ꓔꓯꓺ ꓥꓳꓽ ꓣꓱꓽ ꓢꓲ ꓟꓸ ꓖꓶˍ ꓟ

ꓔꓯꓺ ꓥꓳꓽ ꓐꓯ ꓟ ꓠꓬ ꓟꓲ ꓠꓯ ꓗꓪ ꓒꓬꓱꓼ ꓔꓬ ꓟ ꓟꓸ ꓟꓲꓽ ꓔꓯ ꓣꓱꓽ ꓢꓲ ꓟꓴꓽ ꓗꓪ ꓗꓴꓷꓼ ꓔꓯ ꓟꓳꓸ ꓚꓵ ꓘꓶꓽ ꓐꓴ ꓔꓯ ꓒꓶ ꓟꓸ ꓖꓶˍ ꓟ ꓥ ꓡꓳ= ꓕꓱ ꓟ ꓔꓯ ꓔꓯꓺ ꓥꓳꓽ ꓐꓯ ꓟ ꓥ ꓡꓳ= ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓟ-ꓕꓲ 13ꓽ10-17 ꓗꓪ ꓝꓲ ꓓꓴ ꓐꓴ ꓠꓬ “ ꓮ ꓫꓵꓽ ꓪꓴꓸ ꓠꓬꓲ ꓔꓯꓺ ꓥꓳꓽ ꓣꓱꓽ ꓢꓲ ꓟꓸ ꓖꓶˍ ꓡ” ꓐꓰ ꓠ ꓠꓬꓲˍ ꓕꓯ ꓢꓲꓺ ꓒ ꓬꓰ-ꓢꓴ ꓡꓰ “ꓠꓴ ꓪ ꓔꓯ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓟ ꓚꓵꓺ ꓘꓶꓽ ꓢꓷꓸ ꓡꓰ ꓠꓹ ꓟ ꓖꓶ ꓔ ꓡꓳ= ꓬꓲ ꓪ ꓔꓯ ꓠꓽ ꓟꓽ ꓖꓶ ꓔ꓾ ꓐꓰ ꓒꓳꓹ ꓖꓶˍ ꓡꓳ=

ꓟꓴ ꓗꓪ ꓗꓴꓷꓼ ꓗꓪ ꓟ ꓚꓵꓻ ꓘꓶꓽ ꓐꓴ ꓔꓯ ꓙ ꓜꓲꓼ ꓡꓰ ꓠ ꓐꓯ ꓟꓸ ꓖꓶˍ ꓐꓯ ꓟ ꓕꓯꓽ ꓢꓲ꓾ ꓐꓯ ꓟꓸ ꓖꓶ ꓔꓬ ꓟ ꓔꓯ ꓟꓽ ꓠ ꓠꓹ ꓟ ꓪꓴꓸ ꓠꓬꓲ ꓠ ꓠꓹ ꓡ ꓠ ꓬꓲ ꓪ ꓔꓯ ꓬꓲ ꓪ ꓗꓳ ꓡꓳ ꓗꓪ ꓙꓳ ꓔꓬ ꓟ꓾ ꓒꓬꓱꓼ ꓔꓬ ꓟ ꓔꓯ ꓔꓯꓺ ꓥꓳꓽ ꓣꓱꓽ ꓢꓲ ꓟꓸ ꓖꓶˍ ꓟ ꓥ ꓡꓳ꓾ ꓐꓰ ꓐꓯ ꓓꓹ ꓡꓳ= ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ “ꓬꓲ ꓪ ꓔꓯ ꓔꓯꓺ ꓥꓳꓽ ꓗꓪ ꓐꓰ ꓟꓸ ꓖꓶˍ ꓟ ꓠꓬ ꓬꓲ ꓪ ꓠꓽ ꓟꓳꓻˍ ꓥ ꓟꓲ ꓟꓽ ꓡꓳꓸ ꓓꓳ ꓡ꓾ ꓑˍ ꓟꓲ ꓟꓽ ꓑ ꓙ꓾ ꓙꓽˍ ꓟꓲ ꓟꓽ ꓙ ꓜꓲꓼ ꓟ ꓪꓴꓸ ꓠꓬꓲ ꓥ ꓡꓳ” ꓐꓰ ꓢꓲꓺ ꓒ ꓡꓰ ꓐꓯ ꓡꓳ=

ꓟꓸ ꓟꓲꓽ ꓚꓺ ꓢꓴ ꓕꓲ ꓣꓳ ꓐꓱ ꓶ ꓬꓰ ꓫ ꓓꓴ ꓕꓲ ꓟ ꓙꓳˍ ꓡꓳ= ꓕꓱ ꓟ ꓠꓬ ꓬꓲ ꓚꓺ ꓔꓬ ꓟ꓾ ꓬꓲ ꓟꓸ ꓖꓶ ꓔꓬ ꓟ ꓔꓯ ꓑ ꓫꓬ ꓐꓴ ꓙ ꓜꓲꓼˍ ꓡ꓾ ꓟꓽ ꓙ ꓜꓲꓼ ꓡ ꓐꓯ ꓟ ꓥ ꓡꓳ= ꓚꓺ ꓔꓬ ꓟ꓾ ꓐꓯ ꓔꓬ ꓟ ꓔꓯ ꓑ ꓙꓽˍ ꓥ ꓟꓲ ꓟꓽ ꓙ ꓜꓲꓼ ꓕꓯ ꓠꓽ ꓬꓲ ꓚꓺ ꓟꓸ ꓖꓶˍ ꓟ ꓮ ꓙꓵꓽ ꓠꓬ ꓮꓽ ꓔꓳꓺˍ ꓡꓰꓽ ꓗꓷ ꓡꓰˍ ꓥꓳ ꓟꓽ ꓥ ꓡ= ꓕꓲ ꓖ ꓕꓲ ꓧꓪꓹ ꓟꓲ ꓠꓯ ꓞꓳ ꓤ ꓐꓴ ꓠꓬ ꓚꓲ ꓛꓬ ꓑ ꓙꓽ ꓠꓲꓹ ꓫꓵˍ ꓟ ꓔꓯ ꓡꓰꓽ ꓑ ꓙꓽ ꓢꓲ꓾ ꓤꓰꓻ ꓞꓸ ꓟ ꓔꓯ ꓠꓬ ꓠꓲꓹ ꓟ ꓪꓴꓸ ꓓꓵ ꓗꓪ ꓟꓽ ꓗꓷ ꓔ= ꓮ ꓟꓬꓹ ꓚꓺ ꓟꓸ ꓖꓶ ꓔꓬ ꓥˍ ꓟꓲ ꓑ ꓙꓽ ꓠꓲꓹ ꓫꓵˍ ꓟ꓾ ꓐꓯ ꓬꓯꓼˍ ꓟ ꓕꓲ ꓘꓶꓽ ꓤ ꓔꓯ ꓡꓰꓽ ꓚꓲꓸ ꓔ ꓟ ꓥ ꓡꓳ=

ꓣꓳ ꓚꓲ ꓛꓬ ꓥˍ ꓟꓲ ꓕꓲ ꓖ ꓕꓲ ꓧꓪꓹ ꓚꓲ ꓛꓬ ꓟꓳꓻ ꓠꓲꓹ ꓫꓵˍ ꓟ ꓔꓯ ꓡꓰꓽ ꓟꓳꓻ꓾ ꓑ ꓙꓽ ꓠꓲꓹ ꓫꓵˍ ꓟ ꓔꓯ ꓡꓰꓽ ꓑ ꓙꓽ꓾ ꓙ ꓜꓲꓼ ꓠꓲꓹ ꓫꓵˍ ꓟ ꓔꓯ ꓡꓰꓽ ꓙ ꓜꓲꓼˍ ꓡꓳ ꓟꓽ ꓥ ꓡ= ꓖꓳ ꓡꓱ ꓥˍ ꓟꓲ ꓚꓲ ꓛꓬ ꓚꓬꓴꓸ ꓟꓶ ꓓꓴ ꓐꓱ ꓶ꓾ ꓟꓴ ꓗꓪ ꓗꓴꓷꓼ ꓗꓪ ꓟ ꓚꓵꓺ ꓘꓶꓽ ꓐꓴ꓾ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓐꓱ ꓶ ꓟꓸ ꓟꓲꓽ ꓐꓴ ꓔꓯ ꓣꓳ ꓐꓴ ꓟꓳꓻ ꓠꓹ ꓟ꓾ ꓑ ꓙꓽ ꓠꓲꓹ ꓟ꓾ ꓙ ꓜꓲꓼ ꓠꓹ ꓟ ꓚꓵꓺ ꓚꓵꓺ ꓣꓱꓽ ꓞꓹ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓔꓯꓺ ꓥꓳꓽ ꓣꓱꓽ ꓢꓲ ꓣꓳ ꓐꓴ ꓙ ꓜꓲꓼ ꓡꓰ ꓠꓹ ꓟ ꓟꓸ ꓖꓶ ꓔꓬ ꓡꓳ= ꓕꓱ ꓟ ꓔꓯ ꓣꓳ ꓒꓵꓽ ꓠ ꓗˍ ꓡꓳ=