ꓙꓵꓻ ꓠꓲꓹ ꓙꓳˍ ꓟ ꓤ ꓟꓶ ꓤ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓠꓬ ꓢꓲꓺ ꓒ ꓬꓰ-ꓢꓴ ꓔꓬ ꓗꓪ ꓦꓲ-ꓡꓲꓸ ꓤ ꓟꓶ ꓤ ꓕꓲ ꓣꓳ ꓡ ꓢꓲ ꓠꓬꓲ ꓠꓲꓽ ꓜꓶꓽ ꓞꓹ ꓔꓬ ꓟ ꓬꓲ ꓮ ꓟꓲꓽ ꓤ ꓔꓯ ꓫꓬꓹ ꓖꓶ ꓠꓹ ꓟ ꓐꓱ ꓶ ꓬꓰ-ꓢꓴ ꓔꓯ ꓓꓰꓽ ꓡˍ ꓟ ꓟꓸ ꓟꓲꓽ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓔꓬ ꓗꓪ ꓡˍ ꓟ ꓦꓲ-ꓡꓲꓸ ꓤ ꓟꓶ ꓤ ꓐꓯ ꓟ ꓠꓬ꓾ ꓦꓲ-ꓡꓲ ꓞꓳ ꓫꓵꓽ ꓐꓯ ꓟ ꓠꓬ ꓮ ꓠꓱ ꓕꓯ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓡꓰ ꓦꓲ-ꓡꓲ ꓞꓳ ꓫꓵꓽ ꓔꓯ ꓠꓲꓹ ꓙꓳˍ ꓡꓳ= ꓝꓴꓲꓸ ꓙꓳ ꓢꓴ ꓟꓽ ꓙꓲꓻ ꓟ ꓬꓰ ꓢꓴ ꓐꓰ ꓐꓯ ꓡꓳ= ꓦꓲ-ꓡꓲ ꓡ ꓞꓳ ꓐꓴ ꓠꓬ ꓬꓲ-ꓢꓷ-ꓡꓰ ꓞꓳ ꓫꓵꓽ ꓟꓽ ꓥ ꓪꓴ-ꓢ ꓡꓰ ꓢꓲꓺ ꓚꓰꓸ ꓔ ꓢꓴ ꓟꓽ ꓥ= ꓬꓲ ꓪ ꓐꓴ ꓠꓬ ꓪꓴ-ꓢ ꓟꓽ ꓥ ꓟ ꓠꓱꓸ ꓐꓯꓼ ꓔꓯ ꓪꓴꓸ ꓓꓵ ꓕꓱꓽ ꓢꓴ꓾ ꓙꓱꓽ ꓤ ꓮꓸ ꓠꓬꓲꓽ ꓐꓬꓱꓽ ꓑꓴꓹ ꓢꓲ ꓠꓬꓲ ꓪꓴꓸ ꓓꓵꓽ ꓕꓱꓽ ꓢꓴ꓾ ꓟꓽ ꓧꓺ ꓟ ꓬꓲ ꓫꓵꓽ ꓬꓲ ꓙꓰꓽ꓾ ꓟꓲ ꓠꓯ ꓗꓹ ꓛꓲꓽˍ ꓟ ꓧꓪ ꓢꓴ ꓥ ꓡꓳ=

ꓖꓳ ꓟ ꓪꓴꓸ ꓠꓬꓲ ꓦꓲ-ꓡꓲꓸ ꓤ ꓟꓶ ꓤ ꓠꓬ ꓢꓲꓺ ꓒ ꓬꓰ-ꓢꓴ ꓔꓬ ꓗꓪ ꓡ ꓢꓲ ꓠꓬꓲ ꓢꓲꓺ ꓒꓽꓳ ꓥꓪ ꓮ ꓟꓲꓽ ꓤ ꓔꓯ ꓠꓲꓽ ꓜꓶꓽ ꓞꓹ ꓠꓬꓲ ꓓꓹ ꓟ ꓔꓯ ꓠꓴ ꓡꓰ ꓖꓼ ꓓꓳ ꓖꓶꓽ꓾ ꓐꓰ ꓓꓰꓽˍ ꓕꓯ ꓬꓰ-ꓢꓴ ꓡꓰ ꓬꓲ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓚꓬꓴꓸ ꓠꓹ ꓟ ꓡꓰꓽ ꓡˍ ꓟ ꓪꓴꓸ ꓠꓬꓲ ꓦꓲ-ꓡꓲꓸ ꓤ ꓟ ꓤ ꓔꓯ ꓮ ꓠꓽ ꓡꓰ ꓔꓯꓺ ꓢꓲ ꓠꓬꓲ ꓐꓯ ꓡꓳ= ꓦꓲ-ꓡꓲꓸ ꓤ ꓟꓶ ꓤ ꓡꓰ ꓢꓲꓺ ꓒ ꓬꓰ-ꓢꓴ ꓔꓯ ꓓꓰꓽˍ ꓕꓯ ꓬꓰ-ꓢꓴ ꓠꓬ ꓤ ꓠꓱ ꓤ ꓜꓽ ꓓꓴ ꓔꓯ ꓠꓬ ꓮ ꓫꓵꓽ ꓪꓴꓸ ꓠꓬꓲ ꓮ ꓠꓽ ꓔꓯ ꓖꓶꓽ ꓜꓽˍ ꓥꓳ ꓪ꓾ ꓐꓰ ꓐꓯ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓡꓰ ꓦꓲ-ꓡꓲꓸ ꓤ ꓟꓶ ꓤ ꓔꓯ ꓮ ꓠꓽ ꓐꓰ ꓔꓯꓺ ꓢꓲ ꓐꓯ ꓥ ꓟꓲ ꓬꓲ ꓠꓬ ꓬꓲ ꓮ ꓟꓲꓽ ꓤ ꓔꓯ ꓜꓶꓽ ꓞꓹ ꓟ ꓠꓲꓽ ꓔꓯ ꓖꓼ ꓓꓳ ꓟꓶ ꓠꓲꓹ ꓫꓵˍ ꓟ ꓪꓴꓸ ꓠꓬꓲ ꓬꓲ ꓠꓬ ꓙꓵꓻ ꓠꓲꓹ ꓟꓽ ꓐꓬ ꓡꓰ ꓡꓰ ꓢꓲꓺ ꓒ ꓬꓰ-ꓢꓴ ꓔꓯ ꓕꓱ ꓡꓱ ꓒꓳꓹ ꓖꓶˍ ꓡꓳ=  ꓢꓲꓺ ꓒꓽꓳ ꓮ ꓠꓽ ꓥˍ ꓟꓲ ꓤ ꓠꓱ ꓤ ꓜꓽˍ ꓟ ꓢꓽ ꓡ ꓠꓯꓸꓼ ꓗꓪ ꓞꓰ ꓓꓹ ꓟ ꓜꓽ ꓟꓰꓽ ꓔꓯ ꓪ ꓜꓽˍ ꓡꓳ꓾ ꓐꓰ ꓒꓳꓹ ꓖꓶˍ ꓕꓯ ꓢꓲꓺ ꓒ ꓬꓰ-ꓢꓴ ꓠꓬ ꓦꓲ-ꓡꓲꓸ ꓤ ꓟꓶ ꓤ ꓙꓵꓻ ꓠꓲꓹ ꓔꓯ ꓮ ꓘꓶꓸ ꓓꓵꓽ ꓙꓽ ꓮ’ ꓡꓰꓳ= ꓬꓲ ꓔꓯ ꓮ ꓘꓶꓸ ꓫꓱꓸ ꓤˍ ꓡꓳ= ꓙꓵꓻ ꓠꓲꓹ ꓪꓴꓽˍ ꓟ ꓔꓯ ꓬꓲ ꓟꓳ ꓡꓰ ꓟ ꓪꓴꓸ ꓠꓬꓲ ꓬꓲ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ=  ꓙꓰ ꓛꓵˍ ꓡꓳ꓾ ꓠꓴ ꓮ ꓟꓲꓽ ꓤ ꓠꓬ ꓠꓲꓽ ꓜꓶꓽ ꓞꓹ ꓟ ꓗꓪ ꓐꓰ ꓖꓼ ꓓꓳ ꓗꓷ ꓟꓶ ꓡꓰꓳ꓾ ꓐꓰ ꓐꓯ ꓕꓯ ꓦꓲ-ꓡꓲꓸ ꓤ ꓟꓶ ꓤ ꓠꓬ ꓬꓲꓼ ꓙꓰ ꓢꓲ ꓠꓬꓲ ꓬꓲ ꓮ ꓟꓲꓽ ꓤ ꓔꓬ ꓗꓪ ꓙꓰˍ ꓕꓯ ꓬꓲ ꓮ ꓟꓲꓽˍ ꓟꓲ ꓓꓻ ꓡꓰ ꓢꓲ ꓠꓬꓲ ꓠꓲꓽ ꓥˍ ꓟꓲ ꓬꓲ ꓮ ꓟꓲꓽ ꓤ ꓠꓯꓸꓼ ꓗꓪ ꓐꓰ ꓓꓳ ꓙꓰꓳ꓾ ꓐꓰ ꓠꓬꓲꓸ ꓠꓬꓲꓸ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓣꓳ ꓑ ꓙˍ ꓡꓳ=

ꓣꓳ ꓥˍ ꓟꓲ ꓥꓪ ꓠꓬ ꓝꓴꓲꓸ ꓬꓰ ꓛꓬ ꓗꓷꓳ= ꓥꓪ ꓪꓽ ꓘꓴ ꓦꓲꓻ ꓗꓪ ꓟꓽ ꓙꓰ ꓟˍ ꓟꓲ ꓟꓶ ꓫꓵ ꓡꓰꓳ= ꓪꓴ-ꓢ ꓐꓰ ꓶ ꓤ ꓗꓷ ꓡꓰ ꓒꓰꓳ= ꓥꓪ ꓝꓴꓲꓸ ꓓ ꓟ ꓙꓳˍ ꓟ ꓪꓴꓸ ꓠꓬꓲ ꓪꓴ-ꓢ ꓠꓬ ꓥꓪ ꓐꓯ ꓘꓶꓽ ꓥꓪ ꓓꓰꓽ ꓘꓶꓽ ꓔꓯ ꓬꓲ ꓟꓽ ꓠ ꓠꓹ ꓡꓺꓳ꓾ ꓐꓰ ꓣꓳ ꓓꓵꓽ ꓙˍ ꓟꓲ ꓓꓵꓽ ꓙ ꓠꓬꓲ ꓗꓴˍ ꓡꓳ= ꓖꓳ ꓡꓱ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓪꓴ-ꓢ ꓔꓯ ꓦ ꓡꓱ ꓢꓴ ꓟꓽ ꓥ ꓟ꓾ ꓠꓱꓸ ꓐꓯꓼ ꓔꓯ ꓦ ꓡꓱ ꓢꓴ ꓥˍ ꓟꓲ ꓬꓲ ꓔꓯ ꓙꓵꓻ ꓠꓲꓹ ꓓꓽ ꓟ ꓡꓰ ꓓꓰꓽˍ ꓠꓬ ꓬꓲ ꓡꓰ ꓫꓬꓹ ꓖꓶˍ ꓟ ꓕꓲ ꓡꓰꓹ ꓣꓳ ꓪꓴ-ꓢ ꓦ ꓡꓱ ꓢꓴ ꓕꓲ ꓣꓳ ꓬꓲ ꓔꓯ ꓓꓰꓽˍ ꓠꓬ ꓟꓬꓽ ꓠꓬꓲ ꓬꓲ ꓡꓰ ꓖꓶꓽˍ ꓥꓳ= ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓦꓲ-ꓡꓲꓸ ꓤ ꓟꓶ ꓤ ꓬꓲ ꓮ ꓟꓲꓽ ꓤ ꓠꓬ ꓬꓲ ꓒ ꓕꓲ ꓗꓪ ꓟꓽ ꓔꓬ= ꓠꓲꓽ ꓜꓶꓽ ꓞꓹ ꓟ ꓮ ꓟꓲꓽ ꓤ ꓠꓬ ꓦꓲꓻ ꓗꓪ ꓶꓽ ꓤ ꓗꓪ ꓔꓬ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓐꓯ ꓘꓶꓽ ꓕꓲ ꓘꓶꓽˍ ꓡꓰ ꓶꓽ ꓤ ꓗꓪ ꓠꓲꓽ ꓜꓶꓽ ꓞꓹ ꓔꓬ ꓟ ꓮ ꓟꓲꓽ ꓤ ꓠꓬ ꓓꓻ ꓡꓰ ꓟ ꓕꓲ ꓡꓰꓹ ꓐꓰ ꓣꓳ ꓪꓽ ꓘꓴ ꓘꓶꓽ꓾ ꓣꓳ ꓓꓰꓽ ꓠꓲꓹ ꓫꓵˍ ꓟ ꓪꓽ ꓘꓴꓽ ꓘꓶꓽ ꓣꓳ ꓐꓰ ꓶ ꓤ ꓗꓪ ꓓꓹ ꓥ ꓟꓲ ꓣꓳ ꓦꓲꓻ ꓘꓴꓽ ꓢꓴ ꓐꓱ ꓶ ꓶꓽ ꓤ ꓗꓪ ꓐꓰ ꓓꓰꓽˍ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓓꓰꓽ ꓘꓶꓽ ꓔꓯ ꓑ ꓙ ꓢꓲ ꓠꓬꓲ ꓬꓲ ꓡꓰ ꓣꓳ ꓔꓯ ꓖꓶˍ ꓥꓳ= ꓠꓬꓲꓸ ꓠꓬꓲ ꓗꓪ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓡꓰ ꓐꓰ ꓣꓳ ꓮ ꓫꓵꓽ ꓓꓰꓽˍ ꓠꓬ ꓬꓲ ꓡꓰ ꓖꓶˍ ꓥꓳ꓾ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓣꓳ ꓠꓽ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓠꓲꓹ ꓓꓽ ꓟ ꓡꓰ ꓙꓵꓻ ꓢꓲ ꓠꓬꓲ ꓓꓰꓽ ꓠꓹ ꓟ ꓠꓬ ꓣꓳ ꓶꓻ ꓙꓳˍ ꓡꓳ= ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓦꓲ-ꓡꓲꓸ ꓤ ꓟꓶ ꓤ ꓡꓰ ꓐꓰ ꓬꓲ ꓔꓯ ꓮ ꓠꓽ ꓐꓰ ꓔꓯˍ ꓥ ꓟꓲ ꓬꓲ ꓠꓬ ꓙꓵꓻ ꓠꓲꓹ ꓓꓽ ꓟ ꓙꓳˍ ꓟ ꓪꓴꓸ ꓠꓬꓲ ꓪꓴ-ꓢ ꓠꓬ ꓬꓲ ꓓꓰꓽ ꓘꓶꓽ ꓔꓯ ꓓꓽ ꓔꓳꓹ ꓖꓶˍ ꓟ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓥˍ ꓟꓲ ꓙꓵꓻ ꓠꓲꓹ ꓓꓽ ꓟ ꓡꓰ꓾ ꓝꓴꓲꓸ ꓙꓳˍ ꓥ ꓟꓲ ꓠꓲꓹ ꓟ ꓟꓽ ꓙꓬ ꓡꓰ ꓡꓰ ꓪꓴ-ꓢ ꓔꓯ ꓓꓰꓽˍ ꓥꓳ ꓐꓯ ꓠꓬ ꓣꓳ ꓓꓰꓽ ꓘꓶꓽ ꓔꓯ ꓪꓴ-ꓢ ꓡꓰ ꓓꓽ ꓔꓳꓹ ꓖꓶꓽ ꓡˍ ꓥꓳ꓾ ꓐꓰ ꓣꓳ ꓔꓯ ꓦꓻ ꓢꓯꓼ ꓪ ꓖꓶ ꓡ ꓔꓬ ꓟ ꓥ ꓡꓳ=