ꓙꓵꓻ ꓠꓲꓹ

ꓙꓵꓻ ꓠꓲꓹ

ꓣꓳ ꓤꓶꓻ ꓗꓪ ꓪꓽ ꓕꓲ ꓧꓪꓹ ꓠꓬꓲꓽ ꓧꓪꓹ ꓘꓴ ꓗꓷ ꓢꓲ ꓟꓽ ꓟꓶ ꓕꓯ ꓠꓲꓹ ꓟ ꓙꓬ ꓡꓰ ꓢꓲ꓾ ꓪꓽ ꓟꓽ ꓘꓴ ꓕꓱ ꓡꓱ ꓫꓵ ꓔꓳꓹ ꓜꓳ ꓠꓬꓲ_ ꓡ? ꓕꓲ ꓠꓬꓲ ꓡꓲ ꓕꓲ ꓠꓬꓲ ꓪꓽ ꓘꓴ ꓔꓬ ꓥ ꓟꓲ ꓟꓽ ꓟꓶ ꓡ ꓟ ꓔꓯ ꓔꓳꓹ ꓜꓳ ꓠꓬꓲ_ ꓡ?

ꓖꓳ ꓡꓱ ꓥ ꓟꓲ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓔꓯ ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ= ꓟ-ꓕꓲ 15ꓽ21-28 ꓗꓪ ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓙꓰ ꓔꓬ ꓕꓯ ꓘꓷ- ꓠ ꓤ ꓟꓶ ꓤ ꓕꓲꓽ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓥꓪ ꓔꓯ ꓫꓱꓸ ꓤ ꓡꓯ꓾ ꓥꓪ ꓮ ꓟꓲꓽ ꓠꓬ ꓠꓲꓽ ꓜꓶꓽ ꓞꓹ ꓠꓬꓲ ꓮ ꓘꓶꓸ ꓫꓸ ꓙꓵꓻ ꓔꓬ ꓡꓳ꓾ ꓐꓰ ꓬꓲꓸ ꓔꓯ ꓓꓰ_ ꓡꓳ= ꓢꓲ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓕꓲ ꓘꓶꓽ ꓡꓲ ꓟꓽ ꓒꓳꓹ ꓖꓳ ꓡꓱ ꓥ ꓟꓲ ꓤ ꓟꓶ ꓤ ꓖꓳ ꓕꓲ ꓣꓳ ꓟ ꓠꓬ ꓡꓯ ꓫꓵ ꓶꓽ ꓓꓰ ꓟ ꓑꓶ ꓓꓴ ꓢꓲ ꓒ ꓬꓰ-ꓢꓴ ꓠꓬ ꓤ ꓟꓶ ꓤ ꓔꓯ ꓖꓶ ꓜ ꓟ ꓜ ꓓꓴ ꓮ ꓠꓽ ꓔꓯ ꓖꓶ ꓜ ꓡꓰ ꓟꓽ ꓙꓳ ꓐꓰ ꓒꓳꓹ ꓖꓶ_ ꓡꓳ꓾ ꓖꓳ ꓡꓱ ꓐꓯ ꓥ ꓟꓲ ꓤ ꓟꓶ ꓤ ꓖꓳ ꓟ ꓠꓬ ꓥ ꓡꓯ꓾ ꓟꓸ ꓒꓽꓳ꓾ ꓤ ꓠꓱ ꓤ ꓔꓯ ꓖꓶ ꓜ ꓓꓴ ꓜ ꓓꓴ ꓟ ꓠꓬ ꓮ ꓠꓽ ꓔꓯ ꓖꓶ ꓜ ꓓꓴ ꓟꓽ ꓥ꓾ ꓖꓳ ꓡꓱ ꓥ ꓟꓲ ꓜ ꓜ ꓖꓴ ꓗꓪ ꓐꓰ ꓞꓰ ꓡꓰ ꓟ ꓜ ꓟꓰꓽ ꓔꓯ ꓠꓬ ꓮ ꓠꓽ ꓟꓲ ꓜ ꓓ_ ꓡꓳ꓾ ꓐꓰ ꓒꓳꓹ ꓖꓶ_ ꓡꓳ= ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓤ ꓟꓶ ꓤ ꓙꓵꓻ ꓠꓲꓹ ꓔꓯ ꓟꓳ ꓡꓰ ꓢꓲ ꓠꓬꓲ ꓮ ꓟꓲꓽꓖꓳ ꓕꓲ ꓣꓳ ꓟ ꓔꓯ ꓫꓬꓹ ꓓ ꓡꓰ_ ꓟ ꓟꓸ ꓟꓲꓽ ꓥ ꓡꓳ= ꓖꓳ ꓡꓱ ꓠꓬꓲ ꓤ ꓟꓶ ꓤ ꓬꓲꓸ ꓙꓵꓻ ꓠꓲꓹ ꓔꓯ ꓣꓳ ꓡꓳꓸ ꓠꓬꓲ ꓕꓯ ꓬꓲ ꓠꓬ ꓢꓲ ꓒ ꓬꓰ-ꓢꓴ ꓮ ꓫꓵ ꓕꓲ ꓘꓶꓽ ꓡꓲ ꓟꓽ ꓐꓯ ꓖꓶ ꓡ ꓟꓲ ꓟꓽ ꓔꓴꓸ ꓔꓬ ꓥ ꓟꓲ ꓟꓽ ꓠꓽ ꓠ ꓓꓰ_ ꓡꓳ= ꓕꓱ ꓟ ꓠꓬ ꓣꓳ ꓐꓱ ꓶ ꓔꓯ ꓢꓳ ꓓꓴ ꓥ ꓡꓳ= ꓣꓳ ꓮ ꓡꓰ ꓐꓰ ꓪꓽ ꓘꓴ ꓥ ꓟꓲ ꓮ ꓫꓵ ꓬꓲꓸ ꓢꓯꓼ ꓡꓲ ꓟꓽ ꓑ ꓙ꓾ ꓮ ꓫꓵ ꓓ ꓔꓳꓹ ꓓꓴ ꓡꓲ ꓟꓽ ꓙꓳ꓾ ꓖꓳ ꓡꓱ ꓥ ꓟꓲ ꓠꓬꓲꓸ ꓠꓬꓲ ꓤ ꓟꓶ ꓤ ꓡꓰ ꓐꓰ ꓠꓲꓹ ꓟ ꓟꓽ ꓙꓬ ꓙꓬ ꓡꓯ ꓫꓵ ꓪꓽ ꓘꓴ ꓠꓹ ꓟ ꓣꓳꓸ ꓚꓵ_ ꓡꓳ= ꓤ ꓟꓶ ꓤ ꓖꓳ ꓟ ꓠꓬ ꓡꓯ ꓫꓵ ꓪꓽ ꓘꓴ_ ꓕꓯ ꓢꓲ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓤ ꓠꓱ ꓤ ꓔꓯ ꓖꓶ ꓜ_ ꓟ꓾ ꓜ ꓫꓵ ꓮ ꓠꓽ ꓔꓯ ꓖꓶ ꓜ ꓫꓵ ꓟꓽ ꓥ꓾ ꓐꓰ ꓬꓲ ꓔꓯ ꓐꓯ_ ꓡꓳ= ꓖꓳ ꓡꓱ ꓥ ꓟꓲ ꓬꓲ ꓔꓯ ꓮ ꓠꓽ ꓐꓯ ꓔ ꓥ ꓟꓲ ꓬꓲ ꓠꓬ ꓠꓲꓹ ꓟ ꓟꓽ ꓙꓬ ꓡꓰ ꓬꓲ ꓟꓶ ꓡꓰ ꓙꓳ_ ꓟ ꓬꓲꓸ ꓙꓵꓻ_ ꓟ ꓑꓶ ꓓꓴ ꓬꓲ ꓡꓯ ꓫꓵ ꓓꓰ_ ꓡꓳ= ꓖꓳ ꓡꓱ ꓠꓬꓲ ꓬꓲꓸ ꓟꓶꓽ ꓕꓯ ꓬꓲꓸ ꓠꓬ ꓬꓲꓸ ꓓꓰ_ ꓟ ꓪꓽ ꓘꓴ ꓘꓶꓽ ꓟꓶ ꓡꓰꓳ=

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓲ ꓧꓪꓹ ꓧꓪꓹ ꓣꓳ ꓪꓽ ꓘꓴ_ ꓟ ꓠꓬ ꓪꓽ ꓘꓴ_ ꓟ ꓟꓽ ꓟꓶ ꓟꓶ ꓐꓰ ꓪ ꓙꓲ ꓣꓳ ꓐꓱ ꓶ ꓫꓸ ꓙꓵ ꓟꓷꓼ ꓙꓵ ꓔꓳꓹ ꓜꓳ ꓫꓵ ꓙꓳ ꓗꓴꓸ_ ꓡꓳ= ꓖꓳ ꓕꓯ ꓖꓳ ꓤ ꓟꓶ ꓤ ꓔꓯ ꓓꓵꓽ ꓙ ꓡꓯ꓾ ꓬꓲꓸ ꓠꓬ ꓢꓯꓼ ꓕꓵꓼ ꓥ ꓟꓲ ꓞ ꓐꓰ ꓟꓽ ꓟꓶ꓾ ꓖꓳ ꓡꓱ ꓥ ꓟꓲ ꓬꓲ ꓡꓯ ꓫꓵ ꓢꓯꓼ ꓕꓵꓼ ꓟ ꓑꓶ ꓓꓴ ꓬꓲꓸ ꓟꓶ ꓡꓰꓳ= ꓣꓳ ꓮ ꓙꓵ ꓥ ꓟꓲ ꓟꓲ ꓠꓯ ꓕꓱ ꓟ ꓗꓪ ꓛꓳ ꓙꓳ ꓔꓬ ꓕꓯ ꓣꓳ ꓕꓲ ꓧꓪꓹ ꓢꓯꓼ ꓕꓵꓼ ꓠꓬ ꓟꓽ ꓟꓶ ꓕꓯ ꓠꓬꓲꓽ ꓧꓪꓹ ꓢꓯꓼ ꓕꓵꓼ ꓢꓲ ꓟꓽ ꓟꓶ ꓕꓯ ꓠꓲꓹ ꓟ ꓟꓽ ꓙꓬ ꓙꓬ ꓡꓰ ꓐꓰ ꓬꓲꓸ ꓑꓶꓸ ꓟꓽ ꓛꓲ ꓛꓲ ꓐꓰ ꓢꓯꓼ ꓕꓵꓼ ꓠꓹ ꓟ ꓣꓳꓸ ꓚꓵ_ ꓡꓳ= ꓕꓱ ꓟ ꓠꓬ ꓣꓳ ꓐꓱ ꓶ ꓠꓬꓲꓸ ꓠꓬꓲ ꓦ ꓢꓯꓼ ꓪ ꓣꓴ ꓓꓴ ꓥ ꓡꓳ= ꓫꓵꓺ ꓚꓰꓼ ꓟꓽ ꓚꓰꓼ ꓐꓯ_ ꓟ ꓔꓯ ꓮ ꓔꓳꓸ ꓗꓪ ꓐꓰ ꓚꓰꓼ ꓠꓯ_ ꓟ ꓡꓰ ꓐꓰ ꓣꓳ ꓙꓵꓻ ꓠꓲꓹ ꓐꓯ_ ꓟ ꓚꓰꓼ ꓟꓽ ꓚꓰꓼ ꓐꓯ_ ꓟ ꓔꓯ ꓮ ꓔꓳꓸ ꓗꓪ ꓐꓰ ꓫꓸ ꓙꓵ ꓟꓷꓼ ꓙꓵ ꓓꓴ ꓗꓪ ꓐꓰ ꓚꓰꓼ_ ꓡꓳ ꓖꓳ ꓡꓱ ꓠꓬꓲ ꓣꓳ ꓫꓸ ꓙꓵ ꓟꓷꓼ ꓙꓵ ꓓꓴ ꓦꓬꓼ ꓠꓬꓲ ꓗꓪ ꓙꓵꓻ ꓠꓲꓹ ꓔꓯ ꓟꓽ ꓡꓳ ꓒꓰꓹꓒꓰ ꓐꓰ ꓙꓵꓻ ꓠꓲꓹ ꓔꓯ ꓪꓳ ꓔ ꓢꓲ ꓡꓯ ꓫꓵ ꓪꓽ ꓘꓴ ꓙꓰ ꓥꓳ ꓐꓯ ꓠꓬ ꓣꓳ ꓶꓼ ꓓꓰꓽ ꓪꓽꓘꓴ_ ꓟ ꓮ ꓡꓰ ꓥ ꓟꓲ ꓟꓶꓸ_ ꓥꓳ ꓐꓰ ꓠꓬꓲꓸ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓰ ꓣꓳ ꓔꓯ ꓦ ꓢꓯꓼ ꓪ ꓖꓶ ꓡ ꓔꓬ ꓟ ꓥ ꓡꓳ=