ꓐꓹ ꓐ ꓟꓹ ꓟ ꓣꓱꓽ ꓢꓴ ꓕꓽ ꓐꓴ ꓠꓲꓹ ꓟ

ꓪꓴ- ꓢ ꓔꓯ ꓠꓲꓹ ꓠꓵ ꓗꓴꓸ- ꓟ ꓤꓽ ꓠꓵ ꓤꓽ ꓔꓯ -ꓸ ꓪꓴ-ꓢ ꓶꓼ ꓤꓽ ꓫꓱꓹ ꓤꓽ ꓮ ꓟꓬ ꓖꓶ_ ꓡꓳ= ꓬꓲꓸ ꓡꓰ ꓤꓽ ꓠꓱ ꓤꓽ ꓖꓳ ꓟ ꓔꓯ -ꓸ ꓠꓬꓲ ꓙ ꓡꓳꓸ ꓙ ꓖꓶ- ꓡꓳ= ꓔꓹ ꓙ ꓖꓶ_ ꓡꓳ= ꓗꓪꓼ ꓫꓵꓼ ꓖꓶ_ꓡꓳ= ꓤꓽ ꓠꓱꓽ ꓤ ꓖꓳ ꓟ ꓠꓬ ꓢꓲ- ꓫꓬ- ꓟ- ꓦ ꓠꓯꓸꓼ ꓗꓪ ꓕꓲꓽ ꓠꓬꓲ ꓕꓲꓽ ꓒꓳꓹ ꓪꓴꓽ ꓡꓸ- ꓟꓴ ꓡ ꓢꓲ ꓢꓯꓼ ꓙꓳ ꓡ- ꓡꓳ= ꓘꓶꓽ ꓫꓵꓼ ꓡꓵ ꓗꓪ ꓓ- ꓪꓵ ꓔꓯ ꓡꓳꓸ ꓠꓬꓲ= ꓪꓴ-ꓢ ꓡꓰ ꓬꓲꓸ ꓔꓯ ꓵꓸꓸ ꓖꓴ ꓟ ꓓ ꓟ ꓣꓱꓽ ꓛꓰꓽ ꓖꓶ_ ꓡꓳ= ꓬꓲꓸ ꓖꓳ ꓓꓱꓽ ꓠꓬ-ꓸ ꓮ ꓘꓶꓸ ꓣꓳꓸ- ꓟꓲ ꓡ ꓞꓳ ꓓ ꓟ ꓔꓯ ꓓꓶꓽ ꓧꓪꓸ ꓘꓴꓸ-ꓸ ꓠꓲꓹ ꓠꓵꓹ ꓗꓴꓸ- ꓠꓬꓲ ꓥ ꓡꓳ= ꓤꓽ ꓠꓱ ꓤ ꓐꓴ ꓪꓴ-ꓢ ꓔꓯ ꓠꓲꓹ ꓠꓵ ꓡꓴ_ ꓕꓯ-ꓸ ꓐꓹ ꓐ ꓟꓹ ꓟ ꓣꓱꓽ ꓢꓴ ꓮ ꓘꓶꓸ ꓪꓴꓽ ꓧꓶ ꓟꓽ ꓛꓵ= ꓐꓹ ꓐ ꓟꓹ ꓟ ꓠꓬ ꓚꓲꓸ ꓛꓬꓼ ꓤꓽ ꓠꓱ ꓐꓴ_ ꓐꓰ ꓮ ꓕꓯ_ ꓟꓲ ꓕꓲꓽ ꓞꓲꓼ ꓕꓲꓽ ꓡꓰꓸ ꓐꓰ ꓟꓽ ꓔꓬ= ꓪꓴ- ꓢ ꓠꓽ ꓮ ꓕꓯ_ ꓟꓲ ꓔꓬ ꓡꓳ= ꓣꓳꓽ ꓠꓬ-ꓸ ꓚꓲꓸ ꓛꓬꓼ ꓤꓽ ꓠꓱ-ꓸ ꓮ ꓗꓪ ꓙꓰ_ ꓟ ꓗꓪ -ꓸ ꓖꓼ ꓙꓰ ꓟꓶ ꓟꓽ ꓘꓴ_ ꓟꓲ-ꓸ ꓪꓴ-ꓢ ꓠꓽ-ꓸ ꓬꓲꓸ ꓪ ꓐꓴ ꓮ ꓡꓰ ꓗꓪ ꓙꓰ_ ꓠꓬ-ꓸ ꓮ ꓡꓰ ꓗꓪ ꓔꓬ ꓡꓳ= ꓣꓳꓽ ꓤꓽ ꓠꓱ ꓪꓴ-ꓢ ꓔꓯ ꓟꓽ ꓙꓳꓸꓸ-ꓸ ꓪꓴ-ꓢ ꓔꓯ  ꓟꓽ ꓠꓵ ꓕꓯ ꓠ-ꓸ ꓐꓹ ꓐꓹ ꓟꓹ ꓟ ꓐꓴ ꓔꓯ_ ꓟꓲ ꓒꓵꓽ_ ꓥꓳ-ꓸ ꓐꓰ ꓠꓵ ꓓꓳꓽ ꓙ ꓡ? ꓪꓴ-ꓢ ꓔꓯ ꓟꓽ ꓙꓳꓸꓸ ꓟ ꓤꓽ ꓠꓱ ꓤꓽ ꓠꓬ ꓮꓽ ꓟ ꓔꓯ_ ꓟꓲ ꓟꓽ ꓒꓴꓽ = ꓟꓽ ꓙꓳꓸꓸ= ꓖꓳ ꓡꓱ ꓠꓬꓲ ꓚꓲꓸ ꓛꓬꓼ ꓤꓽ ꓠꓱ ꓤꓽ ꓐꓴ ꓔꓯ-ꓸ ꓪꓴ-ꓢ ꓔꓯ ꓠꓲꓹ ꓠꓵ ꓗꓴꓸ ꓠ ꓟ ꓢꓯꓼ ꓕ ꓡꓳ= ꓚꓲꓸ ꓛꓬꓼ ꓤꓽ ꓠꓱ ꓔꓯ ꓪꓴ-ꓢ ꓔꓯ-ꓸ ꓔꓲꓸꓸ ꓡꓴ ꓖꓶꓽ ꓗꓴꓸ- ꓟ ꓐꓹ ꓐ ꓟꓹ ꓟ ꓪꓴ-ꓢ ꓶꓼ ꓤꓽ ꓫꓱꓹ ꓤꓽ ꓖꓶ_ ꓡꓳ= ꓬꓲꓸ ꓪ ꓦꓲ ꓗꓪ ꓮ ꓕꓯ_ ꓟꓲ ꓢꓲ ꓡꓲ ꓟ ꓙꓳ_ ꓡꓳ= ꓦꓲꓸꓹ ꓘꓴ ꓠꓯꓸꓼ ꓗꓪ ꓫꓸ ꓥ_ ꓟꓲ-ꓸ ꓢꓸꓹ ꓥ_ ꓟꓲ ꓪꓴ-ꓢ ꓣꓱꓽ ꓛꓰꓽ ꓠꓯꓸꓼ ꓗꓪ ꓗ ꓛꓲꓽ ꓛꓲꓽ ꓡꓰꓽ ꓓ_ ꓥꓳ= ꓢꓷꓹ ꓠꓲꓹ ꓮ ꓘꓶꓸ  ꓢꓷꓸ- ꓟꓲ-ꓸ ꓮ ꓡꓲ ꓗꓪ _ꓟꓲ-ꓸ ꓟꓽ ꓪꓽ ꓘꓪꓽ ꓟ ꓟꓳ ꓠꓬꓲ_ ꓡꓳ ꓟꓽ ꓥ ꓡ?= ꓠꓲꓹ ꓟ ꓠꓯꓸꓼ ꓗꓪ ꓪꓴ-ꓢ ꓟꓽ ꓔꓬ_ ꓟ ꓠꓱ ꓤꓽ ꓔꓯ ꓠꓬ-ꓸ ꓬꓲꓸ ꓪ ꓐꓹ ꓐ ꓟꓹ ꓟ_ ꓟꓲ-ꓸ ꓟꓽ ꓪꓽ ꓘꓪꓽ= ꓚꓳ ꓡꓳ ꓚꓳ ꓐꓴ_ ꓟꓲ ꓦ ꓡꓱ ꓟꓽ ꓠ=