ꓣꓳ ꓤꓶꓸꓹ ꓗꓪ ꓡꓳ ꓩꓴ ꓗꓷ ꓠ ꓗꓹ ꓟ ꓕꓲ ꓐꓱ

ꓣꓳ ꓤꓶꓸꓹ ꓗꓪ ꓡꓳ ꓩꓴ ꓗꓷ ꓠꓹ ꓔꓽ ꓟ ꓕꓲ ꓐꓱ ꓣꓳ ꓐꓴ ꓠꓬ ꓣꓳ ꓚꓲꓸ ꓛꓬ ꓔꓯ ꓙꓵꓹ ꓟ ꓟꓳ ꓠꓹ ꓟ ꓕꓯ ꓢꓲ ꓢꓴ ꓔꓯ ꓙꓵꓹ ꓟ ꓟꓳ ꓚꓱꓼ ꓡꓳ= ꓢꓴ ꓡꓳꓸ ꓐꓲ ꓟ ꓔꓯ ꓡꓰ ꓟꓳ ꓡꓳ꓾ ꓟꓽ ꓞꓲ ꓢꓴ ꓗꓹ ꓛꓲ ꓟ ꓔꓯ ꓡꓰ ꓟꓳ ꓡꓳ= ꓣꓳ ꓤꓶꓸꓹ ꓗꓪ ꓗꓹ ꓛꓲ ꓠꓲꓹ ꓫꓵ ꓠꓬ ꓕꓱ ꓡꓱ ꓫꓵ ꓔꓯ ꓣꓳ ꓠꓲꓹ ꓟ ꓪꓴꓽ ꓠꓶꓽ ꓗꓪ ꓐꓰ ꓡꓳ ꓩꓴ ꓗꓷ ꓠꓹ ꓗꓹ ꓡꓳ= ꓕꓱ ꓡꓱ ꓡꓳ ꓩꓴ ꓗꓷ ꓠꓹ ꓟ ꓠꓬ ꓟꓽ ꓢ ꓐꓭ ꓥꓳ= ꓖꓳ ꓡꓰ ꓥ ꓟꓲ ꓬꓲ ꓙꓵꓹ ꓣꓴ ꓢꓲ꓾ ꓢꓯꓼ ꓕꓵꓼ ꓠꓹ ꓗꓹ ꓡꓳ= ꓟꓲ ꓠꓯ ꓗꓪ ꓔꓬ ꓢꓴ ꓞꓳ ꓤ ꓮ ꓙꓵꓽ ꓠꓬ ꓥꓳ ꓡꓰ ꓟ ꓙꓳ ꓚꓱꓼ ꓡꓳ= ꓟꓽ ꓥꓳ ꓡꓰ ꓠꓬꓲ ꓢꓴ ꓕꓲ ꓣꓳ ꓟꓲ ꓟꓽ ꓙꓳ=

ꓥꓪ ꓠꓬ ꓙꓳ ꓡꓰ ꓢꓴ ꓥꓳ꓾ ꓮ ꓫꓵꓽ ꓟꓲ ꓬꓰ ꓟꓽ ꓑ ꓡ ꓐꓰ ꓐꓯ ꓢꓲ꓾ ꓟꓽ ꓢꓯꓼ ꓕꓵꓼ ꓕꓽ ꓔꓬ= ꓣꓳ ꓛꓲ ꓚꓬ ꓖꓳ ꓓꓱ ꓠꓲꓹ ꓟ ꓔꓯ ꓙꓵꓹ ꓟ ꓡꓳꓸ ꓟꓳ ꓝꓲ= ꓢꓴ ꓡꓰ ꓠꓴ ꓠꓬ ꓮ ꓫꓵꓽ ꓡꓲ ꓬꓰ ꓟꓽ ꓑ ꓡ ꓐꓰ ꓐꓯ ꓡ ꓕꓯ ꓠꓴ ꓠꓲꓹ ꓟ ꓔꓯ ꓢꓯꓼ ꓙꓳ ꓙꓳ ꓡꓰ ꓗꓷ ꓡꓰ ꓝꓲ꓾ ꓠꓲꓹ ꓟ ꓕꓽ ꓐꓬ ꓡꓰ ꓝꓲ= ꓟꓲ ꓠꓯ ꓗꓪ ꓠꓬ ꓠꓴ ꓔꓯ ꓬꓲꓸ ꓚꓱꓹ ꓮ ꓟꓬꓹ ꓫꓵꓽ ꓗꓪ ꓐꓰ ꓤ ꓠꓬꓲ ꓡ ꓥꓳ= ꓖꓳ ꓡꓰ ꓐꓯ ꓥ ꓟꓲ ꓠꓲꓹ ꓟ ꓕꓽ ꓐꓬ ꓡꓰ ꓝꓲ= ꓣꓳ ꓤꓶꓸꓹ ꓗꓪ ꓣꓳ ꓛꓲ ꓚꓬ ꓡꓰ ꓦ ꓡꓱ ꓖꓴ ꓥ ꓡꓳ= ꓣꓳ ꓠꓯꓼ ꓗꓪ ꓙꓳˍ ꓟ ꓔꓯ ꓠꓲꓹ ꓖꓪ ꓫꓵꓽ= ꓢꓴ ꓠꓯꓹꓼ ꓗꓪ ꓙꓳ ꓟ ꓔꓯ ꓓ ꓠꓲꓹ ꓠ= ꓟꓲ ꓠꓯ ꓗꓪ ꓣꓳ ꓪ ꓠꓲꓹ ꓫꓵꓽˍ ꓟ ꓮ ꓙꓵꓹ ꓔꓯ ꓪ ꓠꓹ ꓟ ꓠꓬ ꓟꓽ ꓢ=

ꓖꓳ ꓡꓰ ꓟ ꓑꓶꓸ ꓓꓴ ꓣꓳ ꓠꓯꓹꓼ ꓗꓪ ꓙꓳ ꓟ ꓔꓯ ꓠꓲꓹ ꓖꓪ ꓫꓵꓽ ꓠꓹ ꓗꓹ ꓡꓳ= ꓠꓴ ꓠꓯꓹꓼ ꓗꓪ ꓫꓸ ꓓꓴ ꓙꓳ ꓡ ꓐꓯ ꓥˍ ꓟꓲ ꓠꓴ ꓕꓯ ꓢꓲ ꓗꓪ ꓫꓸ ꓢꓴ ꓮ ꓟꓬꓹ ꓔꓬ ꓟ ꓔꓯ ꓓꓵ ꓙ ꓪ ꓡꓰ ꓝꓲ= ꓟꓲ ꓠꓯ ꓗꓪ ꓮ ꓟꓬ ꓗꓪ ꓛꓲ ꓧꓪꓽ ꓡꓰ ꓢꓴ ꓕꓲ ꓣꓳ ꓥ ꓟꓲ ꓬꓲꓸ ꓠꓯꓹꓼ ꓗꓪ ꓙꓳˍ ꓟ ꓔꓯ ꓠꓲꓹ ꓖꓪ ꓟꓽ ꓫꓵꓽ ꓢꓴ ꓟꓲ ꓙꓳ ꓡꓳ= ꓗꓹ ꓛꓲ ꓓꓴ ꓐꓯ ꓟ ꓠꓬ ꓒꓴꓽ ꓫꓵꓽ ꓙꓳˍ ꓕꓯ ꓢꓲ ꓟꓽ ꓥ= ꓪ ꓦ ꓟ ꓤꓶꓸꓹ ꓕꓯ ꓗꓹ ꓛꓲ ꓛꓲ ꓔꓬ ꓣꓳ ꓛꓲ ꓚꓬ ꓕꓱꓹ ꓛꓲ ꓚꓬ ꓙ ꓫꓸ ꓔꓽ ꓟ ꓚꓱꓹ ꓮ ꓙꓵꓹ ꓔꓯ ꓡꓳ ꓩꓴ ꓗꓷ= ꓙꓲˍ ꓟ ꓞꓳ ꓤ ꓒꓬꓱꓽ ꓡ ꓠꓹ ꓟ ꓢꓯꓼ ꓕꓵꓼ= ꓡꓳꓹ ꓬꓰ ꓟ ꓕꓲ ꓙꓵꓹ ꓔꓯ ꓬꓰ ꓗꓷ ꓥꓳ ꓗꓷ ꓟ ꓝꓴꓲꓸ ꓗꓪ ꓐꓰ ꓕꓯ ꓥꓳ ꓣꓴ ꓢꓲ꓾ ꓡ ꓠꓹ ꓟ ꓗꓪ ꓕꓱ ꓡꓱ ꓟꓽ ꓬꓰ ꓥꓳ ꓡꓰ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓡꓯ= ꓣꓳ ꓔꓯ ꓙꓵꓹ ꓢꓴ ꓔꓯ ꓡꓰ ꓙꓵꓹ ꓪ ꓡꓰ ꓝꓲ= ꓟꓲ ꓠꓯ ꓤꓶꓸꓹ ꓠꓬ ꓕꓲ ꓑ ꓤ ꓡꓰ ꓥ ꓡꓳ= ꓣꓳ ꓒ ꓕꓲ ꓗꓪ ꓔꓬ ꓢꓲ꓾ ꓣꓳ ꓔꓯ ꓢꓯꓼ ꓖꓶ ꓡ ꓢꓴ ꓬꓰ ꓙ ꓡ ꓢꓴ ꓙ ꓖꓴ ꓧꓳ ꓟꓳꓸ ꓖꓶ ꓡ ꓢꓴ ꓐꓴ ꓐꓰ ꓕꓲ ꓠꓲꓹ ꓕꓲ ꓪ ꓔꓬ ꓪ ꓡꓰ ꓝꓲ= ꓣꓳ ꓡꓰ ꓬꓰ ꓙ ꓦ ꓢꓴ ꓐꓴ ꓣꓳ ꓫꓸ ꓓꓴ ꓔꓳꓹ ꓜꓳꓼ ꓔꓬ ꓟ ꓕꓲ ꓙꓵꓹ ꓗꓪ ꓟꓽ ꓬꓰ ꓙ ꓡ ꓢꓴ ꓔꓯ ꓠꓲꓹ ꓟ ꓗꓪ ꓐꓰ ꓡꓳ ꓩꓴ ꓗꓷ ꓑ ꓡ ꓝꓲ= ꓢꓴ ꓠꓬ ꓣꓳ ꓟꓽ ꓥ=