Constantinople ꓡꓳ ꓒꓱ ꓐꓬꓻ ꓡꓰ ꓟ ꓚꓱ, 2 ꓕꓱ

Constantinople ꓡꓳ ꓒꓱ ꓐꓬꓻ ꓡꓰ ꓟ ꓚꓱ, 2 ꓕꓱ

ꓪ ꓔꓲ Alexios (5) ꓠꓬ ꓪ ꓔꓲ Alexios (4) ꓡꓰ ꓟꓯꓼ ꓓꓶꓽ ꓙ ꓖꓶ ꓢꓴ Crusade ꓟꓯꓼ ꓜꓴꓻ ꓔꓯ ꓒꓴ ꓖꓶ ꓠ, ꓟ ꓐꓯ ꓗꓷ ꓥ ꓟꓲ ꓒꓴ ꓖꓶ ꓠꓲ, ꓟꓽ ꓫꓵꓽ ꓖꓳ ꓡꓱ  ꓥ ꓟ ꓪꓴ. ꓠꓬꓲ Crusade ꓟꓯꓼ ꓜꓴꓻ ꓠꓬ Constantinople ꓡꓳ ꓒꓱ ꓔꓯ ꓟꓯꓼ ꓢꓰꓼ ꓟꓯꓼ ꓓꓶꓽ ꓠ, ꓟ ꓙꓽ ꓖꓶ ꓗꓷꓳ꓿ ꓒꓴ ꓫꓵꓽ ꓑꓶ. ꓓꓴ ꓛꓳ ꓐꓯ ꓥ ꓟꓲ ꓛꓴ ꓙꓳ ꓢꓴ ꓒꓬꓱꓼ ꓡ ꓥ ꓐꓯ ꓔ ꓟ ꓡꓰ ꓐꓰ ꓦꓻ ꓡꓱ ꓢꓴ ꓙꓲ ꓢꓴ ꓢꓲꓺ ꓤ ꓐꓴ ꓔꓬ ꓟ Constantinople ꓡꓳ ꓒꓱ ꓔꓯ Crusade ꓟꓯꓼ ꓐꓴ ꓡꓰ ꓓꓶꓽ ꓗꓷꓳ꓿ ꓕꓱ ꓫꓵꓽ ꓪꓴꓽ ꓒꓬꓱꓼ ꓡ ꓟ ꓪꓴ. ꓠꓬꓲ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ. ꓟꓴ ꓢꓴ ꓐꓴ ꓘꓴ ꓗꓪ ꓮ ꓟꓬ, ꓛꓲ ꓓꓴ ꓙ ꓫ. ꓓꓴ ꓒꓬꓱꓼ ꓡꓰꓳ꓿

ꓔꓲꓺ ꓒ ꓪ ꓔꓲ Innocent (3) ꓠꓬ ꓙꓲ ꓢꓴ ꓢꓲꓺ ꓤ ꓡꓳ ꓒꓱ ꓥ ꓟꓲ Constantinople ꓔꓯ ꓟꓯꓼ ꓟꓽ ꓓꓶꓽ ꓟꓽ ꓢꓰꓼ ꓠ, ꓟ ꓐꓯ ꓑꓶ ꓗꓷ ꓥ ꓟꓲ Crusade ꓟꓯꓼ ꓒ ꓐꓴ ꓟꓽ ꓠ, ꓡꓳ ꓟ ꓪꓴ. ꓠꓬꓲ ꓫꓵꓽ ꓪꓴꓽ ꓒꓬꓱꓼ ꓡ ꓟ ꓥ ꓡꓳ꓿ AD 1203 4 ꓦ ꓟ 12 ꓠꓬꓲ ꓕꓯ Crusade  ꓟꓯꓼ ꓜꓴꓻ ꓡꓰ Constantinople ꓡꓳ ꓒꓱ ꓔꓯ ꓟꓯꓼ ꓓꓶ ꓧꓪ. ꓡꓰꓳ꓿ Constantinople ꓡꓳ ꓒꓱ ꓗꓪ ꓔꓬ ꓟ ꓙꓲ ꓢꓴ ꓢꓲꓺ ꓤ ꓐꓴ ꓦꓲꓻ (15000) ꓮ ꓔꓳ. ꓐꓬ ꓡꓰꓳ꓿ ꓔꓱ ꓡꓱ ꓐꓰ Crusade ꓟꓯꓼ ꓜꓴꓻ ꓠꓬ ꓮ ꓙꓲꓻ ꓟ ꓟꓬꓱꓽ ꓮ ꓟꓬ ꓬꓰ ꓗꓷ ꓟ ꓥ ꓡꓳ꓿

ꓪꓽ ꓘꓴ ꓦꓲꓻ ꓐꓰ ꓙꓲ ꓢꓴ ꓢꓲꓺ ꓤ ꓐꓴ ꓔꓬ ꓦꓲꓻ ꓮ ꓟꓬ, ꓔꓯ ꓐꓬ ꓡꓰ ꓝꓲ ꓟ ꓪꓴ. ꓠꓬꓲ Crusade ꓟꓯꓼ ꓜꓴꓻ ꓔꓯ ꓔꓲꓺ ꓒ ꓪ ꓔꓲ ꓠꓬ ꓮ ꓘꓶ. ꓛꓲ ꓠꓲ, ꓟ ꓟꓽ ꓗ, ꓛꓲ ꓡꓰꓳ꓿ Crusade ꓟꓯꓼ ꓜꓴꓻ ꓠꓬ ꓬꓲ ꓪ ꓔꓬ ꓟꓵꓽ ꓗꓪ ꓡ ꓙꓰꓳ꓿ Crusade ꓟꓯꓼ ꓜꓴꓻ ꓠꓬ ꓙꓱ‐ꓣꓴ‐ꓢ‐ꓡꓱ ꓡꓳ ꓒꓱ (Holy Land) ꓗꓪ ꓛꓲ ꓟꓽ ꓙꓰ ꓛꓲ ꓙꓽ ꓖꓴ ꓕꓲ ꓕꓱ ꓗꓪ ꓐꓰ ꓡꓽ ꓙꓰ ꓟ ꓥ ꓡꓳ꓿ ꓕꓱ ꓡꓱ ꓐꓰ 1204 ꓘꓳꓼ ꓔꓯ ꓘꓴ ꓜꓲꓼ ꓞꓳ ꓘꓴ ꓗꓪ ꓟꓽ ꓪ ꓡꓯ ꓘꓳ ꓓꓴ ꓮ ꓟꓬ ꓙꓳ ꓡꓰꓳ꓿