ꓬꓰ-ꓢꓴ ꓐꓰ ꓟꓵꓽ ꓘꓳꓼ (9) (ꓟꓵꓽ ꓘꓳꓼ ꓐꓰ ꓫꓸ ꓕꓱˍ ꓟ)

ꓪꓴ-ꓢ ꓠꓬ ꓢꓲꓺ ꓒꓽ ꓬꓰ-ꓢꓴ ꓗꓪ ꓐꓰ ꓟꓲ ꓠꓯ ꓞꓳ ꓤꓽ ꓐꓰ ꓟꓲ ꓠꓯ ꓠꓬꓲꓽ ꓗꓴ ꓚꓸ ꓗꓪ ꓝꓮꓲ ꓕꓲꓽ ꓧꓪ ꓧꓳ ꓡꓯꓽ ꓘꓳ ꓝꓲˍ ꓟ ꓒꓬꓱꓼ ꓡ ꓝꓲˍ ꓡꓳ ꓐꓰ 2ꓽ ꓗꓳ-ꓡꓴ ꓕꓵ 5ꓽ 19 ꓗꓳ-ꓡꓳ-ꓫꓵ 1ꓽ 20 ꓗꓪ ꓝꓲ ꓓꓴ ꓒꓳ-ꓡꓳ ꓡꓰ ꓕꓱ ꓡꓰ ꓐꓯ ꓔ ꓡꓳ= ꓕꓱ ꓟ ꓢꓲꓽ ꓫꓬ ꓕꓳ ꓶ ꓝꓲ ꓗꓪ ꓣꓳꓽ ꓛꓳ ꓠꓬꓲ ꓠꓬ ꓔꓱꓹ ꓚꓵˍ ꓟ ꓐꓯˍ ꓟ ꓠꓯ ꓗꓪ ꓕꓲꓽ ꓟ ꓐꓰ ꓕꓲꓽ ꓟ ꓠꓬ ꓝꓲꓸ ꓡꓯ ꓘꓳ ꓟ ꓙꓳ ꓢꓲ ꓬꓲ ꓟꓶꓽ ꓗꓪ ꓠꓬ ꓪꓴ-ꓢ ꓠꓯꓸꓼ ꓗꓪ ꓝꓸ ꓡꓯꓽ ꓘꓳˍ ꓟ ꓪꓴ-ꓢ ꓠꓯꓸꓼ ꓘꓪ ꓧꓳꓹ ꓡꓯ ꓘꓳˍ ꓟ ꓒꓬꓱꓹ ꓡ ꓝꓲˍ ꓡꓳ ꓐꓰ ꓝꓲ ꓓꓴ ꓒꓳ-ꓡꓳ ꓡꓰ ꓐꓯ ꓔ ꓟ ꓙꓳˍ ꓡꓳ= 

ꓙꓵ ꓠꓲꓹ ꓚꓱꓹ ꓔꓯ ꓟꓳꓸ ꓣꓳ-ꓟ ꓗ-ꓕꓳ-ꓡꓲꓼ ꓘꓴ ꓜꓲꓼ ꓞꓳ ꓪꓽ ꓘꓴ ꓙꓵꓹ ꓬꓰˍ ꓟ ꓚꓱꓹ ꓐꓯˍ ꓟ ꓣꓳꓟꓮꓠ ꓡꓲꓔꓴꓣꓖꓬ ꓐꓯˍ ꓟ ꓠꓯꓸꓼ ꓗꓪ ꓠꓬ ꓢꓲꓺ ꓒꓽ ꓬꓰ-ꓢꓴ ꓫꓵˍ ꓟ ꓗꓪ ꓐꓰ ꓢꓯꓸ ꓬꓲꓼ ꓡˍ ꓟ ꓑꓮꓲꓽ ꓠꓯꓸꓼ ꓗꓪ ꓕꓱ ꓡꓰ ꓐꓳ ꓔ ꓡꓳ= ꓢꓲꓺ ꓒꓽ ꓬꓰ-ꓢꓴ ꓠꓯꓸꓼ ꓗꓪ ꓐꓰ ꓣꓳ ꓠꓬ ꓢꓯꓼ ꓟꓬ ꓬꓲ ꓫꓵꓼ ꓑꓯꓹ ꓟꓶ ꓡꓰꓳ= ꓝꓴꓲꓸ ꓡꓰ ꓙꓵꓽ ꓔꓬ ꓟ ꓚꓱꓹ ꓠꓬ ꓐꓬ ꓡꓰꓳ ꓟꓶꓽ ꓡꓰꓳ= ꓐꓬ ꓡꓰˍ ꓟ ꓟꓲ ꓠꓯ ꓔꓯ ꓬꓲ ꓫꓵꓼ ꓒꓬꓱꓼ ꓡ ꓝꓲꓺꓳ= ꓒꓳꓹ ꓡꓶꓸ ꓗꓷꓳ= ꓞꓳ ꓤꓽ ꓮꓽ ꓙꓵꓽ ꓠꓬ ꓠꓲꓹ ꓧꓳꓹ ꓫꓵꓽ ꓧꓳꓹ ꓡꓯ ꓘꓳ ꓢꓲ ꓕꓲꓽ ꓟꓹ ꓒꓬꓱꓼ ꓡꓺꓳ= ꓢꓯꓸ ꓬꓲꓼ ꓡˍ ꓟ ꓑꓶꓸ ꓓꓴ ꓠꓲꓹ ꓟ ꓢ ꓡꓰˍ ꓟ ꓠꓬ ꓟꓲ ꓠꓯ ꓕꓲ ꓟꓲ ꓠꓯ ꓡꓱꓸꓼ ꓔꓯ ꓠꓲꓹ ꓗꓳꓹ ꓟꓬ ꓗꓳꓹ ꓖꓶ ꓗꓷꓳ ꓐꓰ ꓕꓱ ꓡꓰ ꓐꓳ ꓔ ꓡꓳ= ꓢꓯꓸ ꓬꓲ ꓡˍ ꓟ ꓗꓪ ꓐꓰ ꓪꓴꓽ ꓖꓴ ꓡꓰˍ ꓟ ꓥꓳ ꓡꓳꓸ ꓓꓴ ꓬꓲ ꓢꓷꓸ ꓡꓰ ꓓꓴ ꓓꓽ ꓟ ꓒꓬꓱꓼ ꓡꓺ ꓳ= 

ꓙꓳꓹ ꓟꓽ ꓙꓳꓹ ꓟ ꓮꓽ ꓙꓵꓽ ꓔꓯ ꓚꓰꓼˍ ꓟ ꓠꓬ ꓢꓲꓺ ꓒꓽ ꓬꓰ-ꓢꓴ ꓠꓯꓸꓼ ꓗꓪ ꓕꓲꓽ ꓠꓲꓹ ꓕꓲꓽ ꓪꓼ ꓗꓷ ꓡꓰ ꓝꓲꓺ ꓳ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒꓽ ꓬꓰ ꓢꓴ ꓗꓪ ꓐꓰ ꓕꓲꓽ ꓝꓸ ꓙꓳꓹ ꓟꓽ ꓙꓳꓹ ꓟ ꓮ ꓙꓵꓽ ꓠꓬ ꓪꓴ-ꓢ ꓠꓯꓸꓼ ꓗꓪ ꓛꓲ ꓡˍ ꓟ ꓙꓵꓹ ꓐꓱ ꓶ ꓥꓳ ꓡꓳꓸ ꓓꓴ ꓓꓽ ꓟ ꓘꓷ ꓡꓰꓳ= ꓕꓲꓽ ꓠꓲꓹ ꓕꓲꓽ ꓪꓼ ꓗꓶ ꓡꓰ ꓠˍ ꓟ ꓥ ꓠꓬ ꓚꓬꓴꓹ ꓙˍ ꓟ ꓐꓱ ꓶ ꓥꓳ ꓡꓳꓸ ꓓꓴ ꓠꓬ ꓪꓴ-ꓢ ꓟꓲ ꓙꓬ ꓗꓪ ꓙꓳˍ ꓡꓳ= ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤꓽ ꓔꓯ ꓝꓴꓲꓸ ꓔꓯ ꓥˍ ꓟꓲ ꓣꓳꓽ ꓠꓯꓸꓼ ꓗꓪ ꓟꓽ ꓐꓲ ꓜꓲˍ ꓟ ꓔꓯ ꓥˍ ꓟꓲ ꓢꓯꓼ ꓟꓬ ꓬꓲ ꓫꓵꓼ ꓠꓯꓸꓼ ꓗꓪ ꓧꓳꓽ ꓔꓯꓹ ꓙꓰ ꓖꓶ ꓡꓺ ꓳ ꓬꓳ-ꓦ 43ꓽ 19 ꓬꓲ-ꓢꓲ-ꓚꓰ 37 ꓗꓪ ꓕꓱ ꓡꓰ ꓐꓯ ꓔ ꓡꓳ=