ꓙꓰ-ꓣꓴ ꓡꓰ ꓬꓰ-ꓢꓴ ꓔꓯ ꓘꓴˍ ꓟ

Tuesday, January 31, 2023

ꓫꓵꓽ ꓜꓲ ꓓꓳ ꓠꓻ ꓙꓳ ꓢꓴ ꓤ ꓟꓶ ꓤ ꓠꓬ ꓮ ꓟꓬꓹ ꓘꓳꓼ ꓛꓲꓺ ꓠꓻ ꓫꓬꓹ ꓗꓷˍ ꓟꓲ ꓒꓴ ꓖꓴ ꓢꓲ ꓡ ꓞꓳ ꓪꓴꓽ ꓧꓶˍ ꓟ ꓚꓳꓸ ꓗꓳꓸ ꓙꓰ ꓠꓬ ꓬꓲ ꓠꓻ ꓠꓽ ꓟꓽ ꓓ ꓡꓰ= ꓫꓬꓹ ꓓꓻ ꓡꓰˍ ꓟ ꓠꓯꓻ ꓞꓲꓼ ꓟꓽ ꓙꓳ ꓟ ꓠꓬ ꓠꓲꓹ ꓟ ꓙꓬ ꓡꓰ ꓓꓴ ꓕꓲ ꓫꓵꓽ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓬꓲ ꓓꓵꓽ ꓙ ꓟꓶ ꓓꓴ ꓬꓰˍ ꓟ ꓔꓯ ꓑ ꓙ ꓡꓰ ꓢꓲ ꓙꓵꓻ ꓡ ꓕꓯ ꓢꓲꓺ ꓒ ꓬꓲ ꓠꓻ ꓫꓬꓹ ꓖꓶˍ ꓟ ꓣꓱꓽ ꓛꓰꓽ ꓔꓯ ꓥꓳ ꓡꓳꓸ ꓢꓲ ꓡꓳꓸ ꓠꓬꓹ ꓔꓬ ꓗꓷꓳ= ꓢꓲꓺ ꓒ ꓔꓬ ꓗꓪ ꓠꓻ ꓫꓬꓹ ꓪ ꓡꓰ ꓠꓹ ꓟ ꓦꓴꓻ ꓠꓬꓹ ꓗꓷꓳ= ꓠꓻ ꓢꓴ ꓮ ꓟꓬꓹ ꓠꓬ ꓬꓰ-ꓢꓴ ꓔꓯ ꓕꓲꓺ ꓪ ꓡꓰ ꓠꓹ ꓟ ꓑꓵ ꓔꓬ ꓖꓴˍ ꓕꓯ ꓤ ꓟꓶ ꓤ ꓕꓱ ꓕꓲ ꓣꓳ ꓐꓱ ꓶ ꓞꓳ ꓜꓴ ꓓꓽ ꓟ ꓔꓯ ꓗꓳꓸ ꓙꓰ ꓢꓲ ꓬꓰ-ꓢꓴ ꓔꓬ ꓗꓪ ꓛꓲ ꓬꓰ ꓠꓹ ꓟ ꓤ ꓟꓶ ꓤ ꓥ ꓟ ꓬꓲ ꓐꓱ ꓶ ꓮ ꓘꓶꓸ ꓫꓸ ꓟ ꓥ ꓡꓳ= ꓬꓲ ꓓꓽ ꓟ ꓙꓵꓻ ꓢꓲ ꓥꓳ ꓡꓳꓸ ꓔ ꓟ ꓠꓬ ꓬꓰ ꓫꓸ ꓓꓴ ꓮ ꓙꓵꓽ ꓔꓯ ꓧꓪꓸ ꓡꓰ ꓐ ꓡ ꓗꓷꓳ=

ꓠꓬꓲꓸ ꓠꓬꓲ ꓗꓪ ꓣꓳ ꓐꓴ ꓠꓬ ꓞꓳ ꓤ ꓮ ꓟꓬꓹ ꓟ ꓟꓲ ꓙꓬ ꓗꓪ ꓑꓵ ꓟꓽ ꓛꓵ ꓛꓵ ꓢꓲꓽ ꓫꓬ ꓖꓳ ꓓꓱꓽ ꓢ-ꓗ-ꓣ-ꓟꓰ-ꓔꓴ ꓔꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓘꓳꓹ ꓣꓴ ꓪ ꓡꓰꓳ= ꓫꓵꓽ ꓜꓲ ꓓꓳ ꓠꓻ ꓙꓳˍ ꓟ ꓤ ꓟꓶ ꓤ ꓡꓰ ꓐꓰ ꓙꓵꓻ ꓠꓲꓹ ꓕꓶꓺ ꓞꓹ ꓕꓯ ꓠꓽ ꓪꓴ-ꓢ ꓬꓲ ꓢꓷꓸ ꓡꓰ ꓓꓴ ꓐꓴ ꓔꓯˍ ꓟꓲ ꓣꓳ ꓐꓴ ꓒꓬꓱꓽ ꓔꓳꓹ ꓟꓬ ꓔꓳꓹ ꓟꓳꓻ ꓪ ꓐ ꓡˍ ꓟ ꓥ ꓡꓳ=