ꓫꓬꓹ ꓑꓱ ꓠꓹ ꓟ ꓕꓽ ꓙꓳ꓾

1ꓸ ꓔꓶꓸꓹ ꓙꓱꓼ ꓙꓳ ꓝꓲ꓾

ꓧꓪꓸ ꓠꓲꓹ ꓫꓵˍꓟ ꓞꓳ ꓡꓱ ꓐꓴ ꓠꓯꓼ ꓗꓪ ꓠꓬ ꓣꓳꓸ ꓚꓵˍ ꓟ ꓔꓶꓸꓹ ꓙꓱꓼ ꓙꓳˍꓡꓳ=  ꓔꓶꓸꓹ ꓙꓱꓼ ꓟꓽ ꓙꓳ ꓢꓴ ꓠꓬ ꓬꓲꓸ ꓮ ꓡꓰ ꓗꓷ ꓠꓲꓹ ꓫꓵˍ ꓟ ꓔꓯ ꓟꓽ ꓢꓷꓸ ꓠꓬꓲ ꓥꓳ= ꓖꓳ ꓡꓱ ꓗꓷ ꓡ ꓕꓯ ꓠꓬ ꓞꓳ ꓡꓱ ꓐꓴ ꓠꓯꓼ ꓗꓪ ꓧꓪꓸ ꓡꓰ ꓓꓴ ꓚꓱꓹ ꓟꓶ ꓡꓰ ꓡ ꓥꓳ= ꓖꓳ ꓟ ꓑꓶ ꓓꓴ ꓔꓶꓸꓹ ꓙꓱꓼ ꓙꓳ ꓝꓲ=

2ꓸ ꓢꓴ ꓐꓰ ꓟꓽ ꓪ ꓠ ꓟꓬꓱꓽ ꓔꓯ ꓢꓯꓼ ꓕꓵꓼ꓾

ꓢꓴ ꓐꓰ ꓪ ꓠ ꓟꓬꓱꓽ ꓬꓰ ꓕꓯ ꓠꓬ ꓢꓴ ꓐꓰ ꓪˍ ꓟ ꓬꓲꓸ ꓒꓵꓽ ꓪ ꓡ ꓥꓳ= ꓢꓴ ꓐꓰ ꓟꓽ ꓪ ꓠ ꓟꓬꓱꓽ ꓬꓰ ꓠꓬ ꓢꓴ ꓐꓰ ꓟꓽ ꓪ ꓟ ꓬꓲꓸ ꓒꓵꓽ ꓔꓯ ꓪ ꓡ ꓥꓳ= ꓢꓴ ꓕꓯ ꓢ ꓐꓳ ꓠꓲꓹ ꓫꓵ ꓐꓶ ꓠꓬ ꓢꓴ ꓐꓰ ꓟꓽ ꓪ ꓟ ꓟꓬꓱꓽ ꓔꓯ ꓢꓯꓼ ꓕꓵꓼ ꓪ ꓡꓰ ꓝꓲ=

3ꓸ ꓑ ꓫꓬ ꓠꓲꓹ ꓡꓶꓽ ꓕꓽ ꓛꓳ꓾

ꓕꓲ ꓖ ꓕꓲ ꓧꓪꓹ ꓣꓳ ꓐꓴ ꓠꓬ ꓟꓽ ꓓꓵꓽ ꓙ ꓙ ꓑ ꓫꓬ ꓠꓲꓹ ꓡꓶꓽ ꓔꓯ ꓛꓳ ꓗꓷ ꓕꓯ ꓥꓳꓽ ꓡꓰ ꓟ ꓥ ꓟꓲ ꓙꓳ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓮ ꓙꓵꓽ ꓔꓯ ꓕꓽ ꓛꓳ ꓐꓰ ꓐꓯ ꓟ ꓟꓽ ꓥ= ꓛꓳ ꓠ ꓔ ꓟ ꓔꓯ ꓛꓳ꓾ ꓟꓽ ꓛꓳ ꓠ ꓔ ꓟ ꓔꓯ ꓠꓬ ꓣꓳ ꓚꓲ ꓛꓬ ꓢꓷꓸ ꓗꓴꓸ ꓠ ꓔ ꓡꓳ= ꓑ ꓫꓬ ꓠꓲꓹ ꓡꓶꓽ ꓔꓯ ꓛꓳ ꓕꓯ ꓥꓳꓽ ꓡꓰ ꓟ ꓔꓯ ꓠꓬ ꓥꓳꓽ ꓡꓰꓳ ꓐꓰ ꓐꓯ ꓑꓶꓸ ꓠ ꓔ ꓡꓳ= ꓖꓳ ꓕꓯ ꓢꓲ ꓣꓳ ꓗꓴꓷꓼ ꓣꓳ ꓫꓵꓽ ꓣꓳ ꓤꓶꓸꓹ ꓪꓴꓽ ꓡ ꓓꓴ ꓥ ꓡꓳ=

4ꓸ ꓫꓬꓹ ꓑꓱ ꓠꓹ ꓟ ꓕꓽ ꓙꓳ꓾

ꓠꓲꓹ ꓟ ꓠꓯꓼ ꓗꓪ ꓣꓳ ꓥꓳꓽ ꓡꓰ ꓟ ꓔꓯ ꓢꓷꓸ ꓐꓶ ꓠꓬ ꓫꓬꓹ ꓑꓱ ꓠꓹ ꓟ ꓕꓽ ꓙꓳ= ꓥꓳꓽ ꓡꓰ ꓟ ꓔꓯ ꓢꓷꓸ ꓡꓰ ꓢꓲ ꓫꓬꓹ ꓑꓱ ꓗꓴꓸ ꓢꓴ ꓠꓽ ꓢꓷꓸ ꓠꓲꓹ ꓙꓳ ꓒꓽ ꓥ ꓡꓳ=

5ꓸ ꓢ ꓢ ꓡꓰ ꓕꓽ ꓙꓵ.,

ꓣꓳ ꓪꓴꓸ ꓠꓶꓸ ꓗꓪ ꓐꓰ ꓟꓽ ꓓꓵꓽ ꓙ ꓙ ꓢꓴ ꓡꓰ ꓐꓯ_ ꓟ ꓐꓯ ꓘꓶꓽ ꓫꓸ ꓪ ꓔꓯ ꓢ ꓢ ꓡꓰ ꓙꓵꓻˍ ꓟ ꓪꓴꓸ ꓠꓬꓲ  ꓤꓶꓸꓹ ꓐꓬ ꓡꓰ ꓟ ꓟꓲ ꓙꓳ ꓡꓳ= ꓚꓵ ꓚꓵ ꓪꓴꓸ ꓠꓶꓸ ꓙꓳ ꓢꓴ ꓥꓳ ꓐꓯ ꓠꓬ ꓢꓴ ꓡꓰ ꓐꓯˍꓟ ꓫꓸ ꓪ ꓔꓯ ꓢ ꓢ ꓡꓰ ꓙꓵꓻ ꓟꓽ ꓐ ꓡ = ꓞꓳ ꓡꓱ ꓐꓴ ꓠꓴ ꓪ ꓥ ꓟꓲ ꓢ ꓢ ꓡꓰ ꓕꓽ ꓙꓵꓻ ꓪ ꓡꓰ ꓝꓲ = ꓕꓲ ꓐꓱ ꓠꓬ ꓣꓳ ꓧꓪꓸ ꓡꓰ ꓟ ꓚꓱꓹ ꓗꓪ ꓙꓻ ꓫꓱꓽ ꓢꓯꓼ ꓕꓵꓼ ꓕꓯ ꓕꓱ ꓟ ꓠꓬ ꓟꓽ ꓙꓲˍ ꓟ ꓚꓱꓹ ꓥ ꓡꓳ ꓐꓰ ꓠꓴ ꓔꓯ ꓐꓯ ꓡ ꓕꓯ ꓢ ꓢ ꓡꓰ ꓙꓵꓻ ꓗꓷ ꓐꓯ ꓠꓬ ꓠꓴ ꓧꓪꓸ ꓡꓰ ꓟ ꓚꓱꓹ  ꓐꓬ ꓡꓰ ꓡ ꓥꓳ= ꓖꓳ ꓡꓱ ꓔ ꓟ ꓪꓴꓸ ꓠꓬꓲ ꓞꓳ ꓡꓱ ꓐꓴ ꓮ ꓘꓶꓸ ꓤ ꓟꓳ ꓠ ꓔ ꓡꓳ=