ꓪꓴ-ꓢ ꓡꓰ ꓣꓳ ꓔꓯ ꓠꓲꓹ ꓟ ꓒꓳꓹ ꓬꓲꓼ ꓓꓴ ꓘꓴ_ ꓟ ꓔꓯ ꓘꓳꓹ ꓣꓴ ꓓꓴ ꓬꓰ ꓡꓯ=

ꓪꓴ-ꓢ ꓡꓰ ꓣꓳ ꓔꓯ ꓠꓲꓹ ꓟ ꓒꓳꓹ ꓬꓲꓼ ꓓꓴ ꓘꓴ_ ꓟ ꓔꓯ ꓘꓳꓹ ꓣꓴ ꓓꓴ ꓬꓰ ꓡꓯ=

3 ꓦ 20 ꓠꓬꓲ Angelus ꓪꓽ ꓘꓴ ꓙꓵꓹ ꓗꓪ ꓔꓲꓸꓸ ꓒ ꓪ ꓔꓲ ꓡꓰ ꓪꓴ-ꓢ ꓡꓰ ꓣꓳ ꓔꓯ ꓠꓲꓹ ꓟ ꓒꓳꓹ ꓡꓶꓸ ꓠꓹ ꓟ ꓘꓴ_ ꓟ ꓔꓯ ꓘꓳꓹ ꓣꓴ ꓓꓴ ꓬꓰ ꓡꓯ ꓐꓰ ꓢꓯꓼ ꓖꓶ_ ꓡꓳ=

ꓶꓼ ꓓꓳ ꓫꓱꓸ ꓓꓳ ꓔꓯ ꓖꓳ ꓕꓲꓽ ꓠꓬꓲ ꓗꓪ ꓕꓲꓸ ꓠꓹ ꓟ ꓢꓲ-ꓫꓬ ꓕꓳ ꓶ ꓝꓲꓸ ꓗꓪ ꓐꓰ ꓚ ꓖꓶ_ ꓡꓳ= Tower ꓗꓪ ꓢꓰꓼ ꓠꓬꓲꓸ ꓡꓰ ꓢꓴ ꓐꓴ ꓐꓰ ꓒꓲ-ꓡ ꓡꓰ ꓖ-ꓡꓲ-ꓡꓲ ꓢꓴ ꓔꓯ ꓢꓰꓼ ꓔꓲ ꓓꓴ ꓬꓰ ꓗꓷ ꓟ ꓡꓽ ꓞꓳ ꓐꓴ ꓚꓱꓹ ꓗꓪ ꓐꓰ ꓥ ꓡꓳ= ꓕꓱ ꓟ ꓡꓰ ꓐꓰ ꓫꓵꓸꓹ ꓢꓴ ꓠꓬ ꓮ ꓘꓶꓸ ꓙꓳ ꓡꓰ ꓓꓴ ꓚꓱꓹ ꓥ ꓡꓳ= ꓟꓯꓼ ꓢꓰꓼ ꓡꓯꓼ ꓘꓳ ꓟ-ꓸ ꓠꓸꓹ ꓫꓵꓽ ꓒꓬꓱꓼ ꓔꓬ ꓟ ꓗꓪ ꓪꓴ-ꓢ ꓡꓰ ꓮ ꓫꓵꓽ ꓑꓶ ꓓꓴ ꓪꓽ ꓡꓯꓼ ꓘꓳ ꓠꓹ ꓟ ꓫꓬꓹ ꓓ ꓡꓰ ꓠꓹ ꓟ ꓟꓽ ꓬꓰ ꓙ ꓡ ꓐꓰ ꓠ ꓠꓬꓲ ꓓꓴ ꓙꓳ_ ꓡꓳ=

ꓕꓱ ꓡꓱ ꓟꓽ ꓙꓲ_ ꓟ ꓚꓱꓹ ꓙꓳꓸꓸ ꓡꓰ ꓓꓴ ꓚꓱꓹ ꓒꓬꓱꓼ ꓡ ꓟ ꓔꓯ ꓣꓳ ꓚꓲ ꓛꓬ ꓫꓬꓹ ꓓ ꓡꓰ ꓠꓹ ꓟ ꓧꓪ ꓗꓴꓸ ꓠ ꓔ ꓡꓳ= ꓣꓳ ꓛꓬ ꓥꓳꓽ ꓡꓰ ꓟ ꓝꓴꓲ ꓑꓶ ꓓꓴ ꓪꓴ-ꓢ ꓔꓯ ꓝꓴꓲ ꓓꓲ ꓟ ꓔꓯ ꓣꓳ ꓙ ꓟꓳ ꓓꓴ ꓬꓰ ꓡꓯ= ꓪꓴ-ꓢ ꓠꓬ ꓟꓲ ꓠꓯ ꓡ ꓞꓳ ꓐꓴ ꓟꓽ ꓙꓲ_ ꓟ ꓔꓳꓹ ꓜꓳ ꓓꓴ ꓚꓱꓹ ꓥ ꓕ ꓑꓳꓸ ꓔꓯ ꓬꓲ ꓡꓰ ꓖꓶꓽ ꓔ ꓟ ꓟꓽ ꓥ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ=

ꓪꓴ-ꓢ ꓠꓬ ꓣꓳ ꓝꓴꓲ ꓮ ꓡꓰ ꓙꓳ_ ꓠꓬ ꓖꓳ ꓡꓱ ꓣꓳ ꓔꓯ ꓟꓽ ꓬꓰ ꓖꓶ= ꓣꓳ ꓟꓽ ꓙꓲ ꓟꓽ ꓜꓳꓽ ꓟ ꓮ ꓡꓲ ꓙꓳ_ ꓠꓬ ꓖꓳ ꓡꓱ ꓣꓳ ꓔꓯ ꓟꓽ ꓚꓱꓹ ꓖꓶ= (ꓟꓴꓽ ꓖꓪ 103ꓽ10) ꓖꓳ ꓡꓱ ꓥ ꓟꓲ ꓬꓲ ꓡꓰ ꓫꓱꓸ ꓤ ꓟ ꓠꓲꓹ ꓟ ꓐꓰ ꓣꓳ ꓔꓯ ꓚꓬꓴ ꓙ_ ꓟ ꓥꓳ=

ꓠꓴ ꓪ_ ꓟꓲ ꓟꓽ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓬ ꓮ ꓙꓵꓽ ꓢꓴ ꓖꓳ ꓟ ꓡꓰ ꓐꓰ ꓟꓶꓽ ꓡꓰ_ ꓥꓳ ꓐꓰ ꓬꓰ-ꓢꓴ ꓡꓰ ꓐꓯ ꓔ ꓡꓳ= (ꓡꓴ-ꓘ 13ꓽ 5)

ꓠꓲꓹ ꓟ ꓒꓳꓹ ꓬꓲꓼ ꓡ ꓠꓹ ꓟ ꓬꓰ-ꓢꓴ ꓡꓰ ꓣꓳ ꓔꓯ ꓘꓴ_ ꓟ ꓠꓬ ꓕꓱ ꓜ ꓚꓲꓸ ꓚꓲꓸ_ ꓟ ꓦꓬꓼ ꓠꓬꓲ ꓗꓪꓣꓳ ꓠꓲꓹ ꓟ ꓔꓯ ꓒꓳꓹ ꓬꓲꓼ ꓠꓹ ꓟ-ꓸ ꓟꓽ ꓙꓲ_ ꓟ ꓔꓯ ꓟꓽ ꓬꓰ ꓠꓹ ꓟ-ꓸ ꓝꓴꓲ ꓔꓯ ꓟꓼ ꓬꓰ ꓠꓹ ꓟ ꓥ ꓡꓳ= ꓠꓵ ꓠꓲꓹ ꓐꓰ ꓬꓲꓼ ꓠꓬꓲ ꓤ ꓠꓲꓹ ꓟ ꓙꓳ ꓟ ꓗꓪ ꓠꓬ ꓢꓯꓼ ꓪ ꓟꓬ ꓠꓬꓲ ꓪꓴꓽ_ ꓟ ꓥꓳ= ꓢ-ꓓꓯ  ꓢꓯꓼ ꓪ ꓠꓬ ꓣꓳꓸꓸ ꓡꓰ ꓟ ꓥꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ=

ꓪꓴ-ꓢ ꓡꓰ ꓣꓳ ꓔꓯ ꓬꓲ ꓙꓵꓹ ꓮ ꓟꓬꓹ ꓖꓶ ꓔ ꓡꓳ= ꓣꓳ ꓠꓲꓹ ꓟ ꓔꓯ ꓕꓽ ꓟꓶꓽ ꓡꓰ ꓝꓲ-ꓸ ꓬꓲ ꓫꓱꓸ ꓤ ꓟ ꓠꓲꓹ ꓟ ꓠꓬ ꓣꓳ ꓐꓰ ꓶ ꓥ ꓡꓳ ꓕꓱ ꓟ ꓔꓯ ꓣꓳ ꓮ ꓕꓯ ꓥ ꓟꓲ ꓓꓵꓽ ꓙ ꓠ ꓔ ꓡꓳ=

ꓠꓲꓹ ꓠꓵ_ ꓟ ꓬꓲ ꓤ ꓠꓬꓲ ꓤ ꓐꓴ ꓪꓴ-ꓢ ꓠꓬ ꓣꓳ ꓔꓯ ꓙꓵꓸꓹ_ ꓟ ꓠꓵ ꓠꓲꓹ ꓙꓳ_ ꓟ ꓥꓳ= ꓪꓴꓽ_ ꓟ ꓙꓵꓸꓹ ꓠꓲꓹ ꓙꓳ_ ꓟ ꓪꓴ-ꓢ ꓠꓬ ꓣꓳ ꓔꓯ ꓣꓳ ꓟꓯꓼ ꓛꓳ ꓒꓯꓹ ꓡꓰ ꓐꓰ ꓕꓲꓽ ꓪ ꓙꓸꓹ ꓫꓱꓽ ꓡꓳ= ꓬꓲ ꓠꓬ ꓮ ꓕꓯ ꓥ ꓟꓲ ꓠꓲꓹ ꓟ ꓟꓽ ꓐꓬ ꓡꓰ ꓡꓰ-ꓸ ꓣꓳ ꓠꓯꓼ ꓗꓪ ꓥꓳ ꓡꓳꓸ ꓓꓴ ꓮ ꓕꓯ ꓥ ꓟꓲ ꓖꓶ_ ꓟ ꓥꓳ= ꓪꓴ-ꓢ ꓠꓬ ꓣꓳ ꓐꓹ ꓐ ꓥ ꓡꓳ= ꓮꓽ ꓐ ꓕꓲꓽ ꓣꓳ ꓡꓰ ꓐꓰ ꓣꓳ ꓔꓯ ꓡꓳꓸ ꓙ ꓖꓶ_ ꓡꓳ= ꓙꓲ_ ꓟ ꓮꓽ ꓐ ꓡꓰ ꓐꓰ ꓙꓲ_ꓟ ꓢꓶꓸ ꓢꓶꓽ ꓔꓱꓼ ꓡ ꓠꓹ ꓟ ꓬꓲ ꓡꓰ ꓙ ꓖꓶ ꓔ ꓟ ꓥꓳ= ꓡꓳꓹ ꓬꓰ_ ꓟ ꓤꓶꓸꓹ ꓗꓪ ꓟꓽ ꓔꓬ-ꓸ ꓣꓳ ꓙꓸꓹ ꓫꓱꓽ_ ꓟ ꓗꓪ ꓪꓴꓽ_ ꓟ ꓙꓵꓸꓹ_ ꓟ ꓠꓲꓹ ꓟ ꓐꓰ ꓣꓳ ꓔꓯ ꓢꓯꓼ ꓖꓶ_ ꓡꓳ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓚ ꓟꓸ ꓖꓶ_ ꓡꓳ=

ꓬꓲꓸ ꓟꓶꓽ ꓗꓪ ꓐꓰ ꓣꓳ ꓮ ꓙꓵꓽ ꓐꓱ ꓶ ꓟꓹ ꓟ ꓟ-ꓡꓲ ꓠꓯꓼ ꓗꓪ ꓶꓽ ꓓꓰꓽ ꓪꓽ ꓘꓴ ꓖꓶꓽ ꓢꓲ-ꓸ ꓠꓲꓹ ꓟ ꓒꓳꓹ ꓬꓲꓼ ꓠꓹ ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓢꓯꓼ ꓖꓶ_ ꓡꓳ=

Add new comment

9 + 4 =