ꓠꓴ ꓐꓸ ꓐꓽ ꓟꓸ ꓟ ꓔꓯ ꓒꓵꓼ

ꓐꓸ ꓐꓽ ꓟꓸ ꓟ ꓠꓬ ꓣꓳ ꓐꓴ ꓔꓯ ꓠꓲꓸ ꓠꓵ ꓔꓬ ꓢꓴ ꓥꓳ

ꓠꓴ ꓪ ꓶꓼ ꓙꓳ ꓫꓱꓹ ꓙꓳ ꓠꓹ ꓟ_ ꓐꓰ ꓟꓲ ꓠꓯ ꓗꓪ ꓤꓶ ꓙꓳ ꓟꓯ ꓙꓳ ꓠꓹ ꓟ꓾ ꓠꓴ ꓪ ꓐꓹ ꓐꓽ ꓟꓹ ꓟ ꓔꓯ ꓒꓵꓽ= (ꓬꓲ-ꓩꓴ-ꓢꓳ 6ꓽ3)

ꓟꓶꓽ ꓦꓸꓹ ꓦꓸꓹ ꓝꓲꓹ 7 ꓦꓸꓹ ꓛꓲꓸꓸ ꓡ_ ꓠꓬ ꓗ-ꓔꓳ-ꓡꓲ ꓘꓴ-ꓜꓲ-ꓞꓳ ꓢꓲ ꓤꓼ ꓐꓴ ꓠꓬ ꓐꓹ ꓐꓽ ꓟꓹ ꓟ ꓑꓮꓲ ꓔꓯ

ꓓꓵꓽ ꓙ ꓟꓶ ꓔꓬꓹ ꓟ ꓥꓳ= ꓮ ꓐꓽ ꓮ ꓟ ꓣꓱꓽ ꓢꓴ ꓐꓴ ꓔꓯꓼ ꓒꓵꓽ  ꓠꓯ_ꓟ ꓠꓬ ꓡꓲꓽ  ꓒꓰꓼ ꓔꓯ ꓛꓳ ꓫꓱ_ꓟ ꓟꓬ-ꓟ ꓗꓴꓷꓼ ꓗ-ꓔꓳ-ꓡꓲ ꓘꓴꓜꓲꓼ ꓞꓳ ꓐꓴ ꓐꓱ ꓶꓽ꓾ ꓶꓼ ꓙꓳ ꓫꓱꓹ ꓙꓳ_ ꓟ ꓡꓲꓽ ꓒꓰ ꓕꓲꓽ ꓟ ꓥ ꓡꓳ꓾

ꓐꓰ ꓐꓯ ꓪ ꓓꓹ ꓡꓳ=

ꓐꓹ ꓐꓽ ꓟꓹ ꓟ ꓑꓮꓲ ꓦꓬꓼ ꓠꓬꓲ ꓠꓬ ꓮ ꓡꓰ ꓗꓪ ꓐꓰ ꓓꓳꓸꓹ ꓡꓹ ꓡꓽ ? ꓐꓯ_ ꓟ ꓬꓲꓸ ꓚꓰꓸꓸ ꓔꓯ ꓠꓽ ꓟꓽ ꓢꓷ꓾  ꓑꓮꓲ ꓬꓰ ꓖꓴ ꓐꓰ ꓑꓮꓲ ꓬꓰ ꓫꓵꓽ ꓠꓽ ꓕꓲꓽ ꓖ ꓐꓰ ꓕꓲꓽ ꓖ ꓕꓲꓽ ꓟꓵꓽ ꓐꓰ ꓕꓲꓽ ꓟꓵꓽ ꓟꓽ ꓫꓱꓸ ꓡꓯ ꓘꓳ꓾ ꓟꓽ ꓪꓽ ꓡꓯ ꓘꓳ=

ꓠꓱꓸ ꓐꓯꓼ ꓟꓵꓽ꓾ ꓟꓬꓽ ꓠꓬꓲ ꓮꓟꓰꓣꓲꓚꓮ ꓟꓵꓽ ꓗꓪ ꓠꓬ ꓟꓸ ꓟ ꓣꓱꓽ ꓢꓴ ꓐꓴ ꓠꓬꓲ꓾ ꓐꓹ ꓐꓽ ꓣꓱꓽ ꓢꓴ ꓐꓴ ꓠꓬꓲ ꓐꓯ ꓢꓲꓹ ꓑꓮꓲ ꓬꓰ ꓔꓬ ꓟ ꓥ_ ꓟꓲ꓾ ꓮ ꓐꓽ ꓮ ꓟ ꓑꓮꓲ ꓐꓯ ꓢꓲ꓾ ꓕꓲꓽ ꓟꓵꓽ ꓕꓲꓽ ꓢꓰꓸꓹ ꓗꓪ ꓬꓰ

ꓔꓬ ꓟ ꓠꓽ ꓟꓽ ꓟꓳ ꓠꓬꓲ ꓢꓰꓼ= ꓣꓳ ꓟꓬ-ꓟ ꓗꓴꓷꓼ ꓗ-ꓔꓳ-ꓡꓲ ꓘꓴ-ꓜꓲ-ꓞꓳ ꓗꓪ ꓠꓬ ꓐꓸ ꓐꓽ ꓟꓸ ꓟ ꓑꓮꓲ ꓔꓯ ꓬꓰ-ꓢꓴ ꓟꓸ ꓟꓽ  -ꓡꓲ-  ꓐꓹ ꓐꓽ ꓟꓸ ꓟ ꓥ ꓟ꓾ ꓙꓲ ꓫꓬ ꓢꓴ ꓙꓳꓮꓚꓧꓲꓟ ꓐꓰ ꓮꓠꓠꓮ ꓐꓴ ꓑꓮꓲ ꓔꓯꓹ 7 ꓦꓸꓹ ꓟ 26  ꓠꓬꓲ ꓗꓪ ꓬꓰ_ ꓟ ꓠꓬ ꓡꓲꓽ ꓒꓰꓽ ꓕꓲꓽ ꓟ ꓡꓰ ꓐꓰ ꓗꓷ ꓡꓰꓳ=

ꓢꓲ-ꓫꓬ-ꓕꓳ-ꓶ ꓗꓪ ꓪꓴ-ꓢ ꓖꓶꓽ ꓔ ꓟ ꓙꓵꓽ ꓗ ꓙꓳ_ ꓡꓳ= ꓓꓳ ꓙꓰ ꓕꓳ ꓶ 20 ꓕꓱꓹ ꓗꓪ ꓙꓳ_ ꓡꓳ=

ꓙꓵꓽ ꓗ 10 ꓙꓰꓽ ꓟ ꓗꓪ 2 ꓐꓱꓸꓹ ꓐꓱꓸꓹ ꓢꓲ ꓡꓳꓸ ꓠꓬꓲ ꓠꓬ꓾ ꓬꓲꓸ ꓪꓴꓸ 3 ꓙꓰꓽ ꓟ ꓠꓬ ꓪꓴ-ꓢ ꓔꓯ ꓣꓳꓽ ꓟꓲ ꓠꓯ ꓞꓳ ꓤ ꓐꓴ ꓒꓵꓽ ꓗ ꓗꓷ ꓙꓲꓼ ꓙꓳ_ ꓟ ꓔꓯ ꓟꓳꓸꓹ ꓪ ꓓꓹ ꓡꓳ= ꓙꓰ ꓓꓹ ꓟ ꓙꓵꓽ ꓗ 7 ꓙꓰꓽ ꓟ ꓠꓬ ꓣꓳꓽ ꓟꓲ ꓠꓯ ꓞꓳ ꓤ ꓐꓴ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓒꓵꓽ ꓗ ꓬꓰ ꓠꓯꓹ ꓟ ꓟꓸ ꓖꓶꓽ ꓔ ꓡꓳ= ꓖꓳ ꓟ

ꓪꓴꓸ ꓠꓬꓲ ꓕꓲꓽ ꓣꓳ ꓛꓳ ꓕꓲꓽ ꓣꓳ ꓒꓵꓽ ꓗ ꓗꓷ_ ꓟ ꓗꓪ ꓐꓹ ꓐꓽ ꓟꓹ ꓟ ꓕꓯꓽ ꓢꓲꓸꓸ ꓗꓪ  ꓒꓵꓽ ꓗ ꓗꓷ  ꓠꓯꓹ ꓟ ꓠꓽ ꓬꓲꓸ ꓪꓴꓸ ꓙꓵꓽ ꓗ ꓕꓲꓽ ꓟ ꓟ ꓥꓳ= ꓙꓵꓽ ꓗ 4 ꓟ ꓕꓲꓽ ꓟ ꓗꓪ “ꓐꓹ ꓐꓽ ꓟꓹ ꓟ ꓔꓯ ꓒꓵꓽ”꓾ ꓐꓰ ꓐꓯ ꓔ ꓡꓳ=

ꓪꓴ-ꓢ ꓦ ꓡꓱꓸꓹ ꓢꓴ ꓟꓽ ꓥ ꓟ꓾ ꓠꓱꓸ ꓐꓯꓼ ꓐꓴꓓꓓꓮꓧ ꓙꓵꓽ ꓗ ꓗꓪ ꓥ_ꓟꓲ ꓐꓹ ꓐꓽ ꓟꓹ ꓟ ꓔꓯ ꓒꓵꓽ ꓐꓰ ꓙꓵꓽ ꓗ ꓙꓳ_ ꓡꓳ= ꓐꓹ ꓐꓽ ꓟꓹ ꓟ ꓔꓯ ꓒꓵꓽ_ ꓟ ꓡꓰ ꓟꓽ ꓞꓲ꓾ ꓞꓲꓼ ꓪꓴꓽ ꓡ_ ꓕꓯ ꓬꓲꓸ ꓪ ꓠꓲꓹ ꓟ ꓢꓸꓸ ꓢꓸꓸ ꓡꓰ ꓔꓬꓹ ꓪ ꓠꓹ ꓟ꓾ ꓡꓳꓸ ꓙ ꓠ ꓗꓹ ꓡꓳ= ꓟꓬꓽ ꓠꓬꓲ ꓡ ꓞꓳ ꓐꓴ ꓢꓷꓸ ꓔ ꓟ ꓕꓲꓽ ꓫꓵꓽ ꓙꓳ_ ꓡꓳ= ꓮ ꓐꓽ ꓮ ꓟ ꓔꓯ ꓒꓵꓽ ꓐꓯ_ ꓟ ꓠꓬ ꓮ ꓐꓽ ꓮ ꓟ ꓔꓯ ꓔꓳꓹ ꓙ꓾ ꓬꓰ ꓙ꓾  ꓐꓰ ꓐꓯ_ ꓟ ꓥ ꓡꓳ= ꓮ ꓐꓽ ꓮ ꓟ ꓔꓯ ꓔꓳꓹ ꓙ꓾ ꓬꓰ ꓙ ꓢꓴ ꓠꓬ ꓕꓲꓽ ꓤꓶ ꓡꓱꓸꓼ ꓗꓪ ꓠꓲꓹ ꓒꓴ ꓗꓹ ꓛꓲꓽ ꓛꓲꓽ ꓐꓰ ꓔꓬꓹ ꓪ ꓓꓹ ꓡꓳ ꓐꓰ꓾ ꓐꓯ_ ꓟ ꓥ ꓡꓳ=   ꓝꓲ-ꓓꓴ ꓒꓳ-ꓡꓳ ꓐꓳ ꓔꓸ ꓟ ꓬꓲ-ꓩꓴ-ꓢꓳ ꓕꓳ ꓶ (61-3) ꓗꓪ ꓒꓳ-ꓡꓳ ꓠꓬ ꓤ ꓠꓱ ꓤ ꓐꓴꓳ꓾ ꓢꓲ ꓒꓽ ꓠꓯꓸꓼ ꓗꓪ ꓠꓴ ꓪ ꓐꓹ ꓐꓽ ꓟꓹ ꓟ ꓔꓯ ꓒꓵꓽ ꓛꓳ= ꓕꓱ ꓡꓱ ꓬꓰˍ ꓟ ꓠꓬ  ꓜꓳꓽˍ ꓟ ꓥ ꓡꓳ= ꓙ ꓟꓳ ꓘꓶꓽ ꓕꓱꓹ ꓞꓹ ꓟ ꓕꓵꓼ ꓪ ꓬꓲ ꓪꓴꓸ ꓕꓲ ꓚꓱꓹ ꓗꓪ꓾ ꓠꓴ ꓪ ꓶꓼ ꓙꓳ ꓫꓱꓹ ꓙꓳ ꓠꓹ ꓟ_ ꓐꓰ ꓟꓲ ꓠꓯ ꓗꓪ ꓤꓶ ꓙꓳ ꓟꓯ ꓙꓳ ꓠꓹ ꓟ꓾ ꓠꓴ ꓪ ꓐꓹ ꓐꓽ ꓟꓹ ꓟ ꓔꓯ ꓒꓵꓽ꓾ ꓐꓰ ꓐꓯ ꓔ   ꓡꓳ=” ꓕꓱ ꓙꓵꓽ ꓗ ꓟ ꓠꓬ ꓣꓳꓽ  ꓟꓶ_ ꓟ ꓒꓵꓽ ꓶꓼ ꓔꓯꓸꓼ ꓟꓲ ꓕꓲꓽ ꓡꓰꓸ ꓕꓲꓽ ꓛꓳ_ ꓟꓸ ꓖꓶꓽ ꓔ ꓡꓳ=

ꓮ ꓐꓽ ꓮ ꓟ ꓔꓯ ꓣꓱꓽ ꓙ꓾ ꓔꓳꓹ ꓙ ꓢꓴ ꓠꓽ ꓮ ꓕꓯˍ ꓟꓲ ꓟꓽ ꓫꓸ ꓡꓰ꓾ ꓐꓰ ꓐꓯ ꓔ ꓟ ꓙꓳˍ ꓡꓳ= ꓣꓱꓽ ꓙ꓾ ꓔꓳꓹ ꓙ ꓟ ꓗꓪ ꓐꓰ ꓮ ꓡꓰ ꓐꓰ ꓫꓸ ꓟꓳ ꓗꓴ_ ꓟ ꓔꓯ ꓟꓳꓸ ꓖꓶꓽ ꓔꓬꓹ ꓖꓶˍ ꓡꓳ=ꓕꓲꓽ ꓖ ꓕꓲꓽ ꓧꓪꓹ  ꓗꓪ ꓣꓳꓽ  ꓬꓰ ꓐ ꓡꓹ ꓟ ꓗꓪ ꓐꓰ ꓮ ꓐꓽ ꓮ ꓟ ꓕꓯꓽ ꓢꓲ ꓗꓪ꓾ ꓣꓳꓽ ꓮ ꓡꓰ ꓗꓪ ꓛꓲ ꓫꓸ ꓟꓳ ꓗꓴˍ ꓟ꓾ ꓢꓷꓸ ꓗꓴˍ ꓟ꓾ ꓒꓵꓽ ꓗ ꓬꓰ ꓗꓴˍ ꓟ ꓔꓯ ꓔꓯꓸꓸ ꓟꓳꓸ ꓖꓶꓽ ꓔꓬꓹ ꓡꓳ= ꓐꓹ ꓐꓽ ꓟꓹ ꓟ ꓣꓱꓽ ꓛꓰꓽ ꓠꓽ ꓤ ꓠꓱ ꓤ ꓐꓴ ꓕꓯꓽ ꓢꓲ ꓗꓪ ꓪꓴꓽ ꓓꓰ ꓡꓰꓳ= ꓜꓱꓹ_ ꓟꓲꓽ ꓜꓱꓹ ꓖꓴ ꓟꓽ ꓓ= ꓤ ꓠꓱ ꓤ ꓕꓲꓽ ꓐꓱꓸꓸ ꓟ ꓠꓽ ꓫꓸ ꓠꓬꓲ ꓤ ꓓꓴ ꓙꓳˍ ꓡꓳ=ꓮ ꓟ ꓗꓪ ꓦꓱꓸꓹ ꓓꓳꓸꓹ ꓡ ꓗꓸ ꓠꓯꓸꓼ ꓫꓸ ꓙꓵꓸꓸ ꓙꓲꓽ ꓢꓲ ꓪꓴ ꓡ ꓟꓴ ꓡ ꓔꓬꓹ     ꓡꓳ= ꓞꓲꓼ ꓣꓳˍ ꓥ ꓟꓲ ꓟꓬꓱꓽ ꓓꓽ ꓟ ꓬꓰ ꓔꓬꓹ ꓪ ꓡꓳ=ꓐꓹ ꓐꓽ ꓟꓹ ꓟ ꓐꓲꓸꓹ ꓙꓲꓼ ꓙꓲꓼ_  ꓪꓴꓽ ꓡ ꓢꓴˍ ꓐꓰ ꓐꓹ ꓐꓽ ꓟꓹ ꓟ ꓐꓰ ꓕꓲꓽ ꓪꓸꓸꓽ ꓟꓽ ꓔꓬꓹ ꓪ ꓟ꓾ ꓤ ꓛꓵꓽ ꓤ ꓡꓰ ꓐꓰ ꓗꓹ ꓟ꓾ ꓮ ꓡꓰ ꓕꓲꓽ ꓣꓳ ꓟ ꓠꓬ ꓮ ꓐꓽ ꓮ ꓟ ꓔꓯ ꓟꓬꓽ ꓠꓬꓲ ꓣꓱꓽ ꓙ꓾ ꓔꓳꓹꓙ  ꓢꓲ ꓫꓸ ꓟꓳ ꓠꓯꓹ ꓡ ꓐꓰ ꓠ ꓠꓬꓲ ꓡꓹ ꓕꓯ ꓠꓴ ꓪ ꓮ ꓡꓰ  ꓐꓯ ꓔꓳꓹ ꓖꓶꓽ ꓓꓴ ꓙꓳˍ ꓡ?=

ꓮ ꓐꓽ ꓮ ꓟ ꓣꓱꓽ ꓢꓴ ꓐꓴ ꓠꓬ ꓬꓲ ꓪ ꓤꓽ ꓠꓱ ꓐꓴ ꓔꓯ꓾ ꓙꓲꓸꓸ ꓙꓲꓸꓸ ꓟꓽ ꓔꓳꓹ ꓙ ꓕꓯ ꓠꓽ ꓤ ꓠꓱ ꓤ ꓐꓴ ꓙꓽ  ꓫꓸ ꓓꓴ ꓓꓳꓸꓹ ꓡˍ ꓡꓳ= ꓠꓲꓹ ꓟˍ ꓟꓲ ꓠꓸꓹˍ ꓡꓳ= ꓕꓲꓽ ꓠꓱꓹ_ ꓟ ꓘꓴꓽ ꓠꓯꓸꓼ ꓗꓪ ꓥ ꓟꓲ꓾ ꓢꓲꓸꓸ ꓢꓲꓸ ꓒꓯꓽ ꓢꓲꓼ  ꓠꓵ ꓠꓲꓹ ꓟꓽ ꓟꓶ ꓟ ꓤ ꓠꓱ ꓠꓬ ꓟꓶ ꓫꓵꓸꓸ ꓡˍ ꓕꓯ ꓮ ꓐꓽ ꓮ ꓟ ꓠꓵ ꓠꓲꓹ ꓔꓯ ꓟꓽ ꓠꓲꓹ ꓥꓳ ꓗꓷ ꓡꓰˍ ꓥꓳ= ꓐꓹ ꓐꓽ ꓟꓹ ꓟ ꓠꓵ ꓠꓲꓹ ꓗꓪ ꓐꓰ ꓮꓽ ꓤ ꓤ ꓶꓽ ꓡꓰˍ ꓥꓳ꓾ ꓦꓽ ꓡꓰˍ ꓥꓳ= ꓠꓵ ꓠꓲꓹ ꓟꓽ ꓟꓶ ꓟ ꓪꓴꓸ ꓠꓬꓲ ꓚꓲꓸ ꓛꓬ ꓮ ꓐꓽ ꓮ ꓟ ꓔꓯ ꓠꓲꓹ ꓠꓵ ꓠꓹ ꓟ ꓟꓲ ꓟꓽ ꓢꓷ= ꓡꓳ ꓗꓷ ꓟꓶˍ ꓟ ꓞꓳ ꓤ ꓠꓬ ꓠꓵ ꓠꓲꓹꓐꓯ ꓘꓶꓽ ꓔꓯ ꓑꓸꓹ ꓙꓹ ꓕꓯ꓾ ꓠꓸꓸ ꓠꓹ ꓠꓲꓹ ꓟꓽ ꓫꓵꓸꓹ ꓗꓷ ꓡꓰˍ ꓥꓳ= ꓤ ꓛꓵꓽ ꓤꓼ ꓐꓯˍ ꓟ ꓠꓲꓹ ꓟ ꓔꓯ ꓠꓬ ꓤ ꓛꓵꓽ ꓤ ꓕꓯꓽ ꓢꓲ ꓮ ꓟ ꓟꓲ ꓟꓽ ꓢꓷꓹ=ꓠꓸꓹ ꓓꓴ ꓔꓯ ꓠꓽ ꓠꓸꓹ ꓢꓴ ꓡꓰꓽ ꓢꓷˍ ꓡꓳ=ꓐꓹ ꓐꓽ ꓟꓹ ꓟ ꓙꓳˍ ꓥ ꓟꓲ ꓬꓲꓸ ꓪ ꓙꓽ ꓗꓳꓸ ꓠꓲꓹ ꓟꓽ ꓟꓶ ꓠꓬ ꓬꓲꓸ ꓪꓴꓽ ꓡꓹ ꓕꓯꓽ ꓮ ꓐꓽ ꓮ ꓟ ꓔꓯ ꓙꓽ ꓗꓳꓸ ꓠꓲꓹ ꓟꓽ ꓙꓳ ꓡ=  ꓕꓲꓽ ꓖꓸꓹ ꓕꓲꓽ

ꓧꓪꓹ ꓗꓪ ꓐꓹ ꓐꓽ ꓟꓹ ꓟ ꓔꓯ ꓒꓵˍ ꓟ꓾ ꓣꓱꓽ ꓙ ꓔꓳꓹ ꓙˍ ꓟ ꓠꓬ ꓤ ꓠꓱ ꓤꓼ ꓤꓶꓸꓸ ꓕꓯ ꓐꓹ ꓐꓽ ꓟꓹ ꓟ ꓡꓰ ꓮ ꓡꓰ ꓐꓰ ꓣꓱꓽ ꓙ ꓔꓳꓹ ꓙ ꓗꓳꓸ ꓡˍ ꓡ? ꓐꓯ ꓟ ꓕꓯꓽ ꓢꓲ ꓗꓪ ꓡꓳꓸ ꓢꓲ꓾ ꓔꓯꓸꓸ ꓡꓯꓽ ꓘꓳˍ ꓟ ꓤ ꓠꓱ ꓤ ꓐꓴ ꓮ
ꓟꓬ ꓙꓳˍ ꓡꓳ=

ꓓꓳ ꓙꓰ ꓕꓳ ꓶ ꓗꓪ ꓕꓲꓽ ꓡꓰ ꓐꓯ ꓔꓸ  ꓡꓳ=ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓠꓬ 40 ꓘꓳꓼ ꓟꓽ ꓞꓲ  ꓡꓲ ꓛꓲ ꓟꓵꓽ ꓗꓪ ꓚꓳꓸꓹ ꓔꓬꓹ ꓡꓳ= ꓡꓲ ꓛꓲ ꓟꓵꓽ ꓗꓪ ꓚꓳꓸꓹ ꓔꓬꓹ ꓕꓯ ꓮ ꓐꓽ ꓮ ꓟ ꓣꓱꓽ ꓢꓴ ꓮ ꓡꓰ ꓕꓲꓽ   ꓣꓳˍ ꓟꓲ ꓬꓲ ꓪ ꓤ ꓠꓱ ꓤ ꓐꓴ ꓔꓯ  ꓖꓶꓽ ꓜꓽ ꓖꓶꓽ ꓓꓳꓸꓹ ꓟꓽ ꓐ ꓡ= ꓐꓵꓸꓹ ꓞꓶꓽ ꓟꓲ ꓖꓶꓽ ꓟꓽ ꓐ ꓡ= ꓜꓽ ꓓꓴ꓾ ꓓꓳꓸꓹ ꓓꓴ꓾ ꓖꓪꓽ ꓓꓴ ꓮ ꓙꓵꓽ ꓠꓬ ꓪꓴ-ꓢ ꓡꓰꓽ ꓖꓶꓽ ꓔ ꓡꓳ=ꓫꓬꓽ ꓫꓬꓽ ꓐꓯˍ ꓠꓬ ꓬꓲ ꓘꓳꓼ  ꓟꓶ ꓤ ꓗꓪ ꓛꓲ ꓐꓹ ꓐꓽ ꓟꓹ ꓟ ꓣꓱꓽ ꓢꓴ ꓐꓴ ꓤ ꓠꓱ ꓐꓴ ꓔꓯ ꓖꓶꓽ ꓜꓽ ꓟꓽ ꓐ ꓡ= ꓖꓳ ꓡꓱ ꓥˍ ꓟꓲ ꓢꓲ-ꓠ ꓪꓽ ꓚꓲ ꓗꓪ ꓪꓴ-ꓢ ꓡꓰ    “ꓠꓴ ꓪ ꓐꓹ ꓐ ꓟꓹ ꓟ ꓔꓯ ꓒꓵꓽ” ꓐꓰ ꓙꓵꓽ ꓗ ꓖꓶꓽ ꓔ ꓡꓳ= ꓐꓹ ꓐ ꓟꓹ ꓟ ꓔꓯ ꓒꓵꓽ ꓐꓯˍ ꓟ ꓠꓬ ꓬꓲ ꓪ ꓡꓰ ꓣꓳꓽ ꓔꓯ ꓫꓳ ꓖꓶꓽ ꓡˍ ꓟ ꓪꓴꓸ ꓠꓬꓲ ꓒꓵꓽ ꓐꓯˍ ꓟ ꓟꓽ ꓥ= ꓐꓹ ꓐꓽ ꓟꓹ ꓟ ꓠꓬ ꓣꓳꓽ ꓠꓴ ꓪ ꓕꓯꓽ ꓢꓲ ꓗꓪ ꓙꓲˍ ꓥ ꓟꓲ꓾ ꓟꓽ ꓙꓲ ꓥ_ꓟꓲ ꓒꓵꓽ ꓠꓯꓹ ꓟ ꓙꓵꓽ ꓗ ꓖꓶꓽ ꓔ ꓡꓳ= ꓬꓲ ꓪ ꓫꓳꓸꓸ ꓖꓶꓽ ꓡˍ ꓟ ꓔꓯ ꓡꓳꓸ ꓢꓲ   ꓒꓵꓽ ꓠꓹ ꓟ ꓟꓽ ꓥ=ꓬꓲ ꓪ ꓖꓶꓽ ꓔ ꓟ ꓡꓯꓽ ꓫꓴ ꓔꓯ ꓡꓳꓸ ꓢꓲ ꓡꓰꓽ ꓒꓵꓽ ꓠꓹ ꓟ ꓪꓴ-ꓢ ꓡꓰ ꓙꓵꓽ ꓗ ꓖꓶꓽ ꓔ  ꓡꓳ꓾ ꓐꓰ ꓢꓷꓸ ꓪ ꓓꓹ ꓡꓳ= ꓐꓹ ꓐ ꓟꓹ ꓟ ꓐꓴ ꓠꓬ ꓚꓲꓸ ꓛꓬ ꓮ ꓐꓲ ꓮ ꓟꓲꓽ ꓐꓴ ꓔꓯ ꓕꓲꓽ ꓡꓰꓸꓸꓽ ꓥ ꓟ꓾ ꓒꓵꓽ ꓓꓰ ꓡꓰˍ ꓟ ꓡꓯꓽ ꓫꓴ ꓕꓲꓽ ꓟ ꓖꓶꓽ ꓔ ꓡꓳ= ꓣꓳꓽ ꓐꓹ ꓐꓽ ꓟꓹ ꓟ ꓖꓶꓽ ꓔ ꓟ ꓡꓯꓽ ꓫꓴ ꓐꓰ ꓠꓴ ꓪ ꓮ ꓐꓽ ꓮ ꓟ ꓖꓶꓽ ꓔ ꓟ ꓡꓯꓽ ꓫꓴ ꓠꓽ ꓕꓲꓽ ꓡꓰꓸꓸꓽ ꓥꓳ=

ꓡꓯꓽ ꓫꓴ ꓖꓳ ꓟ ꓠꓬ ꓠꓬꓲꓸ ꓠꓬꓲ ꓣꓳꓽ ꓟꓶ ꓔ ꓟ ꓢꓯꓼ ꓟꓬꓸꓸ ꓥ ꓡꓳ=ꓟꓲ ꓠꓯ ꓗꓪ ꓢꓯꓼ ꓟꓬꓸꓸ ꓕꓯꓽ ꓢꓲ ꓙꓲˍ ꓟ꓾ ꓒꓵꓽˍ ꓟ ꓟꓽ ꓙꓳ= ꓢꓯꓽ ꓟꓬꓸꓸ ꓖꓶꓽ ꓔ ꓟ ꓪꓴꓸ ꓠꓬꓲ ꓣꓳꓽ ꓕꓱ ꓗꓪ ꓙꓳ ꓔꓬꓹ ꓟ ꓥꓳ= ꓕꓱ ꓕꓲꓽ ꓫꓵꓽ ꓟ ꓡꓰꓽ ꓐꓰ ꓣꓳꓽ ꓐꓹ ꓐꓽ ꓟꓹ ꓟ ꓔꓯ ꓣꓱꓽ ꓙ꓾ ꓔꓳꓹ ꓙ ꓠꓹ ꓟ ꓐꓲ_ꓜꓲꓽˍ  ꓥꓳ ꓐꓰ ꓢꓳꓼ ꓓꓹ ꓡꓳ=

ꓤ ꓠꓱ ꓤ ꓕꓲꓽ ꓐꓱꓸꓹ ꓟ ꓠꓽ ꓢꓷꓸ ꓠꓲꓹ ꓠꓲꓸ-ꓫꓬꓸ ꓟꓽ ꓟꓶ=ꓕꓲꓽ ꓐꓱꓸꓹ ꓟ ꓠꓬ ꓐꓳ ꓶ ꓟꓽ ꓟꓶ=ꓕꓲꓽ ꓐꓱꓸꓹ ꓟ  ꓠꓬ ꓠꓵ ꓠꓲꓹ ꓟꓽ ꓟꓶ=ꓕꓲꓽ ꓐꓱꓸꓹ ꓟ ꓠꓽ ꓮ ꓐꓽ ꓮ ꓟ ꓗꓪ ꓐꓰ ꓮ ꓟꓬ ꓟꓶˍ ꓡꓳ= ꓬꓲ ꓪꓴꓸ ꓢꓯꓼ ꓟꓬ    ꓡꓯꓽ ꓫꓴ꓾ ꓙꓵꓸꓹ ꓠꓲꓹ ꓠꓲ-ꓫꓬ꓾ ꓢꓷ ꓠꓲꓹ ꓠꓲ-ꓫꓬ꓾ ꓚꓲꓸ ꓛꓬ ꓐꓱ ꓶ ꓚꓲꓸ ꓛꓬ ꓦꓰꓼ ꓕꓴꓸꓹ ꓐ ꓡ ꓠꓹ ꓟ ꓢꓯꓼ ꓪ ꓠꓲ-ꓫꓬ꓾ ꓠꓲꓹ ꓠꓵ ꓗꓴˍ ꓟ ꓠꓵ ꓠꓲꓹ ꓠꓲ-ꓫꓬ ꓮ ꓟꓬ ꓫꓵꓽ ꓥꓳ=

ꓐꓹ ꓐꓽ ꓟꓹ ꓟ ꓖꓶꓽ ꓔ ꓟ ꓢꓯꓼ ꓟꓬ ꓐꓱ ꓶ ꓮ ꓐꓽ ꓮ ꓟ ꓐꓴ ꓔꓯ ꓣꓳꓽ ꓒꓵꓽ ꓙꓵꓽ ꓙꓳ_ꓟ ꓥ ꓡꓳ= ꓣꓳꓽ ꓐꓴ ꓮ ꓡꓰ ꓓꓽ ꓔꓳꓹ ꓠ ꓗꓹ ꓡꓸꓸ?=ꓕꓲꓽ ꓠꓬꓲ ꓙꓳˍ ꓕꓯ ꓮ ꓟ ꓥ ꓟꓲ ꓐꓹ ꓐꓽ ꓟꓹ ꓟ ꓒꓬꓱꓼ ꓡˍ ꓥꓳ=ꓔꓲ ꓒꓽ ꓾ ꓔꓲ ꓟ ꓟ-ꓒ/ꓟ ꓟꓹ ꓣꓱꓽ ꓢꓴ ꓐꓴˍ ꓟꓲ ꓚꓲ ꓛꓬ ꓘꓴ-ꓜꓲ-ꓞꓳ ꓢꓲ ꓤ ꓐꓱ ꓶ ꓮ ꓐꓽ ꓮ ꓟ ꓡꓰꓽ ꓥꓳ= ꓐꓹ ꓐꓽ ꓟꓹ ꓟ ꓠꓬ ꓣꓳꓽ ꓔꓯ ꓢꓯꓼ ꓟꓬ ꓖꓶꓽˍ ꓡꓳ= ꓕꓱ ꓡꓯꓽ ꓫꓴ ꓔꓯ ꓡꓰꓽ ꓣꓳꓽ ꓤꓶ ꓗꓪ ꓔꓳꓹ ꓜꓳꓽ ꓠ ꓗꓹ ꓟ ꓞꓳ ꓤ   ꓐꓴ ꓔꓯ ꓝꓸ ꓢꓲ ꓖꓶꓽ ꓠꓹ ꓟ ꓥꓳ= ꓣꓳꓽ ꓗꓪ ꓐꓰ ꓠꓱꓸ ꓐꓯꓼ ꓤꓶ ꓢꓯꓼ ꓟꓬ ꓟꓶˍ ꓥꓳ= ꓬꓲ ꓪ ꓤꓶ ꓟꓬꓽ

ꓠꓬꓲ ꓪꓴꓽ ꓡ ꓟꓴ ꓡ ꓠ꓾ꓣꓳꓽ ꓚꓲ ꓛꓬ ꓥˍ ꓟꓲ ꓢꓯꓼ ꓟꓬ ꓡꓯꓽ ꓫꓴ ꓖꓶꓽ ꓢꓴ ꓕꓲꓽ ꓣꓳ ꓒꓬꓱꓼ ꓡˍ ꓥꓳ= ꓮ ꓐꓽ ꓮ ꓟ ꓠꓲꓹ ꓟ ꓡꓰ ꓐꓰ ꓣꓳꓽ ꓚꓲ ꓛꓬ ꓠꓲꓹ ꓟ ꓘꓴꓽ ꓗꓪ ꓗꓷ ꓔ ꓢꓲ꓾ꓠꓵ ꓠꓲꓹ ꓗꓪ ꓐꓰ ꓙ ꓖꓴ ꓧꓳꓽ ꓟꓸ ꓖꓶꓽ ꓠꓹ ꓟ꓾ ꓣꓳ ꓐꓰ ꓜꓲꓸꓸ ꓡ ꓢꓴ ꓮ ꓟ ꓔꓯˍ ꓟꓲ ꓪꓴ-ꓢ ꓠꓲꓹ ꓡꓶꓽ ꓡꓰ ꓐꓰ ꓞꓳ ꓫꓱꓽ ꓬꓰ ꓙ ꓐ ꓡ ꓠꓹ ꓟ  ꓪꓴ-ꓢ ꓠꓲꓹ ꓫꓵˍ ꓡꓳ= ꓣꓳꓽ ꓚꓲ ꓛꓬ ꓢꓯꓼ ꓟꓬ ꓟꓶˍꓟ ꓡꓰ ꓐꓰ ꓠꓱꓸ ꓐꓯꓼ ꓢꓴ ꓔꓯ꓾ꓠꓶꓽ ꓛꓳꓽ ꓕꓲꓽ ꓛꓳꓽ ꓔꓯ ꓥˍ ꓟꓲ ꓢꓯꓼ ꓟꓬ ꓖꓶꓽ ꓢꓴ ꓒꓬꓱꓼ ꓠ ꓗˍ ꓡꓳ=

ꓮ ꓟꓶ ꓥˍ ꓟꓲ ꓮ ꓐꓽ ꓮ ꓟ ꓔꓯ ꓫ ꓟꓳˍ ꓟ ꓾ ꓒꓵꓽˍ ꓟ ꓔꓯ ꓣꓳꓽ ꓟꓳꓸ ꓖꓶꓽ ꓠ ꓗꓹ ꓡꓳ= ꓐꓹ ꓐꓽ ꓟꓹ ꓟ ꓐꓰ ꓶꓽ ꓤ ꓗꓪ ꓔꓬ ꓢꓴ꓾ ꓮ ꓐꓽ ꓮ ꓟ ꓒ ꓕꓲꓸꓼ ꓗꓪ ꓔꓬꓹ ꓥ ꓟꓲ ꓶꓽ ꓤ ꓗꓷ ꓡꓰ ꓔꓬꓹ ꓢꓴ ꓮ ꓙꓵꓽ꓾ ꓬꓲꓸ ꓪ ꓔꓯ ꓤ ꓠꓱ ꓤ ꓐꓴ ꓟꓽ ꓟꓲꓸꓸ ꓡꓰ ꓡꓰ꓾ ꓪꓽ ꓘꓴ ꓙ ꓔꓬꓹ ꓟ꓾ ꓢꓯꓼ ꓕꓵꓼ ꓔꓬꓹ ꓟ꓾ ꓬꓲ ꓪ ꓔꓯ ꓠꓲꓹ ꓠꓵˍ  ꓟ ꓢꓷ ꓡꓰ ꓠ ꓑꓧꓳꓠꓰ ꓗꓪ ꓐꓰ ꓥˍ ꓟꓲ꓾ ꓕꓳꓽ ꓶ ꓗꓪ ꓐꓰ ꓥ ꓟꓲ ꓕꓲꓽ ꓘꓶꓽ ꓤ ꓐꓯ ꓖꓶꓽ ꓓꓹ ꓡꓳ= ꓤ ꓠꓱ ꓤ ꓐꓴ ꓡꓰ ꓬꓲ ꓪ ꓔꓯ ꓑꓧꓳꓠꓰ ꓕꓲꓽ ꓧꓪꓼ ꓘꓴˍ ꓠꓬ꓾ ꓥ ꓠꓬ ꓕꓳꓽ ꓶ ꓕꓲꓽ ꓗ ꓐꓳ ꓖꓶꓽˍ  ꓠꓬ ꓐꓹ ꓐꓽ ꓟꓹ ꓟ ꓐꓴ ꓠꓲ ꓘꓪꓽ ꓫꓵˍ ꓥꓳ= ꓣꓳꓽ ꓮ ꓐꓽ ꓮ ꓟ ꓐꓴ ꓐꓱ ꓶꓼ ꓪꓽ ꓘꓴ ꓙ ꓡꓯ= ꓬꓲ ꓪ ꓤꓶ ꓟꓽ ꓖꓴ ꓡꓰ ꓕꓯ ꓣꓳꓽ    ꓗꓪ ꓐꓰ ꓐꓹ ꓐꓽ ꓟꓹ ꓟ ꓐꓴ ꓠꓲꓹ ꓘꓪꓽ ꓫꓵꓸꓸ ꓓꓴ ꓙꓳ ꓝꓲ꓾ ꓗꓹ ꓛꓲꓽ ꓪ ꓡꓰ ꓝꓲ=

ꓮ ꓙꓵꓽ ꓢꓴ ꓐꓸ ꓐꓽ ꓟꓸ ꓟ ꓔꓯ ꓒꓵꓽ ꓢꓲꓼ ꓬꓰ ꓙ ꓪ ꓡꓰ ꓝꓲ=

Add new comment

5 + 0 =