ꓔ ꓟꓼ ꓩꓴꓸ ꓓꓲꓻ ꓢꓴ ꓔꓯ ꓫꓬꓹ ꓓꓻ ꓡꓰ ꓟ

ꓟ-ꓘꓳ 1:40-45

ꓟꓹ ꓟ ꓕꓲ ꓣꓳ ꓡꓰ ꓬꓲ ꓮ ꓐꓲ ꓤ ꓔꓯ ꓬꓲ ꓔꓬ ꓗꓪ ꓡ ꓠꓹ ꓟ꓾ ꓛꓲ ꓦꓽ ꓕꓲ ꓦꓽ ꓡꓰ ꓕꓲ ꓦꓽ ꓔꓼ ꓝꓲ ꓙꓳ ꓙꓳ ꓡꓰꓽ꓾ ꓟꓽ ꓙꓳꓺ ꓙꓳꓺ ꓦꓽ ꓠꓹ ꓟ ꓢꓯꓼ ꓖꓶꓽ ꓢꓲ ꓘꓴꓻ ꓔꓬ ꓟˍ ꓡꓰ ꓐꓰ ꓢꓲꓺ ꓒ ꓬꓰ-ꓢꓴ ꓥˍ ꓟꓲ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓬꓲ ꓔꓬꓹ ꓗꓪ ꓡ ꓠꓹ ꓟ ꓘꓴꓻ ꓔꓬ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓣꓳ ꓐꓴ ꓠꓬ ꓬꓲ ꓪꓴꓸ ꓟ ꓛꓲ ꓦꓽ ꓕꓲ ꓦꓽ ꓦꓽ ꓢꓲ ꓢꓲꓺ ꓒ ꓔꓬ ꓗꓪ ꓛꓲꓺ ꓬꓰ ꓠ ꓙ ꓫꓱꓽ ꓠꓹ ꓟ ꓙꓳꓺ ꓔꓬ ꓢꓲ ꓠꓬꓲ꓾ ꓚꓲꓸ ꓛꓬ ꓦꓰꓼ ꓔ ꓟ ꓗꓪ ꓡꓰꓽ ꓕꓶꓺ ꓕꓶꓺ ꓡꓰꓽ ꓦꓰꓼ ꓔꓬ꓾ ꓠꓽ ꓔꓬ ꓖꓴˍ ꓡꓳ=

ꓣꓳ ꓐꓴ ꓠꓬ ꓐꓲꓻ ꓜꓲꓼˍ ꓟ ꓟꓶ ꓠꓹ ꓟ ꓐꓱ ꓶ ꓫꓸ ꓙꓵ ꓓꓴ ꓠꓻ ꓓꓴ ꓗꓪ ꓐꓰ ꓓꓻ ꓡꓰ ꓠꓲꓹ ꓫꓵˍ ꓡꓳ꓾ ꓠꓲꓹ ꓟ ꓢ ꓠꓲꓹ ꓫꓵˍ ꓡꓳ ꓐꓰ ꓐꓯ ꓔꓬ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓔꓯ ꓓꓰꓽˍ ꓟ ꓔꓯ ꓠꓬ ꓟꓽ ꓬꓰ= ꓟꓽ ꓥ ꓠꓬ ꓬꓰ-ꓢꓴ ꓔꓯ ꓓꓰꓽˍ ꓥˍ ꓟꓲ ꓑꓶꓸ ꓑꓶꓸ ꓡꓰꓽ ꓟꓽ ꓓꓰꓽ꓾ ꓮ ꓤ ꓤ ꓐꓰ ꓓꓰꓽ ꓔꓬ ꓢꓲ꓾ ꓓꓰꓽ ꓔ ꓟ ꓐꓲ ꓡˍ ꓕꓯ ꓥˍ ꓟꓲ ꓣꓱꓽ ꓛꓰꓽ ꓕꓱ ꓟ ꓐꓱ ꓶ ꓢꓲ ꓒ ꓬꓰ-ꓢꓴ ꓮ ꓡꓰ ꓬꓰ ꓡˍ ꓥ ꓟꓽ ꓢꓷꓸ ꓐꓰ ꓐꓯ ꓢꓲꓸ ꓙꓳꓺ ꓔꓬ ꓡꓳ=

ꓢꓲꓽ ꓫꓬ ꓕꓳꓽ ꓶ ꓘꓴꓽ ꓗꓪ ꓔꓸ ꓟꓼ ꓩꓴꓸ ꓓꓲꓻ ꓢꓴ ꓡꓰ ꓙꓵꓻ ꓠꓲꓹ ꓒ ꓐꓲꓸ ꓐꓰ ꓓꓰꓽˍ ꓟ “ꓢꓲꓺ ꓒ ꓠꓲꓹ ꓡꓶꓽ ꓙꓳˍ ꓠꓬ ꓓꓻ ꓡꓰ ꓐ ꓡˍ ꓡꓳ” ꓐꓯ ꓟ ꓐꓯ ꓘꓶꓽ ꓡꓰ ꓐꓰ ꓣꓳ ꓐꓴ ꓕꓲ ꓣꓳ ꓡꓰ ꓕꓲ ꓣꓳ ꓥˍ ꓟꓲ ꓙꓵꓻ ꓠꓲꓹ ꓒ ꓐꓲꓸ ꓐꓰ ꓢꓲꓺ ꓒ ꓬꓰ-ꓢꓴ ꓔꓯ ꓠꓶꓽ ꓙꓰ ꓠꓹ ꓟ ꓢꓯꓼ ꓕꓵ ꓼ ꓡꓯ=

ꓢꓲꓺ ꓒ ꓬꓰ-ꓢꓴ ꓬꓲ ꓠꓻ ꓫꓬꓹ ꓖꓶˍ ꓟ ꓣꓱꓽ ꓛꓰꓽ ꓔꓯ ꓘꓳꓹ ꓣꓴ ꓢꓲ ꓐꓲꓻ ꓜꓲꓼˍ ꓟ ꓤꓶꓻ ꓗꓪ ꓢꓲꓺ ꓒ ꓬꓰ-ꓢꓴ ꓐꓰ ꓕꓲ ꓪꓽ ꓙ ꓫꓱꓽ ꓙꓰ ꓐ ꓡ ꓠꓹ ꓟ ꓢꓯꓼ ꓕꓵꓼ ꓢꓲ ꓢꓯꓸ ꓔꓬ ꓓꓴ ꓬꓰ ꓡꓯ=