ꓬꓰ-ꓢꓴ ꓖ-ꓡꓲ-ꓡꓲ ꓟꓵꓽ ꓗꓪ ꓚꓳ ꓙꓰˍ ꓟ

ꓮ ꓟ ꓕꓲ ꓣꓳ ꓙꓳˍ ꓡꓳ= ꓬꓲ ꓔꓯ ꓠꓬ ꓬꓲ ꓞꓲꓼ 3 ꓘꓳꓼ ꓙꓳˍ ꓟ ꓮ ꓟꓲꓽ ꓤ ꓕꓲ ꓣꓳ ꓙꓳˍ ꓡꓳ= ꓕꓲ ꓠꓬꓲ ꓙꓳˍ ꓕꓯ ꓮ ꓟꓲꓽ ꓤ ꓖꓳ ꓟ ꓠꓬ ꓦꓰꓼ ꓛꓲꓽ ꓠꓻ ꓢꓲ꓾ ꓮ ꓘꓶꓸ ꓠꓻ ꓜꓲꓽ ꓢꓲ ꓠꓬꓲ ꓠꓻ ꓪꓴꓽ ꓔꓬ ꓡꓳ= ꓮ ꓟꓲꓽ ꓤ ꓖꓳ ꓟ ꓠꓬ ꓕꓱ ꓡꓱ ꓦꓰꓼ ꓛꓲꓽ ꓠꓻ ꓢꓲ ꓠꓻ ꓪꓴꓽ ꓕꓯ ꓮ ꓟ ꓣꓱꓽ ꓢꓴ ꓬꓲ ꓠꓲꓹ ꓟ ꓗꓪˍ ꓟꓲ ꓮ ꓘꓶꓸ ꓠꓻˍ ꓡꓳ= ꓤ ꓠꓱ ꓤ ꓠꓻˍ ꓟ ꓢꓶꓸ ꓟꓽ ꓞꓲꓺ ꓮ ꓟ ꓬꓲ ꓠꓲꓹ ꓟ ꓠꓬ ꓤ ꓠꓱ ꓤ ꓔꓯ ꓫꓱꓸ ꓤˍ ꓟ ꓑꓶꓸ ꓓꓴ ꓤ ꓠꓱ ꓤ ꓐꓱ ꓶ ꓟꓬꓺ ꓐꓲ ꓞꓰꓻ ꓢꓲ ꓤ ꓠꓱ ꓤ ꓔꓯ ꓗꓪꓽ ꓫꓵꓼ ꓖꓶˍ ꓡꓳ= ꓚꓵ ꓚꓵ ꓐꓯ ꓠꓬ ꓬꓲ ꓤ ꓠꓱ ꓦꓰꓼ ꓛꓲꓽ ꓠꓻˍ ꓟ ꓢꓶꓸ ꓟꓽ ꓞꓲꓺ ꓮ ꓟ ꓬꓲ ꓠꓲꓹ ꓟ ꓠꓬ ꓐꓶꓽ ꓗꓷˍ ꓗꓪ ꓛꓲ ꓠꓻˍ ꓡꓳ= ꓬꓲ ꓟꓽ ꓗꓹ ꓛꓲꓽ꓾ ꓕꓱ ꓟ ꓠꓬ ꓮ ꓟ ꓠꓵꓻ ꓠꓲꓹ ꓥ ꓡꓳ=

ꓟꓹ ꓟ ꓠꓵ ꓠꓲꓹ ꓔꓯ ꓡꓳꓸ ꓠꓬꓲˍ ꓕꓯ꓾ ꓟꓹ ꓟ ꓠꓬ ꓬꓲ ꓤ ꓠꓱ ꓔꓯ ꓮ ꓡꓲ ꓟꓬ ꓗꓪ ꓛꓲ ꓠꓲꓹ ꓠꓵˍ ꓡ= ꓬꓲ ꓤ ꓠꓱ ꓗꓪ ꓕꓲ ꓫꓵꓽ ꓫꓵꓽ ꓒꓬꓱꓼ ꓡˍ ꓕꓯ꓾ ꓫꓸ ꓙꓵ ꓓꓴ ꓔꓳꓹ ꓜꓳꓽ ꓡ ꓕꓯ ꓮ ꓟ ꓠꓬ ꓬꓲ ꓤ ꓠꓱ ꓢꓶꓸ ꓟꓽ ꓞꓲꓺ ꓠꓲꓹ ꓟ ꓫꓸ ꓠꓬꓲ꓾ ꓠꓲꓹ ꓥꓴ ꓠꓬꓲ ꓗꓹ ꓟ ꓠꓬ ꓟꓹ ꓟ ꓐꓴ ꓫꓷꓹ ꓥ ꓡꓳ= ꓬꓲ ꓫꓱꓹ ꓥ ꓡꓳ= ꓕꓱ ꓟ ꓠꓬ ꓟꓹ ꓟ ꓠꓵ ꓠꓲꓹ ꓥ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓣꓳ ꓵ ꓠꓹ ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ-ꓕꓲ=9:32-37 ꓥ ꓡꓳ= ꓢꓲꓽ ꓫꓬ ꓕꓳ ꓶ ꓕꓱ ꓟ ꓗꓪ ꓣꓳ ꓑ ꓙꓽ ꓪˍ ꓟ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓡꓳ ꓒꓱ ꓥ ꓕ ꓑꓳꓸꓼ꓾ ꓘꓹ ꓥ ꓕ ꓑꓳꓸꓼ ꓗꓪ ꓙꓰ ꓢꓲ ꓠꓬꓲ ꓪꓴ-ꓢ ꓗꓴꓷꓼ ꓟꓸ ꓟꓲꓽ ꓚ ꓟꓸ ꓖꓶˍ ꓟ ꓐꓰ ꓠꓻ ꓫꓵꓽ ꓠꓻ ꓙꓰꓽ ꓮ ꓙꓵꓽ ꓔꓯ ꓬꓲ ꓡꓰ ꓫꓬꓹ ꓖꓶˍ ꓡꓳ= ꓖꓳ ꓕꓯ ꓬꓲ ꓠꓬ ꓡ ꓞꓳ ꓔꓯ ꓡꓳꓸ ꓠꓬꓲ ꓢꓲ ꓠꓬꓲ ꓬꓲ ꓠꓲꓹ ꓟ ꓠꓻˍ ꓡꓳ꓾ ꓐꓰ ꓐꓯ ꓔ ꓡꓳ= ꓬꓲ ꓠꓬ ꓬꓲ ꓪ ꓔꓯ ꓫꓱꓸ ꓤˍ ꓡꓳ= ꓞꓳ ꓜꓴ ꓔꓯ ꓫꓱꓸ ꓤˍ ꓡꓳ= ꓮ ꓡꓲꓳ ꓐꓯ ꓠꓬ ꓬꓲ ꓪ ꓠꓬ ꓮ ꓣꓳ ꓡꓳꓸ ꓒ ꓟꓽ ꓙꓳ ꓟ ꓮ ꓣꓳ ꓔꓯ ꓫꓱꓸˍ ꓡꓳ꓾ ꓐꓰ ꓬꓲ ꓐꓯ ꓡꓳ=

ꓮ ꓟ ꓔꓯ ꓡꓳꓸ ꓠꓬꓲˍ ꓥ ꓟꓲ ꓬꓲ ꓫꓱꓸ ꓤˍ ꓡꓳ= ꓬꓲ ꓠꓲꓹ ꓟ ꓠꓯꓸꓼ ꓗꓪ ꓠꓲꓹ ꓟ ꓠꓻ ꓡꓰˍ ꓗꓪ ꓛꓲ ꓬꓲ ꓫꓱꓸ ꓤˍ ꓡꓳ= ꓖꓳ ꓟ ꓑꓶꓸ ꓓꓴ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓠꓬ “ꓶꓼ ꓫ ꓓꓴ ꓠꓬ ꓮ ꓟꓬꓹ ꓙꓳˍ ꓡꓳ= ꓟꓬꓱꓽ ꓬꓰ ꓢꓴ ꓠꓬ ꓠꓲꓸˍ ꓡꓳ”꓾ ꓐꓰ ꓐꓯ ꓢꓲ ꓠꓬꓲ ꓬꓲ ꓝꓲ ꓓꓴ ꓐꓴ ꓔꓯ ꓢꓯꓼ ꓖꓶˍ ꓟ ꓟꓸ ꓟꓲꓽ ꓥ ꓡꓳ=

ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓮ ꓟ ꓕꓲ ꓣꓳˍ ꓡꓰ ꓐꓰ ꓠꓵꓻ ꓠꓲꓹ ꓙꓳˍ ꓡꓳ= ꓬꓲ-ꓢ-ꓬ ꓕꓳ ꓶ ꓗꓪ ꓡꓳꓸ ꓠꓬꓲˍ ꓕꓯ ꓮ ꓚꓵꓹ ꓖꓶ ꓛꓵꓼ ꓔꓬ ꓟ ꓮ ꓟ ꓕꓲ ꓣꓳ ꓠꓬ ꓬꓲ ꓮ ꓚꓵꓹ ꓖꓶ ꓛꓵꓼ ꓗꓷ ꓟ ꓤ ꓠꓱ ꓤ ꓔꓯ ꓬꓲ ꓟꓲ ꓡꓰˍ ꓗꓷ ꓓꓹ ꓡ= ꓬꓲ ꓟꓲ ꓡꓰˍ ꓗꓷˍ ꓐꓯ ꓥˍ ꓟꓲ ꓥꓪ ꓠꓽ ꓠꓴ ꓪ ꓔꓯ ꓟꓽ ꓟꓲ ꓡꓰ꓾ ꓐꓯ ꓢꓲ ꓐꓹ ꓐ ꓬꓲ ꓠꓵ ꓠꓲꓹ ꓔꓯ ꓮ ꓟ ꓠꓵ ꓠꓲꓹ ꓡꓰ ꓔꓯ ꓔ ꓡꓳ=

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓡ ꓞꓳ ꓐꓴ ꓠꓲꓹ ꓫ ꓟꓬ ꓫ ꓔꓬ ꓟ꓾ ꓥꓳ ꓡꓳꓸ ꓖꓴ ꓟꓽ ꓙꓳ꓾ ꓠꓽ ꓖꓴ ꓟꓽ ꓙꓳ ꓟ ꓞꓳ ꓜꓴ ꓔꓯ ꓡꓳꓸ ꓢꓲ ꓬꓲ ꓠꓬ ꓠꓲꓹ  ꓟ ꓠꓻˍ ꓡꓳ= ꓫꓱꓸ ꓤˍ ꓡꓳ ꓐꓰ ꓐꓯ ꓔ ꓡꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓗ ꓠꓯꓸ ꓛꓳ ꓢꓴ ꓣꓳ ꓥ ꓟꓲ ꓕꓲ ꓠꓬꓲ ꓕꓲ ꓠꓬꓲ ꓪꓽ ꓘꓴˍ ꓟ ꓗꓪ ꓐꓰ꓾ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓐꓰ ꓫꓱꓸ ꓠꓹ ꓟ ꓢꓯꓼ ꓕꓵꓼ ꓪˍ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓪꓴ-ꓢ ꓐꓰ ꓠꓶꓽ ꓡˍ ꓕꓯ ꓣꓳ ꓠꓬ ꓦꓲꓻ ꓘꓴꓽ ꓢꓴ ꓐꓱ ꓶˍ ꓡꓰꓽ ꓣꓳ ꓟꓽ ꓓꓵꓽ ꓙ= ꓠꓱꓸ ꓐꓯ ꓗꓪ ꓠꓲꓹ ꓫ ꓟꓬ ꓫ ꓔꓬ ꓢꓴ꓾ ꓠꓱꓸ ꓐꓯ ꓗꓪ ꓫ ꓙꓵ ꓔꓬ ꓢꓴ ꓐꓱ ꓶ ꓥˍ ꓟꓲ ꓣꓳ ꓓꓵꓽ ꓙꓽ ꓗꓴꓸ ꓡˍ ꓡꓳ= ꓮ ꓡꓲꓳ ꓐꓯ ꓠꓬ ꓣꓳ ꓢꓲ ꓒ ꓬꓰ-ꓢꓴ ꓔꓯ ꓙꓳˍ ꓟ ꓠꓲꓹ ꓟ ꓔꓯ ꓣꓳ ꓔꓯꓺ ꓢꓳ ꓡ ꓢꓲ ꓢꓲ ꓒ ꓬꓰ-ꓢꓴ ꓡꓰ ꓐꓰ ꓗꓷ ꓡꓰˍ ꓥꓳ=

ꓖꓳ ꓡꓱ ꓠꓬꓲ ꓕꓱ ꓟ ꓔꓯ ꓣꓳ ꓢꓯꓼ ꓕꓵꓼ ꓡꓯ= ꓣꓳ ꓦꓲꓻ ꓐꓱ ꓶ ꓣꓳ ꓐꓱ ꓶˍ ꓡꓰꓽ ꓟꓽ ꓞꓲꓺ꓾ ꓠꓲꓹ ꓫ ꓟꓬ ꓫ ꓔꓬ ꓟ ꓞꓳ ꓘꓹ ꓢꓴ ꓐꓴ꓾ ꓡꓳ ꓒꓱ ꓗꓪ ꓔꓬ ꓢꓴ ꓐꓴ꓾ ꓕꓲ ꓖ ꓖ ꓗꓪ ꓫ ꓙꓵ ꓔꓬ ꓢꓴ ꓐꓴ ꓐꓱ ꓶˍ ꓟꓲ꓾ ꓬꓲ ꓪ ꓐꓱ ꓶ ꓠꓲꓹ ꓟ ꓠꓻ ꓢꓲ ꓬꓲ ꓪ ꓐꓱ ꓶ ꓪꓽ ꓘꓴ ꓙ ꓖꓶ ꓠꓹ ꓟ ꓢꓲ ꓒ ꓬꓰ-ꓢꓴ ꓔꓯ ꓣꓳ ꓔꓯꓺ ꓢꓳ ꓠ ꓗꓹ ꓡꓳ=

ꓝꓮꓲ ꓕꓲ ꓫꓵꓽ ꓠꓬ꓾ ꓢꓲ ꓒ ꓬꓰ-ꓢꓴ ꓠꓬ “ꓶꓼ ꓫ ꓓꓴ ꓮ ꓟꓬꓹ ꓙꓳˍ ꓡꓳ” ꓐꓯ ꓟ ꓡꓰ ꓐꓰ ꓠꓵꓻ ꓠꓲꓹ ꓟꓳꓸ ꓖꓶ ꓠꓹ ꓟ꓾ ꓪꓴ-ꓢ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ ꓠꓹ ꓟ ꓟꓬꓱꓽ ꓮ ꓟꓬꓹ ꓙꓳˍ ꓡꓳ= ꓡ ꓞꓳ ꓮ ꓟꓬꓹ ꓠꓬ ꓠꓲꓹ ꓟ ꓫ ꓠꓬꓲ꓾ ꓠꓲꓹ ꓟ ꓪꓴꓽ ꓧꓶ ꓠꓽ ꓖꓴ ꓟꓽ ꓙꓳ꓾ ꓪꓴ-ꓢ ꓔꓯ ꓕꓲ ꓶ ꓟꓬ ꓡꓱꓸꓼ ꓟꓽ ꓙꓵꓻ ꓟ ꓮ ꓟꓬꓹ ꓙꓳˍ ꓡꓳ= ꓬꓲ ꓪ ꓔꓯ ꓠꓲꓹ ꓗꓴ ꓟꓬ ꓗꓴ ꓖꓶ ꓠꓹ ꓟ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓬꓲꓼ ꓠꓬꓲꓸ ꓖꓶ ꓔꓬ ꓡꓳ=

ꓮ ꓡꓲꓳ ꓐꓯ ꓠꓬ ꓜ ꓟꓲ ꓕꓲ ꓟꓲ ꓗꓪ ꓜ ꓶꓼ ꓢꓴ ꓟꓽ ꓙꓳ ꓠꓬ ꓠꓱꓽ ꓡˍ ꓟ ꓜ ꓐꓴ ꓠꓬ ꓬꓲ ꓖꓳꓽ ꓗꓷ ꓡꓰˍ ꓥꓳ= ꓛꓵꓽ ꓡꓰˍ ꓥꓳ= ꓠꓬꓹ ꓤ ꓐꓴ ꓡꓰ ꓜꓽ ꓬꓰˍ ꓥꓳ= ꓕꓱ ꓟˍ ꓡꓰ ꓐꓰ ꓣꓳ ꓬꓰ ꓙꓲꓽ ꓙꓳˍ ꓟ ꓔꓯ ꓟꓽ ꓬꓰ ꓕꓯ ꓣꓳ ꓟꓶ ꓠ ꓔ ꓟ ꓣꓱꓽ ꓛꓰꓽ ꓣꓳ ꓟꓽ ꓟꓶ ꓗꓷ ꓡꓰˍ ꓥꓳ ꓐꓰ ꓪꓴ-ꓢ ꓡꓰ ꓣꓳ ꓔꓯ ꓬꓲꓼ ꓠꓬꓲꓸ ꓖꓶ ꓔꓬ ꓡꓳ= ꓮ ꓙꓵꓽ ꓢꓴ ꓢꓲ ꓒ ꓬꓰ-ꓢꓴ ꓠꓲꓹ ꓟ ꓔꓯ ꓔꓯꓺ ꓢꓳ ꓢꓲ ꓣꓳ ꓦꓲ ꓐꓱ ꓶˍ ꓡꓰꓽ ꓟꓽ ꓞꓲꓺ ꓠꓱꓸ ꓐꓯ ꓢꓴ ꓐꓱ ꓶ ꓥˍ ꓟꓲ ꓢꓯꓼ ꓕꓵꓼ ꓗꓴꓸ ꓠꓹ ꓟ꓾ ꓢꓯꓸ ꓔꓬ ꓠꓹ ꓟ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=