ꓕꓲ ꓖ ꓕꓲ ꓧꓪ, ꓣꓳ ꓐꓴ ꓠꓬ ꓦꓲꓸꓹ ꓘꓴ: ꓗꓪ ꓔꓬ ꓠꓲꓹ ꓟꓽ ꓫꓵ ꓟ ꓬꓲ ꓙꓵꓹ ꓥ ꓟꓲ ꓙꓳ ꓡꓳ=

ꓕꓲ ꓖ ꓕꓲ ꓧꓪ, ꓣꓳ ꓐꓴ ꓠꓬ ꓦꓲꓸꓹ ꓘꓴ: ꓗꓪ ꓔꓬ ꓟꓽ ꓠꓲꓹ ꓫꓵ ꓟ ꓬꓲ ꓙꓵꓹ ꓥ ꓟꓲ ꓙꓳ ꓡꓳ= ꓟꓬ ꓠꓬꓲ ꓐꓭ ꓠꓬꓲ ꓔꓬ ꓟꓽ ꓠꓲꓹ ꓫꓵ ꓟ ꓠꓬ ꓞꓳ ꓡꓱ ꓤ ꓐꓴ ꓥ ꓡꓳ= ꓦꓲꓸꓹ ꓘꓴ: ꓗꓪ ꓔꓬ ꓕꓯ ꓟꓽ ꓗꓹ ꓛꓲ ꓟ꓾ ꓞꓳ ꓟꓳ ꓡꓰ ꓙꓲˍ ꓟ ꓚꓱꓹ ꓗꓪ ꓫꓬꓹ Tꓱ, ꓟ ꓔꓯ ꓟ ꓠꓲꓹ ꓠꓵ ꓟ ꓕꓱ ꓡꓱ ꓫꓵ ꓑꓶ ꓓꓴ ꓞꓳ ꓡꓱ ꓐꓴ ꓦꓲꓸꓹ ꓘꓴꓽ ꓗꓪ ꓔꓬ ꓠꓲꓹ ꓟꓽ ꓫꓵ ꓟ ꓗꓷ ꓡ ꓡꓳ= ꓠꓯꓸ ꓐꓯꓼ ꓕꓲ ꓖ ꓗꓪ ꓙꓰ ꓕꓯ ꓢꓲ꓾ꓥꓪ ꓐꓱ ꓶ ꓗꓹ ꓛꓲ ꓓꓴ ꓙꓳ ꓡ ꓥꓳ꓾ ꓐꓰ ꓓꓵꓽ ꓙ ꓢꓲ꓾ꓦꓲꓸꓹ ꓘꓴ ꓗꓪ ꓐꓰ ꓓꓳꓸꓹ ꓠꓲꓹ ꓫꓵ ꓟ ꓠꓲꓹ ꓟ ꓙꓳ ꓡ ꓡꓳ=

ꓕꓱ ꓡꓱ ꓫꓵ ꓠꓬ ꓕꓲ ꓖ ꓕꓲ ꓧꓪꓹ ꓣꓳ ꓐꓴ ꓔꓳꓹ ꓜꓳ ꓠꓬꓲ ꓡꓳ꓾ ꓣꓳ ꓞꓳ ꓡꓱ ꓐꓴ ꓠꓬ ꓞꓳ ꓟꓳ ꓦꓲꓸꓹ ꓗꓪ ꓔꓬ ꓕꓯ ꓮ ꓟꓬꓹ ꓛꓲ ꓗꓹ ꓛꓲ ꓟ ꓔꓯ ꓟꓲ ꓡꓰ ꓗꓷ ꓡꓳ= ꓶ ꓤ ꓟꓵꓽ ꓗꓪ ꓛꓲ ꓬꓰ ꓕꓯ ꓢꓲ꓾ ꓦꓲꓸꓹ ꓘꓴꓽ ꓗꓪ ꓮ ꓟꓬꓹ ꓛꓲ ꓗꓹ ꓛꓲ ꓟ ꓔꓯ ꓓꓵꓽ ꓙ ꓛꓲ ꓡ ꓡꓳ= ꓟꓬ ꓠꓬꓲ ꓐꓭ ꓠꓬꓲ ꓣꓳ ꓠꓸꓹ ꓓꓴ ꓔꓳꓹ ꓜꓳ ꓕꓯ ꓣꓳ ꓟꓬꓱꓽ ꓬꓰ ꓢꓲ꓾ ꓮ ꓘꓶꓸ ꓪꓴ ꓧꓶ ꓕꓯ ꓣꓳ ꓔꓯ ꓬꓰ ꓙ ꓢꓴ ꓟꓽ ꓔꓬ ꓕꓯ ꓦꓲꓸꓹ ꓘꓴ ꓗꓪ ꓣꓳ ꓮꓽ ꓐꓽ ꓮ ꓟ ꓐꓰ ꓠꓬꓲ ꓤ ꓠꓬꓲ ꓟ ꓐꓴ ꓔꓯ ꓓꓵꓽ ꓙ ꓛꓲ ꓡ ꓡꓳ= ꓕꓱ ꓟ ꓠꓬꓲ ꓥꓪ ꓚꓲꓸ ꓛꓬ ꓥ ꓟꓲ ꓔꓳꓹ ꓜꓳ ꓗꓷ ꓟ ꓥ ꓡꓳ=

ꓟꓽ ꓞꓲ ꓣꓳ ꓜ ꓠꓲꓹ ꓫꓵˍ ꓟ ꓔꓯ ꓖꓶ ꓜ ꓡ ꓢꓴ ꓟꓽ ꓔꓬ ꓕꓯ ꓶ ꓤ ꓟꓵꓽ ꓗꓪ ꓔꓬ ꓟ ꓕꓲ ꓙꓵꓹ ꓔꓯ ꓠꓲꓹ ꓜꓳꓽ ꓡ ꓡꓳ= ꓖꓳ ꓕꓯ ꓢꓲ ꓦꓲꓸꓹ ꓘꓴꓽ ꓐꓯ ꓟ ꓮ ꓟꓬꓹ ꓗꓪ ꓛꓲ ꓙꓲˍ ꓟ ꓠꓵ ꓠꓲꓹ ꓮ ꓟꓬ ꓗꓪ ꓛꓲ ꓙꓳ ꓟ ꓦ ꓡꓱ ꓓꓴ ꓙꓳ ꓟ ꓔꓯ ꓢꓷꓸ ꓡ ꓡꓳ= ꓣꓳ ꓟꓬꓱꓽ ꓬꓰ ꓢꓲ꓾ ꓮ ꓘꓶꓸ ꓪꓴ ꓧꓶ ꓓꓴ ꓙꓳ ꓕꓯ ꓦꓲꓸꓹ ꓘꓴ ꓗꓪ ꓔꓬ ꓐꓯ ꓠ ꓮꓽ ꓟ ꓡꓰ ꓢꓯꓼ ꓖꓶ ꓘꓶꓽ ꓕꓱ ꓖꓶ ꓡ ꓓꓴ ꓥꓳ ꓐꓰ ꓓꓵꓽ ꓙ ꓡ ꓡꓳ= ꓣꓳ ꓕꓲ ꓣꓳ ꓡꓰ ꓔꓬ ꓗꓷ ꓟ ꓦꓯꓼ ꓠꓬꓲ ꓟꓶ ꓫꓵ ꓡ ꓕꓯ ꓕꓲ ꓦꓲꓸꓹ ꓡ ꓞꓳ ꓐꓰ ꓕꓲ ꓠꓲꓹ ꓕꓲ ꓪ ꓔꓬ ꓗꓷ ꓟ ꓦꓯꓼ ꓠꓬꓲ ꓔꓯ ꓓꓵꓽ ꓙ ꓛꓲ ꓡ ꓡꓳ=  ꓔꓬ ꓠꓲꓹ ꓟꓽ ꓫꓵ ꓐꓰ ꓓꓵꓽ ꓙ ꓗꓷ ꓟ ꓦꓲꓸꓹ ꓘꓴꓽ ꓔꓯ ꓮ ꓟꓶ ꓢꓲ ꓙꓬ ꓡ ꓡꓳ= ꓖꓳ ꓡꓰ ꓔ ꓟ ꓪꓴꓸ ꓠꓬꓲ ꓣꓳ ꓞꓳ ꓟꓳ ꓦꓲꓸꓹ ꓘꓴꓽ ꓗꓪ ꓔꓬ ꓟ ꓕꓲ ꓙꓵꓹ ꓗꓪ ꓮꓽ ꓐꓽ ꓮ ꓟ ꓔꓯ ꓞꓳ ꓒꓵꓽ ꓪ ꓡꓰ ꓝꓲ꓾ꓬꓰ ꓙ ꓪ ꓡꓰ ꓝꓲ꓾ꓞꓳ ꓟꓳ ꓡꓰ ꓟꓸ ꓖꓶ ꓔꓯ ꓠ ꓡꓳꓹ ꓘꓳꓹ ꓣꓴ ꓪ ꓡꓰ ꓝꓲ= ꓬꓲ ꓙꓵꓹ ꓙꓳ ꓟ ꓕꓲ ꓝꓲꓸ ꓗꓪ ꓮꓽ ꓐꓽ ꓮ ꓟ ꓠꓬꓲ ꓤ ꓠꓬꓲ ꓟ ꓐꓴ ꓐꓰ ꓕꓲ ꓠꓲꓹ ꓕꓲ ꓪ ꓔꓬ ꓪ ꓡꓰ ꓝꓲ=