Mother Teresa ꓚꓱꓼ

ꓟꓳꓔꓧꓰꓣ ꓔꓰꓣꓰꓢꓮ ꓚꓱꓹ

ꓟꓳꓔꓧꓰꓣ ꓔꓰꓣꓰꓢꓮ ꓠꓬ  ꓗ-ꓔꓳ-ꓡꓲꓗ ꓘꓴ ꓞꓲ ꓜꓳ ꓗꓪ ꓟ ꓔꓲꓺ ꓟ ꓕꓲ ꓣꓳ ꓥ ꓡꓳ= ꓬꓲ ꓠꓬ ꓬꓲꓸ ꓕꓲ ꓤꓶꓻ ꓡꓱꓸꓼ ꓔꓯ ꓪꓴ-ꓢ ꓔꓯ ꓡꓯ ꓙꓱꓽ ꓔ ꓢꓲ꓾ ꓪꓴ-ꓢ ꓟꓬꓱꓽ ꓬꓰ ꓢꓴ ꓕꓲ ꓣꓳ ꓥ ꓡꓳ= ꓫꓸ ꓢꓴ ꓟꓷꓼ ꓢꓴ ꓐꓰ꓾ ꓛꓲꓺ ꓒꓯꓹ ꓡꓯ ꓒꓯꓹ ꓡꓵꓻ ꓟꓽ ꓘꓴ ꓢꓴ꓾ ꓠ ꓢꓴ ꓒꓬ ꓢꓴ ꓔꓯ ꓬꓰ ꓙ ꓔ ꓙ ꓢꓴ ꓕꓲ ꓣꓳ ꓥ ꓡꓳ= ꓬꓲ ꓠꓬ ꓚꓮlꓚꓴꓔꓔꓮ  ꓡꓳ ꓒꓱ ꓗꓪ ꓔꓬ ꓢꓲ ꓟꓬꓱꓽ ꓔꓯ ꓬꓰ ꓗꓷꓳ= ꓬꓲ ꓠꓬ ꓟꓰꓢꓢꓲꓳꓠꓮꓣꓬ ꓳꓝ ꓚꓧꓮꓣꓲꓔꓬ ꓐꓯˍ ꓟ꓾ ꓠꓵ ꓠꓲꓹ ꓗꓪ ꓐꓰ ꓪꓴ-ꓢ ꓶ ꓓꓳꓽ ꓫꓱꓹ ꓓꓳꓽ ꓚˍ ꓜꓴꓻ ꓔꓯ ꓬꓲꓸ ꓪꓴꓸ ꓲꓠꓓꓲꓮ ꓗꓴꓷ ꓗꓪ  ꓔꓶꓻ ꓗꓷꓳ= ꓕꓱ ꓟ ꓠꓬ ꓕꓲ ꓞꓲꓼ ꓡꓱꓸꓼ ꓔꓯ ꓪꓴ-ꓢ ꓔꓯ ꓡꓯ ꓙꓱꓻ ꓔꓸ ꓢꓴ ꓕꓲ ꓟ ꓬꓰˍ ꓟ ꓜꓴ ꓥ ꓡꓳ= ꓬꓲ ꓜꓴ ꓠꓬ ꓬꓰ ꓙ ꓔ ꓙ ꓢꓴ ꓟꓽ ꓙꓳ ꓟ ꓡ ꓞꓳ ꓔꓯ ꓬꓰ ꓙ ꓢꓴ ꓜꓴ ꓥ ꓡꓳ=

1979 ꓘꓳꓼ ꓕꓯ ꓟꓳꓔꓧꓰꓣ ꓔꓰꓣꓰꓢꓮ ꓠꓬ꓾ ꓔꓧꓰ ꓠꓳꓐꓡꓰ ꓑꓰꓮꓚꓰ ꓑꓣꓲꓚꓰ ꓐꓯˍ ꓟ꓾ ꓟꓬꓱꓽ ꓠꓯꓸꓼ ꓗꓪ ꓢꓲꓺ ꓡꓲꓺ ꓗꓷ ꓡꓰ ꓠ ꓹ ꓟ ꓐꓱ ꓶ ꓢꓯꓼ ꓕꓵꓼ ꓢꓴ ꓔꓯ ꓖꓶˍ ꓟ꓾ ꓪꓴꓽ ꓡꓳꓹ ꓬꓰ ꓟ ꓡꓯꓼ ꓫꓴꓻ ꓔꓯ ꓘꓳꓹ ꓣꓳ ꓟꓶ ꓡꓰ ꓪ= ꓬꓲ ꓠꓬ ꓠꓵ ꓠꓲꓹ ꓐꓱ ꓶ ꓟꓬꓱꓽ ꓬꓰˍ ꓟ ꓢꓷ ꓡꓰ ꓓꓴ ꓓ ꓟ ꓕꓲ ꓟ ꓗꓷ ꓡꓰꓳ= 2016 ꓘꓳꓼ ꓕꓯ ꓠꓬ ꓬꓲ ꓔꓯ꓾ ꓣꓳꓟꓮ ꓗ-ꓔꓳ-ꓡꓲꓗ ꓘꓴ ꓞꓲ ꓜꓳ ꓗꓪ ꓐꓰ ꓙꓲꓻ ꓫꓬ ꓢꓴ ꓕꓲ ꓣꓳ ꓐꓰ ꓬꓲ ꓔꓯ ꓟꓬꓱꓺ ꓓꓳꓽ ꓖꓶ ꓗꓷꓳ= ꓟꓳꓔꓧꓰꓣ ꓔꓰꓣꓰꓢꓮ ꓠꓬ 1910ꓘꓳꓼ 8ꓦ 26 ꓠꓬꓲ ꓕꓯ ꓬꓲ ꓔꓯ꓾ ꓢꓗꓳꓑꓙꓰ ꓡꓳ ꓒꓱ ꓟꓮꓚꓰꓓꓳꓠꓲꓮ ꓗꓴꓷꓼ ꓗꓪ ꓦꓵꓻ ꓗꓷꓳ=

ꓬꓲ ꓞꓲꓼ 18 ꓘꓳꓼ ꓡꓳ ꓕꓯ ꓬꓲ ꓠꓬ꓾ ꓔꓲꓺ ꓟ ꓕꓲ ꓣꓳ ꓒꓬꓱꓼ ꓠꓲꓹ ꓫꓵˍ ꓟ ꓪꓴꓸ ꓠꓬꓲ꓾ ꓲꓣꓰꓡꓮꓠꓓ ꓗꓴꓷꓼ ꓗꓪ ꓙꓰ ꓢꓲ ꓪꓴ-ꓢ ꓐꓯ ꓘꓶꓽ ꓐꓰ ꓟꓲꓺ ꓠꓯꓺ ꓢꓷ ꓠꓲꓹ ꓔꓯ ꓢꓳ ꓣꓴ ꓟꓶ ꓡꓰ ꓪ= ꓗ ꓠꓯꓸ ꓬꓲ ꓔꓯ ꓔꓲꓺ ꓟ  ꓡꓳꓣꓲꓔꓳ ꓐꓰ ꓕꓲ ꓪ꓾ ꓲꓠꓓꓲꓮ ꓗꓴꓷꓼ ꓗꓪ ꓪꓴ- ꓢ  ꓟꓬꓱꓽ ꓬꓰ ꓠꓹ ꓟ ꓝꓲ ꓩꓴ ꓗꓷꓳ= 1931 ꓘꓳꓽ ꓕꓯ ꓬꓲ ꓠꓬ꓾ ꓙꓬꓻ ꓫꓬꓹ ꓟ ꓟꓮꓣꓬ ꓔꓰꓣꓰꓢꓮ ꓟꓬꓱꓺ ꓔꓯ ꓘꓳꓹ ꓣꓴ ꓢꓲ ꓔꓲꓺ ꓟ ꓕꓲ ꓣꓳ ꓒꓬꓱꓼ ꓡꓻ ꓪ= ꓬꓲ ꓠꓬ ꓕꓳ ꓶ ꓟꓸ ꓖꓶꓽ ꓠꓹ ꓟ ꓐꓱ ꓶ ꓡ ꓟ ꓥ ꓡꓳ= ꓖꓳ ꓡꓱ ꓥˍ  ꓟ ꓚꓮꓚꓴꓡꓮꓗꓮꓔꓮ ꓗꓪ ꓬꓲꓼ ꓙꓰˍ ꓕꓯ ꓫꓸ ꓢꓴ ꓟꓷꓼ ꓢꓴ ꓐꓰ꓾ ꓠ ꓢꓴ ꓒꓬꓽ ꓢꓴ ꓮ ꓟꓬꓹ ꓔꓯ ꓡꓳꓸ ꓟꓳ ꓗꓷ ꓕꓯ꓾ ꓬꓲ ꓠꓬ ꓕꓳ ꓶ ꓟꓸ ꓠꓹ ꓟ ꓕꓯ ꓢꓲꓽ꓾ ꓠꓵ ꓠꓲꓹ ꓟꓬꓱꓽ ꓬꓰ ꓠꓹ ꓟ ꓓꓵꓽ ꓙ ꓗꓷ ꓪ= ꓟꓳꓔꓧꓰꓣ ꓔꓰꓣꓰꓢꓮ ꓠꓬ ꓮ ꓟꓬꓹ ꓢꓯꓼ ꓕꓵꓼ ꓢꓲ꓾ ꓫ ꓢꓴ ꓟꓷꓼ ꓢꓴ ꓔꓯ ꓬꓰ ꓙˍ ꓟ ꓜꓴꓻ ꓔꓯ ꓗꓴꓷꓼ ꓮ ꓟꓬꓹ ꓗꓪ ꓔꓶꓻ ꓪ ꓡꓰꓳ= 1997 ꓘꓳꓼ ꓕꓯ ꓚꓧꓮꓣꓲꓔꓬ ꓳꓝ ꓟꓰꓢꓢꓲꓳꓠꓮꓣꓬ ꓜꓴꓻ ꓠꓬ ꓔꓲ ꓟ 4000 ꓣꓳ ꓐꓰ꓾ ꓗꓴꓷꓼ 123 ꓗꓴꓷꓼ  ꓔꓶꓻ ꓪ ꓡꓰꓳ= ꓬꓲ ꓠꓬ 1997 ꓘꓳꓼ 9ꓦ 5ꓠꓬꓲ꓾ ꓬꓲ ꓘꓳꓼ 87 ꓘꓳꓼ ꓕꓯ꓾ ꓲꓠꓓꓲꓮ ꓗꓴꓷꓼ ꓚꓮꓡꓚꓴꓔꓔꓮ ꓗꓪ ꓟꓲꓺ ꓠꓯꓺ ꓗꓪ ꓐꓰ ꓧꓪꓽ ꓖꓳ ꓓꓱꓽ ꓡꓳꓹ ꓬꓰ ꓪ=2003 ꓘꓳꓼ ꓕꓯ ꓟꓳꓔꓧꓰꓣ ꓔꓰꓣꓰꓢꓮ ꓔꓯ ꓔꓲꓺ ꓒ ꓪ ꓔꓲꓸ ꓒꓳ-ꓡꓳ ꓲꓲ ꓡꓰ ꓬꓲꓸ ꓔꓯ ꓦꓮꓔꓲꓚꓮꓠ ꓚꓲꓔꓬ ꓗꓪ ꓶꓼ ꓥꓳꓽ ꓙꓱꓽ ꓖꓶ ꓗꓷ ꓪ=