ꓟꓲ: ꓟꓲ ꓛꓲ ꓡꓯꓼ ꓣꓳ ꓣꓱꓽ ꓬꓯꓼ ꓔꓬ

ꓕꓲ ꓠꓬꓲ ꓙꓳˍ ꓕꓯ ꓕꓳ ꓶ ꓐꓳ ꓒꓽ ꓕꓲ ꓣꓳ ꓡꓳ ꓒꓱ ꓗꓪ ꓬꓲ. ꓟꓯꓼ ꓕꓲꓽ ꓪ ꓗ, ꓗꓹ ꓡ ꓡꓳ꓿ ꓖꓳ ꓕꓯ ꓬꓲ. ꓠꓬ ꓬꓲꓼ ꓔ ꓖꓴ ꓗꓪ ꓠꓸꓹ ꓔꓬ ꓡꓳ꓿ ꓖꓳ ꓡꓰ ꓢꓲ ꓬꓲ. ꓟꓯꓼ ꓠꓬ ꓥꓪ ꓛꓳ ꓒꓯꓹ ꓮ  ꓫꓵꓽ ꓑꓶ ꓓꓴ ꓠ.ꓹ ꓔꓬ ꓥ ꓢꓷ ꓐꓰ ꓐꓯ ꓢꓲ꓾ ꓦꓲ., ꓘꓴꓽ ꓐꓰ ꓚꓳ ꓡꓳ ꓗꓪ ꓧꓪ ꓔꓬ ꓡꓳ꓿ ꓦꓲ., ꓪꓴ. ꓓꓴ ꓗꓪ ꓢꓲꓹ ꓜꓲꓸꓸ ꓮ ꓟꓬꓹ ꓙꓳˍ ꓟ ꓔꓯ ꓡꓳ. ꓟꓳ ꓡꓳ꓿ ꓕꓱ ꓡꓱ ꓔ ꓟ ꓪꓴ. ꓠꓬꓲ ꓬꓲ. ꓠ.ꓹ ꓓꓴ ꓟꓽ ꓓ ꓡ ꓥ ꓢꓷ ꓐꓰ ꓙꓽ ꓟꓶ ꓢꓲ꓾ ꓢꓲꓹ ꓜꓲꓸꓸ ꓔꓯ ꓘꓷꓹ ꓩꓴˍ ꓡꓳ꓿ ꓖꓳ ꓡꓰ ꓐꓯ ꓥ ꓟꓲ ꓟꓲꓽ ꓟꓲ ꓛꓲ ꓡꓯꓼ ꓟꓽ ꓪ_ ꓟ ꓑꓶ ꓓꓴ ꓠꓬꓲ ꓟꓳ ꓓꓴ ꓗꓸ ꓘꓶꓽ ꓒꓰꓼ ꓔꓯ ꓥ ꓟꓲ ꓢꓲ ꓫꓬ ꓩꓴˍ ꓡꓳ꓿ ꓖꓳ ꓡꓱ ꓐꓯ ꓥˍ ꓟꓲ ꓟꓲꓽ ꓟꓲ ꓛꓲ ꓡꓯꓼ ꓟꓽ ꓪ꓿ ꓦꓯꓹ ꓡꓳ ꓟꓶ ꓛꓵ ꓮ ꓘꓶꓸ ꓙꓳ_ ꓟ ꓪꓴ. ꓠꓬꓲ ꓔ ꓥ ꓟꓽ ꓢꓷ. ꓐꓰ ꓙ ꓟꓶ ꓢꓲ꓾ ꓦꓯꓹ ꓡꓳ ꓟꓶ ꓛꓵ ꓔꓯ ꓢꓲ ꓫꓬ, ꓩꓴˍꓡꓳ꓿ ꓖꓳ ꓡꓱ ꓐꓯ ꓥˍ ꓟꓲ ꓟꓲꓽ ꓟꓲ ꓛꓲ ꓡꓯꓼ ꓟꓽ ꓪ꓿ ꓬꓲ. ꓟꓶ ꓗꓪ ꓠꓬ ꓠꓬꓲ ꓟꓳ ꓓꓴ ꓗꓸ ꓘꓶꓽ ꓒꓰꓼ ꓗꓪ ꓙꓳ ꓟ ꓐꓲꓸꓸ ꓓꓴ ꓔꓯ ꓠꓱ. ꓐꓯꓼ ꓕꓲꓽ ꓗ ꓗꓪ ꓚꓵꓸ ꓩꓴ ꓢꓲ꓾ ꓠꓬꓲ ꓟꓳ ꓓꓴ ꓪ ꓟ ꓡꓰ ꓟꓽ ꓞꓲ ꓟꓲꓽ ꓟꓲ ꓛꓲ ꓡꓯꓼ ꓥ ꓟꓲ ꓪ ꓡꓰ ꓢꓲ꓾ ꓬꓲ. ꓛꓳ ꓒꓯꓹ ꓥ ꓟꓲ ꓠ.ꓹ ꓓꓴ ꓗꓪ ꓐꓰ ꓮ ꓜ ꓜ ꓓ ꓡꓰ ꓪ꓿ ꓖꓳ ꓡꓱ ꓔ ꓟ ꓑꓶ ꓓꓴ ꓣꓳ ꓘꓶꓽ ꓗꓪ ꓥ ꓟꓲ ꓠꓯꓸ ꓦꓯꓸ ꓔ ꓟ ꓠꓲ, ꓖꓳꓼ_ ꓟ ꓠꓲ, ꓢꓲꓼ_ ꓟ ꓡꓰ ꓐꓰ ꓔꓸ ꓟ ꓢꓲꓹ ꓜꓲ ꓔꓯ ꓢꓲ ꓫꓬ ꓩꓴ ꓠ ꓗ ꓡꓳ꓿ ꓠꓬꓲ ꓟꓳ ꓓꓴ ꓗꓸ ꓘꓶꓽ ꓒꓰꓼ ꓔꓯ ꓢꓲ ꓫꓬ ꓩꓴ ꓟ ꓡꓰ ꓐꓰ ꓢꓴ ꓔꓯ ꓥ ꓟꓲ ꓢꓲ ꓢꓲ ꓫꓬ ꓫꓬ ꓟꓳ ꓗꓴꓸ ꓠꓹ ꓟ ꓣꓱꓽ ꓬꓯꓼ ꓡꓳ꓿  ꓠꓬꓲ ꓟꓳ ꓓꓴ ꓗꓸ ꓘꓶꓽ ꓒꓰꓼ  ꓗꓪ ꓙꓳ ꓟ ꓟꓽ ꓣꓱꓽ ꓬꓯꓼ ꓢꓲ꓾ ꓛꓬ, ꓔ ꓟ ꓐꓲ ꓓꓴ ꓡꓰ ꓐꓰ ꓗ. ꓟ ꓠꓯꓸ ꓦꓯꓸ ꓓꓴ ꓕꓱ ꓟ ꓔꓯ ꓡꓳ ꓩꓴ ꓗꓷ ꓐꓯ ꓠꓬ  ꓟꓲꓽ ꓟꓲ ꓛꓲ ꓡꓯꓼ ꓡꓰ ꓐꓰ ꓔ ꓟ ꓪꓴ‐ꓢ ꓔꓯ ꓥ ꓟꓲ ꓠꓲ, ꓟ ꓗꓪ ꓐꓰ  ꓗꓹ ꓗꓹ ꓛꓲ ꓛꓲ ꓘꓳꓹ ꓣꓴ ꓟꓶ ꓥꓳ꓿

 

Add new comment

6 + 3 =