ꓙꓵꓽ ꓧꓶꓽ ꓔꓯ ꓥꓳꓽ

ꓢꓲꓽ ꓫꓬ ꓕꓳꓽ ꓶ ꓗꓪ ꓠꓬ ꓢꓲꓽ ꓒ ꓬꓰ-ꓢꓴ ꓝꓲ ꓓꓴ ꓐꓴ ꓠꓬ ꓑ ꓑ ꓣꓴ ꓠꓹ ꓟ꓾ ꓫꓪ ꓒꓵꓼ ꓣꓴ ꓠꓹ ꓟ ꓟꓲ ꓡꓰ ꓗꓷ ꓟ ꓟꓸ ꓟꓲꓽ ꓥ ꓡꓳ= ꓬꓲ ꓪ ꓠꓬ ꓡꓲꓺ ꓘꓴꓽ ꓗꓪ ꓓꓵꓽ ꓙꓰˍ ꓕꓯ ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓪ ꓔꓯ ꓒ-ꓡꓲ-ꓢꓷ ꓐꓴ ꓙꓵꓽ ꓧꓶꓽ ꓐꓰ ꓩꓴ-ꓡꓲ ꓙꓵꓽ ꓧꓶꓽ ꓔꓯ ꓤ ꓟꓳ ꓐꓯ ꓕꓯ ꓬꓲ ꓪ ꓠꓬ ꓑ ꓑ ꓟꓲ ꓡꓰ ꓗꓷ꓾ ꓫꓪ ꓒꓵꓼ ꓟꓲ ꓡꓰ ꓗꓷ ꓟ ꓔꓯ ꓡꓰꓽ ꓓꓵꓽ ꓙ ꓔꓬ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓒ-ꓡꓲ-ꓢꓷ ꓐꓴ ꓙꓵꓽ ꓧꓶꓽ ꓐꓯ ꓟ ꓠꓬ ꓒ-ꓡꓲ-ꓢꓷ ꓐꓴ ꓙ ꓫꓱꓽˍ ꓟ ꓚꓱꓹ꓾ ꓬꓲ ꓪ ꓫꓸ ꓕꓱ ꓘꓶꓽ꓾ ꓬꓲ ꓪ ꓬꓲ ꓫꓱꓹ ꓔꓯ ꓟꓽ ꓔꓯꓺ ꓢꓳ ꓠꓹ ꓟ꓾ ꓧꓪꓸ ꓛꓲꓽ ꓔ ꓠꓹ ꓟ ꓐꓯ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓝꓲ ꓓꓴ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓮ ꓡꓰ ꓟ ꓔꓯ ꓐꓯ ꓟ ꓔꓯ ꓬꓲ ꓪ ꓟꓽ ꓢꓷꓸ ꓔꓬ= ꓬꓲ ꓪ ꓠꓲꓹ ꓟ ꓘꓴꓽ ꓗꓪ ꓠꓬ ꓥꓪ ꓠꓴꓽ ꓠꓬ ꓑ ꓑ ꓟꓽ ꓣꓴ ꓔꓯꓹ ꓡ ꓟ ꓑꓶꓸ ꓓꓴ꓾ ꓣꓳ ꓠꓬ ꓫꓪ ꓒꓵꓼ ꓟꓽ ꓔꓯꓹ ꓡ ꓟ ꓑꓶꓸ ꓓꓴ ꓣꓳ ꓔꓯ ꓐꓯ ꓟ ꓥ ꓡꓳ꓾ ꓐꓰ ꓓꓵꓽ ꓙ ꓔꓬ ꓡꓳ=

ꓬꓲ ꓪ ꓔꓯ ꓣꓳꓽ ꓡꓳ ꓠꓬꓲˍ ꓕꓯ ꓬꓲ ꓪ ꓠꓬ ꓢꓲꓺ ꓒ ꓬꓰ-ꓢꓴ ꓐꓰ ꓔꓬ ꓕꓯ ꓜꓽ ꓓꓴ ꓓꓳ ꓓꓴ ꓐꓱ ꓶ ꓫꓸ ꓟꓽ ꓛꓵ= ꓢꓲꓺ ꓒ ꓬꓰ-ꓢꓴ ꓒ ꓕꓲ ꓗꓪ ꓔꓬ ꓕꓯ ꓮ ꓫꓵꓽ ꓓꓵꓽ ꓙ ꓫ ꓟꓽ ꓛꓵ ꓟ ꓪꓴꓸ ꓠꓬꓲ ꓜꓽ ꓓꓴ ꓓꓳ ꓓꓴ ꓟꓲ ꓡꓰ ꓗꓷˍ ꓗꓪ ꓛꓲꓺ ꓓꓹ ꓡꓳ= ꓣꓳ ꓟꓲ ꓠꓯ ꓕꓱ ꓟ ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓛꓳꓽ ꓫꓱꓽ ꓔꓬ ꓕꓯ ꓣꓳ ꓓꓵꓽ ꓙ ꓠꓬꓲˍ ꓕꓯ ꓣꓳ ꓗ ꓘꓶꓽ ꓓꓳ ꓙꓰˍ ꓕꓯ ꓠꓬ ꓜꓽ ꓓꓴ ꓓꓳ ꓓꓴ ꓟꓽ ꓔꓯꓹ ꓔꓯꓹ ꓐꓰ ꓟꓽ ꓙꓰ= ꓠꓱꓸ ꓐꓯ ꓔꓯ ꓟꓲ ꓡꓰ ꓗꓷ ꓐ ꓡꓹ ꓥ ꓟꓲ꓾ ꓟꓲ ꓡꓰ ꓗꓷˍ ꓥ ꓟꓲ ꓜꓽ ꓓꓴ ꓓꓳ ꓓꓴ ꓔꓯ ꓠꓽ ꓮ ꓕꓯ ꓟꓲ ꓟꓲ ꓡꓰ ꓟꓽ ꓗꓴꓸ= ꓖꓳ ꓡꓱ ꓥ ꓟꓲ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓬꓲ ꓝꓲ ꓓꓴ ꓐꓴ ꓠꓬ ꓜꓽ ꓓꓴ ꓔꓯꓹ ꓠꓹ ꓟ ꓟꓲ ꓡꓰ ꓗꓷꓳ ꓐꓰ ꓐꓯ ꓔ ꓡꓳ= ꓮ ꓫꓵꓽ ꓪꓴꓸ ꓠꓬꓲ ꓥ ꓡ? ꓬꓰ-ꓢꓴ ꓒ ꓕꓲ ꓗꓪ ꓔꓬ ꓕꓯ ꓬꓲ ꓪ ꓠꓬ ꓮ ꓕꓯ ꓟꓲ ꓐꓳˍ ꓡꓳ= ꓜꓽ ꓓꓴ ꓓꓳ ꓓꓴ ꓟꓽ ꓙꓳ ꓥˍ ꓟꓲ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓪ ꓔꓯ ꓖꓶ ꓜꓽ ꓐ ꓡˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓜꓽ ꓓꓴ ꓐꓱ ꓶ ꓓꓵꓽ ꓙ ꓫꓸ ꓟꓽ ꓛꓵ ꓐꓯ ꓟ ꓥ ꓡꓳ=

ꓖꓳ ꓡꓱ ꓥˍ ꓟꓲ ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓒ-ꓡꓲ-ꓢꓷ ꓐꓴ ꓙꓵꓽ ꓧꓶꓽ ꓔꓯ ꓤ ꓟꓳ ꓔ ꓐꓯ ꓕꓯ ꓬꓲ ꓪ ꓠꓽ ꓣꓳ ꓑ ꓑ ꓟꓽ ꓔꓯꓹ ꓡ ꓟ ꓑꓶꓸ ꓓꓴ꓾ ꓥ ꓠꓬ ꓣꓳ ꓫꓪ ꓒꓵꓼ ꓟꓽ ꓔꓯꓹ ꓡ ꓟ ꓑꓶꓸ ꓓꓴ ꓢꓲꓺ ꓒ ꓬꓰ-ꓢꓴ ꓣꓳ ꓔꓯ ꓐꓯ ꓔꓬ ꓟ ꓥꓳ ꓐꓰ ꓬꓲ ꓪ ꓕꓱ ꓡꓱ ꓓꓵꓽ ꓙˍ ꓡꓳ= ꓬꓲ ꓪ ꓠꓲꓹ ꓟ ꓠꓯꓸꓼ ꓗꓪ ꓠꓬ ꓜꓽ ꓓꓴ ꓓꓳ ꓓꓴ ꓫꓸ ꓟꓽ ꓛꓵ ꓐꓯ ꓥ ꓟꓲ ꓢꓲꓺ ꓒ ꓬꓰ-ꓢꓴ ꓐꓯ ꓘꓶꓽ ꓮ ꓙꓵꓽ ꓔꓯ ꓬꓲ ꓪ ꓠꓲꓹ ꓟ꓾ ꓥ ꓠꓬ ꓮ ꓙꓵꓽ ꓠꓬ ꓜꓽ ꓓꓴ ꓔꓯ ꓡꓰꓽ ꓥꓳꓺ ꓓꓹ ꓟ ꓔꓯ ꓣꓳ ꓢꓷꓸ ꓪˍ ꓡꓳ= ꓢꓲꓺ ꓒ ꓬꓰ-ꓢꓴ ꓬꓲ ꓐꓯ ꓠꓲꓹ ꓫꓵˍ ꓟ ꓠꓬ ꓒ-ꓡꓲ-ꓢꓷ ꓐꓴ ꓬꓲ ꓪ ꓙ ꓫꓱꓽ ꓔꓬ ꓟ ꓚꓱꓹ꓾ ꓓꓵꓽ ꓙ ꓚꓱꓹ ꓠꓴ ꓔꓯ ꓟꓽ ꓠꓷꓼ ꓡꓰ ꓠꓹ ꓟ ꓤ ꓟꓳ ꓐꓰ ꓐꓯ ꓟ ꓥ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓝꓲ ꓓꓴ ꓐꓴ ꓠꓬ ꓡꓳꓸ ꓟꓳ ꓟꓽ ꓐ ꓡ= ꓢꓲꓺ ꓒ ꓬꓰ-ꓢꓴ ꓡꓰ ꓮ ꓫꓵꓽ ꓪꓴꓸ ꓠꓬꓲ ꓒ-ꓡꓲ-ꓢꓷ ꓐꓴ ꓙꓵꓽ ꓧꓶꓽ ꓐꓰ ꓐꓯ ꓡ ꓐꓯ ꓟ ꓬꓲ ꓪ ꓓꓵꓽ ꓙ ꓟꓶ ꓔꓬ ꓡꓳ=

ꓙꓵꓽ ꓧꓶꓽ ꓐꓯ ꓟ ꓮ ꓫꓵꓽ ꓥ ꓡ? ꓙꓵꓽ ꓧꓶꓽ ꓐꓯ ꓟ ꓠꓬ ꓣꓳ ꓙꓲ ꓒꓶꓽ ꓚꓬꓸ ꓕꓯ꓾ ꓕꓲꓽ ꓙꓰꓽ ꓙꓰꓽ ꓬꓰˍ ꓕꓯ ꓐꓬ ꓡꓰ ꓘꓴˍ ꓟ ꓜꓻ ꓔꓯ ꓐꓬ ꓡꓰ ꓝꓲˍ ꓟ꓾ ꓥ ꓠꓬ ꓕꓲ ꓫꓵꓽ ꓫꓵꓽ ꓔꓯ ꓛꓵꓽ ꓡꓰ ꓠ ꓛꓲꓺ ꓬꓰ ꓐ ꓡˍ ꓟ ꓙꓵꓽ ꓧꓶꓽ ꓥ ꓡꓳ꓾ ꓐꓰ ꓐꓯ ꓠꓸ ꓡꓳ= ꓙꓵꓽ ꓧꓶꓽ ꓮ ꓡꓰ ꓟꓬꓱꓽ ꓬꓰˍ ꓡ ꓐꓯ ꓟ ꓔꓯ ꓣꓳ ꓙꓲ ꓒꓶꓽ ꓞꓴꓺ ꓢꓴ ꓚꓬꓸ ꓢꓴ꓾ ꓮ ꓪꓯꓼ ꓜ ꓝꓸ ꓢꓴ꓾ ꓑ ꓑ ꓗꓳꓺ ꓢꓴ ꓮ ꓙꓵꓽ ꓠꓬ ꓙꓵꓽ ꓧꓶꓽ ꓔꓯ ꓮ ꓡꓰ ꓣꓱꓽ ꓓꓹ ꓟ ꓮ ꓡꓰ ꓟꓬꓱꓽ ꓬꓰˍ ꓟ ꓢꓷˍ ꓡꓳ= ꓖꓳ ꓡꓱ ꓠꓬꓲ ꓒ-ꓡꓲ-ꓢꓷ ꓐꓴ ꓙꓵꓽ ꓧꓶꓽ ꓐꓯ ꓟ ꓠꓬ ꓒ-ꓡꓲ-ꓢꓷ ꓐꓴ ꓬꓲ ꓪ ꓟꓽ ꓙꓲꓻ ꓟ꓾ ꓬꓲ ꓪ ꓠꓬ ꓟꓷꓽ ꓠꓷꓹ ꓗꓪ ꓐꓰ ꓡꓰꓽ ꓪꓴ-ꓢ ꓔꓯ ꓫꓱꓸ ꓖꓶˍ ꓟ꓾ ꓬꓲ ꓪ ꓠꓬ ꓕꓯꓽ ꓢꓲ ꓗꓪ ꓡꓰꓽ ꓪꓴ-ꓢ ꓔꓯ ꓓꓳ ꓟꓴˍ ꓟ ꓔꓯ ꓢꓲꓺ ꓒ ꓬꓰ-ꓢꓴ ꓡꓳꓸ ꓟꓳˍ ꓠꓬꓲ ꓕꓱ ꓟ ꓟꓽ ꓠꓷꓼ ꓡꓰ ꓠꓹ ꓟ ꓠꓴ ꓪ ꓤ ꓟꓳ ꓐꓰ ꓐꓯ ꓟ ꓥ ꓡꓳ=

ꓝꓲ ꓓꓴ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓐꓯ ꓟ ꓡꓳꓸ ꓟꓽ ꓟꓳ= ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓬꓲ ꓪ ꓔꓯ ꓒꓳꓹ ꓖꓶˍ ꓡꓳ= ꓠꓴ ꓠꓬ ꓟꓬ ꓢꓶꓽ ꓙꓳˍ ꓥ ꓟꓲ ꓟꓬ ꓢꓶꓽ ꓟꓽ ꓟꓳ= ꓠꓸ ꓑꓳ ꓙꓳˍ ꓥ ꓟꓲ ꓑ ꓙ ꓟꓽ ꓘꓴ ꓟ ꓔꓯ ꓫꓱꓸ ꓡꓰꓳ꓾ ꓐꓰ ꓐꓯ ꓟ ꓥ ꓡꓳ= ꓠꓬꓲꓸ ꓠꓬꓲ ꓣꓳꓽ ꓛꓳ ꓫꓱꓽ ꓔꓬ ꓕꓯ ꓥ ꓟꓲ ꓪꓴ-ꓢ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ= ꓣꓳ ꓠꓬ ꓟꓬ ꓢꓶꓽ ꓙꓳˍ ꓥ ꓟꓲ ꓚꓵꓺ ꓚꓵꓺ ꓪꓴ-ꓢ ꓡꓰ ꓟꓳ ꓝꓲ ꓠꓲꓹ ꓫꓵˍ ꓟ ꓔꓯ ꓟꓳ ꓡꓰ ꓡ? ꓠꓸ ꓑꓳ ꓙꓳˍ ꓥ ꓟꓲ ꓚꓵꓺ ꓚꓵꓺ ꓪꓴ-ꓢ ꓡꓰ ꓑ ꓙ ꓝꓲ ꓠꓲꓹ ꓫꓵˍ ꓟ ꓣꓳ ꓑ ꓙ ꓡꓰ ꓡ? ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓡꓯ= ꓥ ꓡꓳ꓾ ꓣꓳ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓛꓳ ꓫꓱꓽ ꓔꓬ ꓕꓯ ꓪꓴ-ꓢ ꓖꓶ ꓔ ꓟ ꓟꓬ ꓢꓶꓽ ꓟꓳˍ ꓥ ꓟꓲ ꓬꓲ ꓡꓰ ꓟꓳ ꓝꓲ ꓠꓲꓹ ꓫꓵˍ ꓟ꓾ ꓥ ꓠꓬ ꓔꓱꓹ ꓜꓳꓽˍ ꓟ ꓔꓯ ꓟꓳ ꓟꓽ ꓘꓴ= ꓟꓳ ꓪˍ ꓟ ꓔꓯ ꓟꓳ ꓟꓽ ꓘꓴ= ꓣꓱꓽ ꓟꓽ ꓬꓯꓼ ꓟ ꓗꓪ ꓡꓰꓽ ꓣꓳ ꓟꓬ ꓢꓶꓽ ꓔꓯ ꓣꓱꓽ ꓔꓬ ꓡ? ꓥ ꓠꓬ ꓣꓳ ꓠꓸ ꓑꓳ ꓔꓯ ꓥ ꓟꓲ ꓮ ꓡꓰ ꓗꓪ ꓣꓱꓽ ꓔꓬ ꓡ ꓐꓯ ꓟ ꓓꓵꓽ ꓙ ꓠꓬꓲ ꓡꓯ=

Add new comment

8 + 6 =