꓫꓸ ꓙꓵ ꓟꓷ ꓙꓵ ꓓꓴ ꓔꓳꓹ ꓜꓳ ꓥ ꓟꓲ ꓗꓳꓸ ꓙꓰ ꓐ ꓡ ꓠꓹ ꓟ ꓢꓯꓼ ꓪ ꓟꓽ ꓙꓳ꓾

ꓔꓲꓺ ꓒ ꓪ ꓔꓲ ꓡꓰ ꓚꓲꓸ ꓛꓬ ꓔꓱꓹ ꓕ ꓓꓵꓽ ꓙ ꓠꓹ ꓟ ꓠ ꓠꓬꓲ ꓘꓶꓽ ꓐꓰ ꓐꓯ ꓔ ꓡꓳ= ꓣꓳ ꓠꓯꓼ ꓗꓪ ꓫꓸ ꓓꓴ ꓔꓳꓹ ꓜꓳ ꓡ ꓕꓯ ꓝꓮꓲ ꓣꓳ ꓢꓯꓸ ꓔꓬ ꓟ ꓤꓶꓻ ꓗꓪ ꓪꓴ-ꓢ ꓬꓰ ꓙ ꓔꓳꓹ ꓙ ꓡ ꓟ ꓔꓯ ꓘꓳꓹ ꓣꓴ ꓢꓲ ꓓꓵꓽ ꓙ ꓡ? ꓟꓽ ꓞꓲ ꓣꓳ ꓤꓶꓻ ꓗꓪ ꓟꓲꓽ ꓦꓲꓻ ꓕꓳꓽ ꓥꓳꓽ ꓓꓽ ꓡꓰ ꓐꓰ ꓗꓷ ꓡ ꓕꓯ ꓚꓲꓸ ꓛꓬ ꓔꓱꓹ ꓚꓲ ꓛꓬ ꓢꓲ ꓡꓲꓹ ꓠꓹ ꓟ ꓬꓰ_ ꓡ꓾ ꓟꓽ ꓥ ꓢꓲꓺ ꓒ ꓔꓯ ꓠꓲꓹ ꓥꓳ ꓢꓲ ꓣꓳ ꓙꓵꓻ ꓠꓲꓹ ꓔꓯ ꓕꓲ ꓣꓳ ꓐꓰ ꓕꓲ ꓣꓳ ꓛꓱꓺ ꓓꓳ ꓠ ꓙꓻ ꓡꓯꓽ ꓘꓳ_ ꓡ꓾ ꓬꓲ ꓢꓯꓼ ꓔꓯ ꓠ ꓠꓹ ꓢꓲ ꓢꓲ ꓡꓲꓹ ꓐꓰ ꓔꓬꓟ ꓐꓰ ꓶꓽ ꓓꓰꓽ ꓪꓽ ꓘꓴ ꓡ꓾ ꓐꓰ ꓥ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓬꓲꓸ ꓟꓶꓽ ꓗꓪ ꓐꓰ ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓢꓲ꓾ ꓑꓶꓸ ꓑꓶꓸ ꓡꓰ ꓘꓳꓹ ꓣꓴ ꓟ ꓟꓹ ꓟ ꓟ-ꓡꓲ ꓡꓰ ꓐꓰ ꓣꓳ ꓫꓸ ꓓꓴ ꓔꓳꓹ ꓜꓳ ꓡ ꓟ ꓙꓵꓹ ꓗꓪ ꓬꓲ ꓠꓯꓼ ꓗꓪ ꓠꓲꓹ ꓥꓳ ꓢꓲ ꓔꓳꓹ ꓜꓳ ꓡ ꓟ ꓔꓯ ꓗꓳꓸ ꓙꓰ ꓐ ꓡ ꓠꓹ ꓟ ꓐꓱ ꓶ ꓶꓽ ꓓꓰ ꓪꓽ ꓘꓴ ꓖꓶ ꓗꓷ ꓟ ꓥ ꓡꓳ=