ꓡꓳ ꓒꓱ ꓢ ꓟ ꓔꓯ ꓕꓼˍ ꓟ

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓫꓬ ꓕꓳ ꓶ ꓗꓪ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓙꓱꓽ ꓘꓶꓽ ꓖꓶˍ ꓟ꓾ ꓠꓲꓹ ꓟ ꓙꓬˍ ꓟ ꓔꓯ ꓮ ꓘꓶꓸ ꓟꓽ ꓑ ꓙ ꓠꓬꓲ= ꓕꓲ ꓧꓪꓹ ꓠꓬꓲꓽ ꓧꓪꓹ ꓤ ꓡꓰꓽ ꓑ ꓙ ꓠꓬꓲˍ ꓡꓳ= ꓕꓲ ꓧꓪꓹ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓮ ꓘꓶꓸ ꓦꓰꓼ ꓟꓷꓼˍ ꓕꓯ ꓮ ꓘꓶꓽ ꓜꓲ ꓔꓯ ꓟꓳˍ ꓡꓳ= ꓮ ꓘꓶꓽ ꓜꓲ ꓖꓳ ꓟ ꓗꓪ ꓬꓲ ꓢꓶꓽ ꓟꓽ ꓓꓱꓼ ꓓꓹ ꓟ ꓑꓶꓸ ꓓꓴ ꓬꓲ ꓠꓬ “ꓠꓬꓲꓸ ꓠꓬꓲ ꓗꓪ ꓐꓰ ꓠꓴ ꓠꓬ ꓢꓲꓹ ꓢꓶꓽ ꓕꓽ ꓓꓱꓼ ꓨ” ꓐꓰ ꓐꓯ ꓕꓯ ꓢꓲꓹ ꓢꓶꓽ ꓜꓲ ꓖꓳ ꓟ ꓠꓬ ꓝꓮꓲ ꓕꓲ ꓠꓬꓲ ꓕꓯ ꓫꓵꓻꓳ= ꓝꓮꓲ ꓕꓲ ꓧꓪꓹ ꓟ ꓠꓬ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓟ-ꓕꓲ 11ꓽ20-24 ꓗꓪ ꓢꓲ ꓒ ꓬꓰ-ꓢꓴ ꓠꓬ ꓗꓳ-ꓡ-ꓢꓲ ꓐꓰ ꓐꓱ-ꓢꓰ-ꓓ ꓐꓱ ꓶ ꓮ ꓘꓶꓸ ꓠꓲꓹ ꓟ ꓫ ꓟ ꓚꓱꓹ ꓔꓯ ꓣꓳ ꓑ ꓙ ꓪˍ ꓡꓳ=

ꓬꓲ ꓡꓰ “ꓗꓳ-ꓡ-ꓢꓲ ꓐꓰ ꓐꓱ-ꓢꓰ-ꓓꓽꓳ꓾ ꓠꓴ ꓪ ꓠꓬ ꓠꓲꓹ ꓟ ꓮ ꓗꓶꓸ ꓩꓴˍ ꓡꓳ= ꓠꓴ ꓪ ꓠꓬ ꓶꓽ ꓥꓳ ꓙꓱꓽˍ ꓟ ꓟꓽ ꓟꓶ” ꓐꓰ ꓬꓲ ꓡꓰ ꓐꓯ ꓖꓶˍ ꓡꓳ= ꓮ ꓡꓲꓳ ꓐꓯ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓪ ꓗꓳ ꓡꓳ ꓗꓪ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓮ ꓟꓬꓹ ꓬꓰ ꓖꓶˍ ꓥ ꓟꓲ ꓬꓲ ꓪ ꓠꓲꓹ ꓟ ꓠꓬ ꓒꓳꓹ ꓡꓶꓸ ꓟꓽ ꓐ ꓡ= ꓠꓲꓹ ꓟ ꓩꓴˍ ꓡꓳ= ꓖꓳ ꓟ ꓑꓶꓸ ꓓꓴ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓑꓶꓸ ꓓꓴ ꓠꓲꓹ ꓟ ꓫ ꓟ꓾ ꓠꓲꓹ ꓟ ꓙꓬˍ ꓟ ꓔꓯ ꓣꓳ ꓑ ꓙꓽ ꓪˍ ꓡꓳ=

ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓬꓰ ꓟꓳꓸ ꓖꓶ ꓡ ꓟ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓔꓯ ꓟꓳꓻ ꓟꓽ ꓐ ꓡ ꓟ ꓔꓯ ꓬꓲ ꓠꓲꓹ ꓟ ꓫꓸ ꓡꓳ= ꓬꓲ ꓐꓱ ꓶ ꓮ ꓟꓶ ꓟ ꓡꓰ ꓛꓲ ꓠꓲꓹ ꓟ ꓫ ꓝꓲˍ ꓟ ꓠꓬ ꓠꓱꓸ ꓐꓯ ꓟꓽ ꓙꓳ= ꓢꓲ ꓒ ꓬꓰ-ꓢꓴ ꓠꓬ ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲˍ ꓥ ꓟꓲ꓾ ꓝꓮꓲ ꓠꓻ ꓢꓴ ꓔꓯ ꓓꓻ ꓡꓰ ꓝꓲˍ ꓟ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓬꓰ ꓟꓸ ꓖꓶˍ ꓥ ꓟꓲ ꓬꓲ ꓪ ꓠꓬ ꓬꓰ-ꓢꓴ ꓔꓯ ꓟꓽ ꓙꓵꓻ= ꓢꓲ ꓒ ꓬꓰ-ꓢꓴ ꓬꓰ ꓖꓶ ꓔꓬ ꓟ ꓔꓯ ꓬꓲ ꓪ ꓟꓽ ꓟꓳꓻ= ꓕꓱ ꓟ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓠꓲꓹ ꓟ ꓙꓬ ꓡꓰ ꓝꓲˍ ꓟ ꓥ ꓡꓳ= ꓠꓲꓹ ꓟ ꓫꓸ ꓡꓰ ꓝꓲˍ ꓟ ꓥ ꓡꓳ=

ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓞꓳ ꓙꓳ ꓔꓬ ꓕꓯ ꓢꓲ ꓒ ꓬꓰ-ꓢꓴ ꓡꓰ ꓖꓶ ꓡˍ ꓟ ꓶꓼ ꓤ ꓫꓱꓸ ꓤ꓾ ꓓꓵꓽ ꓙ ꓟꓶ ꓓꓴ ꓕꓱ ꓟ ꓔꓯ ꓟꓽ ꓟꓳꓻ ꓬꓰ ꓗꓷ ꓟ ꓮ ꓟꓬꓹ ꓙꓳˍ ꓡꓳ= ꓕꓲ ꓖ ꓕꓲ ꓧꓪꓹ ꓣꓳ ꓠꓬ ꓣꓳ ꓟꓶ ꓔ ꓟ ꓣꓱꓽ ꓛꓰꓽ ꓮ ꓙꓵꓽ ꓠꓬ ꓢꓲ ꓒ ꓗꓪ ꓐꓰ ꓡˍ ꓟ ꓥ ꓡꓳ꓾ ꓐꓯ ꓟ ꓔꓯ ꓟꓲ ꓡꓰˍ ꓗꓷ ꓔꓬ ꓡꓳ= ꓕꓲ ꓠꓯ ꓡꓰ ꓕꓲ ꓠꓯ ꓟꓬ ꓢꓶꓽ ꓒꓴ ꓐ ꓡˍ ꓟ꓾ ꓬꓲꓼ ꓔ ꓖꓴ ꓗꓪ ꓐꓰ ꓔꓴ ꓐ ꓡˍ ꓟ꓾ ꓜꓻ ꓜꓽ ꓘꓴˍ ꓟ꓾ ꓟꓬꓱꓽ ꓬꓰ ꓘꓴ꓾ ꓙꓰ ꓘꓴ ꓡ ꓘꓴˍ ꓟ ꓮ ꓙꓵꓽ ꓠꓬ ꓪꓴ-ꓢ ꓡꓰ ꓖꓶ ꓡˍ ꓟ ꓣꓱꓽ ꓛꓰꓽ ꓥ ꓡꓳ ꓐꓯ ꓟ ꓔꓯ ꓕꓲ ꓖ ꓕꓲ ꓧꓪꓹ ꓣꓳ ꓠꓬ ꓟꓲ ꓡꓰˍ ꓗꓷˍ ꓡꓳ= ꓕꓱ ꓟ ꓥˍ ꓟꓲ ꓓꓵꓽ ꓙ ꓟꓶ ꓓꓴ ꓥ ꓡꓳ=

ꓢꓲꓽ ꓫꓬ ꓕꓳ ꓶ ꓗꓪ ꓐꓯ ꓔ ꓟ ꓠꓬ ꓠꓴ ꓔꓯ ꓟꓽ ꓖꓶ ꓔ ꓟ ꓕꓲ ꓫꓵꓽ ꓫꓵꓽ ꓙꓳˍ ꓡ꓾ ꓐꓰ ꓠꓺ ꓠꓬꓲ ꓔ ꓡꓳ= ꓣꓳ ꓔꓯ ꓙꓳˍ ꓟ ꓮ ꓙꓵꓽ ꓠꓬ ꓪꓴ-ꓢ ꓡꓰ ꓖꓶ ꓔ ꓟ ꓥ ꓡꓳ= ꓪꓴ-ꓢ ꓡꓰ ꓟꓽ ꓖꓶ ꓔ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ= ꓖꓳ ꓡꓱ ꓠꓬꓲ ꓓꓵꓽ ꓙ ꓟꓶ ꓓꓴ ꓐꓯ ꓟ ꓠꓬ ꓓꓵꓽ ꓙ ꓮ’ ꓡꓰ ꓓꓴ꓾ ꓒꓰꓸ ꓩꓴ ꓓꓴ ꓔꓯ ꓬꓰ ꓟꓳꓸ ꓖꓶˍ ꓟ ꓔꓯ ꓐꓯ ꓟ ꓟꓽ ꓥ= ꓕꓲ ꓠꓬꓲ ꓕꓲ ꓠꓬꓲ ꓣꓳ ꓞꓳ ꓙꓳ ꓢꓯꓸ ꓔꓬ ꓟ ꓮ ꓙꓵꓽ ꓠꓬ ꓓꓵꓽ ꓙ ꓟꓶ ꓓꓴ ꓡꓰꓽ ꓥ ꓡꓳ= ꓕꓱ ꓟ ꓔꓯ ꓟꓳꓻ ꓐ ꓡ ꓠꓹ ꓟ꓾ ꓒꓵꓽ ꓗ ꓗꓶ ꓗꓴꓸ ꓠꓹ ꓟ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓥ ꓡꓳ= ꓬꓲ ꓔꓯ ꓟꓽ ꓙꓵꓻ ꓟ꓾ ꓬꓲ ꓡꓰ ꓖꓶ ꓡˍ ꓟ ꓶꓼ ꓤ ꓫꓱꓸ ꓤ ꓔꓯ ꓟꓽ ꓟꓳꓻ ꓟ꓾ ꓫ ꓟꓳ ꓟꓽ ꓗꓴꓸ ꓟ꓾ ꓕꓱ ꓟ ꓕꓯꓽ ꓢꓲ ꓬꓲ ꓔꓯ ꓠꓲꓹ ꓟ ꓫ ꓡꓰ ꓝꓲˍ ꓟ ꓠꓱꓸ ꓐꓯ ꓟꓽ ꓙꓳ=

ꓪꓽ ꓛꓴꓽ ꓚꓱꓹˍ ꓐꓯ ꓕꓯꓽ ꓢꓴ ꓡꓰ ꓣꓳ ꓔꓯ ꓟꓽ ꓙꓲꓻ ꓟ ꓬꓰ ꓖꓶ ꓡ ꓟ ꓔꓯ ꓣꓳ ꓠꓬ ꓟꓽ ꓙꓲꓻ ꓟ ꓔꓯ ꓝꓮꓲ ꓕꓲ ꓧꓪꓹ ꓡꓲꓸ ꓖꓶˍ ꓟ ꓥ ꓡꓳ= ꓣꓳ ꓔꓯ ꓕꓲ ꓕꓷꓹ ꓔꓲꓸ ꓡ ꓠꓬ ꓣꓳ ꓠꓽ ꓠꓬꓲ ꓕꓷꓹ ꓔꓲꓸ ꓠꓲꓹ ꓫꓵˍ ꓡꓳ= ꓕꓱ ꓟ ꓠꓬ ꓪꓽ ꓛꓴꓽ ꓚꓱꓹˍ ꓟ ꓥ ꓡꓳ= ꓕꓱ ꓟ ꓠꓽ ꓟꓽ ꓙꓲꓻ ꓟ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓖꓳ ꓟ ꓕꓯꓽ ꓢꓲ ꓟꓽ ꓙꓲꓻ ꓟ ꓠꓬ ꓫ ꓟꓳ ꓟꓽ ꓗꓴꓸ ꓟ ꓥ ꓡꓳ= ꓪꓽ ꓛꓴꓽ ꓚꓱꓹˍ ꓟ ꓠꓬ ꓣꓳ ꓔꓯ ꓢꓴ ꓡꓰ ꓠꓻ ꓡꓰ ꓝꓲˍ ꓟ ꓑꓶꓸ ꓓꓴ ꓖꓳ ꓕꓲ ꓣꓳ ꓔꓯ ꓠꓻ ꓡꓰ ꓝꓲˍ ꓟ ꓥ ꓡꓳ= ꓫ ꓟꓳ ꓟꓽ ꓗꓴꓸ ꓟ ꓠꓬ ꓙꓲˍ ꓟ ꓔꓯ ꓘꓳꓹ ꓣꓴ ꓗꓷ ꓢꓲ ꓙꓲˍ ꓟ ꓬꓰ ꓖꓶˍ ꓡ ꓢꓴ ꓔꓯ ꓟꓽ ꓙꓲꓻ ꓟ ꓡꓰ ꓡꓲꓸ ꓖꓶˍ ꓟ ꓥ ꓡꓳ= ꓪꓴ-ꓢ ꓡꓰ ꓣꓳ ꓔꓯ ꓙꓲˍ ꓟ ꓖꓶˍ ꓟ ꓥ ꓟꓲ ꓣꓳ ꓬꓲ ꓔꓯ ꓫꓸ ꓟꓳ ꓟꓽ ꓗꓴꓸ ꓟ ꓕꓱ ꓟ ꓕꓯꓽ ꓢꓲ ꓪꓴ-ꓢ ꓔꓯ ꓠꓲꓹ ꓟ ꓫ ꓡꓰ ꓝꓲˍ ꓟ ꓟꓽ ꓙꓳ=

ꓖꓳ ꓡꓱ ꓠꓬꓲ ꓪꓽ ꓛꓴꓽ ꓚꓱꓹˍ ꓟ ꓢꓶꓸ ꓟꓽ ꓞꓲꓺ ꓫ ꓟꓳ ꓟꓽ ꓗꓴꓸ ꓟ ꓠꓬ ꓪ ꓜꓲ ꓝꓴꓲꓸ ꓪꓴꓽˍ ꓡꓳ= ꓮ ꓫꓵꓽ ꓑꓶꓸ ꓓꓴ ꓥ ꓡ= ꓪꓽ ꓛꓴꓽ ꓚꓱꓹˍ ꓟ ꓠꓬ ꓣꓳ ꓔꓯ ꓢꓴ ꓡꓰ ꓔꓲꓸ ꓡ ꓕꓯ ꓢꓲ ꓡꓰꓽ ꓖꓳ ꓕꓲ ꓣꓳ ꓔꓯ ꓔꓲꓸ ꓚꓱꓹˍ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓫ ꓟꓳ ꓟꓽ ꓗꓴꓸ ꓟ ꓠꓬ ꓙꓲˍ ꓟ ꓔꓯ ꓟꓽ ꓙꓲ ꓟ ꓡꓰ ꓡꓲꓸ ꓖꓶˍ ꓟ ꓥ ꓡꓳ= ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓞꓳ ꓙꓳ ꓔꓬ ꓕꓯ ꓪꓴ-ꓢ ꓔꓬ ꓗꓪ ꓐꓰ ꓡˍ ꓟ ꓶꓼ ꓤ ꓫꓱꓸ ꓤ ꓠꓬ ꓵ ꓖꓴ ꓟꓽ ꓓ= ꓖꓳ ꓟ ꓔꓯ ꓣꓳ ꓟꓳꓻ ꓐ ꓡˍ ꓡ ꓐꓯ ꓟ ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓝꓮꓲ ꓕꓲ ꓧꓪꓹ ꓓꓵꓽ ꓙ ꓠꓬꓲ ꓝꓲˍ ꓟ ꓥ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓞꓳ ꓙꓳ ꓔꓬ ꓕꓯ ꓪꓴ-ꓢ ꓖꓶ ꓡˍ ꓟ ꓶꓼ ꓤ ꓫꓱꓸ ꓤ ꓔꓯ ꓒꓵꓽ ꓗ ꓬꓰ= ꓬꓲ ꓡꓰ ꓖꓶ ꓡˍ ꓟ ꓢꓯꓼ ꓟꓬ ꓔꓯ ꓒꓵꓽ ꓢꓲ ꓬꓲ ꓔꓯ ꓫ ꓟꓳ= ꓮ ꓡꓰ ꓫꓵꓽ ꓥˍ ꓟꓲ ꓣꓱꓽ ꓛꓰꓽ ꓡꓰꓽ ꓥ ꓡꓳ= ꓣꓱꓽ ꓛꓰꓽ ꓟꓽ ꓥ ꓠꓬ ꓮ ꓫꓵꓽ ꓥ ꓟꓲ ꓣꓳ ꓔꓯ ꓟꓽ ꓙꓳ= ꓪꓴ-ꓢ ꓗꓪ ꓐꓰ ꓟꓽ ꓡ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ ꓐꓯ ꓟ ꓔꓯ ꓓꓵꓽ ꓙ ꓔ ꓢꓲ ꓠꓬꓲ ꓮ ꓕꓯ ꓟꓲ ꓫ ꓟꓳˍ ꓟ ꓠꓲꓹ ꓟ ꓡꓰ ꓤ ꓠꓱ ꓤ ꓕꓲ ꓣꓳˍ ꓡꓰ ꓐꓰ ꓮ ꓫꓵꓽ ꓔꓯ ꓥˍ ꓟꓲ꓾ ꓓꓵꓽ ꓙ ꓮ’ ꓡꓰ ꓗꓴꓸˍ ꓟ꓾ ꓒꓰꓸ ꓩꓴ ꓗꓴꓸˍ ꓟ ꓞꓳ ꓤ ꓕꓲ ꓣꓳ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ= ꓟꓴ ꓗꓪ ꓗꓴꓷꓼ ꓠꓬ ꓤ ꓠꓱ ꓤ ꓕꓲ ꓣꓳˍ ꓡꓰ ꓐꓰ ꓒꓳꓹ ꓡꓶꓸ ꓙꓰ ꓢꓴ ꓐꓴ ꓐꓱ ꓶˍ ꓡꓰꓽ ꓥ ꓡꓳ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓔ ꓡꓳ= ꓖꓳ ꓟ ꓡꓰ ꓐꓰ ꓮ ꓫꓵꓽ ꓔꓯ ꓥ ꓟꓲ ꓠꓺ ꓠꓬꓲ ꓗꓴꓸˍ ꓟ꓾ ꓡꓳꓸ ꓠꓬꓲ ꓗꓴꓸˍ ꓟ꓾ ꓓꓵꓽ ꓙ ꓟꓶ ꓗꓴꓸˍ ꓟ꓾ ꓫ ꓟꓳ ꓗꓴꓸˍ ꓟ ꓞꓳ ꓤ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=