ꓧꓪ: ꓖꓳ ꓓꓱ ꓔꓬ ꓢ ꓟ ꓮ ꓟ ꓐꓴ ꓤꓶꓸꓹ (family)

ꓧꓪ: ꓖꓳ ꓓꓱ ꓔꓬ ꓢ ꓟ ꓮ ꓟ ꓐꓴ ꓤꓶꓸꓹ

ꓟꓲ ꓠꓯ ꓕꓯ ꓢꓲ ꓗꓪ ꓤ ꓠꓱ ꓟꓯꓸꓸ ꓤ ꓠꓱ ꓶꓸꓹ ꓢꓴ ꓮ ꓟ ꓐꓴ ꓧꓪ: ꓖꓳ ꓓꓱ ꓔꓬ ꓟ ꓢ ꓟ ꓪꓴꓸ ꓠꓬꓲ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓤ ꓟꓶ ꓤ ꓐꓴ 1000 ꓣꓳ ꓟ ꓞꓲ ꓫꓵꓸꓹ ꓡꓰ ꓔꓬ ꓟ ꓥ ꓡꓳ= ꓕꓱ ꓡꓱ ꓫꓵꓸꓹ ꓡꓰ ꓓꓴ ꓮ ꓘꓶꓸ ꓟꓽ ꓟꓬ ꓡ ꓠ, ꓟ ꓤ ꓠꓱ ꓟꓯꓸꓸ ꓕꓯ ꓤ ꓟꓳ ꓠ ꓗ, ꓞꓳ ꓫꓱꓽ ꓠ ꓗꓹ ꓟ ꓐꓯ ꓟꓸ ꓖꓶ ꓩꓴ ꓡ ꓥꓳ=

ꓖꓳ ꓡꓰ ꓐꓯ ꓥ ꓟꓲ ꓤ ꓠꓱ ꓟꓯꓸꓸ ꓟ ꓤ ꓟꓶ ꓤ ꓐꓴ ꓠꓬ ꓕꓱ ꓛꓳꓺ ꓚꓱꓹ ꓔꓯ ꓛꓳ ꓢꓲ꓾ ꓔꓬ ꓠ, ꓟ ꓠꓬ ꓣꓳ ꓦꓲꓸꓹ ꓢꓲ ꓒꓽ ꓣꓳ ꓚꓳ ꓡꓳ ꓗꓪ ꓟ ꓫꓵ ꓤ ꓧꓪꓽ ꓤ ꓐꓴ ꓐꓰ ꓗꓴꓷꓼ ꓙꓵꓽ ꓢꓲ ꓒꓽ ꓐꓴ ꓡꓰ ꓬꓰ ꓙ ꓓꓴ ꓔꓯ ꓥˍ ꓟꓲ ꓣꓱꓽ ꓬꓯꓼ ꓡꓳ= ꓤ ꓠꓱ ꓦꓵꓸꓹ ꓕꓯ ꓬꓰ ꓙ ꓢꓴ ꓐꓴ ꓔꓯ ꓣꓱꓽ ꓬꓯꓼ ꓟ ꓚꓱꓹ ꓟ. ꓖꓶ ꓟ ꓗꓴꓷꓼ ꓗꓪ ꓟ ꓮ ꓢꓳ. ꓬ ꓐꓴ ꓠꓯꓼ ꓗꓪ ꓙꓵꓽ ꓪ ꓙꓳˍ ꓡꓳ= ꓖꓳ ꓟ ꓡꓰ ꓐꓰ ꓟꓽ ꓞꓲ ꓤ ꓠꓱ ꓦꓵꓸꓹ ꓕꓲ ꓙꓵ, ꓗꓪ ꓫꓸ ꓔꓬ ꓢꓴ ꓐꓴ ꓔꓯ ꓥ ꓟꓲ ꓬꓰ ꓙ ꓠ, ꓟ ꓐꓱ ꓶ ꓮ ꓘꓶꓸ ꓣꓳ. ꓚꓵ_ ꓡꓳ=

1ꓸ ꓤ ꓠꓱ ꓟꓯꓸꓸ ꓟ ꓤ ꓟꓶ ꓤ ꓐꓴ ꓠꓬ ꓤ ꓠꓱ ꓟꓯꓸꓸ ꓟ ꓕꓲ ꓙꓵ, ꓗꓪ ꓠꓯꓸꓸ ꓞꓲꓼ ꓟꓸ ꓐ ꓟꓸ ꓟ ꓐꓴ ꓔꓯ ꓟꓽ ꓠ ꓠ ꓟ. ꓖꓶ ꓠ ꓗꓹ ꓡꓳ= ꓖꓳ ꓕꓯ ꓢꓲ ꓤ ꓠꓱ ꓦꓵꓸꓹ ꓟ ꓕꓲ ꓙꓵ, ꓗꓪ ꓚꓬ ꓫꓸ ꓓꓴ ꓮ ꓘꓶꓸ ꓟꓽ ꓙꓳ ꓡ ꓥꓳ=

2ꓸꓤ ꓠꓱ ꓦꓵꓸꓹ ꓕꓯ ꓤ ꓠꓱ ꓦꓵꓸꓹ ꓠꓯꓸꓸ ꓞꓲꓼ ꓟꓸ ꓟ ꓡꓯꓽ ꓒꓯꓹ ꓗꓪ ꓦꓵꓸꓹ ꓠ ꓗꓹ ꓡꓳ꓾ ꓖꓳ ꓕꓯ ꓢꓲ ꓤ ꓠꓱ ꓐꓰ ꓤ ꓠꓱ ꓟꓹ ꓟ ꓧꓪꓽ ꓖꓳ ꓓꓱ ꓔꓬ ꓢ ꓡ ꓥꓳ=

3ꓸꓕꓲ ꓦꓲꓸꓹ ꓘꓴꓽ ꓠꓯꓼ ꓗꓪ ꓤ ꓠꓱ ꓟꓯꓸꓸ ꓢꓴ ꓔꓬ ꓐꓭ ꓠꓬ ꓤ ꓠꓱ ꓐꓱ ꓶ ꓤ ꓟꓳ ꓙꓰ ꓙꓳˍ ꓟ ꓔꓯ ꓤ ꓟꓳ ꓠ ꓗꓹ ꓡꓳ=

4ꓸꓤ ꓠꓱ ꓟꓯꓸꓸ ꓟ ꓟꓹ ꓟ ꓐꓴ ꓠꓬ ꓤ ꓠꓱ ꓖꓳ ꓓꓱ ꓗꓪ ꓶꓸꓹ ꓞ, ꓕꓯ ꓜ ꓓꓴ ꓓꓳꓸꓸ ꓓꓴ ꓔꓯ ꓮ ꓘꓶꓸ ꓜ ꓠ ꓗꓹ ꓟ ꓡꓰ ꓐꓰ ꓪ ꓜꓲ ꓪꓴꓽ ꓧꓶ ꓠꓽ ꓟꓶ ꓠ, ꓟ ꓣꓳ. ꓚꓵ ꓡꓳ=

5ꓸ ꓤ ꓠꓱ ꓦꓵꓸꓹ ꓕꓯ ꓕꓲ ꓣꓳ ꓐꓰ ꓕꓲ ꓣꓳ ꓠꓬꓲ ꓘꓳꓼ ꓛꓲ ꓧꓽ ꓢꓲ꓾ ꓐꓰ 18 ꓘꓳꓼ ꓟꓽ ꓐꓲ ꓕꓯ ꓐꓰ 35 ꓘꓳꓼ ꓙ ꓡꓰ ꓕꓯ ꓤ ꓠꓱ ꓟꓽ ꓦꓵꓸꓹ ꓠ, ꓟ ꓮ ꓓꓰ ꓣꓳ. ꓚꓵ ꓡꓳ= ꓖꓳ ꓕꓲ ꓙꓵ, ꓘꓴꓽ ꓗꓪ ꓤ ꓟꓳ ꓐ ꓕꓯ ꓢꓲ꓾ ꓤ ꓠꓱ ꓬꓲ ꓟꓹ ꓟ ꓐꓴ ꓧꓪ ꓖꓳ ꓓꓱ ꓔꓬ ꓓꓴ ꓙꓳ ꓡ ꓥꓳ=

6ꓸꓕꓱ ꓟ ꓡꓰ ꓟ ꓞꓲ ꓤ ꓠꓱ ꓤꓶꓸꓹ ꓗꓪ ꓐꓰ ꓞꓳ ꓡꓱ ꓤꓶꓸꓹ ꓗꓪ ꓧꓪꓽ ꓖꓳ ꓓꓱ ꓐꓱ ꓶ ꓙꓲ ꓖꓴ ꓙꓳˍ ꓟ ꓮ-ꓧꓮ-ꓣ ꓪ_ ꓟ ꓜ ꓫꓵꓽ ꓜ ꓙꓰ ꓔꓯ ꓜ ꓪ ꓢꓴ ꓤ ꓟꓶ ꓤ ꓐꓴ ꓠꓬ ꓤ ꓠꓱ ꓖꓳ ꓓꓱ ꓗꓪ ꓙꓳˍ ꓡ ꓕꓯ ꓫꓸ ꓓꓴ ꓮ ꓘꓶꓸ ꓟꓽ ꓙꓳ ꓐꓰ ꓧꓪꓽ ꓖꓳ ꓓꓱ ꓔꓬ ꓢ ꓓꓴ ꓚꓱꓹ ꓔꓯ ꓟꓳꓸ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ ꓐꓯ ꓔ ꓡꓳ=