ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓟꓶ ꓡꓰ ꓢꓴ ꓐꓴ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓘꓴ ꓜꓲꓼ ꓞꓳ ꓗꓪ ꓐꓰ ꓟꓬꓱꓺ ꓓꓳꓽ ꓖꓶ ꓟ

ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓟꓶ ꓡꓰ ꓢꓴ ꓐꓴ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓘꓴ ꓜꓲꓼ ꓞꓳ ꓗꓪ ꓐꓰ  ꓟꓬꓱꓺ ꓓꓳꓽ ꓖꓶ ꓟ

ꓣꓳ‐ꓟ ꓪ ꓔꓲ ꓐꓴ ꓡꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓟ ꓐꓰ ꓫ. ꓓꓴ ꓟꓶꓽ ꓓꓴ ꓖꓶ ꓟ ꓚꓱ, (10) ꓫꓵꓽ ꓙꓳˍ ꓟ ꓥ ꓡꓳ꓿ ꓕꓱ ꓡꓱ ꓫ. ꓓꓴ ꓟꓶꓽ ꓓꓴ ꓖꓶ ꓟ ꓗꓳꓻ ꓡꓳ ꓗꓪ ꓐꓰ ꓢꓰꓼ ꓟ ꓝꓴꓲ ꓖꓶ ꓟ ꓚꓱ, ꓠꓬ ꓮ ꓟꓬ, ꓛꓲ ꓟꓽ ꓙꓲˍ ꓟ ꓕꓲ ꓫꓵꓽ ꓥ ꓡꓳ꓿ ꓕꓱ ꓡꓰ ꓐꓰ ꓠꓱ. ꓐꓯꓼ ꓫ. ꓓꓴ ꓟꓷꓽ ꓓꓴ ꓖꓶ ꓟ ꓚꓱ, ꓮ ꓟꓬ, ꓟꓲ ꓙꓳˍ ꓟ ꓥ ꓡꓳ꓿

AD (300) ꓘꓳꓼ ꓗꓪ ꓛꓲ ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓢꓲ ꓛꓳ ꓢꓴ ꓐꓴ ꓙꓲ‐ꓢꓴ ꓢꓲꓺ ꓤ ꓐꓴ ꓐꓰ ꓟꓬꓱꓺ ꓔ ꓢꓴ ꓐꓴ ꓠꓬ ꓫ. ꓓꓴ ꓟꓶꓽ ꓓꓴ ꓮ ꓟꓬ, ꓙꓳˍ ꓟ ꓙꓵ, ꓟꓲ ꓥ ꓡꓳ꓿ ꓣꓳ‐ꓟ ꓟꓯꓼ ꓐꓴ ꓡꓰ ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓢꓲ ꓛꓳ ꓢꓴ ꓐꓴ ꓔꓯ ꓣꓴ ꓢꓲ ꓠꓬꓲ ꓐꓱ ꓓꓵ ꓔꓳ, ꓦꓲꓻ ꓗꓪ ꓐꓱ ꓗꓷ ꓟ ꓥ ꓡꓳ꓿ ꓝꓮꓲ ꓙꓲ‐ꓢꓴ ꓢꓲꓺ ꓤ ꓐꓴ ꓠꓯ, ꓗꓪ ꓙꓳˍ ꓟ ꓒꓴ ꓫꓵꓺ ꓐꓰ ꓣꓱ ꓫꓵꓽ ꓣꓱ ꓙꓱꓽ ꓮ ꓟꓬ, ꓥ ꓟꓲ ꓣꓴ ꓔꓯ ꓙꓰ ꓟ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓣꓳ‐ꓟ ꓟꓯꓼ ꓐꓴ ꓡꓰ ꓫ. ꓓꓴ ꓟꓶꓽ ꓓꓴ ꓮ ꓟꓬ, ꓖꓶ ꓢꓲ ꓠꓬꓲ ꓢꓰꓼ ꓗꓷ ꓟ ꓥ ꓡꓳ꓿ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓮ ꓘꓶ. ꓛꓲ ꓫ. ꓓꓴ ꓟꓶꓽ ꓓꓴ ꓖꓶ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓢꓲ ꓗꓪ ꓑꓶꓺ ꓑꓶꓺ ꓞꓳ ꓫꓱ ꓟ ꓥ ꓡꓳ꓿

ꓕꓱ ꓡꓰ ꓐꓰ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓣꓳ‐ꓟ ꓟꓯꓼ ꓐꓴ ꓡꓰ ꓫ. ꓓꓴ ꓟꓶꓽ ꓓꓴ ꓖꓶ ꓟ ꓙꓵ, ꓗꓪ ꓦꓻ ꓢꓯꓼ ꓐ ꓢꓴ ꓐꓴ ꓟꓲ ꓮ ꓟꓬ, ꓔꓬ ꓟ ꓥ ꓡꓳ꓿ ꓣꓳ‐ꓟ ꓟꓯꓼ ꓐꓴ ꓡꓰ ꓫ. ꓓꓴ ꓟꓶꓽ ꓓꓴ ꓮ ꓟꓬ, ꓖꓶ ꓡ ꓟ ꓙꓵ, ꓕꓯ ꓙꓵꓻ ꓠꓲ, ꓚꓱ, ꓗꓪ ꓢꓯꓼ ꓐ ꓡ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓙꓲ‐ꓢꓴ ꓢꓲꓺ ꓤ ꓮ ꓟꓬ, ꓟꓬ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓬꓲ. ꓪ ꓢꓯꓼ ꓟꓬ, ꓔꓯ ꓖꓶ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓐꓰ ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓟꓶ ꓡꓰ ꓢꓴ ꓐꓴ ꓔꓯ ꓘꓴ ꓜꓲꓼ ꓞꓳ ꓡꓰ ꓟꓬꓱꓺ ꓓꓳꓽ ꓮ ꓟꓬ, ꓖꓶ ꓟ ꓥ ꓡꓳ꓿

ꓙꓲ‐ꓢꓴ ꓢꓲꓺ ꓤ ꓕꓲ ꓐꓱ ꓠꓬ ꓙꓵꓻ ꓠꓲ, ꓚꓱ, ꓔꓯ ꓛ ꓗꓷ ꓡꓳꓻ ꓗꓷ ꓢꓲ ꓠꓬꓲ ꓟꓲ ꓠꓯ ꓒꓴ ꓫꓵꓺ ꓗ. ꓠꓯ ꓞꓳ ꓙꓰ ꓡꓳ꓿ ꓙꓵꓻ ꓠꓲ, ꓚꓱ, ꓔꓯ ꓡꓳ ꓗꓷ ꓛ ꓗꓷ ꓢꓲ ꓠꓬꓲ ꓝꓮꓲ ꓕꓲ ꓧꓪ, ꓘꓴ ꓜꓲꓼ ꓞꓳ ꓠꓯ ꓗꓪ ꓬꓯꓼ ꓡ ꓢꓴ ꓐꓴ ꓔꓯ ꓘꓴ ꓜꓲꓼ ꓞꓳ ꓠꓬ ꓝꓴꓲ ꓖꓽ ꓖꓶ ꓗꓷ ꓢꓲ ꓠꓬꓲ ꓘꓳ ꓣꓴ ꓗꓷ ꓥ ꓡꓳ꓿ ꓐꓱ ꓓꓵꓽ ꓔꓳ ꓦꓲꓻ ꓗꓪ    ꓐꓱ ꓗꓷ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓘꓴ ꓜꓲꓼ ꓞꓳ ꓔꓯ ꓡꓳ ꓗꓷ ꓛ ꓗꓷ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙ ꓖꓶ ꓗꓷ ꓟ ꓥ ꓡꓳ꓿

ꓙꓵꓻ ꓠꓲ, ꓚꓱ, ꓑꓶ. ꓓꓴ ꓢꓰꓼ ꓟꓶ ꓡꓰ ꓢꓴ ꓐꓴ ꓠꓬ ꓟꓲ ꓠꓯ ꓗꓪ ꓢꓯꓼ ꓟꓬ, ꓟꓶ ꓡꓰ ꓥ ꓟꓲ ꓟꓴ ꓗꓪ ꓗꓴꓷꓼ ꓗꓪ ꓢꓯꓼ ꓟꓬ, ꓝꓮꓲ ꓟꓶ ꓡꓰ ꓢꓴ ꓐꓴ ꓥ ꓡꓳ꓿ ꓬꓲ ꓪ ꓠꓬ ꓕꓲ ꓞꓲꓼ ꓕꓲ ꓑ ꓟꓽ ꓫꓵꓻ ꓪꓴ‐ꓢ ꓐ ꓕꓲ ꓗꓪ ꓢꓯ. ꓔꓬ ꓠ, ꓟ ꓙꓵꓽ ꓪ ꓟꓶ ꓡꓰ ꓢꓴ ꓐꓴ ꓥ ꓡꓳ꓿ ꓕꓱ ꓡꓰ ꓐꓰ ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓞꓳ ꓢꓴ ꓐꓴ ꓔꓯ ꓣꓳ‐ꓟ ꓟꓯꓼ ꓐꓴ ꓡꓰ ꓢꓰꓼ ꓥ ꓟꓲ ꓟꓽ ꓙꓳꓺ ꓙꓳꓺ ꓙꓵꓻ ꓠꓲ, ꓚꓱ, ꓔꓯ ꓟꓽ ꓡꓳ ꓗꓷ ꓟꓽ ꓛ ꓗꓷ ꓐꓰ ꓙꓵꓻ ꓠꓲ, ꓑꓶ. ꓓꓴ ꓢꓰꓼ ꓟꓶ ꓗꓪ ꓛꓲ ꓢꓯꓼ ꓟꓬ, ꓖꓶ ꓗꓷ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓟꓬꓱꓺ ꓠꓯ, ꓡ ꓠ, ꓟ  ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓟꓬꓱꓺ ꓓꓳꓽ ꓖꓶ ꓢꓲ ꓠꓬꓲ ꓬꓲ. ꓪ ꓑꓶ. ꓓꓴ ꓮ ꓟꓬ, ꓓꓴ ꓗ, ꓛꓲ ꓓꓴ ꓒꓬꓱꓼ ꓡ ꓟ ꓥ ꓡꓳ꓿ ꓬꓲ. ꓪ ꓮ ꓙꓵꓽ ꓟꓬꓱꓺ ꓠꓬ ꓮ ꓘꓶ. ꓛꓲ ꓟꓬꓱꓺ ꓓꓳꓽ ꓙꓳˍ ꓢꓲ ꓠꓬꓲ ꓮ ꓕꓯ ꓥ ꓟꓲ ꓟꓬꓱꓺ ꓓꓳꓽ ꓖꓶ ꓠꓯ, ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓥ ꓡꓳ꓿