ꓬꓰ-ꓢꓴ ꓐꓰ ꓟꓵꓽ ꓘꓳꓼ (9) (ꓟꓵꓽ ꓘꓳꓼ ꓐꓰ ꓫꓸ ꓕꓱˍ ꓟ)

ꓪꓴ-ꓢ ꓠꓬ ꓢꓲꓺ ꓒ ꓬꓰ-ꓢꓴ ꓗꓪ ꓐꓰ ꓟꓲ ꓠꓯ ꓞꓳ ꓤ ꓐꓰ ꓪꓴ-ꓢ ꓠꓬꓲꓽ ꓗꓴꓸ ꓚꓸ ꓗꓪ ꓝꓮꓲ ꓕꓲ ꓧꓪꓹ ꓧꓳꓹ ꓡꓯ ꓘꓳ ꓝꓲˍ ꓟ ꓒꓬꓱꓼ ꓡ ꓝꓲˍ ꓡꓳ꓾ ꓐꓰ 2 ꓘꓳ-ꓡꓱ-ꓕꓴ ꓕꓳ ꓶ 5ꓽ19꓾ ꓘꓳ-ꓡꓳ-ꓫꓲ 1ꓽ20 ꓗꓪ ꓝꓲ ꓓꓴ ꓒꓳ-ꓡꓳ ꓡꓰ ꓕꓱ ꓡꓱ ꓐꓯ ꓔ ꓡꓳ= ꓢꓲꓽ ꓫꓬ ꓕꓳ ꓶ ꓝꓲꓸ ꓕꓱ ꓟ ꓠꓯꓸꓼ ꓗꓪ ꓣꓳ ꓡꓳꓸ ꓠꓬꓲ ꓗꓷ ꓠꓬ ꓔꓱꓹ ꓚꓵˍ ꓟ ꓐꓯ ꓟ ꓠꓯꓸꓼ ꓗꓪ ꓕꓲ ꓟ ꓐꓰ ꓕꓲ ꓟ ꓠꓬ ꓝꓸ ꓡꓯ ꓘꓳꓹ ꓟ ꓙꓳ ꓢꓲ ꓬꓲ ꓟꓶꓽ ꓗꓪ ꓠꓬ ꓪꓴ-ꓢ ꓠꓯꓸꓼ ꓗꓪ ꓝꓸ ꓡꓯ ꓘꓳꓹ ꓟ꓾ ꓪꓴ-ꓢ ꓠꓯꓸꓼ ꓗꓪ ꓧꓳꓹ ꓡꓯ ꓘꓳꓹ ꓟ ꓒꓬꓱꓼ ꓡ ꓝꓲˍ ꓡꓳ꓾ ꓐꓰ ꓝꓲ ꓓꓴ ꓒꓳ-ꓡꓳ ꓡꓰ ꓐꓯ ꓔ ꓟ ꓙꓳˍ ꓡꓳ=

ꓙꓵꓻ ꓠꓲꓹ ꓚꓱꓹ ꓔꓯ ꓟꓳꓸ ꓣꓳ-ꓟ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓪꓽ ꓘꓴ ꓙꓵꓹ ꓬꓰˍ ꓟ ꓚꓱꓹ ꓐꓯ ꓟ Roman Liturgy ꓐꓯ ꓟ ꓠꓯꓸꓼ ꓗꓪ ꓠꓬ ꓢꓲꓺ ꓒ ꓬꓰ-ꓢꓴ ꓫꓵˍ ꓟ ꓗꓪ ꓐꓰ ꓢꓯꓸ ꓬꓲꓼ ꓡˍ ꓟ ꓑꓮꓲꓽ ꓠꓯꓸꓼ ꓗꓪ ꓕꓱ ꓡꓱ ꓐꓳ ꓔ ꓡꓳ= ꓢꓲꓺ ꓒ ꓬꓰ-ꓢꓴ ꓠꓯꓸꓼ ꓗꓪ ꓐꓰ ꓣꓳ ꓠꓬ ꓢꓯꓼ ꓟꓬ ꓬꓲ ꓫꓵꓼ ꓑꓯꓹ ꓟꓶ ꓡꓰꓳ= ꓝꓴꓲꓸ ꓡꓰ ꓙꓵꓽ ꓔꓬ ꓟ ꓚꓱꓹ ꓠꓬ ꓐꓬ ꓡꓰ ꓟꓶꓽ ꓡꓰꓳ= ꓐꓬ ꓡꓰ ꓟ ꓟꓲ ꓠꓯ ꓔꓯ ꓬꓲ ꓫꓵꓼ ꓒꓬꓱꓼ ꓡ ꓝꓲꓳ= ꓒꓳꓹ ꓡꓶꓸ ꓗꓷꓳ= ꓞꓳ ꓤ ꓮ ꓙꓵꓽ ꓠꓬ ꓠꓲꓹ ꓧꓳꓹ ꓫꓵꓽ ꓧꓳꓹ ꓡꓯ ꓘꓳ ꓢꓲ ꓕꓲꓽ ꓟˍ ꓒꓬꓱꓼ ꓡꓻꓳ= ꓢꓯꓸ ꓬꓲꓼ ꓡˍ ꓟ ꓑꓶꓸ ꓓꓴ ꓠꓲꓹ ꓟ ꓢ ꓡꓰˍ ꓟ ꓠꓬ ꓕꓲ ꓟꓲ ꓠꓯ ꓡꓱꓸꓼ ꓔꓯ ꓠꓲꓹ ꓗꓴ ꓟꓬ ꓗꓴ ꓖꓶ ꓗꓷꓳ꓾ ꓐꓰ ꓕꓱ ꓡꓱ ꓐꓳ ꓔ ꓡꓳ=

ꓢꓯꓸ ꓬꓲꓼ ꓡ ꓟ ꓗꓪ ꓐꓰ ꓪꓴꓽ ꓖꓴ ꓡꓰˍ ꓟ ꓥꓳ ꓡꓳꓸ ꓓꓴ ꓬꓲ ꓢꓷꓸ ꓡꓰ ꓓꓴ ꓓꓽ ꓟ ꓒꓬꓱꓼ ꓡꓻꓳ= ꓙꓳˍ꓾ ꓟꓽ ꓙꓳˍ ꓟ ꓮ ꓙꓵꓽ ꓔꓯ ꓚꓰꓼˍ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓠꓯꓸꓼ ꓗꓪ ꓕꓲ ꓠꓲꓹ ꓕꓲ ꓪ ꓗꓷ ꓡꓰ ꓝꓲꓳ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓗꓪ ꓐꓰ ꓕꓲ ꓝꓸ ꓙꓳˍ꓾ ꓟꓽ ꓙꓳˍ ꓟ ꓮ ꓙꓵꓽ ꓠꓬ ꓪꓴ-ꓢ ꓠꓯꓸꓼ ꓗꓪ ꓛꓲ ꓡˍ ꓟ ꓙꓵꓹ ꓐꓱ ꓶ ꓥꓳ ꓡꓳꓸ ꓓꓴ ꓓꓽ ꓟ ꓗꓷ ꓡꓰꓳ= ꓕꓲ ꓠꓲꓹ ꓕꓲ ꓪ ꓗꓷ ꓡꓰ ꓠꓹ ꓟ꓾ ꓟꓽ ꓥ ꓠꓬ꓾ ꓚꓬꓴꓸ ꓙˍ ꓟ ꓐꓱ ꓶ ꓥꓳ ꓡꓳꓸ ꓓꓴ ꓠꓬ ꓪꓴ-ꓢ ꓒꓬꓱꓽ ꓕꓯꓽ ꓗꓪ ꓙꓳˍ ꓡꓳ=

ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤ ꓔꓯ ꓝꓴꓲꓸ ꓔꓯ ꓥˍ ꓟꓲ꓾ ꓣꓳ ꓠꓯꓸꓼ ꓗꓪ ꓟꓽ ꓐꓲ ꓜꓲꓼ ꓟ ꓔꓯ ꓥˍ ꓟꓲ ꓢꓯꓼ ꓟꓬ ꓬꓲ ꓫꓵꓼ ꓠꓯꓸꓼ ꓗꓪ ꓧꓳꓽ ꓔꓯꓹ ꓙꓰ ꓖꓶ ꓡꓻꓳ= ꓬꓳ-ꓦ 43ꓽ19꓾ ꓬꓲ-ꓫꓲ-ꓚꓰ 37ꓽ ꓗꓪ ꓕꓱ ꓡꓱ ꓐꓯ ꓔ ꓡꓳ=