ꓬꓰ-ꓢꓴ ꓐꓰ ꓟꓵꓽ ꓘꓳꓼ (3) Dialogue with Environment

ꓢꓲꓺ ꓒ ꓬꓰ-ꓢꓴ ꓠꓬ ꓕꓳꓼ ꓡ ꓟꓵꓽ ꓤꓼ ꓜꓶꓽ ꓢꓲ ꓙꓰ-ꓣꓴ-ꓢ-ꓡꓱ ꓗꓪ ꓓꓵꓽ ꓡˍ ꓟ ꓥ ꓪ(ꓟ-ꓘꓳ 21)= ꓖꓳ ꓟ ꓟ-ꓘꓳ ꓶꓽ ꓓꓳ ꓫꓱꓸ ꓓꓳ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓗꓸ ꓠꓯꓸ ꓢꓲ ꓗꓪ ꓛꓳ ꓢꓴ ꓐꓴ ꓔꓯ ꓠꓴ ꓪ ꓠꓬ ꓟꓵꓽ ꓗꓳꓹ ꓓꓵ ꓓꓵ ꓗꓪ ꓙꓰ ꓢꓲ ꓞꓳ ꓫꓵꓽ ꓥ ꓕ ꓑꓳꓸ ꓔꓯ ꓪꓴ-ꓢ ꓶꓽ ꓓꓳꓽ ꓫꓱꓸ ꓓꓳꓽ ꓚ ꓒꓬꓱꓼ ꓙꓰ ꓐꓰ ꓕꓱ ꓡꓰ ꓐꓯ ꓔ ꓡꓳ= ꓢꓲꓺ ꓒꓽ ꓬꓰ-ꓢꓴ ꓬꓲ ꓡꓯꓼ ꓐꓳ ꓔꓶꓸ ꓓꓴ ꓗꓪ ꓕꓯꓼ ꓔꓶꓸ ꓫꓵˍ ꓟ ꓠꓬ ꓬꓲ ꓠꓬ ꓟꓵꓽ ꓘꓳꓼ ꓔꓯ ꓛꓳ ꓢꓲ ꓞꓳ ꓤꓽ ꓮ ꓡꓰ ꓫꓵˍ ꓟ ꓖꓳ ꓡꓰ ꓫꓵˍ ꓟ ꓥ ꓢꓲ ꓠꓬꓲ 3 ꓦꓬꓼ ꓗꓸ ꓠꓯꓸ ꓢꓯꓸ ꓬꓲꓼ ꓡˍ ꓟ ꓥˍ ꓟ ꓪꓴ ꓠꓬꓲ ꓕꓱ ꓟ ꓠꓬ ꓚꓵ ꓘꓶꓽ ꓓꓽ ꓟ ꓥˍ ꓡꓳ= ꓮ ꓡꓲꓳ ꓐꓯ ꓠꓬ ꓪꓴ-ꓢ ꓕꓲꓽ ꓣꓳ ꓠꓬ ꓞꓳ ꓤꓽ ꓕꓲꓽ ꓣꓳ ꓫꓵꓽ ꓟ ꓡꓰ ꓐꓰ ꓕꓲꓽ ꓡꓰꓻ ꓫꓵˍ ꓟ ꓥˍ ꓟ ꓪꓴꓸ ꓠꓬꓲ ꓬꓲ ꓠꓬ ꓟꓵꓽ ꓘꓳꓼ ꓔꓯ ꓮꓽ ꓘꓶꓸ ꓒꓵꓽ ꓢꓴ ꓥˍ ꓡꓳ ꓐꓯˍ ꓟ ꓬꓲ ꓢꓷꓸ ꓡꓰ ꓓꓴ ꓕꓲꓽ ꓟ ꓥ ꓪ= 

ꓢꓲꓺ ꓒ ꓬꓰ-ꓢꓴ ꓪꓴ-ꓢ ꓐꓯ ꓘꓶꓽ ꓔꓯ ꓪꓴ-ꓢ ꓐꓯ ꓘꓶꓽ ꓔꓯ ꓠ ꓠꓹ ꓢꓲ ꓬꓰˍ ꓟ ꓟꓬꓱꓽ ꓥ ꓕꓯ ꓑꓳꓸ ꓠꓬ ꓞꓳ ꓤꓽ ꓐꓰ ꓚꓰꓼ ꓢꓴ ꓢꓲꓺ ꓒ ꓪꓴ-ꓢ ꓠꓬꓲꓽ ꓗꓴꓸ ꓚꓸ ꓗꓪ ꓧꓳꓹ ꓡꓯꓽ ꓘꓳ ꓝꓲˍ ꓟ꓾ ꓠ ꓓꓴ ꓒꓬꓽ ꓓꓴ ꓔꓯ ꓠ ꓫꓬ ꓒꓬꓽ ꓫꓬ ꓖꓶˍ ꓟ꓾ ꓞꓳ ꓤꓽ ꓠꓲꓹ ꓟ ꓒꓳꓹ ꓡꓰꓼ ꓡ ꓠꓹ ꓟ ꓐꓱ ꓶ ꓟꓸ ꓖꓶˍ ꓟ ꓕꓱ ꓡꓰ ꓬꓰˍ ꓟ ꓠꓯꓸꓼ ꓗꓪ ꓮ ꓕꓯ ꓥˍ ꓟꓲ ꓕꓱ ꓡꓯꓹ ꓡꓰ ꓬꓰ ꓓ ꓥ ꓐꓯˍ ꓟ ꓟꓽ ꓙꓳ ꓬꓲ ꓠꓬ ꓒꓴ ꓒꓴ ꓡꓯꓽ ꓡꓯꓽ ꓮꓽ ꓙꓵꓽ ꓢꓴ ꓐꓱ ꓶ ꓕꓱ ꓡꓰ ꓬꓰˍ ꓟ ꓥ ꓪ= ꓬꓲ ꓕꓲꓽ ꓞꓲꓼ ꓡꓱꓸꓼ ꓪꓴ-ꓢ ꓐꓱ ꓶ ꓢꓯꓼ ꓕꓵꓼˍ ꓟ ꓚꓬꓴ ꓙˍ ꓟ ꓟꓬꓱꓽ ꓬꓰˍ ꓟ ꓮꓽ ꓙꓵꓽ ꓠꓬ ꓟꓽ ꓓ ꓪꓴꓽ ꓖꓴ ꓡꓰ ꓟ ꓙꓲ ꓖꓴ ꓙꓳˍ ꓟ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓝꓲ ꓓꓴ ꓒꓳ-ꓡꓳ ꓡꓰ ꓮ ꓡꓰ ꓐꓯꓹ ꓡ ꓐꓯˍ ꓠꓬ ꓢꓲꓺ ꓒꓽ ꓬꓰ-ꓢꓴ ꓠꓬ ꓚꓰꓼ ꓔ ꓟ ꓮꓽ ꓙꓵꓽ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵˍ ꓟ ꓬꓲ ꓝꓳꓹ ꓟꓶ ꓠꓯꓸꓼ ꓗꓪ ꓔꓬ ꓡꓳ ꓐꓰ ꓕꓱ ꓡꓰ ꓟꓸ ꓟꓲꓽ ꓚ ꓔ ꓟ ꓥˍ ꓡꓳ=

ꓢꓲꓺ ꓒ ꓬꓰ-ꓢꓴ ꓠꓬ ꓣꓳꓽ ꓟꓲ ꓠꓯ ꓞꓳ ꓤꓽ ꓡꓰ ꓟꓳ ꓪ ꓟꓽ ꓓˍ ꓟ ꓪꓴ-ꓢ ꓡꓰ ꓚꓰꓼ ꓔ ꓟ ꓚꓱꓹ ꓠꓯꓸꓼ ꓗꓪ ꓓꓽ ꓪꓴꓸ ꓥˍ ꓡꓳ= ꓟꓴ ꓗꓪ ꓐꓰ ꓟꓲ ꓠꓯ ꓗꓪ ꓟꓳ ꓪ ꓓˍ ꓟ ꓐꓰ ꓟꓳ ꓪ ꓟꓽ ꓓꓹ ꓟ ꓮꓽ ꓙꓵꓽ ꓠꓬ ꓬꓲ ꓡꓰ ꓚꓰꓼ ꓔ ꓟ ꓔꓯ ꓑꓯꓹ ꓟꓶˍ ꓡꓳ= ꓙꓵꓽ ꓠꓲꓸ ꓕꓲ ꓗꓪ ꓔꓬ ꓢꓴ ꓥˍ ꓟꓲ꓾ ꓗꓴꓷꓼ ꓔꓯ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓥˍ ꓟꓲ꓾ ꓙꓵꓽ ꓪꓼ ꓙꓳ ꓢꓴ ꓥˍ ꓟꓲ ꓮꓽ ꓙꓵꓽ ꓠꓬ ꓬꓲ ꓠꓯꓸꓼ ꓗꓪ ꓥ ꓢꓲ ꓬꓲ ꓐꓱ ꓶ ꓚꓰꓼ ꓔ ꓟ ꓥˍ ꓡꓳ= ꓬꓲ ꓠꓬ ꓚꓰꓼ ꓔ ꓟ ꓕꓲꓽ ꓫꓵꓽ ꓡꓰ ꓟꓽ ꓙꓳ ꓢꓰꓼ ꓧꓶꓸ ꓕꓯ ꓗꓪ ꓔꓬˍ ꓟ ꓙꓳˍ ꓟ ꓥ ꓢꓲ ꓙꓳ ꓟ ꓮꓽ ꓙꓵ ꓠꓬ ꓬꓲˍ ꓐꓰ ꓕꓲꓽ ꓪꓼ ꓥˍ ꓡꓳ (1 ꓘꓳ-ꓡꓴ-ꓕꓵ)= ꓢꓲꓺ ꓒ ꓬꓰ-ꓢꓴ ꓠꓬ ꓪꓴ-ꓢ ꓬꓲ ꓐꓯ ꓘꓶꓽ ꓥ ꓢꓲ ꓪꓴ-ꓢ ꓬꓲ ꓙꓽ ꓜꓲꓼ ꓠꓲꓹ ꓢꓷꓸ ꓠꓲꓹ ꓥˍ ꓟꓲ ꓥˍ ꓡꓳ= ꓢꓲꓺ ꓒꓽ ꓬꓰ-ꓢꓴ ꓠꓬ ꓬꓲ ꓚꓰ ꓬꓲ ꓪꓴꓸ ꓕꓯ ꓡꓰ ꓪꓴ-ꓢ ꓐꓰ ꓕꓲꓽ ꓪꓼ ꓔꓬ ꓡꓳ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒꓽ ꓬꓰ-ꓢꓴ ꓠꓬ ꓟꓵꓽ ꓘꓳꓼ ꓬꓲ ꓚꓰ ꓬꓲ ꓪꓴꓸ ꓟ ꓥ ꓢꓲ ꓟꓵꓽ ꓘꓳꓼ ꓮꓽ ꓙꓵꓽ ꓢꓲꓺ ꓒꓽ ꓠꓬ ꓬꓲ ꓥˍ ꓡꓳ=