ꓙꓱ-ꓣꓴ-ꓢ-ꓡꓱ ꓐꓱ ꓶ ꓬꓰ-ꓢꓴ ꓠꓲꓹ ꓟ ꓫꓸˍ ꓟ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓙꓱ-ꓣꓴ-ꓢ-ꓡꓱ ꓗꓪ ꓟ ꓤ ꓫꓵꓸ ꓤ ꓠꓱ ꓐꓴ ꓔꓯ ꓬꓲ ꓕꓱ ꓡꓱ ꓐꓯ ꓡꓳ= ꓮ ꓭꓸ ꓟ ꓡꓰ ꓬꓲ ꓤ ꓫꓵꓸ ꓤ ꓠꓱ ꓐꓴ ꓔꓯ ꓬꓲ ꓓꓵ ꓡꓯꓼ ꓠꓯꓸꓼ ꓗꓪ ꓟꓵꓸ ꓖꓶˍ ꓟ ꓪꓸ ꓔ ꓖꓶˍ ꓟ ꓕꓲ ꓡꓰꓹ ꓢꓲꓺ ꓒ ꓬꓰ-ꓢꓴ ꓥˍ ꓟꓲ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓟ ꓤ ꓫꓵꓸ ꓤ ꓠꓱ ꓐꓴ ꓔꓯ ꓘꓴ ꓜꓲꓼ ꓡ ꓠꓲꓹ ꓫꓵˍ ꓡꓳ= ꓕꓱ ꓡꓱ ꓘꓴ ꓜꓲꓼ ꓡ ꓠꓲꓹ ꓫꓵˍ ꓥˍ ꓟꓲ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓟ ꓤ ꓠꓱ ꓐꓴ ꓠꓬ ꓬꓲ ꓔꓯ ꓡ ꓟꓽ ꓫꓳ= ꓬꓲ ꓔꓬꓹ ꓗꓪ ꓟꓽ ꓡ ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓬꓲ ꓔꓬꓹ ꓗꓪ ꓡ ꓠꓹ ꓟ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ= ꓬꓲ ꓡꓰ ꓮ ꓡꓰ ꓘꓶ ꓛꓲ ꓫꓸ ꓙꓵ ꓢꓲ ꓠꓬꓲ ꓣꓳ ꓔꓬ ꓗꓪ ꓡˍ ꓡ ꓐꓯ ꓠꓬ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓒ-ꓡꓲ-ꓢꓷ ꓐꓴ ꓡꓰ ꓬꓲ ꓔꓯ ꓠꓴ ꓔꓯ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓓꓳ ꓙꓰ ꓝꓲ ꓠꓲꓹ ꓫꓵˍ ꓡꓳ= ꓮ ꓡꓲꓳ ꓐꓯ ꓠꓬ ꓩꓴ-ꓡꓲ ꓡꓰ ꓠꓴ ꓔꓯ ꓢꓰꓼ ꓗꓷ ꓠꓲꓹ ꓫꓵˍ ꓡꓳ꓾ ꓐꓰ ꓢꓲꓺ ꓒ ꓬꓰ-ꓢꓴ ꓔꓯ ꓐꓯ ꓚꓳꓹ ꓖꓶˍ ꓡꓳ= ꓙꓳꓺ ꓗꓽ ꓖꓶˍ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓔꓯ ꓒ-ꓡꓲ-ꓢꓷ ꓐꓴ ꓡꓰ ꓕꓰ ꓡꓰ ꓐꓯ ꓚꓳ ꓖꓶ ꓔꓬ ꓥˍ ꓟꓲ ꓗꓸ ꓧꓪ ꓔꓬ ꓥˍ ꓟꓲ꓾ ꓢꓲ ꓒ ꓬꓰ-ꓢꓴ ꓔꓯ ꓢꓰꓼ ꓗꓷˍ ꓥꓳ꓾ ꓐꓰ ꓒ-ꓡꓲ-ꓢꓷ ꓐꓴ ꓡꓰ ꓕꓰ ꓡꓰ ꓐꓯ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓒ-ꓡꓲ-ꓢꓷ ꓐꓴ ꓔꓯ ꓕꓱ ꓡꓱ ꓒꓳꓹ ꓖꓶˍ ꓡꓳ= ꓥꓪ ꓠꓬ ꓠꓬꓲꓸ ꓠꓬꓲ ꓢ ꓠꓯ ꓐꓰ ꓪꓻ ꓠꓬꓲ ꓮ ꓕꓯ ꓥˍ ꓟꓲ ꓐꓹ ꓐ ꓟꓬꓱꓺ ꓓꓳꓽ ꓔꓯ ꓛꓵ ꓔꓴ ꓠꓹ ꓟ꓾ ꓥꓪ ꓟꓬꓱꓽ ꓔꓯ ꓬꓰ ꓓꓳ ꓡꓰ ꓠꓹ ꓟ ꓥꓪ ꓡ ꓟ ꓥ ꓡꓳ꓾ ꓐꓰ ꓒ-ꓡꓲ-ꓢꓷ ꓐꓴ ꓔꓯ ꓕꓰ ꓡꓰ ꓒꓳꓹ ꓖꓶˍ ꓡꓳ=

ꓕꓱ ꓟ ꓡꓰꓽ ꓟꓽ ꓞꓲꓺ ꓾ ꓙꓰ꓾ ꓩꓴ-ꓡꓲ ꓔꓯ ꓕꓱ ꓡꓱ ꓐꓯ ꓖꓶ꓾ ꓥꓪ ꓠꓬ ꓠꓲꓽ ꓔꓯ ꓖꓼ ꓓꓳ ꓩꓴ ꓗꓷˍ ꓥꓳ= ꓠꓻ ꓢꓴ ꓔꓯ ꓥˍ ꓟꓲ ꓠꓻ ꓫꓬꓹ ꓖꓶˍ ꓥꓳ= ꓥꓪ ꓟꓬꓱꓽ ꓬꓰ ꓓꓳ ꓡꓰ ꓠꓹ ꓟ ꓥꓪ ꓡ ꓟ ꓥ ꓡꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓒ-ꓡꓲ-ꓢꓷ ꓐꓴ ꓔꓯ ꓐꓯ ꓟꓳꓸ ꓖꓶˍ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓗꓪ ꓡꓳꓸ ꓠꓬꓲˍ ꓕꓯ ꓠꓽ ꓢꓲ ꓒ ꓬꓰ-ꓢꓴ ꓔꓯ ꓬꓲ ꓔꓯ ꓢꓰꓼ ꓗꓷˍ ꓐꓰ ꓐꓯ ꓔꓬ ꓥˍ ꓟꓲ꓾ ꓮ ꓡꓰ ꓐꓰ ꓘꓶ ꓙꓵ ꓡˍ ꓥꓳ ꓐꓰ ꓐꓯ ꓔꓬ ꓥ ꓟꓲ ꓬꓲ ꓠꓽ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓟ ꓤ ꓫꓵꓸ ꓤ ꓠꓱ ꓐꓴ ꓐꓱ ꓶ꓾ ꓥ ꓠꓬ꓾ ꓣꓳ ꓟꓲ ꓠꓯ ꓞꓳ ꓤ ꓐꓱ ꓶ ꓬꓰ ꓓꓳ ꓡꓰˍ ꓗꓪ ꓛꓲ ꓣꓳ ꓐꓰ ꓕꓲ ꓡꓰꓹ ꓔ ꓔꓬ ꓠꓹ ꓟ ꓬꓲ ꓔꓯ ꓮ ꓫꓵꓽ ꓟꓲ ꓗꓽ ꓔ ꓟꓽ ꓐ ꓡ ꓟ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ= ꓟꓲ ꓠꓯꓽ ꓙꓵꓽ ꓪ꓾ ꓟꓽ ꓙꓲꓻ ꓟ ꓤꓹ ꓠꓬꓲ ꓫꓵꓽ ꓠꓬꓲ ꓓꓴ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓧꓪꓸ ꓡꓰ ꓟꓽ ꓘꓴ ꓟ ꓔꓯ ꓥˍ ꓟꓲ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ= ꓠꓲ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓔꓯ ꓕꓱ ꓘꓶ ꓛꓲ ꓢꓰꓼ ꓗꓷˍ ꓐꓰ ꓐꓯ ꓔꓬ ꓥˍ ꓟꓲ꓾ ꓬꓲ ꓔꓯ ꓗꓸ ꓧꓪ ꓡ ꓔꓬ ꓥˍ ꓟꓲ꓾ ꓬꓲ ꓫ ꓙꓵˍ ꓟ ꓔꓯ ꓬꓲ ꓢꓷꓸ ꓔ ꓥˍ ꓟꓲ꓾ ꓕꓲ ꓠꓬꓲ ꓙꓳˍ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓢꓯꓼ ꓟꓬ ꓖꓶ ꓗꓷ ꓪˍ ꓥꓳ꓾ ꓐꓰ ꓢꓷꓸ ꓔ ꓥ ꓟꓲ ꓣꓳ ꓔꓯ ꓠꓲꓹ ꓠꓵˍ ꓟ ꓑꓶꓸ ꓓꓴ ꓬꓲ ꓣꓳ ꓐꓰ ꓶꓽ ꓤ ꓟꓽ ꓗꓷ ꓡꓰ= ꓣꓳ ꓐꓰ ꓶꓽ ꓤ ꓟꓽ ꓙꓰ= ꓣꓳ ꓐꓰ ꓒ ꓕꓲ ꓔꓬ ꓢꓲ ꓠꓬꓲ ꓮ ꓭꓸ ꓟ ꓡꓰ ꓬꓲ ꓤ ꓠꓱ ꓐꓴ ꓔꓯ ꓓꓵ ꓡꓯꓼ ꓠꓯꓸꓼ ꓗꓪ ꓟꓵꓸ ꓖꓶ ꓪꓸ ꓔ ꓖꓶ ꓠꓲꓹ ꓫꓵˍ ꓟ ꓕꓲ ꓡꓰꓹ ꓬꓲ ꓠꓵꓻ ꓠꓲꓹ ꓠꓬ ꓣꓳ ꓕꓯꓽ ꓢꓲ ꓗꓪ ꓕꓱ ꓘꓶ ꓛꓲ ꓪꓴꓽ ꓓꓰˍ ꓡꓳ꓾ ꓐꓯ ꓟ ꓔꓯ ꓣꓳ ꓢꓷꓸ ꓠ ꓗꓹ ꓡꓳ=

ꓖꓳ ꓡꓱ ꓐꓯ ꓥˍ ꓟꓲ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓰ-ꓣꓴ-ꓢ-ꓡꓱ ꓗꓪ ꓔꓬ ꓟ ꓤ ꓫꓵꓸ ꓤ ꓠꓱ ꓐꓴ ꓠꓬ ꓬꓲ ꓠꓵꓻ ꓠꓲꓹ ꓠꓯꓸꓼ ꓗꓪ ꓔꓬ ꓠꓲꓹ ꓟꓽ ꓫꓵ ꓐꓯ ꓘꓶꓽ ꓔꓯ ꓟꓽ ꓠ ꓠꓹ= ꓕꓱ ꓟ ꓕꓲ ꓡꓰꓹ ꓐꓰ ꓠꓬꓲꓸ ꓠꓬꓲ ꓣꓳ ꓥˍ ꓟꓲ ꓢꓲ ꓒ ꓬꓰ-ꓢꓴ ꓐꓯ ꓘꓶꓽ ꓔꓯ ꓣꓳꓽ ꓕꓲ ꓖ ꓕꓲ ꓧꓪꓹ ꓠꓬ ꓠ ꓠꓹ ꓠꓲꓹ ꓟꓽ ꓫꓵ= ꓢꓲ ꓒ ꓬꓰ-ꓢꓴ ꓐꓯ ꓔ ꓟ ꓐꓯ ꓘꓶꓽ ꓔꓯ ꓣꓳꓽ ꓟꓽ ꓛꓳ ꓫꓱꓽ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓕꓱ ꓡꓱ ꓐꓯ ꓟꓳꓸ ꓖꓶˍ ꓡꓳ= ꓠꓴꓻ ꓥꓪ ꓠꓵꓻ ꓠꓲꓹ ꓠꓯꓸꓼ ꓗꓪ ꓔꓬ꓾ ꓖꓳ ꓡꓱ ꓥˍ ꓟꓲ ꓥꓪ ꓠꓴ ꓔꓯ ꓟꓽ ꓓ ꓟꓽ ꓞꓽ ꓔꓬ ꓐꓰ ꓥꓪ ꓠꓴ ꓔꓯ ꓟꓽ ꓐꓯ= ꓠꓴ ꓔꓬ ꓠꓲꓹ ꓫꓵˍ ꓠꓬ ꓔꓬ ꓡꓯ= ꓔꓬ ꓠꓲꓹ ꓟꓽ ꓫꓵ ꓥˍ ꓟꓲ ꓠꓴ ꓙꓰˍ ꓥˍ ꓟꓲ ꓥꓪ ꓮ ꓡꓰ ꓐꓯ ꓟꓽ ꓐ ꓡ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓐꓯ ꓔꓬ ꓡꓳ=

ꓕꓱ ꓟ ꓡꓰꓽ ꓟꓽ ꓞꓲꓺ ꓣꓳ ꓬꓲ ꓠꓵꓻ ꓠꓲꓹ ꓠꓯꓸꓼ ꓗꓪ ꓟꓽ ꓔꓬ ꓟ ꓑꓶꓸ ꓓꓴ ꓠꓬꓲ ꓣꓳ ꓶꓽ ꓤ ꓗꓪ ꓙꓰˍ ꓕꓯ꓾ ꓣꓳ ꓛꓲ ꓕꓲꓽ ꓗꓷˍ ꓕꓯ ꓬꓲ ꓠꓲꓹ ꓟ ꓠꓯꓸꓼ ꓠꓻˍ ꓡꓳ= ꓣꓳ ꓐꓱꓽ ꓙꓰ ꓡꓱꓸ ꓙꓰˍ ꓕꓯ ꓠꓽ ꓬꓲ ꓠꓲꓹ ꓟ ꓗꓪ ꓗꓸ ꓠꓻˍ ꓡꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓔꓯ ꓬꓲ ꓠꓵꓻ ꓠꓲꓹ ꓕꓱ ꓘꓶ ꓛꓲ ꓪꓴꓽ ꓓꓰˍ ꓟ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓦ ꓢꓯꓼ ꓪ ꓖꓶ ꓡ ꓔꓬ ꓡꓳ=