ꓞꓳ ꓡꓱ ꓐꓴ ꓔꓳꓹ ꓜꓳꓽ ꓔꓬꓹ ꓟ ꓘꓶ ꓡꓶꓽ ꓓꓴ

                        ꓞꓳ ꓡꓱ ꓐꓴ ꓔꓳꓹ ꓜꓳꓽ ꓔꓬꓹ ꓟ ꓘꓶ ꓡꓶꓽ ꓓꓴ

ꓕꓲꓽ ꓣꓳ ꓣꓳ ꓡꓰ ꓤ ꓠꓱ ꓤ ꓐꓴ ꓔꓳꓹ ꓜꓳ ꓔꓬꓹ ꓟ ꓘꓶ ꓡꓶꓽ ꓓꓳ ꓔꓯ-ꓸ ꓪꓽ ꓡꓽ ꓤ ꓔꓯ ꓔꓯꓸꓸ ꓔ_ ꓡꓳ=ꓟꓴꓽ ꓚꓰꓼ ꓟꓲ ꓚꓰꓼ_ ꓕꓯ-ꓸ ꓪꓽ ꓡꓽ ꓤ ꓐꓴ ꓠꓬ ꓬꓲ ꓔꓯ ꓫꓱꓸ_ ꓫꓵꓽ ꓠꓱꓸ ꓐꓯꓼ ꓚꓰꓼ ꓫꓵꓽ ꓚꓰꓼ ꓙꓰ ꓧꓪ ꓟꓽ ꓟꓳ= ꓬꓲ ꓠꓬ ꓓꓳ ꓒꓯꓹ ꓠꓵ_ ꓠꓬꓲ-ꓸ ꓠꓬꓹ ꓤ ꓔꓯ ꓔꓹ ꓔꓬꓹ ꓙꓰ_ꓡꓳ= ꓕꓲ ꓑ ꓤ ꓠꓬ ꓓꓳꓽ ꓒꓯꓹ ꓬꓰ ꓠ_ꓡꓳ= ꓖꓳ ꓡꓱ ꓐꓯ ꓥ_ꓟꓲ-ꓸ ꓕꓲꓽ ꓠꓬꓲ ꓙꓳ_ꓟ ꓗꓪ-ꓸ ꓠꓬꓹ ꓤ ꓕꓲꓽ ꓟ ꓡꓰ ꓬꓲ ꓔꓯ-ꓸꓠꓴ ꓮ ꓫꓵ ꓪꓴꓸ ꓠꓬꓲ ꓥꓪ ꓠꓴꓽ ꓐꓰ ꓔꓬꓹ ꓡ?ꓥꓪ ꓠꓵꓽ ꓠꓽ ꓠꓬꓹ ꓤ ꓥ ꓢꓲ_ꓸ ꓠꓴ ꓠꓽ ꓐꓬꓱ ꓗꓴ_ꓥ_ꓟꓲ ꓥꓪ ꓠꓴꓽ ꓡꓰ ꓐꓰ ꓟꓽ ꓗꓼ ꓟꓽ= ꓠꓴ ꓠꓽ ꓦꓯꓹ ꓒꓶꓽ ꓔꓯ ꓮ ꓘꓶꓸ ꓫꓱꓸ_ ꓡꓳ= ꓠꓴ ꓠꓽ ꓦꓯꓹ ꓒꓶ ꓤ ꓐꓴ-ꓸ ꓐꓰ ꓔꓬꓹ ꓟꓬꓽ ꓠꓬꓲ ꓗꓹ ꓛꓲ_ ꓥꓳ-ꓸ ꓐꓰ ꓠꓴ ꓟꓽ ꓓꓳꓽ ꓙ ꓡ? ꓐꓰ ꓐꓯ_ꓡꓳ=

ꓪꓽ ꓡꓽ ꓡꓰ ꓕꓱ ꓟ ꓠꓽ ꓙꓲ_ꓟ ꓚꓴꓽ ꓬꓲꓹ ꓕꓲꓽ ꓟ ꓥ-ꓸ ꓐꓰ ꓓꓵꓽ ꓙ ꓢꓲ ꓦꓯꓹ ꓒꓶ ꓔꓯ ꓔꓹ ꓔꓬꓹ ꓙꓰ ꓡꓳ= ꓬꓲ ꓪ_ꓟꓲ ꓬꓲ ꓔꓯ ꓮ ꓘꓶꓸ ꓘꓳꓸ ꓣꓴ_ꓡꓳ= ꓖꓳ ꓡꓱ ꓐꓯ ꓥ_ꓟꓲ ꓬꓲ ꓪ ꓠꓽ ꓬꓲ ꓡꓰ ꓐꓰ ꓐꓬꓱ ꓙꓰ ꓟꓽ ꓐ ꓡ= ꓖꓳ ꓡꓱ ꓢꓲ-ꓸ ꓬꓲ ꓠꓬ ꓦꓯꓹ ꓒꓶꓽ ꓐꓰ_ꓟꓲ ꓧꓹ ꓙꓰꓳ= ꓖꓳ ꓡꓱ ꓠꓬ-ꓸ ꓮ ꓟꓶ ꓮ ꓫꓵ ꓬꓰ ꓠꓯ_ꓡ? ꓮ ꓡꓲ ꓗꓪꓙꓰ ꓠꓯ_ꓡ? ꓓꓵꓽ ꓙ ꓞꓷꓹ ꓟꓽ ꓐ ꓡ= ꓖꓳ ꓟ ꓗꓪ ꓐꓰ ꓠꓬꓲꓸ ꓟꓰ ꓟ ꓦꓬꓼ ꓠꓬꓲ ꓗꓪ ꓛꓲ-ꓸ ꓤ ꓡꓰ ꓐꓰ ꓙ ꓖꓴ ꓔꓱꓹ ꓔꓱꓹꓼ ꓙꓰ ꓐ ꓡ ꓝꓲ_ ꓟ ꓬꓲꓸ ꓟꓶꓸ ꓟꓽ ꓙꓳ ꓙꓳ-ꓸ ꓖꓪ ꓐꓬꓱ ꓕ ꓐꓬꓱ ꓬꓰ ꓔꓬꓹ ꓪ ꓡꓳ= ꓐꓬꓱ ꓗꓳꓸ ꓙꓰ ꓐꓬꓱ ꓗꓳꓸ ꓡ ꓬꓰ ꓔꓬꓹ ꓪ_ ꓡꓳ= ꓞꓳ ꓡꓱ ꓤ ꓐꓴ ꓥ_ ꓟꓲ ꓕꓱ ꓟ ꓡꓱ ꓐꓰ ꓥꓳ= ꓬꓲ ꓠ ꓽ ꓤ ꓠꓱ ꓤ_ ꓟꓲ ꓟꓽ ꓥ-ꓸ ꓞꓳ ꓪꓴꓽ_ꓟꓲ  ꓟꓽ ꓥ-ꓸ ꓥꓪꓸ- ꓟꓲ ꓟꓽ ꓥ-ꓸ ꓮꓸꓭ_ꓟꓲ ꓟꓽ ꓥ-ꓸ ꓠꓬꓹ ꓤ_ꓟꓲ ꓟꓽ ꓥ-ꓸ ꓙꓱꓽ ꓤ_ꓟꓲ ꓟꓽ ꓥ= ꓖꓳ ꓡꓱ ꓢꓲ ꓟꓳꓸ ꓔ ꓖꓴ ꓟꓽ ꓙꓳ ꓙꓳ ꓖꓪ ꓙꓰ ꓕ ꓙꓰ ꓛꓴꓽ ꓛꓴꓽ ꓔꓬꓹ ꓖꓴ_ ꓡꓳ=ꓞꓳ ꓡꓱ ꓤ ꓦꓬꓼ ꓠꓬꓲ ꓗꓪ ꓬꓲ ꓪ  ꓔꓯ ꓧꓳꓽ ꓣꓱꓽ ꓧꓳꓽ ꓪꓴꓸ ꓟꓴ ꓢꓴ ꓣꓱꓽ ꓞꓹ ꓡꓳ=

Add new comment

2 + 3 =