ꓙꓲˍ ꓟ ꓬꓰˍ ꓕ ꓑꓳꓸ ꓣꓳ ꓠꓬ ꓶꓼ ꓙꓳ ꓫꓱꓹ ꓙꓳˍ ꓡꓳ

ꓢꓲ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓮ ꓕꓯ ꓟꓲ ꓕꓱ ꓡꓰ ꓐꓯˍ ꓡꓳ= ꓠꓴ ꓪ ꓟ. ꓟꓲ: ꓚ ꓙꓰˍ ꓕꓯ꓾ ꓠꓴ ꓪ ꓕꓲ ꓘꓹ ꓡꓰ ꓕꓲ ꓘꓹ ꓶꓼ ꓓꓳ ꓫꓱꓹ ꓓꓳ ꓚ ꓙꓰˍ ꓕꓯ ꓠꓴ ꓪ ꓦꓲ ꓗꓪ ꓢꓲ ꓡꓲ ꓟ ꓙꓳ ꓝꓲ ꓐꓰ꓾ ꓧꓶ. ꓕꓯ ꓐꓯ= ꓖꓳ ꓦꓲ ꓗꓪ ꓢꓲ ꓡꓲ ꓟ ꓔꓯ ꓠꓲꓹ ꓠꓵ ꓢꓴ ꓘꓳ ꓣꓴ ꓢꓴ ꓙꓳˍ ꓠꓬ ꓠꓴ ꓪ ꓔꓯ ꓘꓳ ꓣꓴ ꓡˍ ꓥꓳ= ꓠꓴ ꓪ ꓢꓲ ꓡꓲ ꓟˍ ꓟꓲ ꓬꓲ ꓪ ꓑꓯꓹ ꓟꓶˍ ꓡꓳ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓗꓪ ꓢꓲ ꓡꓲ ꓟ ꓔꓯ ꓟ: ꓘꓳ ꓣꓴ ꓢꓴ ꓙꓳˍ ꓠꓬ ꓠꓴ ꓪ ꓖꓶˍ ꓟ ꓢꓲ ꓡꓲ ꓟ ꓠꓬ ꓠꓴ ꓪ ꓔꓯ ꓚꓱꓹ ꓬꓲꓼ ꓡˍ ꓥꓳ꓾ ꓐꓰ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓟꓳ. ꓖꓶˍ ꓡꓳ=
ꓕꓱ ꓟ ꓮ ꓫꓵ: ꓔꓯ ꓐꓯ ꓟꓳ. ꓖꓶ ꓡˍ ꓡ? ꓣꓳ ꓠꓬ ꓧˍ ꓟ ꓙꓲˍ ꓟ ꓬꓰˍ ꓕ ꓑꓳꓸꓼ ꓣꓳ ꓠꓬ ꓶꓼ ꓙꓳ ꓫꓱꓹ ꓙꓳˍ ꓡꓳ= ꓪꓴ-ꓢ ꓶꓼ ꓤ ꓫꓱꓹ ꓤ ꓖꓶ ꓡˍ ꓡꓳ꓾ ꓐꓰ ꓐꓯ ꓟꓳ. ꓖꓶ ꓡ ꓔꓬ ꓡꓳ= ꓣꓳ ꓠꓬ ꓠꓱ. ꓐꓯ ꓢꓴ ꓔꓯ ꓠꓵ ꓠꓲꓹ ꓗꓪ ꓐꓰ ꓬꓰ ꓖꓶˍ ꓕꓯ꓾ ꓬꓲ ꓪ ꓐꓴ ꓢꓲ ꓡꓲ ꓟ ꓟꓶ ꓝꓲ꓾ ꓪꓴ-ꓢ ꓣꓱ: ꓛꓰ: ꓟꓶ ꓝꓲ꓾ ꓠꓵ ꓠꓲꓹ ꓟꓶ ꓝꓲ ꓐꓯ ꓢꓲ ꓮ ꓫꓵ: ꓬꓰˍ ꓟꓲ ꓕꓰ ꓡꓰ ꓬꓰˍ ꓕꓯ ꓪꓴ-ꓢ ꓡꓰ ꓣꓳ ꓔꓯ ꓪ ꓜꓲ ꓶꓼ ꓤ ꓫꓱꓹ ꓤ ꓖꓶ ꓡˍ ꓥꓳ꓾ ꓐꓯ ꓟ ꓥ ꓡꓳ=
ꓔꓯꓺ ꓥꓳ: ꓐꓯ ꓠꓬ ꓣꓳ ꓠꓱ. ꓐꓯ ꓢꓴ ꓔꓯ ꓠꓲꓹ ꓠꓵˍ ꓟ ꓠꓬ ꓙꓲˍ ꓟ ꓥ ꓡꓳ= ꓣꓳ ꓠꓲꓹ ꓠꓵˍ ꓟ ꓔꓯ ꓬꓲ ꓪ ꓜꓴ ꓟ: ꓘꓳ ꓣꓴ ꓠꓬ꓾ ꓥ ꓠꓬ꓾ ꓣꓳ ꓠꓲꓹ ꓠꓵˍ ꓟ ꓔꓯ ꓬꓲ ꓪ ꓐꓴ ꓘꓳ ꓣꓴ ꓟ: ꓐ ꓡ ꓠꓬ ꓣꓳ ꓠꓵ ꓠꓲꓹ ꓠꓬ ꓣꓳ ꓔꓬ ꓗꓪ ꓚꓱꓹ ꓬꓲꓼ ꓡˍ ꓥꓳ꓾ ꓐꓯ ꓟ ꓥ ꓡꓳ= 
ꓖꓳ ꓡꓱ ꓠꓬꓲ ꓣꓳ ꓮ ꓡꓰ ꓗꓪ ꓙꓰˍ ꓥ ꓟꓲ ꓠꓵ ꓠꓲꓹ ꓕꓱ ꓟ ꓔꓯ ꓫꓵ. ꓔꓲ ꓠ ꓗˍ ꓡꓳ= ꓠꓵ ꓠꓲꓹ ꓕꓱ ꓟ ꓔꓯ ꓫꓵ. ꓔꓲ. ꓢꓲ ꓬꓲ ꓜꓲ ꓣꓱ: ꓡ ꓢꓲ ꓬꓲ ꓢꓶ: ꓓꓱꓼ ꓡ ꓕꓯ ꓮ ꓟˍ ꓟꓲ ꓪ ꓜ:ˍ ꓡꓳ= 
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓟ. ꓟꓲ: ꓗꓪ ꓣꓳ ꓑ ꓙ: ꓪˍ ꓟ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓫꓵ: ꓞꓲ ꓠꓬꓲ: ꓣꓳ ꓔꓯ ꓝꓲ ꓩꓴ ꓗꓷˍ ꓟ ꓟ. ꓟꓲ: ꓥ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓬꓲ ꓐꓯ ꓔ ꓟ ꓡꓰ ꓐꓰ ꓮ ꓡꓰ ꓗꓪ ꓙꓰˍ ꓥ ꓟꓲ ꓢꓲ ꓡꓲ ꓟ ꓙꓳ ꓝꓲ ꓧꓶ. ꓕꓯ ꓐꓯ꓾ ꓐꓯ ꓟ ꓡꓰ ꓢꓲ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓥ ꓟ ꓣꓳ ꓥˍ ꓟꓲ ꓠꓱ. ꓐꓯ ꓢꓴ ꓢꓲ ꓡꓲ ꓟ ꓟꓶˍ ꓟ ꓫ. ꓕꓱ ꓘꓶ:꓾ ꓠꓱ. ꓐꓯ ꓢꓴ ꓠꓲꓹ ꓟ ꓗꓹ ꓛꓲ:ˍ ꓟ ꓢꓲ ꓡꓲ ꓟ ꓙꓳ ꓘꓶ:꓾ ꓠꓱ. ꓐꓯ ꓢꓴ ꓠꓲꓹ ꓟ ꓟ: ꓗꓹ ꓛꓲ: ꓟ ꓢꓲ ꓡꓲ ꓟ ꓟ: ꓙꓳ ꓟ ꓫ. ꓕꓱ ꓘꓶ: ꓟ: ꓫ. ꓕꓱ ꓕꓱ ꓮ ꓡꓰ ꓗꓪ ꓙꓰˍ ꓥ ꓟꓲ ꓪꓴ-ꓢ ꓬꓲ ꓢꓲ ꓡꓲ ꓟ ꓖꓶ ꓐ ꓡ ꓠꓹ ꓟ ꓣꓳ ꓬꓰ ꓠ ꓗꓹ ꓡꓳ= 
ꓖꓳ ꓡꓱ ꓠꓬꓲ ꓣꓳ ꓫ. ꓕꓱˍ ꓟ꓾ ꓓꓵ: ꓙˍ ꓟ꓾ ꓬꓰˍ ꓟ ꓮ ꓙꓵ: ꓠꓬ ꓢꓲ ꓒ ꓬꓰ-ꓢꓴ ꓬꓲ ꓠꓲꓹ ꓡꓶ:ˍ ꓡꓰ ꓐꓰ ꓞꓳ ꓙꓳ ꓐ ꓡ ꓢꓲ ꓠꓬꓲ ꓮ: ꓟ ꓔꓯ ꓥˍ ꓟꓲ ꓢꓲ ꓡꓲ ꓟ ꓖꓶ: ꓐ ꓡˍ ꓟ꓾ ꓮ: ꓟ ꓔꓯ ꓥˍ ꓟꓲ ꓬꓲ ꓠꓵ ꓠꓲꓹ ꓖꓶ ꓐ ꓡˍ ꓟ ꓣꓱ: ꓛꓰ: ꓡꓯ ꓫꓴ ꓪꓴ-ꓢ ꓔꓯ ꓓꓰ: ꓡꓯ= ꓠꓬꓲ. ꓠꓬꓲ ꓐꓱ ꓶ ꓠꓬ ꓣꓳ: ꓕꓱ ꓟ ꓓꓵ: ꓙ: ꓢꓲ ꓠꓬꓲ ꓣꓳ ꓤꓶꓻ ꓗꓪ ꓚꓵ ꓚꓵ ꓢꓯꓼ ꓕꓵꓼ ꓐ ꓡ ꓠꓹ ꓟ ꓪꓴ-ꓢ ꓔꓯ ꓶꓼ ꓓꓰ: ꓡꓯ=