ꓬꓰ-ꓢꓴ ꓐꓰ ꓟꓵꓽ ꓘꓳꓼ (4) Dialogue with Environment

ꓬꓳ-ꓦ ꓡꓰ ꓐꓳ ꓔ ꓟ ꓶꓽ ꓓꓳ ꓫꓱꓸ ꓓꓳ ꓬꓲ ꓪꓴꓸ ꓔꓴˍ ꓟ ꓠꓯꓸꓼ ꓗꓪ ꓢꓲꓺ ꓒ ꓬꓰ-ꓢꓴ ꓛꓱꓽ ꓟꓳ ꓡˍ ꓟ ꓠꓬ ꓟꓲ ꓠꓯ ꓗꓪ ꓢꓯꓸ ꓔꓬ ꓢꓴ ꓮꓽ ꓙꓵꓽ ꓢꓴ ꓚ ꓟꓲꓽ ꓠꓯꓸꓼ ꓗꓪ ꓟꓽ ꓓ ꓬꓳꓸ ꓚꓵˍ ꓟ ꓥˍ  ꓡꓳ ꓐꓯˍ ꓟ ꓔꓯ ꓟ ꓕꓯ ꓡꓳ ꓟꓳ ꓪ ꓓˍ ꓡꓳ= ꓢꓲꓺ ꓒꓽ ꓻꓰ-ꓢꓴ ꓠꓬ ꓚꓰꓼ ꓔ ꓟ ꓠꓯꓸꓼ ꓗꓪ ꓐ ꓢꓴ ꓥˍ ꓡꓳ= ꓬꓲ ꓠꓯꓸꓼ ꓗꓪ ꓐꓰ ꓟꓵꓽ ꓗꓴꓹ ꓓꓵ ꓓꓵ ꓥˍ ꓟꓲꓟꓲ ꓠꓯ ꓥˍ ꓟꓲ ꓠꓱꓸ ꓐꓯꓼ ꓢꓯꓸ ꓫꓵꓽ ꓢꓯꓸ ꓙꓵꓽ ꓮꓽ ꓙꓵꓽ ꓥˍ ꓟꓲ ꓬꓲ ꓡꓰ ꓚꓰꓼ ꓔ ꓟ ꓔꓯ ꓑꓯꓹ ꓟꓶˍ ꓡꓳ ( ꓬꓳ-ꓦ 1ꓽ 3- 5)= ꓟꓵꓽ ꓪꓳꓼ ꓗꓪ ꓟ ꓮꓸ ꓔꓳꓸ ꓔꓯ ꓟꓳ ꓖꓶ ꓡˍ ꓟ ꓥ ꓢꓲ ꓞꓳ ꓤꓽ ꓐꓰ ꓢꓯꓸ ꓫꓵꓽ ꓢꓯꓸ ꓙꓵꓽ ꓮꓽ ꓙꓵꓽ ꓒꓬꓱꓼ ꓡˍ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓝꓳꓹ ꓟꓶ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓟꓵꓽ ꓗꓳꓸ ꓓꓵ ꓓꓵ ꓮꓽ ꓙꓵ ꓒꓬꓱꓼ ꓡˍ ꓟ ꓠꓬ ꓢꓲꓺ ꓒꓽ ꓬꓰ-ꓢꓴ ꓠꓬ ꓟꓽ ꓐ ꓟꓽ ꓓˍ ꓟ ꓥ ꓪ= ꓟꓵꓽ ꓗꓴꓸ ꓓꓵ ꓓꓵ ꓔꓯ ꓚꓰꓼ ꓔ ꓟ ꓓꓽ ꓪꓴꓸ ꓕꓯ ꓡꓰ ꓐ ꓔꓬ ꓟ ꓢꓲꓺ ꓒꓽ ꓬꓰ-ꓢꓴ ꓠꓬ ꓞꓳꓽ ꓤꓽ ꓒꓬꓱꓼ ꓡ ꓞꓳ ꓤꓽ ꓡꓰ ꓐꓰ ꓬꓲꓸ ꓫꓵꓽ ꓬꓲ ꓧꓪꓽ ꓕꓱ ꓡꓰ ꓘꓳꓹ ꓣꓴˍ ꓟ ꓥˍ ꓡꓳ (ꓬꓳ-ꓦ 1ꓽ 14) =

ꓖꓣꓰꓰꓗ ( ꓦꓲ_ꓡꓲ ꓥꓳꓽ) ꓥꓳꓽ ꓗꓪ ꓐꓰ ꓕꓱ ꓟ ꓔꓯ ꓢꓮꓣꓫ ꓐꓰ ꓕꓱ ꓡꓰ ꓣꓱˍ ꓡꓳ= ꓕꓱ ꓟ ꓠꓬ ꓟꓲ ꓠꓯ ꓫꓵꓽ ꓧꓪꓽ ꓚꓱꓹ ꓐꓰ ꓕꓱ ꓡꓰ ꓣꓱˍ ꓡꓳ= ꓢꓲꓽ ꓫꓬ ꓕꓳ ꓶ ꓔꓯ ꓐꓳ ꓢꓴ ꓢꓷꓸ ꓠꓲꓹ ꓙꓳ ꓒꓽ ꓐꓴ ꓡꓰ ꓕꓱ ꓕꓲꓽ ꓘꓶꓽ ꓔꓯ ꓣꓱˍ ꓟ ꓠꓬ ꓖꓳ ꓟ ꓕꓳ ꓶ ꓐꓳ ꓙꓵꓹ ꓗꓪ ꓣꓱˍ ꓟ ꓪꓴ-ꓢ ꓟꓽ ꓙꓳ ꓐꓯˍ ꓟ ꓔꓯ ꓢꓷꓸ ꓡꓰ ꓝꓲ ꓠꓹ ꓟ ꓐꓱ ꓶ ꓣꓱˍ ꓟ ꓥˍ ꓡꓳ ꓐꓰ ꓕꓱ ꓡꓰ ꓞꓳ ꓤꓽ ꓮꓽ ꓟꓬꓹ ꓠꓬ ꓙꓵ ꓔꓬ ꓡꓳ= ꓪꓴ-ꓢ ꓟꓽ ꓙꓳ ꓐꓯ ꓢꓴ ꓠꓬ ꓢꓮꓣꓫ ꓐꓯˍ ꓟ ꓟꓲ ꓠꓯ ꓞꓳ ꓤꓽ ꓚꓱꓹ ꓠꓬ ꓟꓽ ꓙꓲˍ ꓟ ꓥ ꓢꓲ ꓪꓴ-ꓢ ꓐꓰ ꓕꓲꓽ ꓪꓼ ꓮ ꓕꓯ ꓥˍ ꓟꓲ ꓔꓬ ꓟ ꓐ ꓡ ꓐꓰ ꓕꓱ ꓡꓰ ꓟꓸ ꓔꓬˍ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓶꓽ ꓓꓳꓽ ꓫꓱꓸ ꓓꓳꓽ ꓔꓯ ꓐꓳ ꓢꓴ ꓬꓳ-ꓦ ꓠꓬ ꓢꓲꓺ ꓒꓽ ꓬꓰ-ꓢꓴ ꓠꓬ ꓞꓳ ꓤꓽ ꓒꓬꓱꓼ ꓡ ꓢꓲ ꓞꓳ ꓤꓽ ꓫꓶꓹ ꓕꓲꓽ ꓫꓵꓽ ꓡꓰ ꓕꓲꓽ ꓮꓽ ꓙꓵꓽ ꓙꓳˍ ꓟ ꓠꓯꓸꓼ ꓗꓪ ꓓꓵꓽ ꓐ ꓡˍ ꓟ ꓥˍ ꓡꓳ ꓐꓯˍ ꓟ ꓔꓯ ꓢꓷꓸ ꓡꓰ ꓝꓲˍ ꓟ ꓥ ꓪ=

 ꓢꓲꓺ ꓒ ꓬꓰ-ꓢꓴ ꓟꓲ ꓠꓯ ꓞꓳ ꓤꓽ ꓔꓯ ꓚꓬꓴꓹ ꓙ ꓠˍ ꓟ ꓬꓯꓼ ꓡˍ ꓟ ꓠꓬ ꓟꓽ ꓙꓲˍ ꓟ ꓬꓰ ꓢꓴ ꓔꓯ ꓥꓲꓸ ꓠꓹ ꓟ ꓐꓱ ꓶ ꓟꓽ ꓥ= ꓕꓱ ꓡꓰ ꓟꓽ ꓙꓲˍ ꓟ ꓬꓰ ꓢꓴ ꓔꓯ ꓢꓲ ꓡꓳ ꓗꓶ ꓠˍ ꓟ ꓐꓱ ꓶ ꓟꓽ ꓥ= ꓟꓽ ꓙꓲˍ ꓟ ꓬꓰ ꓢꓴ ꓔꓯ ꓒꓳꓹ ꓡꓲꓼ ꓡ ꓠˍ ꓟ ꓐꓱ ꓶ ꓥˍ ꓡꓳ= ꓬꓳ-ꓦ 3ꓽ 16 ꓝꓲ ꓗꓪ ꓢꓲꓺ ꓒꓽ ꓬꓰ-ꓢꓴ ꓠꓬ ꓞꓳ ꓤꓽ ꓒꓬꓱꓼ ꓡ ꓢꓲ ꓟꓲ ꓠꓯ ꓕꓱ ꓟ ꓓꓯꓽ ꓢꓲ ꓗꓪ ꓪꓴ-ꓢ ꓠꓵ ꓠꓲꓹ ꓡꓴꓽ ꓖꓶ ꓡˍ ꓟ ꓥˍ ꓡꓳꓐ ꓰ ꓕꓱ ꓡꓰ ꓬꓲ ꓠꓬ ꓡꓳꓸ ꓟꓳ ꓢꓴ ꓥˍ ꓡꓳ= ꓕꓱ ꓟ ꓢꓲꓽ ꓫꓬ ꓕꓳ ꓶ ꓝꓲꓸ ꓗꓪ ꓬꓲ ꓤꓽ ꓔꓲꓸ ꓔꓯ ꓙꓵ ꓢꓴ ꓥ ꓕ ꓑꓳꓸ ꓠꓬ ꓐꓬ ꓡꓰˍ ꓟ ꓠꓯꓸꓼ ꓗꓪ ꓟꓽ ꓛꓲ= ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓔꓯ ꓟꓶ ꓠˍ ꓟ ꓐꓱ ꓶ ꓕꓲꓽ ꓣꓳ ꓡꓰ ꓥˍ ꓟ ꓬꓲ ꓤꓽ ꓔꓲꓸ ꓔꓯ ꓟꓲ ꓠꓯ ꓞꓳ ꓤꓽ ꓐꓱ ꓶ ꓖꓶ ꓗꓶ ꓗꓪ ꓛꓲ ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤꓽ ꓔꓯ ꓠꓲꓹ ꓠꓵˍ ꓡꓳ=