ꓓꓰꓽ ꓢꓴ ꓠꓬ ꓟꓶˍꓟ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓓꓰꓽ꓾ ꓖꓳ ꓡꓱ ꓠꓬ ꓠꓴ ꓪ ꓟꓶˍ ꓥꓳ= ꓗ ꓘꓶꓽ ꓲꓼ꓾ ꓖꓳ ꓡꓱ ꓠꓬ ꓠꓴ ꓪ ꓔꓯ ꓒꓴ ꓖꓶ ꓡˍ ꓥꓳ= ꓧꓪ ꓖꓳ ꓡꓱ ꓠꓬ ꓠꓴ ꓪ ꓧꓪ ꓟꓶˍ ꓥꓳ꓾ ꓐꓰ ꓬꓰ-ꓢꓴ ꓡꓰ ꓕꓵꓼ ꓪ ꓖꓶ ꓔ ꓡꓳ= ꓕꓱ ꓟ ꓡꓰꓽ ꓟ ꓞꓲꓺ ꓣꓳ ꓮ ꓡꓲ ꓐꓰ ꓓꓰꓽ ꓠꓹ ꓟ ꓠꓬ  ꓔꓯꓺ ꓥꓳꓽ ꓕꓲ ꓟ ꓣꓱꓽ ꓢꓲ ꓕꓱ ꓡꓰ ꓐꓯ ꓔ ꓖꓶˍ ꓡꓳ= ꓦꓬꓽ ꓔꓱꓹ ꓫꓵ ꓕꓲ ꓢꓺ ꓘꓴꓽ ꓕꓯ ꓡ ꓞꓳ ꓕꓲ ꓣꓳ ꓔꓬ ꓗꓪ ꓬꓲ ꓛꓳꓽ ꓒꓯꓹ ꓕꓲ ꓣꓳ ꓠꓬ ꓡ ꓢꓲ ꓬꓲ ꓦꓲꓻ ꓗꓪ ꓠꓽ ꓡꓹ ꓡꓳ=

ꓖꓳ ꓕꓯ ꓦꓬꓽ ꓔꓱꓹ ꓫꓵ ꓥ ꓟ ꓪꓴꓸ ꓠꓬꓲ ꓡ ꓞꓳ ꓒ ꓠꓬ ꓬꓲ ꓛꓳ ꓒꓯꓹ ꓔꓯ ꓮ ꓫꓵꓽ ꓲ’ ꓖꓶ ꓜꓽ ꓓꓴ ꓟꓽ ꓙꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓝꓮꓲ ꓬꓲ ꓛꓳ ꓒꓯꓹ ꓕꓲ ꓣꓳ ꓦꓲꓻ ꓗꓪ ꓙꓰ ꓢꓲ ꓾ ꓗꓪ ꓛꓳꓽ ꓳ꓾ ꓥꓪ ꓔꓯ ꓫꓪ ꓒꓵꓼ ꓑ ꓑ ꓢꓽ ꓑꓬ ꓛꓵꓽ ꓖꓶ ꓡꓯ꓾ ꓐꓰ ꓓꓰꓽˍ ꓡꓳ= ꓖꓳ ꓕꓯ ꓬꓲ ꓗꓪ ꓛꓳꓽ ꓡꓰ ꓛꓳ ꓒꓯꓹꓳ ꓥꓪ ꓔꓯ ꓕꓽ ꓘꓶ ꓡꓶꓽ= ꓮ ꓟꓶ ꓠꓬ ꓥꓪ ꓬꓲꓼ ꓔ ꓔꓬ ꓡꓳ= ꓥꓪ ꓤ ꓠꓱ ꓤ ꓐꓴˍ ꓟꓲ ꓬꓲꓼ ꓔ ꓔꓬ ꓡꓳ= ꓖꓳ ꓟ ꓪꓴꓸ ꓠꓬꓲ ꓥꓪ ꓔꓴꓺ ꓡ ꓟꓽ ꓠ꓾ ꓐꓰ ꓒꓳꓹ ꓖꓶˍ ꓡꓳ=ꓖꓳ ꓡꓱ ꓥˍ ꓟꓲ ꓡ ꓞꓳ ꓒ ꓖꓳ ꓕꓲ ꓣꓳ ꓠꓬ ꓟꓽ ꓠꓽ ꓠꓽ ꓓꓰꓽˍ ꓡꓳ= ꓖꓳ ꓕꓯ ꓬꓲ ꓗꓪꓺ ꓛꓳꓽ ꓡꓰ ꓔꓬ ꓟꓽ ꓠ ꓠꓬꓲ ꓔꓴꓺ ꓡ ꓢꓲ꓾ ꓡ ꓞꓳ ꓒ ꓖꓳ ꓕꓲ ꓣꓳ ꓓꓰꓽˍ ꓟ ꓮ ꓙꓵꓽ꓾ ꓬꓲ ꓣꓱꓽ ꓬꓯꓼˍ ꓟ ꓮ ꓙꓵꓽ ꓖꓶˍ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓟ ꓠꓬ ꓣꓳ ꓔꓯ ꓢꓲꓺ ꓒ ꓬꓰ-ꓢꓴ ꓡꓰ ꓔꓯꓺ ꓥꓳ ꓟꓸ ꓖꓶ ꓔꓬ ꓟ ꓠꓬ꓾ ꓣꓳ ꓥˍ ꓟꓲ ꓪꓴ-ꓢ ꓔꓯ ꓟꓽ ꓠꓽ ꓠꓽ꓾ ꓠꓲꓹ ꓟ ꓫꓵ ꓢꓲ ꓠꓬꓲ ꓓꓰꓽ ꓠꓹ ꓟ ꓥ ꓡꓳ= ꓡ ꓞꓳ ꓒ ꓖꓳ ꓕꓲ ꓣꓳ ꓬꓲ ꓗꓪꓺ ꓛꓳꓽ ꓔꓬ ꓗꓪ ꓟꓽ ꓠꓽ ꓠꓽ ꓓꓰꓽˍ ꓠꓬ꓾ ꓞꓳ ꓤ ꓡꓰ ꓖꓶˍ ꓥꓳ ꓐꓯ ꓠꓬ ꓟꓴꓽ ꓗꓪ ꓗꓪ ꓟ ꓐꓹ ꓐ ꓪꓴ-ꓢ ꓠꓬ ꓣꓳ ꓔꓯ ꓟꓽ ꓖꓶ ꓐꓰ ꓟꓽ ꓔꓬ ꓐꓰ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ=

Add new comment

7 + 0 =