ꓙꓵꓻ ꓢꓴ ꓠꓬ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪ ꓥ ꓟ꓾

ꓪꓴ-ꓢ ꓡꓰ ꓖꓶˍ ꓟ ꓢꓲ ꓡꓲ ꓟ ꓣꓱꓽ ꓛꓰꓽ ꓐꓰ ꓶ ꓤ ꓫꓱꓹ ꓤ ꓮ ꓙꓵꓽ ꓠꓬꓲꓸ ꓠꓬꓲ ꓠꓴ ꓪ ꓮ ꓙꓵꓽ ꓢꓴ ꓑꓯꓹ ꓟꓶ ꓝꓲ= ꓠꓬꓲꓸ ꓠꓬꓲ ꓪꓴ-ꓢ ꓐꓯ ꓘꓶꓽ ꓥ ꓟ ꓟ-ꓕꓲ 12ꓽ46-50 ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓦꓲꓻ ꓘꓴꓽ ꓕꓲ ꓟ ꓗꓪ ꓑ ꓫꓬ ꓐꓴ ꓔꓯ ꓟꓸ ꓖꓶ ꓑꓱ ꓖꓶ ꓾ ꓪꓴ-ꓢ ꓐꓯ ꓘꓶꓽ ꓐꓯ ꓟꓳꓸ ꓖꓶ ꓔꓬ ꓕꓯ ꓡ ꓞꓳ ꓕꓲ ꓣꓳ ꓠꓬ ꓢꓲꓺ ꓒ ꓬꓰ-ꓢꓴ ꓔꓬ ꓗꓪ ꓡ ꓢꓲ ꓦꓲꓻ ꓠꓱ ꓫꓳꓸ ꓟꓸ ꓗꓪ ꓠꓴ ꓟꓹ ꓟ ꓐꓰ ꓠꓬ ꓬꓲꓼ ꓠꓬꓲ ꓠꓴ ꓔꓯ ꓟꓳꓻ ꓠꓲꓹ ꓫꓵˍ ꓡꓳ ꓐꓰ ꓢꓲꓺ ꓒ ꓬꓰ-ꓢꓴ ꓔꓯ ꓐꓯ ꓖꓶˍ ꓟ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓔꓲꓸ ꓒꓳꓹ ꓢꓲ ꓥꓪ ꓬꓲꓼ ꓥꓪ ꓠꓬꓲ ꓠꓬ ꓮꓽ ꓟ ꓥ ꓡ? ꓥꓪ ꓟꓹ ꓟˍ ꓟꓲ ꓮꓽ ꓟ ꓥ ꓡ? ꓕꓱ ꓟ ꓠꓬ ꓥꓪ ꓬꓲꓼ ꓥꓪ ꓠꓬꓲ ꓥꓳ꓾ ꓥꓪ ꓮ ꓟ ꓥꓳ ꓐꓯ ꓢꓲ ꓡꓯꓽ ꓒꓯꓹ ꓛꓱ ꓖꓶ ꓢꓲ ꓠꓬꓲ ꓬꓲ ꓡꓰ ꓟꓸ ꓟꓲꓽ ꓚꓺ ꓟꓳꓸ ꓖꓶ ꓔꓬ ꓟ ꓑ ꓫꓬ ꓐꓴ ꓔꓯ ꓖꓴ ꓢꓲ ꓐꓯ ꓟꓳꓸ ꓖꓶˍ ꓡꓳ=

ꓣꓳ ꓟꓸ ꓟꓲꓽ ꓕꓱ ꓟ ꓔꓯ ꓡꓳꓸ ꓠꓬꓲˍ ꓕꓯ ꓓꓵꓽ ꓙ ꓟꓶ ꓓꓴ ꓓꓵꓽ ꓙ ꓟꓬꓽ ꓓꓴ ꓙꓳ ꓡ ꓗꓴˍ ꓡꓳ- ꓮ ꓫꓵꓽ ꓑꓶꓸ ꓓꓴ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓮ ꓟ ꓔꓯ ꓥꓪ ꓮ ꓟ ꓠꓬ ꓮꓽ ꓟ ꓥ ꓡ꓾ ꓐꓰ ꓐꓯ ꓡ= ꓖꓳ ꓡꓱ ꓥˍ ꓟꓲ ꓣꓳ ꓜꓳꓽ ꓜꓳꓽ ꓓꓵꓽ ꓙ ꓠꓬꓲˍ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓮ ꓟ ꓥ ꓟ ꓢꓲꓽ ꓫꓬ ꓟ-ꓡꓲ-ꓬ ꓔꓯ ꓪ ꓜꓲ ꓫꓱꓸ ꓖꓶ ꓔꓬ ꓟ ꓥ ꓡꓳ= ꓮ ꓡꓲ ꓐꓰ ꓫꓱꓸ ꓖꓶˍ ꓟ ꓥ ꓡ= ꓟꓲ ꓠꓯ ꓕꓱ ꓟ ꓗꓪ ꓢꓲꓺ ꓒ ꓬꓰ-ꓢꓴ ꓚꓳꓸ ꓗꓳꓸ ꓙꓰ ꓠꓬ ꓢꓲꓽ ꓫꓬ ꓟ-ꓡꓲ-ꓬ ꓡꓰ ꓐꓰ ꓐꓹ ꓐ ꓪꓴ-ꓢ ꓐꓯ ꓘꓶꓽ ꓠ ꓡꓳꓸ ꓢꓴ꓾ ꓪꓴ-ꓢ ꓠꓲꓹ ꓡꓶꓽ ꓛꓳꓻ ꓐ ꓡ ꓢꓴ꓾ ꓪꓴ-ꓢ ꓐꓯ ꓘꓶꓽ ꓘꓳ ꓣꓴ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ=

ꓢꓲꓽ ꓫꓬ ꓟ-ꓡꓲ-ꓬ ꓠꓬ ꓞꓲꓼ ꓣꓳˍ ꓕꓯ ꓡꓰ ꓪꓴ-ꓢ ꓔꓯ ꓡꓯꓼ ꓙꓱ ꓔ ꓢꓲ ꓠꓬꓲ ꓟꓴꓽ ꓗꓪ ꓝꓲ ꓓꓴ ꓚꓬ-ꓑꓷ-ꓡꓷ ꓡꓰ ꓢꓲꓽ ꓫꓬ ꓟ-ꓡꓲ-ꓬ ꓔꓯ ꓶꓼ ꓓꓳ ꓫꓱꓹ ꓓꓳ ꓐꓯ ꓟꓸ ꓖꓶ ꓡˍ ꓟ ꓗꓪ ꓐꓰ ꓢꓲꓽ ꓫꓬ ꓟ-ꓡꓲ-ꓬ ꓠꓬ ꓖꓳ ꓓꓱꓽ ꓶꓻ ꓡꓰ ꓢꓲ꓾ ꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓒꓬꓱꓽ ꓟꓳꓻ ꓡ ꓢꓲ ꓠꓬꓲ꓾ ꓢꓲꓺ ꓒ ꓬꓰ-ꓢꓴ ꓔꓯ ꓠꓬꓲꓺ ꓡꓳꓸ ꓗꓪꓼ ꓫꓵꓼˍ ꓟ ꓡꓰꓽ ꓟꓽ ꓞꓲꓺ ꓗ-ꓣ-ꓪ-ꓣꓲ ꓪ ꓚꓲꓺ ꓗꓪ ꓛꓲꓺ ꓢꓲꓺ ꓒ ꓬꓰ-ꓢꓴ ꓐꓰ ꓕꓲ ꓡꓰꓹ ꓔꓬ꓾ ꓢꓲꓺ ꓒ ꓬꓰ-ꓢꓴ ꓐꓰ ꓕꓲ ꓡꓰꓹ ꓫꓸ ꓙꓵꓽ꓾ ꓬꓲ ꓕꓲ ꓤꓶꓻ ꓡꓱꓸꓼ ꓗꓪ ꓪꓴ-ꓢ ꓐꓯ ꓘꓶꓽ ꓔꓯ ꓒꓵꓽ ꓛꓳꓻ ꓗꓳꓸ ꓙꓰꓳ= ꓕꓱ ꓟ ꓠꓬ ꓣꓳ ꓔꓯꓺ ꓢꓳ ꓓꓴ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓠꓬ ꓠꓬꓲꓸ ꓠꓬꓲ ꓠꓬ ꓥꓪ ꓟꓹ ꓟ ꓠꓬ ꓮꓽ ꓟ ꓥ ꓡ ꓐꓯ ꓢꓲ ꓪꓴ-ꓢ ꓐꓯ ꓘꓶꓽ ꓛꓳꓻ ꓢꓴ ꓥ ꓕ ꓑꓳꓸꓼ ꓠꓬ ꓥꓪ ꓮ ꓟ ꓥꓳ= ꓥꓪ ꓬꓲꓼ ꓥꓳ꓾ ꓥꓪ ꓠꓬꓲ ꓥꓳ꓾ ꓐꓯ ꓡꓳ= ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓣꓳ ꓔꓯ ꓟꓳꓸ ꓖꓶ ꓡ ꓟ ꓠꓬ ꓣꓳ ꓠꓬ ꓢꓲꓽ ꓫꓬ ꓟ-ꓡꓲ-ꓬ ꓔꓯ ꓔꓯꓺ ꓢꓳꓻ ꓠ ꓗꓹ ꓡꓳ꓾ ꓐꓯ ꓟ ꓬꓲ ꓪꓴꓸ ꓕꓲ ꓚꓱꓹ ꓣꓳ ꓔꓯ ꓐꓯ ꓟꓳꓸ ꓖꓶ ꓡˍ ꓡꓳ= ꓢꓲꓽ ꓫꓬ ꓟ-ꓡꓲ-ꓬ ꓠꓬ ꓙ ꓣꓳˍ ꓟ꓾ ꓠꓲꓹ ꓗꓴ ꓟꓬ ꓗꓴ ꓖꓶ ꓗꓴꓸˍ ꓟ꓾ ꓢꓴ ꓔꓯ ꓫꓱꓸ ꓤ ꓗꓴꓸˍ ꓟ꓾ ꓠꓲꓹ ꓠꓵ ꓗꓴꓸˍ ꓟ꓾ ꓪꓴ-ꓢ ꓔꓯ ꓙꓳꓺ ꓒꓵꓽ ꓗꓴꓸˍ ꓟ꓾ ꓕꓱ ꓡꓰ ꓙꓲˍ ꓟ ꓮ ꓙꓵꓽ ꓬꓲ ꓡꓰ ꓣꓳ ꓔꓯ ꓟꓳꓸ ꓖꓶ ꓔꓲꓸ ꓗꓷꓳ=

ꓣꓳ ꓠꓬ ꓪꓴ-ꓢ ꓔꓯ ꓒꓵꓽ ꓛꓳˍ ꓕꓯ ꓢꓲꓽ ꓫꓬ ꓟ-ꓡꓲ-ꓬ ꓠꓬ ꓣꓳ ꓟꓹ ꓟ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓟꓹ ꓟ ꓠꓬ ꓣꓳ ꓟꓹ ꓟ ꓒꓬꓱꓼ ꓡˍ ꓡꓳ= ꓕꓱ ꓟ ꓡꓰꓽ ꓟꓽ ꓞꓲꓺ ꓣꓳ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓬꓲ ꓬꓲꓼ ꓬꓲ ꓠꓬꓲ ꓥ ꓡꓳ= ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓟꓴꓽ ꓗꓪ ꓐꓰ ꓟꓲ ꓠꓯ ꓚꓰꓼ ꓢꓴ ꓠꓬ ꓣꓳ ꓮ ꓪꓴꓸ꓾ ꓣꓳ ꓗꓳꓸ ꓗꓳ ꓒꓬꓱꓼ ꓡ ꓕꓯ ꓠꓽ ꓣꓳꓽ ꓠꓬ ꓮ ꓫꓵꓽ ꓔꓯ ꓙꓳꓺ ꓓꓴ ꓙꓳˍ ꓢꓰꓽ ꓡ? ꓖꓳ ꓡꓱ ꓠꓬꓲ ꓣꓳ ꓢꓯꓼ ꓪ ꓣꓴ ꓓꓴ ꓬꓰ ꓡꓯ=

ꓢꓲꓺ ꓒ ꓬꓰ-ꓢꓴ ꓐꓯ ꓟ ꓡꓰ ꓟꓴꓽ ꓗꓪ ꓖꓴꓽ ꓙꓴꓽ ꓧꓶꓸ ꓔꓯ ꓧꓪ= ꓤꓰꓻ ꓞꓹ ꓟ ꓮ ꓙꓵꓽ ꓠꓴ ꓪ ꓔꓯ ꓖꓶ ꓡˍ ꓥꓳ꓾ ꓐꓰ ꓐꓯ ꓔ ꓟˍ ꓡꓰ ꓐꓰ ꓣꓳ ꓠꓬ ꓪꓴ-ꓢ ꓐꓯ ꓘꓶꓽ ꓔꓯ ꓛꓳˍ ꓕꓯ꓾ ꓪꓴ-ꓢ ꓠꓲꓹ ꓡꓶꓽ ꓔꓯ ꓠ ꓡꓳꓸˍ ꓕꓯ ꓙꓲˍ ꓟ ꓬꓰˍ ꓕꓯ ꓟꓴꓽ ꓗꓪ ꓖꓴꓽ ꓙꓴꓽ ꓔꓯ ꓧꓪ ꓔꓬ ꓟ ꓡꓰ ꓥꓳ= ꓖꓳ ꓡꓱ ꓠꓬꓲ ꓮ ꓫꓵꓽ ꓟꓲ ꓬꓰ ꓐ ꓡ ꓢꓴ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓗꓳꓸ ꓗꓳ ꓒꓬꓱꓼ ꓡ ꓕꓯ ꓣꓳ ꓮ ꓪꓴꓸ ꓒꓬꓱꓼ ꓡ ꓕꓯ ꓮ ꓫꓵꓽ ꓔꓯˍ ꓟꓲ ꓧꓪꓸ ꓡꓰˍ ꓟ ꓣꓱꓽ ꓛꓰꓽ ꓟꓶˍ ꓥꓳ= ꓢꓲꓽ ꓫꓬ ꓟ-ꓡꓲ-ꓬ ꓥˍ ꓟꓲ ꓣꓳ ꓔꓯ ꓪ ꓜꓲ ꓠꓲꓹ ꓠꓵ ꓢꓲ ꓠꓬꓲ ꓣꓳ ꓐꓱ ꓶ ꓪ ꓜꓲ ꓪꓽ ꓘꓴ ꓙ ꓐ ꓡˍ ꓥꓳ=

ꓢꓲꓽ ꓫꓬ ꓕꓳ ꓶꓽ ꓗꓪ ꓙꓳˍ ꓟ ꓡꓰ ꓐꓰ ꓠꓴ ꓠꓬ ꓪꓴ-ꓢ ꓔꓯ ꓟꓳꓸ ꓛꓲ ꓦꓽ ꓕꓲ ꓦꓽ ꓦꓽˍ ꓠꓬ꓾ ꓪꓴ-ꓢ ꓠꓬ ꓠꓴ ꓔꓯ ꓛꓲꓺ ꓡ ꓠꓹ ꓟ ꓞꓲꓺ ꓦꓽ ꓦꓽˍ ꓥꓳ ꓐꓰ ꓐꓯ ꓟ ꓡꓰ ꓐꓰ ꓣꓳ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓪꓴ-ꓢ ꓐꓰ ꓠꓶꓽ ꓡꓯ ꓘꓳ ꓠꓹ ꓟ꓾ ꓪꓴ-ꓢ ꓐꓯ ꓘꓶꓽ ꓔꓯ ꓠꓲꓹ ꓟ ꓒꓴ ꓢꓲ ꓠꓬꓲ ꓢꓯꓼ ꓕꓵꓼ ꓙꓰˍ ꓕꓯ ꓠꓽ ꓣꓳ ꓠꓬ ꓠꓲꓹ ꓟ ꓠꓯꓸꓼ ꓗꓪ ꓗꓹ ꓛꓲꓽˍ ꓟ ꓐꓰ ꓕꓲ ꓞꓲꓼ ꓕꓲ ꓑ ꓢꓲꓺ ꓡꓲ ꓟ ꓢꓯꓼ ꓟꓬ ꓘꓳꓹ ꓣꓴ ꓒꓵꓽˍ ꓟ ꓤ ꓮ ꓟꓲꓽ ꓐꓴ ꓒꓬꓱꓼ ꓡˍ ꓥꓳ꓾ ꓐꓯ ꓟ ꓣꓳ ꓔꓯ ꓟꓸ ꓖꓶ ꓡ ꓔꓬ ꓟ ꓥ ꓡꓳ=