ꓒꓲꓼ ꓬꓰ ꓟ ꓮ ꓣꓳ ꓐꓰ ꓒꓴ ꓒꓯꓼ ꓔꓯ ꓥꓳꓽ

ꓞꓳ ꓤ ꓮ ꓙꓵꓽ ꓠꓬ ꓢꓲ ꓒ ꓬꓰ-ꓢꓴ ꓠꓯꓸꓼ ꓗꓪ ꓪꓴ-ꓢ ꓬꓲ ꓠꓵꓻ ꓠꓲꓹ ꓔꓯ ꓐꓲ ꓐꓲ ꓜꓲꓼ ꓜꓲꓼ ꓘꓳ ꓣꓴ ꓐ ꓡˍ ꓡꓳ= ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓥ ꓟ ꓡꓴ-ꓘ 15ꓽ1-10 ꓠꓬ ꓒꓲꓼ ꓬꓰ ꓟ ꓮ ꓣꓳ ꓐꓰ ꓒꓲꓼ ꓬꓰ ꓟ ꓒꓴ ꓒꓯꓼ ꓟꓸ ꓟꓲꓽ ꓔꓯ ꓑ ꓙꓽ ꓪˍ ꓟ ꓥ ꓢꓲ ꓢꓲ ꓒ ꓠꓬ ꓒꓲꓼ ꓬꓰ ꓢꓴ ꓔꓯ ꓧꓪꓸ ꓟˍ ꓡꓰꓽ ꓟꓽ ꓞꓲ ꓬꓲ ꓪ ꓐꓴ ꓔꓯ ꓥˍ ꓟꓲ ꓬꓲ ꓔꓬꓹ ꓗꓪ ꓬꓲꓼ ꓡ ꓠꓹ ꓟ ꓙ ꓖꓴ ꓧꓪ ꓟꓳꓻ ꓡꓰ ꓝꓲˍ ꓡꓳ= ꓪꓴ-ꓢ ꓠꓬ ꓬꓲ ꓚꓲꓸ ꓛꓬ ꓡꓰ ꓟꓴ ꓗꓴꓸ (ꓟꓽ ꓥ ꓠꓬ) ꓮ ꓔꓳꓸ ꓡ ꓡꓲˍ ꓡꓰ ꓐꓰ ꓟꓳꓸ ꓖꓶˍ ꓟ ꓡꓰꓽ ꓟꓽ ꓞꓲꓺ ꓞꓳ ꓤ ꓐꓴ ꓐꓰ ꓪꓽ ꓡꓯ ꓘꓳ ꓕꓽ ꓡꓯ ꓘꓳˍ ꓟ ꓬꓰ-ꓢꓴ ꓗꓪ ꓐꓰˍ ꓟꓲ ꓟꓳꓸ ꓖꓶ ꓔꓬ ꓟ ꓥ ꓡꓳ=

ꓶꓼ ꓓꓳ ꓫꓱꓹ ꓓꓳ ꓚˍ ꓟ꓾ ꓬꓲ ꓡꓰ ꓔꓯ ꓥꓳꓽ ꓣꓱꓽ ꓢꓲ ꓟꓸ ꓖꓶˍ ꓟ ꓡꓰꓽ ꓟꓽ ꓞꓲꓺ ꓞꓳ ꓫꓸ ꓐꓴ꓾ ꓫ ꓙꓵ ꓔꓬ ꓢꓴ ꓐꓴ ꓐꓰ ꓡꓳ ꓒꓰꓹ ꓔ ꓟ ꓟꓶ ꓢꓴ ꓐꓴ ꓕꓯ ꓢꓲ ꓗꓪ ꓥˍ ꓟꓲ ꓬꓲ ꓫꓱꓸ ꓤ ꓠꓲꓹ ꓔꓯ ꓟꓸ ꓖꓶ ꓗꓷꓳ= ꓬꓲ ꓠꓬ ꓠꓻ ꓔꓬ ꓒꓬꓽ ꓔꓬ ꓢꓴ ꓐꓴ ꓔꓯ ꓓꓻ ꓡꓰ ꓝꓲ ꓗꓷꓳ= ꓫꓵꓻ ꓢꓴ ꓐꓴ ꓔꓯˍ ꓟꓲ ꓢꓯꓸ ꓬꓲꓼ ꓡ ꓝꓲ ꓗꓷꓳ= ꓦꓰꓼ ꓟꓷꓼ ꓔꓬ ꓢꓴ ꓐꓴ ꓔꓯ ꓥˍ ꓟꓲ ꓜꓽ ꓓꓴ ꓖꓶꓽ ꓗꓷꓳ= ꓝꓴꓲꓸ ꓙꓳ ꓢꓴ ꓐꓴ ꓔꓯ ꓝꓴꓲꓸ ꓖꓽ ꓖꓶ ꓗꓷꓳ=

ꓟꓬꓽ ꓠꓬꓲ ꓪꓴ-ꓢ ꓠꓬ ꓞꓳ ꓤ ꓐꓴ ꓔꓯ ꓬꓲ ꓒꓬꓱꓽ ꓔꓯ ꓫꓱꓸ ꓡꓰ ꓠ ꓚꓰꓼ ꓗꓷꓳ= ꓞꓳ ꓤ ꓮ ꓙꓵꓽ ꓠꓬ ꓪꓴ-ꓢ ꓒꓬꓱꓽ ꓔꓯ ꓫꓱꓸˍ ꓟ ꓪꓴꓸ ꓠꓬꓲ ꓮ ꓙꓵꓽ ꓠꓬ ꓙꓲˍ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓠꓲꓹ ꓟ ꓫꓸ ꓓꓴ ꓠꓬ ꓕꓲ ꓐꓱ ꓠꓽ ꓪꓴ-ꓢ ꓔꓯ ꓟꓽ ꓙꓰ= ꓪꓴ-ꓢ ꓔꓯˍ ꓐꓰ ꓙ ꓖꓴ ꓥꓳꓽ ꓙꓰˍ ꓡꓳ= ꓟꓲ ꓠꓯ ꓖꓴꓽ ꓙꓴꓽ꓾ ꓟꓲ ꓠꓯ ꓐꓳ ꓶꓼ꓾ ꓙꓵꓽ ꓪ꓾ ꓘꓶꓽ ꓘꓹ ꓟ ꓑꓶꓸ ꓓꓴ ꓪꓴ-ꓢ ꓔꓯ ꓙꓰˍ ꓟ ꓙ ꓖꓴ ꓒꓲꓼ ꓬꓰ ꓗꓷ ꓟ ꓥ ꓡꓳ= ꓙ ꓖꓴ ꓥꓳꓽ ꓡꓰ ꓟ ꓥ ꓡꓳ=

ꓖꓳ ꓡꓱ ꓥˍ ꓟꓲ ꓗꓹ ꓛꓲꓽˍ ꓟ ꓓꓳꓽ꓾ ꓙꓲˍ ꓟ ꓓꓳꓽ ꓕꓲ ꓟ ꓠꓬ ꓪꓴ-ꓢ ꓠꓬ ꓣꓳ ꓐꓴ ꓔꓯ ꓮ ꓕꓯ ꓟꓲ ꓟꓽ ꓡꓳ ꓒꓰꓹ ꓐꓯ ꓟ ꓔꓯ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓒꓲꓼ ꓬꓰ ꓟ ꓮ ꓣꓳ ꓐꓰ ꓒꓲꓼ ꓬꓰ ꓟ ꓒꓴ ꓒꓯꓼ ꓔꓯ ꓟꓽ ꓟꓳꓻ ꓟꓳꓻ ꓠ ꓛꓲ ꓧꓪꓸˍ ꓟˍ ꓡꓰ ꓐꓰ꓾ ꓪꓴ-ꓢ ꓠꓬ ꓙ ꓖꓴ ꓒꓲꓼ ꓬꓰ ꓔꓬ ꓟ ꓣꓳ ꓐꓴ ꓔꓯ ꓟꓽ ꓡꓳꓹ ꓬꓰ ꓟ ꓠꓵꓻ ꓠꓲꓹ ꓗꓪ ꓐꓰ ꓠꓲꓹ ꓠꓵ ꓢꓲ ꓟꓳꓻ ꓡꓰ ꓗꓪ ꓛꓲ ꓧꓪ ꓢꓲ ꓠꓬꓲ꓾ ꓟꓽ ꓥ ꓟ ꓙ ꓖꓴ ꓗꓪ ꓫꓱꓽ ꓔꓬ ꓟ ꓗꓪ ꓐꓰ ꓬꓲ ꓔꓬ ꓗꓪ ꓚꓱꓹ ꓬꓲꓼ ꓡ ꓐ ꓡ ꓠꓹ ꓟ ꓮ ꓕꓯ ꓟꓲ ꓬꓰ ꓙ ꓔꓳꓹ ꓙ ꓖꓶ ꓔꓬ ꓟ ꓥ ꓡꓳ=