ꓘꓴ-ꓜꓲ-ꓞꓳ ꓚ ꓟꓲꓽ ꓕꓳꓽ ꓶ ꓗꓪ ꓐꓰ French ꓞꓳ ꓫꓵꓽ ꓐꓴ ꓘꓴ-ꓜꓲ-ꓞꓳ ꓘꓴꓽ ꓗꓪ ꓓꓵꓽ ꓡꓹ ꓟ ꓚꓱꓹ

ꓘꓴ-ꓜꓲ-ꓞꓳ ꓚ ꓟꓲꓽ ꓕꓳꓽ ꓶ ꓗꓪ ꓐꓰ French ꓞꓳ ꓫꓵꓽ ꓐꓴ ꓘꓴ-ꓜꓲ-ꓞꓳ ꓘꓴꓽ ꓗꓪ ꓓꓵꓽ ꓡꓹ ꓟ ꓚꓱꓹ

ꓘꓴ-ꓜꓲ-ꓞꓳ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓽ ꓦ ꓡꓱ ꓢꓴ ꓪ-ꓔꓲ ꓐꓴ ꓡꓰ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓮ ꓟꓬꓹ ꓫꓸ ꓟꓴ ꓫꓸ ꓚꓬꓼ ꓬꓰˍ ꓟ ꓙꓵꓹ ꓗꓪ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓮ ꓟꓬ ꓛꓲ ꓬꓰ ꓙ ꓗꓷ ꓪ= ꓘꓴ-ꓜꓲ-ꓞꓳ ꓠꓬ ꓙꓲ-ꓢꓴ ꓢꓲ ꓤ ꓐꓴ ꓔꓯ ꓕꓲ ꓣꓳ ꓐꓰ ꓕꓲ ꓣꓳ ꓠꓲꓹ ꓠꓵ ꓠꓹ ꓟ ꓟꓸ ꓖꓶˍ ꓟ ꓥ ꓡꓳ= ꓫꓸ ꓢꓴ ꓟꓶ ꓢꓴ ꓔꓯ ꓥˍ ꓟꓲ  ꓬꓰ ꓙ ꓢꓲ ꓠꓲꓹ ꓠꓵ ꓠꓹ ꓟ ꓟꓸ ꓖꓶˍ ꓟ ꓥ ꓡꓳ= AD 300 ꓘꓳꓼ ꓘꓴꓽ ꓗꓪ German ꓞꓳ ꓫꓵꓽ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓘꓳꓹ ꓣꓴ ꓡ ꓢꓴ ꓮ ꓟꓬꓹ ꓟꓬꓽ ꓡ ꓪ= ꓖꓳ ꓡꓱ ꓥ ꓟꓲ ꓡ ꓞꓳ ꓕꓲ ꓐꓱ ꓠꓬ ꓟꓽ ꓔꓱꓹ  ꓟ ꓟꓸ ꓒ ꓐꓴ ꓡꓰ ꓚˍ ꓟ ꓟꓸ ꓟꓲꓽ ꓔꓯ ꓠ ꓡꓳꓸ ꓢꓲ ꓠꓬꓲ꓾ ꓢꓲ ꓒ ꓬꓰ-ꓢꓴ ꓔꓯ ꓪꓴ-ꓢ ꓕꓲ ꓣꓳ ꓡꓰ ꓐꓰ ꓟ ꓘꓳꓹ ꓣꓴ= French ꓞꓳ ꓫꓵꓽ ꓐꓴ ꓥˍ ꓟꓲ ꓙꓲ-ꓢꓴ ꓢꓲ ꓤ ꓮ ꓟꓬꓹ ꓒꓬꓱꓼ ꓡ ꓪ=

ꓪ ꓔꓲ ꓚ-ꓡꓳ-ꓦꓰ ꓠꓬ French ꓗꓴꓷꓼ ꓔꓯ ꓙꓵꓽˍ ꓟ ꓕꓲ ꓙꓵꓹ ꓗꓪ ꓪ ꓔꓲ ꓠꓬ ꓪꓴ-ꓢ ꓔꓯ ꓟꓽ ꓦ ꓡꓱ ꓢꓴ ꓕꓲ ꓣꓳ  ꓥ ꓡꓳ= ꓖꓳ ꓡꓱ ꓥ ꓟꓲ ꓪ ꓔꓲ ꓬꓲ ꓦꓲꓻ ꓢꓲ ꓟ ꓠꓬ ꓪꓴ-ꓢ ꓦ ꓡꓱ ꓢꓴ ꓕꓲ ꓣꓳ ꓥ ꓡꓳ= ꓕꓲ ꓠꓬꓲ ꓙꓳˍ ꓕꓯ French ꓪ ꓔꓲ ꓠꓬ ꓮ ꓟꓬꓹ ꓟꓯꓼ ꓜꓴ ꓪꓴꓽˍ ꓟ Germany ꓪ ꓔꓲ ꓐꓰ ꓟꓯꓼ ꓢꓰꓼ ꓡꓯ ꓘꓳꓹ ꓟ ꓥ ꓡꓳ= ꓖꓳ ꓕꓯ French ꓪ ꓔꓲ ꓠꓬ ꓟꓯꓼ ꓒ ꓟꓽ ꓡꓳꓼ ꓟ ꓪꓴꓸ ꓠꓬꓲ꓾ ꓟꓯꓼ ꓢꓰꓼ ꓡꓯ ꓘꓳꓹ ꓕꓯ  ꓛꓳꓸ ꓡꓰ ꓠꓹ ꓟ ꓙꓵꓹ ꓛꓲ ꓡˍ ꓡꓳ=

French ꓪ ꓔꓲ ꓠꓬ ꓬꓲ ꓦꓲꓻ ꓢꓲ ꓟ ꓡꓰ ꓐꓯ ꓟꓸ ꓖꓶˍ ꓟ ꓢꓲ-ꓒ ꓬꓰ-ꓢꓴ ꓠꓬ ꓪꓽ ꓘꓴ ꓘꓶꓽ ꓔꓯ ꓠ ꓡꓳˍ ꓟ ꓪꓴ-ꓢ ꓥ ꓡꓳ ꓐꓯˍ ꓟ ꓬꓲ ꓢꓷˍ ꓡꓳ= ꓖꓳ ꓡꓱ ꓥ ꓟ ꓪꓴꓸ ꓠꓬꓲ ꓪ ꓔꓲ ꓠꓬ ꓪꓽ ꓘꓴˍ ꓡꓳ= ꓬꓰ-ꓢꓴ ꓠꓴ ꓥꓪ ꓔꓯ ꓟꓯꓼ ꓢꓰꓼ ꓡꓯ ꓘꓳꓹ ꓟ ꓗꓪ ꓧꓪꓸ ꓡꓰ ꓠꓹ ꓟ ꓬꓰ ꓙ ꓡꓯ ꓐꓰ ꓓꓰˍ ꓡꓳ=ꓢꓲ ꓒ ꓬꓰ-ꓢꓴ ꓥˍ ꓟꓲ French ꓪ ꓔꓲ ꓪꓽ ꓘꓴ ꓘꓶꓽ ꓔꓯ ꓠ ꓡꓳꓸ ꓖꓶꓽ ꓗꓷꓳ= A.D 490 ꓘꓳꓼ ꓕꓯ French ꓪ ꓔꓲ ꓠꓬ ꓬꓲ ꓐꓰ ꓕꓲ ꓪꓺꓽ ꓢꓷꓸ ꓠꓲꓹ ꓙꓳ ꓒ 3000 ꓣꓳ ꓘꓴ-ꓜꓲ-ꓞꓳ ꓘꓴꓽ ꓗꓪ ꓓꓵꓽ ꓡ ꓪ=

ꓖꓳ ꓔꓲ ꓠꓬꓲ  ꓗꓪ ꓐꓰ French ꓗꓴꓷꓼ ꓗꓪ ꓠꓬ  ꓢꓲ ꓒ ꓬꓰ-ꓢꓴ ꓕꓯ ꓦꓻ ꓡꓱ ꓢꓴ ꓮ ꓟꓬ ꓛꓲ ꓟꓬ ꓡ ꓪ=