ꓢꓲ ꓡꓰꓸ ꓟ ꓐꓰ ꓖꓽ ꓖꓶꓽ ꓠꓯꓹ_ꓟ

ꓡꓽ ꓞꓳ ꓐꓰ ꓡꓽ ꓞꓳ ꓬꓰ ꓙ ꓔꓳꓼ ꓙ_ꓟ-ꓸ

ꓢꓲꓸꓸꓡꓲꓼ_ꓟ ꓚꓱꓼ ꓐꓰ ꓖꓼ ꓖꓶꓽ ꓠꓯ_ꓟ ꓚꓱꓼ-ꓸ

ꓠꓲꓹ ꓠꓵꓼ ꓟ ꓬꓲ ꓤꓼ ꓠꓬꓲ ꓤꓼ ꓐꓴ ꓠꓬꓲꓹ ꓠꓬꓲ ꓢꓲꓸꓸꓡꓲꓼ_ꓟ ꓐꓰ ꓖꓼ ꓖꓶꓽ ꓠꓯ_ꓟ ꓚꓱꓼ ꓗꓪ ꓠꓬ ꓟꓲ ꓠꓯ ꓡꓽ ꓞꓳ ꓐꓰ ꓟꓲ-ꓠꓯ ꓧꓪꓽ ꓕꓱ ꓟ ꓔꓯꓸ ꓤꓶꓸꓸ ꓫꓵ ꓡꓰ ꓠꓼ_ ꓟ ꓐꓱ ꓶꓽ ꓕꓲꓽ ꓣꓳ ꓐꓰ ꓕꓲꓽ ꓣꓳ ꓠꓬ ꓖꓼ ꓖꓶꓽ ꓡꓯ ꓘꓳꓸꓹ ꓢꓲꓹ ꓟꓲ ꓠꓯ ꓗꓪ ꓙꓳ_ꓟ  ꓚꓰꓼ ꓔꓸ ꓟ ꓥ ꓕ ꓑꓳ ꓔꓯꓸ ꓤ ꓟꓳ ꓗꓸꓸ ꓕ ꓠ ꓗ ꓡꓳ-ꓸ ꓐꓰ ꓔꓲꓸꓹ ꓒꓽ ꓪ ꓔꓲꓸ ꓝꓣꓮꓠꓚꓲꓢ ꓡꓰꓽ ꓐꓯ_ꓡꓳ=

ꓟꓲ-ꓠꓯ ꓕꓱ ꓟ ꓔꓯ ꓫꓱꓸ ꓤꓼ ꓢꓲꓸ ꓤ ꓟꓳ ꓣꓱꓽ ꓟ ꓠꓬ ꓟꓲ-ꓠꓯ ꓗꓪ ꓔꓬ_ꓟ ꓡꓽ ꓞꓳ ꓐꓰ ꓢꓯꓸ ꓫꓵꓽ ꓢꓯꓸ ꓙꓵ ꓕꓲꓽ ꓠꓲꓹ ꓕꓲꓽ ꓪꓼ ꓤꓶ ꓫꓵ ꓟꓬ ꓫꓵ ꓠꓼ ꓟ ꓥ ꓡꓳ= ꓕꓱ ꓟ ꓠꓬ ꓙꓳ ꓔꓬ ꓟ  ꓕꓲꓽ ꓫꓵꓽ ꓐꓰ ꓕꓲ ꓫꓵꓽ ꓠꓯꓼ ꓗꓪ ꓙꓸꓸꓡꓯꓼ ꓘꓳ_ꓟ ꓚꓱꓹ ꓥ ꓢꓲꓸ ꓚꓰꓼ ꓢꓴ ꓢꓲ-ꓒ ꓠꓲꓹ ꓒꓴ_ꓟ ꓚꓱꓼ _ ꓟꓲ ꓥ ꓡꓳ=

ꓠꓬꓲꓸ ꓠꓬꓲ ꓣꓳꓽ ꓤꓶꓽ ꓦꓬꓼ ꓠꓬꓲ ꓗꓪ ꓠꓬ ꓠꓸꓹ ꓫꓵꓽ ꓕꓲꓽ ꓫꓵꓽ ꓐꓰ ꓕꓲ ꓫꓵꓽ ꓝꓸ ꓢꓲꓹ ꓔꓳꓼ ꓜꓳꓽ ꓔꓬ ꓟ ꓠꓬ ꓟꓶꓽ ꓘꓳꓼ ꓐꓰ  ꓦꓬꓼ ꓠꓬꓲ ꓟꓽ ꓪꓽ ꓟꓽ ꓫꓱꓼ ꓡꓰ ꓟ ꓪꓴ ꓠꓬꓲ_ꓟꓲ ꓥ ꓡꓳ= ꓖꓳ ꓟ ꓠꓬ ꓟꓲ-ꓠꓯ ꓕꓱꓽ ꓟ ꓔꓯ ꓫꓱꓸ ꓤꓼ ꓠꓲꓹ ꓟꓽ ꓙꓳ_ꓟ ꓪꓴꓸ ꓠꓬꓲ ꓥ ꓡꓳ ꓐꓰ ꓢꓷꓸ ꓠꓲꓹ ꓙꓳ ꓢꓴ ꓐꓴ ꓡꓰ ꓐꓯ ꓔꓸ ꓡꓳ=

ꓮꓸ ꓫꓵꓽ ꓪꓴꓸ ꓠꓬꓲ ꓥ_ꓡꓽ? ꓠꓬꓲꓸ ꓠꓬꓲ  ꓣꓳ ꓗꓳꓼ ꓡꓳ ꓗꓪ ꓡꓽ ꓞꓳ ꓕꓲꓽ ꓣꓳ ꓐꓰ ꓕꓲꓽ ꓣꓳ ꓕꓲꓽ ꓜꓴ ꓐꓰ ꓕꓲꓽ ꓜꓴ ꓕꓲꓽ ꓗꓴꓓꓼ ꓐꓰ ꓕꓲꓽ ꓗꓴꓓꓼ ꓖꓼ ꓖꓶꓽ ꓡꓯꓽ ꓘꓳ_ꓟ ꓚꓱ ꓟꓶꓽ ꓡꓰ_ꓟ ꓪꓴꓸ ꓠꓬꓲ ꓟꓽ ꓙꓳ ꓡꓰ_ꓟ ꓑꓶꓸ ꓓꓴ ꓥ ꓡꓳ ꓐꓰ ꓬꓲꓸ ꓚꓰ ꓢꓳꓼ ꓔ ꓟ ꓥ ꓡꓳ=

ꓠꓬꓲꓸ ꓠꓬꓲ ꓟꓵꓽ ꓗꓳ ꓓꓵ ꓓꓵ ꓗꓪ ꓔꓳꓼ ꓜꓳꓽ ꓔꓬ ꓟ ꓠꓸꓹ ꓫꓵꓽ ꓮꓽ ꓟꓬ ꓗꓪ ꓐꓰ ꓡꓰꓼ ꓙꓲ ꓠꓼ_ꓟ ꓠꓬ ꓕꓲꓽ ꓣꓳ ꓐꓰ ꓕꓲꓽ ꓣꓳ ꓪꓽ ꓡꓯꓼ ꓘꓳ ꓖꓼ ꓖꓶꓽ ꓡꓯ ꓘꓳ ꓢꓲꓸ ꓫꓱꓹ ꓡꓯꓼ ꓘꓳ ꓢꓲ ꓬꓰ ꓙ ꓔꓳꓼ ꓙ ꓠ ꓗ ꓡꓳ-ꓸ

ꓣꓳ ꓗꓳ ꓡꓳ ꓗꓪ ꓠꓬ ꓠꓸꓹ ꓒꓬꓽ ꓢꓴ-ꓸ ꓞꓲꓼ ꓪꓴꓽ ꓢꓯꓼ ꓐꓽ ꓔꓬ ꓢꓴ ꓐꓰ ꓫꓸ ꓢꓴ ꓟꓶꓽ ꓢꓴ ꓮꓽ ꓟꓬ ꓙꓳ_ ꓡꓳ-ꓸ ꓖꓳ ꓡꓰ ꓥ_ ꓟꓲ ꓬꓲꓸ ꓪꓽ ꓔꓯꓸ ꓠꓬꓲ ꓙ ꓔꓳ_ꓙ ꓠꓯ_ꓟ ꓚꓱ ꓗꓪ ꓟꓽ ꓓꓵꓽ ꓙ ꓙ ꓚꓵꓸ ꓛꓬ ꓐꓱ ꓶ ꓪ ꓜꓲ ꓬꓰ ꓔꓬ ꓡꓳ-ꓸ ꓖꓳ ꓟ ꓠꓬ ꓚꓰꓼ ꓢꓴ ꓢꓲ-ꓒ ꓠꓲꓹ ꓡꓶꓽ ꓐꓰ ꓟꓽ ꓪꓽ ꓟꓽ ꓫꓱꓼ ꓡꓰꓳ-ꓸ ꓖꓳ ꓟ ꓪꓴꓸ ꓠꓬꓲ ꓣꓳꓽ ꓗꓳ ꓡꓳ ꓗꓪ ꓔꓬ_ꓟ ꓠꓸꓹ ꓒꓬꓽ ꓢꓴ-ꓸ ꓞꓲꓼ ꓪꓴꓽ ꓢꓯꓼ ꓐꓽ ꓔꓬ ꓢꓴ ꓐꓰ ꓫꓸ ꓢꓴ ꓟꓶꓽ ꓢꓴ ꓐꓴ ꓔꓯꓸ ꓬꓰ ꓙ ꓔꓳꓼ ꓙ ꓠ ꓗ ꓡꓳ-ꓸ

ꓕꓱꓽ ꓟ ꓠꓬ ꓕꓲꓽ ꓣꓳ ꓐꓰ ꓕꓲꓽ ꓣꓳ ꓖꓽ ꓖꓶꓽ ꓡꓯ ꓘꓳ_ꓟ ꓚꓱ ꓥ ꓢꓲꓼ ꓪꓴ-ꓢ ꓔꓯ ꓟꓲ ꓠꓯ ꓡꓽ ꓞꓳ ꓡꓰꓽ ꓝꓴꓲꓸ ꓣꓷꓠꓸ ꓔꓸ ꓟ_ꓟꓲ ꓥ ꓡꓳ-ꓸ ꓣꓳꓽ ꓟꓲ-ꓠꓯ ꓡꓽ ꓞꓳ ꓠꓬ ꓝꓴꓲꓹ ꓙꓳ ꓢꓴ_ꓡꓰ ꓥ  ꓡꓳ-ꓸ ꓖꓳ ꓡꓰ ꓥꓼ_ꓟꓲ ꓢꓲ-ꓒ ꓪꓴ ꓢ ꓠꓬ ꓣꓳꓽ ꓔꓯ ꓠꓲꓹ ꓠꓵ ꓢꓲꓹ ꓮ ꓕꓯꓽ ꓥꓼ_ꓟꓲ ꓫꓱꓸ ꓤꓼ ꓔꓬ ꓡꓳ-ꓸ ꓖꓳ ꓟ ꓡꓰ ꓐꓰ ꓟꓲ-ꓠꓯ ꓡꓽ ꓞꓳ ꓐꓴ ꓥ_ꓟꓲ ꓪꓴ-ꓢ ꓔꓯꓸꓝꓴꓲꓸ ꓣꓷꓠ  ꓠꓼ ꓟ ꓣꓳꓽ ꓗꓳ ꓡꓳ ꓗꓪ ꓔꓬ_ꓟ ꓠꓸꓹ ꓒꓬꓽ ꓢꓴ-ꓸ ꓞꓲꓼ ꓪꓴꓽ ꓢꓯꓼ ꓐꓽ ꓔꓬ ꓢꓴ ꓐꓰ ꓫꓸ ꓢꓴ ꓟꓶꓽ ꓢꓴ ꓐꓴ ꓔꓯꓸ ꓬꓰ ꓙ ꓔꓳꓼ ꓙ ꓠ ꓗ ꓡꓳ-ꓸ

ꓝꓮꓲ ꓠꓸꓹ ꓒꓬꓽ ꓢꓴ-ꓸ ꓞꓲꓼ ꓪꓴꓽ ꓢꓯꓼ ꓐꓽ ꓔꓬ ꓢꓴ ꓐꓰ ꓫꓸ ꓢꓴ ꓟꓶꓽ ꓢꓴ ꓐꓴ ꓠꓬ ꓬꓲꓸꓪꓽ ꓠꓯꓼ_ꓗꓪ ꓣꓱꓽ ꓬꓯꓼ_ꓟ ꓐꓰ ꓠꓲꓹ ꓫꓵ_ꓟ ꓐꓱ ꓶꓽ ꓢꓯꓼ ꓕꓵꓼ ꓟ ꓐꓸꓹ ꓡꓽ_ꓟ ꓪꓴꓸ ꓠꓬꓲ  ꓬꓲꓸ ꓪ ꓔꓯꓸ ꓮꓽ ꓘꓶꓸ ꓔꓳꓼ ꓙ ꓠ ꓗ ꓡꓳ-ꓸ

ꓝꓮꓲ ꓟꓳꓽ ꓗꓪ ꓟꓲ ꓠꓯ ꓕꓱ ꓟ ꓔꓯꓸ ꓥꓼ_ꓟꓲ ꓡꓽ ꓞꓳ ꓐꓴ ꓡꓰ ꓤ ꓟꓳ ꓢꓲꓼꓟꓽ ꓙꓽ ꓖꓶꓽ ꓐꓭ ꓠꓬ ꓠꓸꓹ ꓫꓵꓽ ꓠꓸꓹ ꓙꓵꓽ ꓥꓼ_ꓟꓲ ꓪꓸꓸ ꓜꓲ ꓟꓬꓽ ꓡ ꓚꓰꓼ ꓥꓳ= ꓖꓳ ꓟ ꓐꓶꓸ ꓓꓴ ꓠꓬꓲꓹ ꓠꓬꓲ ꓣꓳꓽ ꓠꓬ ꓪꓴ-ꓢ ꓔꓯꓸ ꓖꓼ ꓖꓶꓽ_ꓟ ꓚꓱꓼ ꓗꓪ ꓬꓲꓸ ꓡꓰꓽ ꓡꓯꓼ ꓙꓱ ꓔꓸ ꓟ ꓟꓲ-ꓠꓯ ꓕꓱꓽ ꓟ ꓐꓰ ꓠꓸꓹ ꓒꓬꓽ ꓢꓴ-ꓸ ꓞꓲꓼ ꓪꓴꓽ ꓢꓯꓼ ꓐꓽ ꓔꓬ ꓢꓴ-ꓸ ꓫꓸ ꓢꓴ ꓟꓶꓽ ꓢꓴ ꓐꓴ ꓔꓯꓸ ꓬꓰ ꓙ ꓔꓳꓼ ꓙ ꓢꓲꓼ ꓕꓲꓽ ꓠꓲꓹ ꓕꓲꓽ ꓪꓼ ꓒꓬꓱꓼ ꓡ ꓠꓼ ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ-ꓸ ꓖꓳ ꓡꓰ ꓕꓲꓽ ꓠꓲꓹ ꓕꓲꓽ ꓪꓼ ꓬꓰ ꓐꓭ ꓠꓬ ꓪꓴ-ꓢ ꓥꓼ_ ꓟꓲ ꓣꓳꓽ ꓔꓯꓸ ꓫꓱꓸ ꓤꓼ ꓢꓲ ꓪ ꓜꓲ ꓠꓸꓹ ꓢ ꓗꓸ ꓛꓲꓽ_ꓟ ꓤꓶ ꓦꓬꓼ ꓠꓬꓲ ꓔꓯꓸ ꓬꓲꓸ ꓢꓲ-ꓒ ꓡꓰ ꓙꓽ ꓖꓶꓽ ꓡ ꓥꓳ-ꓸ ꓔꓬ_ꓢ ꓗꓹ ꓛꓲ_ꓟ ꓦꓬꓼ ꓠꓬꓲ ꓟꓶꓽ ꓘꓳꓼ ꓥꓼ_ꓟꓲ ꓒꓬꓱꓼ ꓡ ꓥꓳ=

ꓔꓬ_ꓢ ꓗꓹ ꓛꓲꓽ_ꓟ ꓦꓬꓼ ꓠꓬꓲ ꓐꓰ-ꓸ ꓠꓸꓹ ꓫꓵꓽ ꓥ ꓕ ꓑꓳꓸ ꓗꓪ ꓐꓰ ꓮꓽ ꓙꓵꓽ ꓢꓴ ꓡꓰꓹ ꓙꓰ ꓡꓰ ꓝꓲ-ꓸ

Source: Vatican news

Add new comment

13 + 2 =