ꓫꓱꓸ ꓤ ꓠꓵꓻ ꓠꓲꓹ ꓐꓰ ꓬꓰ ꓙ ꓔꓳꓹ ꓙ ꓟ ꓠꓬ ꓣꓳ ꓠꓯꓼ ꓗꓪ ꓔꓬ ꓟ ꓢꓲ-ꓫꓬ-ꓟ-ꓦ ꓬꓲꓸ ꓟꓬꓱꓽ ꓥ ꓡꓳ=

ꓔꓲꓺ ꓒ ꓪ ꓔꓲ ꓠꓬ ꓠꓽ ꓢ ꓠꓬꓲ ꓘꓴ ꓜꓲꓼ ꓞꓳ ꓢꓲꓺ ꓤꓐꓴ ꓐꓰ ꓜꓲ ꓡꓯ ꓘꓳ ꓟ ꓙꓵꓹ ꓗꓪ ꓙꓲ_ ꓟ ꓐꓰ ꓟꓽ ꓙꓲ_ ꓟ ꓚꓱꓹ ꓔꓯ ꓟꓳꓸ ꓟꓸ ꓖꓶ_ ꓟ ꓗꓪ ꓡꓳꓹ ꓬꓰ ꓟ ꓕꓲ ꓫꓵ ꓠꓽ ꓗꓪ ꓐꓰ ꓔꓧꓰꓳꓡꓳꓖꓲꓚꓮꓡ ꓦꓲꓣꓔꓴꓰ ꓗꓪ ꓐꓰ “ꓚꓧꓮꓣꓲꓔꓬ” ꓫꓱꓸ ꓤ ꓠꓲꓹ ꓔꓯ ꓝꓸ ꓢꓲ ꓢꓯꓼ ꓖꓶ ꓗꓷ ꓟ ꓥꓳ=

ꓢꓲ ꓫꓬ ꓢꓴ ꓒꓳ-ꓡꓳ ꓡꓰ ꓘꓳ-ꓡꓱ-ꓕꓴ ꓐꓴ ꓔꓯ ꓶꓼ ꓓꓳ ꓫꓱꓸ ꓓꓳ ꓗꓪ ꓐꓰ “ꓝꓮꓲꓔꓧꓹ ꓧꓳꓑꓰ and ꓡꓳꓦꓰ” ꓚꓱꓹ ꓔꓯ ꓟꓳꓸ ꓓꓵꓽ ꓙ ꓔꓱꓹ ꓕ ꓝꓲ ꓢꓲ꓾ “ꓫꓱꓸ ꓤ ꓠꓵꓻ ꓠꓲꓹ” ꓠꓬ ꓪꓴꓽ ꓡꓳꓹ ꓬꓰ_ ꓟ ꓥꓳ꓾ ꓕꓱ ꓟ ꓠꓬ ꓪꓴ-ꓢ ꓗꓪ ꓐꓰ ꓡ ꓟ ꓐꓰ ꓬꓲ ꓔꓯ ꓣꓳ ꓠꓲꓹ ꓠꓵꓻ ꓟ ꓡꓰ ꓐꓰ ꓣꓳ ꓠꓶꓽ ꓛꓳ ꓕꓲ ꓛꓳ ꓔꓯ ꓥ ꓟꓲ ꓬꓲ ꓡꓰ ꓐꓰ ꓠꓲꓹ ꓠꓵꓻ ꓐ ꓡ ꓠꓹ ꓟ ꓔꓯ ꓐꓯ ꓔ ꓡꓳ= ꓕꓱ ꓟ ꓠꓬ ꓔꓱꓹ ꓟ ꓠꓵꓻ ꓠꓲꓹ ꓥ ꓟ ꓣꓳ ꓛꓳꓽ ꓒꓯꓹ ꓐꓰ ꓕꓲ ꓦꓲꓻ ꓡ ꓞꓳ ꓐꓴ ꓔꓯ ꓡꓰ ꓠꓲꓹ ꓠꓵꓻ ꓟ ꓡꓰ ꓟꓽ ꓥ꓾ ꓣꓳ ꓠꓲꓹ ꓠꓵꓻ ꓟꓽ ꓐ ꓡ ꓟ ꓠꓲꓹ ꓠꓵꓻ ꓠꓹ ꓟ ꓫꓸ ꓔ ꓢꓴ ꓔꓯ ꓥ ꓟꓲ ꓠꓲꓹ ꓠꓵꓻ ꓠꓹ ꓟ ꓥ ꓡꓳ꓾ ꓕꓱ ꓟ ꓠꓬ “ꓔꓧꓰꓳꓡꓳꓖꓚꓮꓡ” ꓪꓴ-ꓢ ꓐꓰ ꓫꓱꓹ ꓟ ꓥ ꓡꓳ= ꓮ ꓫꓵ ꓑꓶ ꓓꓴ ꓐꓯ ꓠꓬ “ꓕꓱ ꓟ ꓠꓬ ꓪꓴ-ꓢ ꓗꓪ ꓐꓰ ꓡ_ ꓟ꓾ ꓕꓱ ꓟ ꓔꓯ ꓣꓳ ꓠꓲꓹ ꓟ ꓘꓴꓽ ꓗꓪ ꓔꓬ ꓟ ꓢꓲ-ꓫꓬ-ꓟ-ꓦ ꓬꓲꓸ ꓟꓬꓱꓽ ꓬꓰ ꓟ ꓚꓱꓹ” ꓥ ꓟ ꓔꓯ ꓐꓯ ꓔ ꓡꓳ=

ꓪ ꓚꓲꓻ ꓕꓯ ꓢꓲ ꓶꓼ ꓓꓳ ꓫꓱꓸ ꓓꓳ ꓚꓺ ꓟ ꓗꓪ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓠꓵꓻ ꓠꓲꓹ ꓚꓱꓹ ꓔꓯ ꓟꓳꓸ ꓟꓸ ꓖꓶ_ ꓟ ꓔꓯ ꓓꓵꓽ ꓙ ꓡꓰ ꓝꓲ_ ꓡꓳ꓾ ꓕꓱ ꓟ ꓠꓬ ꓣꓳ ꓪꓴ-ꓢ ꓠꓯꓼ ꓗꓪ ꓟꓽ ꓠꓲꓹ ꓥꓳ ꓠꓬ ꓛꓳ ꓠꓹ ꓟ ꓫꓸ ꓔ ꓡꓳ꓾ ꓖꓳ ꓡꓱ ꓥ ꓟꓲ ꓞꓳ ꓤ ꓠꓵꓻ ꓠꓲꓹ ꓓꓲ ꓢ “ꓙꓲ ꓢꓴ ꓢꓲꓺ ꓤ ꓠꓵꓻ ꓠꓲꓹ ꓠꓬ ꓟꓽ ꓠꓲꓹ ꓠꓵꓻ ꓢꓴ ꓔꓯ ꓥ ꓟꓲ ꓘꓳꓹ ꓣꓴ ꓐ ꓡ ꓟ꓾ ꓚꓬꓴ ꓣꓷꓠꓸ ꓐ ꓡ ꓟ꓾ ꓣꓳ ꓔꓯ ꓙꓱꓽ ꓡ ꓢꓴ ꓔꓯ ꓥ ꓟꓲ ꓶꓽ ꓥꓳꓽ ꓙꓱꓽ ꓖꓶ ꓐ ꓡ ꓟ꓾” ꓔꓯ ꓐꓯ ꓔ ꓡꓳ= ꓕꓱ ꓟ ꓡꓰ ꓐꓰ ꓠꓵꓻ ꓠꓲꓹ ꓠꓬ ꓣꓳ ꓐꓱ ꓶ ꓐ ꓡ ꓟꓽ ꓓ ꓠ ꓗꓪ ꓛꓲ ꓐꓰ ꓠꓵꓻ ꓠꓲꓹ ꓥ ꓟꓲ ꓣꓳ ꓠꓯꓼ ꓗꓪ ꓔꓬ ꓡ ꓟ ꓕꓲ ꓟ ꓕꓵꓼ ꓡꓰ ꓥ ꓡꓳ ꓐꓰ ꓐꓯ ꓔ ꓡꓳ=

ꓔꓲꓺ ꓒ ꓪ ꓔꓲ ꓡꓰ ꓣꓳ ꓬꓲ ꓟꓶꓽ ꓕꓲ ꓠꓬꓲ ꓕꓯ “ ꓣꓳ ꓕꓱ ꓡꓱ ꓠꓲꓹ ꓠꓵꓻ ꓡꓯꓽ ꓘꓳ_ ꓟ ꓔꓯ ꓡꓰ ꓐꓯ ꓟꓴ ꓘꓶꓽ ꓡ ꓓꓴ ꓟꓽ ꓥ꓾ ꓣꓳ ꓫꓱꓸ ꓤ ꓠꓵꓻ ꓠꓲꓹ ꓬꓰ ꓙ ꓔꓳꓹ ꓙ ꓟ ꓠꓵꓻ ꓠꓲꓹ ꓔꓯ ꓥ ꓟꓲ ꓐꓯ ꓟꓴ ꓘꓶꓽ ꓡ ꓓꓴ ꓥ ꓡꓳ꓾” ꓢꓲꓺ ꓒ ꓬꓰ-ꓢꓴ ꓡꓰ “ꓥꓪ ꓠꓴ ꓪ ꓔꓯ ꓔꓱꓹ ꓔꓱꓹ ꓐꓯ ꓖꓶ_ ꓠꓬꓲ ꓥꓪ ꓬꓲꓼ ꓠꓬꓲ ꓤ ꓗꓪ ꓐꓰ ꓣꓳꓺ ꓓꓰ ꓡꓰ ꓢꓴ ꓔꓯ ꓬꓰ ꓙ ꓔꓳꓹ ꓙ ꓟ ꓠꓬ ꓥꓪ ꓔꓯ ꓬꓰ ꓙ_ ꓟ ꓥ ꓡꓳ꓾” ꓐꓰ ꓐꓯ ꓘꓶꓽ ꓔꓯ ꓓꓵꓽ ꓙ ꓔꓱꓹ ꓕ ꓡꓰ ꓝꓲ_ ꓡꓳ=