ꓠꓬꓲ. ꓠꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓙꓵ, 5 ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿

ꓠꓬꓲ. ꓠꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓙꓵ, 5 ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 14ꓽ 1‐12 ꓝꓲ ꓗꓪ  ꓥ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ. ꓝꓲ ꓓꓴ ꓐꓴ ꓔꓯ ꓠꓲ, ꓟ ꓗꓴ ꓖꓶˍ ꓟ ꓚꓱ, ꓔꓯ ꓣꓳ ꓡꓳ. ꓟꓳ ꓪ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓪ ꓠꓲ, ꓟ ꓕꓽ ꓫ꓿ ꓪꓴ‐ꓢ ꓔꓯ ꓙꓵꓻ ꓥꓪ ꓔꓯˍ ꓟꓲ ꓙꓵꓻ ꓐꓰ ꓐꓯ ꓔ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓐꓯ ꓘꓶꓽ ꓠꓬ ꓪꓴ‐ꓢ ꓐꓯ ꓘꓶꓽ ꓚꓵ, ꓥ ꓡꓳ ꓐꓯ ꓟ ꓔꓯ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓪꓴ‐ꓢ ꓐꓯ ꓘꓶꓽ ꓠꓬ ꓣꓳ ꓔꓯ ꓕꓲ ꓞꓲ ꓕꓲ ꓒ ꓟ ꓢꓯꓼ ꓟꓬ, ꓚꓬꓴ ꓟꓶ ꓓꓴ ꓚꓱ, ꓗꓪ ꓧꓳꓽ ꓙꓰ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ. ꓮ ꓟꓽ ꓥ ꓟ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓥ ꓟ ꓔꓯ ꓣꓳ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓝꓲ ꓗꓪ ꓐꓰ ꓟ. ꓖꓶ ꓡ ꓟ ꓥ ꓡꓳ꓿ ꓣꓳ ꓟꓲ ꓠꓯ ꓗꓪ ꓞꓳ ꓙꓳ ꓢꓯ. ꓔꓬ ꓟ ꓙꓵ, ꓕꓯ ꓫ. ꓓꓴ ꓟꓶ ꓓꓴ ꓔꓳ, ꓜꓳ ꓡ ꓟ ꓙꓵ, ꓔꓯ ꓢꓲꓺ ꓒ ꓬꓰ‐ꓢꓴ ꓔꓯ ꓙꓵꓻ ꓢꓲ ꓠꓬꓲ ꓞꓳ ꓫꓱ ꓠ, ꓟ ꓟ. ꓖꓶ ꓡ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓠꓬ ꓙ ꓖꓴˍ ꓐꓰ ꓔꓱ,ˍ ꓟ ꓐꓰ ꓢꓯꓼ ꓟꓬ, ꓥ ꓡꓳ꓿ ꓥꓪ ꓗꓪ ꓐꓰ ꓟꓽ ꓥ ꓠꓬ ꓐ, ꓐ ꓔꓯ ꓡ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ ꓐꓰ ꓢꓲꓽ ꓫꓬ ꓕꓳ ꓶ ꓗꓪ ꓡꓳ. ꓟꓳ ꓪ ꓡꓳ꓿ ꓣꓳ ꓙꓵꓻ ꓠꓲ, ꓠꓬ ꓪꓴ‐ꓢ ꓡꓰ ꓧꓳꓽ ꓟꓳ ꓖꓶ ꓡ ꓟ ꓙꓽ ꓖꓴ ꓔꓯ ꓡꓳ. ꓟꓳ ꓪ ꓓ ꓡꓳ꓿ ꓣꓳ ꓞꓳ ꓙꓳ ꓟ ꓤꓶ ꓗꓪ ꓟꓬ, ꓢꓷ ꓗꓪ ꓐꓰ ꓡꓳ. ꓟꓳ ꓪ ꓟꓽ ꓓ ꓟ ꓮ ꓟꓬ, ꓙꓳ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ. ꓔꓯ ꓙꓵꓻ ꓠ, ꓟ ꓐꓰ ꓬꓲ. ꓐꓰ ꓕꓲ ꓪ ꓞꓳ ꓫꓱ ꓠ, ꓟ ꓣꓳ ꓔꓯ ꓟ. ꓖꓶ ꓡꓳ꓿ 

ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ. ꓮ ꓟ ꓥ ꓟ ꓐꓰ ꓬꓲ. ꓚꓵ ꓚꓵ ꓣꓳ ꓚꓬꓴ ꓢꓲꓺ ꓒ ꓥ ꓟ ꓔꓯ ꓣꓳ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟ. ꓖꓶ ꓡ ꓟ ꓥ ꓡꓳ꓿

ꓠꓬꓲ. ꓠꓬꓲ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓐꓰ ꓥꓪ ꓔꓯ ꓠ ꓠꓬꓲˍ ꓟ ꓠꓬ ꓥꓪ ꓠꓬ ꓠꓴˍ ꓐꓰ ꓕꓱ ꓟꓶ ꓛꓲ ꓔꓬ ꓗꓷˍ ꓟꓲ ꓠꓴ ꓥꓪ ꓔꓯ ꓟꓽ ꓢꓷ. ꓢꓰꓼ ꓡ ꓐꓰ ꓣꓳ ꓔꓯ ꓠ ꓠꓬꓲˍ ꓔꓬ ꓟ ꓥ ꓡꓳ꓿ ꓣꓳ ꓢꓲꓽ ꓫꓬ ꓕꓳ ꓶ ꓵꓺ ꓗꓷ ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓫ. ꓕꓱ ꓡ ꓥ ꓟꓲ ꓣꓳ ꓢꓲꓺ ꓒ ꓬꓰ‐ꓢꓴ ꓔꓯ ꓟꓽ ꓡꓳ. ꓟꓳ ꓗꓷ ꓟ ꓙꓳˍ ꓡ ꓣꓳ ꓓꓵꓽ ꓙ ꓠ, ꓟ  ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓐꓯ ꓘꓶ ꓡꓰ ꓐꓰ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓠꓲ, ꓠꓵ ꓡꓯ ꓘꓳ, ꓢꓲ ꓠꓬꓲ ꓫ. ꓢꓴ ꓔꓯ ꓬꓰ ꓙ ꓔꓳ, ꓙ ꓠ, ꓟ꓾ ꓢꓲ ꓡꓲ ꓗ, ꓛꓲ ꓟ ꓗꓴꓷꓼ ꓡꓳ ꓒꓱ ꓞꓳ ꓘ, ꓒꓬꓱꓼ ꓡ ꓠ, ꓟ ꓠꓬꓲ. ꓠꓬꓲ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓓꓵꓽ ꓙ ꓠ, ꓟ ꓟ. ꓖꓶ ꓡ ꓡꓳ꓿ ꓝꓮꓲ ꓢꓲ ꓡꓲ ꓗ, ꓛꓲ ꓟ ꓘꓴ ꓜꓲꓼ ꓞꓳ ꓐꓰ ꓕꓲ ꓦꓲꓻ ꓒꓬꓱꓼ ꓡ ꓠ, ꓟ ꓢꓯꓼꓕꓵꓽ ꓠ, ꓟ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓓꓵꓽ ꓙ ꓢꓪ ꓠꓬꓲˍ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓡ ꓟ ꓥ ꓡꓳ꓿ ꓫ. ꓟꓳ ꓪ꓿