ꓠꓽ ꓦꓬꓼ ꓠꓬꓲ ꓔꓯ ꓟꓳꓸ ꓟꓸ ꓖꓶˍ ꓟ

ꓣꓳ ꓟꓲ ꓠꓯ ꓞꓳ ꓤ ꓞꓳ ꓡꓲꓽ ꓪ ꓚꓱꓹ ꓗꓪ ꓣꓳ ꓓꓵꓽ ꓙ ꓚꓱꓹ꓾ ꓥ ꓠꓬ꓾ ꓫꓸ ꓚꓱꓹ ꓕꓲꓽ ꓟ ꓟ ꓠꓬ ꓞ ꓓꓹ ꓡꓳ= ꓓꓵꓽ ꓙˍ ꓟ ꓟꓽ ꓔꓱꓹ ꓡꓳ꓾ ꓐꓰ ꓣꓳ ꓐꓯ ꓓꓹ ꓡꓳ= ꓕꓱ ꓟ ꓮ ꓫꓵꓽ ꓥ ꓡ ꓐꓯ ꓠꓬ ꓣꓳ ꓟꓲ ꓠꓯ ꓞꓳ ꓤ ꓡꓰ ꓫꓬꓹ ꓔꓶ ꓔ ꓟ ꓡꓲꓽ ꓒꓰꓼ꓾ ꓥ ꓠꓬ꓾ ꓗꓸ ꓚꓵ ꓾ ꓥ ꓠꓬ꓾ ꓞꓳ ꓡꓲꓽ ꓪ ꓚꓱꓹ ꓮ ꓙꓵꓽ ꓠꓬ ꓞꓳ ꓤ ꓐꓱ ꓶ ꓟꓽ ꓥ ꓥ꓾ ꓞꓳ ꓤ ꓠꓬ ꓕꓱ ꓟ ꓡꓲꓽ ꓒꓰꓼ ꓐꓱ ꓶ꓾ ꓗꓸ ꓚꓵ ꓐꓱ ꓶ ꓐꓰ ꓞꓳ ꓡꓲꓽ ꓪ ꓚꓱꓹ ꓐꓱ ꓶ ꓕꓱ ꓡꓱ ꓓꓵꓽ ꓙ ꓗꓴꓸˍ ꓡꓳ=

ꓣꓳ ꓕꓲ ꓙꓰꓽ ꓙꓰꓽ ꓬꓰˍ ꓐꓰ ꓫꓬꓹ ꓔꓶ ꓔ ꓟ ꓗ ꓫꓵ ꓕꓱ ꓟ ꓙꓳˍ ꓠꓬ ꓮ ꓫꓵꓽ ꓑꓶꓸ ꓓꓴ ꓕꓱ ꓟ ꓬꓰ ꓠꓯꓹ ꓡ ꓐꓰ ꓟꓽ ꓐꓯ ꓟꓸ ꓖꓶꓽ ꓖꓶꓽ ꓐꓰ ꓕꓱ ꓟ ꓬꓰ꓾ ꓖꓳ ꓟ ꓬꓰ ꓕꓰ ꓡꓰ ꓐꓯ ꓢꓲ ꓫꓬ ꓔꓶ ꓔ ꓟ ꓮ ꓟꓬꓹ ꓙꓳˍ ꓡꓳ= ꓮ ꓫꓵꓽ ꓑꓶꓸ ꓓꓴ ꓕꓰ ꓡꓰ ꓬꓰ ꓠꓯꓹ ꓡ꓾ ꓮ ꓫꓵꓽ ꓑꓶꓸ ꓓꓴ ꓕꓱ ꓟ ꓔꓯ ꓖꓼ ꓛꓳ ꓠꓯꓹ ꓡ ꓐꓯ ꓟ ꓔꓯ ꓟꓽ ꓐꓯ ꓟꓸ ꓖꓶ ꓖꓶ ꓕꓰ ꓡꓰ ꓬꓰ ꓟꓽ ꓓ꓾ ꓖꓳ ꓡꓰ ꓬꓰ ꓟꓽ ꓓ ꓐꓰ ꓫꓬꓹ ꓔꓶ ꓔ ꓫꓵꓽ ꓮ ꓟꓬꓹ ꓙꓳˍ ꓡꓳ=

ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓣꓳ ꓔꓯ ꓕꓰ ꓡꓰ ꓐꓯ ꓒꓬꓱ ꓖꓶ ꓡ ꓔꓬ ꓡꓳ= ꓮ ꓫꓵꓽ ꓥ ꓐꓯ ꓠꓬ ꓠꓬꓲꓸ ꓠꓬꓲ ꓟꓸ ꓟꓲꓽ ꓑꓷꓠꓽ ꓗꓪ ꓢꓲꓺ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓞꓲꓺ ꓠꓬꓲꓽ ꓣꓳ ꓐꓰ ꓬꓲ ꓠꓬ ꓫꓪ ꓟꓲ ꓗꓪ ꓐꓰ ꓗꓳꓸ ꓙꓰˍ ꓕꓯ ꓬꓲ ꓝꓲ ꓓꓴ ꓞꓲꓺ ꓠꓬꓲꓽ ꓣꓳ ꓟ ꓠꓬ ꓫꓪ ꓞꓷꓹ ꓜꓽˍ ꓟ ꓔꓯ ꓒ-ꓡꓲ-ꓢꓷ-ꓐꓴ ꓟꓳˍ ꓕꓯ ꓬꓲ ꓔꓯ ꓐꓯ ꓗꓸ ꓟ ꓠꓬꓲꓸ ꓠꓬꓲ ꓠꓬ ꓢꓲꓺ ꓒ ꓦꓬꓼ ꓠꓬꓲ ꓥ ꓠꓬꓲ ꓮ ꓫꓵꓽ ꓑꓶꓸ ꓓꓴ ꓕꓰ ꓡꓰ ꓬꓰˍ ꓡ ꓐꓰ ꓢꓲꓺ ꓒ ꓬꓰ-ꓢꓴ ꓔꓯ ꓠꓺ ꓠꓬꓲˍ ꓟ ꓣꓳ ꓑ ꓙꓽˍ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓒꓳꓹ ꓖꓶˍ ꓟ ꓠꓬ ꓞꓳ ꓤ ꓠꓬ ꓢꓲꓺ ꓒ ꓦꓬꓼ ꓠꓬꓲ ꓐꓱ ꓶ ꓟꓽ ꓥ= ꓢꓲꓺ ꓒ ꓦꓬꓼ ꓠꓬꓲ ꓠꓬ ꓞꓳ ꓤ ꓐꓱ ꓶ ꓥ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ=

ꓟꓸ ꓟꓲꓽ ꓕꓱ ꓟ ꓗꓪ ꓐꓰ ꓠꓬꓲꓸ ꓠꓬꓲ ꓣꓳ ꓔꓯ ꓠꓬꓲꓽ ꓫꓵꓽ ꓟꓸ ꓖꓶˍ ꓡ ꓔꓬ ꓡꓳ= ꓕꓲꓽ ꓠꓬ ꓞꓳ ꓤ ꓠꓬ ꓞꓳ ꓡꓲꓽ ꓪ ꓚꓱꓹ ꓥ ꓠꓬ꓾ ꓢꓲꓺ ꓒ ꓦꓬꓼ ꓠꓬꓲ ꓐꓱ ꓶ ꓟꓽ ꓥ= ꓢꓲꓺ ꓒ ꓦꓬꓼ ꓠꓬꓲ ꓠꓬ ꓞꓳ ꓤ ꓐꓱ ꓶ ꓥ ꓡꓳ= ꓡꓲꓽ ꓒꓰꓼ ꓡꓲꓽ ꓚꓱꓹ ꓠꓬ ꓢꓲꓺ ꓒ ꓐꓱ ꓶ ꓟꓽ ꓥ꓾ ꓞꓳ ꓤ ꓐꓱ ꓶꓽˍ ꓡꓰꓽ ꓥ ꓡꓳ= ꓬꓲ ꓡꓰ ꓝꓮꓲ ꓕꓲ ꓫꓵꓽ ꓐꓯ ꓟꓳꓸ ꓖꓶ ꓠꓲꓹ ꓫꓵˍ ꓟ ꓠꓬ ꓬꓲ ꓠꓬ ꓢꓲꓺ ꓒ ꓦꓬꓼ ꓠꓬꓲ ꓬꓲ ꓢꓲꓺ ꓒ ꓥ ꓟ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ=

ꓠ ꓑ ꓕꓲꓽ꓾ ꓣꓳ ꓐꓱ ꓶ ꓢꓲꓺ ꓒ ꓬꓰ-ꓢꓴ ꓡꓰ ꓚꓰ ꓔ ꓟ ꓠꓬ ꓠꓽ ꓦꓬꓼ ꓠꓬꓲ ꓥ ꓡꓳ= ꓣꓳ ꓠꓬ ꓠꓽ ꓦꓬꓼ ꓠꓬꓲ ꓐꓱ ꓶ ꓟꓽ ꓥ= ꓕꓱ ꓟˍ ꓡꓰ ꓐꓰ ꓣꓳ ꓠꓬ ꓟꓲ ꓠꓯ ꓗꓪ ꓛꓳ ꓫꓱꓽ ꓬꓰˍ ꓕꓯ ꓣꓳ ꓫꓬꓹ ꓔꓶ ꓔ ꓟ ꓪꓴ-ꓢ ꓡꓰ ꓫꓬꓹ ꓔꓶ ꓔ ꓟ ꓟꓽ ꓥ ꓥ ꓐꓰ ꓞꓳ ꓤ ꓡꓰ ꓫꓬꓹ ꓔꓶ ꓔ ꓟ ꓗꓺ ꓫꓵ ꓞꓳ ꓡꓲꓽ ꓪ ꓚꓱꓹ ꓠꓬ ꓞꓳ ꓤ ꓐꓱ ꓶ ꓡꓰꓽ ꓥ ꓡꓳ= ꓞꓳ ꓤ ꓠꓬ ꓡꓲꓽ ꓚꓱꓹ꓾ ꓝꓮꓲ ꓞꓳ ꓡꓲꓽ ꓪ ꓚꓱꓹ ꓐꓱ ꓶ ꓟꓽ ꓥ꓾ ꓐꓯ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓟꓸ ꓖꓶ ꓡ ꓔꓬ ꓡꓳ=

ꓣꓳ ꓞꓳ ꓡꓲꓽ ꓪ ꓚꓱꓹ ꓔꓯ ꓟꓳꓸ ꓕꓲ ꓫꓵꓽ ꓫꓵꓽ ꓖꓼ ꓛꓳ ꓙꓰˍ ꓕꓯ ꓮ ꓫꓵꓽ ꓑꓶꓸ ꓓꓴ ꓕꓰ ꓡꓰ ꓫꓬꓹ ꓔꓶ ꓔ ꓡ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓢꓲ ꓬꓲꓸ ꓬꓲ ꓢꓲ ꓙꓳ ꓙꓳ ꓡꓰꓽ ꓬꓰ ꓠꓹ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓟꓳꓸ ꓖꓶ ꓡˍ ꓡꓳ=

ꓝꓮꓲ ꓕꓲ ꓫꓵꓽ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓞꓳ ꓡꓲꓽ ꓪ ꓚꓱꓹ꓾ ꓥ ꓠꓬ꓾ ꓢꓲꓺ ꓒ ꓦꓬꓼ ꓠꓬꓲ ꓬꓲ ꓢꓲꓺ ꓒ ꓥ ꓡꓳ ꓐꓯ ꓟ ꓣꓳ ꓑ ꓙꓽˍ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓠꓬ ꓚꓵꓺ ꓚꓵꓺ ꓪꓴ-ꓢ ꓥꓳ꓾ ꓚꓵ ꓚꓵ ꓣꓳ ꓢꓲꓺ ꓒ ꓥꓳ= ꓠꓬꓲꓸ ꓠꓬꓲ ꓟꓸ ꓟꓲꓽ ꓬꓲ ꓪꓴꓸ ꓕꓲ ꓝꓲꓸ ꓗꓪ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓟꓷ-ꓚꓲ-ꓫꓷ-ꓔꓷ ꓐꓯˍ ꓟ ꓔꓲꓺ ꓒ ꓕꓲ ꓞꓲꓼ ꓕꓲ ꓑ ꓔꓲꓺ ꓒ ꓥ ꓟ ꓣꓳ ꓟꓳꓻ ꓪ ꓓꓹ ꓡꓳ=

ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓐꓰ ꓕꓲ ꓡꓰꓹ ꓔꓬ ꓢꓲ ꓣꓳ ꓐꓱ ꓶ ꓛꓴ ꓔꓲ ꓔꓬ ꓟ ꓮ ꓣꓳ ꓤˍ ꓟꓲ ꓥ ꓡꓳ= ꓔꓲꓺ ꓒ ꓓꓽ ꓟˍ ꓟꓲ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓬ ꓠꓽ ꓦꓬꓼ ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓪꓽ ꓘꓴˍ ꓐꓯ ꓟ ꓠꓬ ꓢꓲꓺ ꓒ ꓐꓱ ꓶꓽˍ ꓡꓰꓽ ꓥ ꓢꓲ ꓢꓲꓺ ꓒ ꓠꓬ ꓣꓳ ꓐꓱ ꓶ ꓥ ꓡꓳ꓾ ꓐꓯ ꓟ ꓓꓵꓽ ꓙ ꓠꓹ ꓟ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓣꓳ ꓔꓯ ꓟꓳꓸ ꓖꓶ ꓡˍ ꓟ ꓥ ꓡꓳ=