ꓙꓵꓽ ꓧꓶꓽ ꓔꓯ ꓥꓳꓽ

ꓟ-ꓘꓳ 8ꓽ14-21

ꓙꓲꓻ ꓫꓬ ꓢꓴ ꓟ-ꓘꓳ ꓡꓰ ꓐꓳ ꓔ ꓟ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓒ-ꓡꓲ-ꓢꓷ ꓐꓰ ꓩꓴ-ꓡꓲ ꓬꓲ ꓪ ꓙꓵꓽ ꓧꓶꓽ ꓔꓯ ꓤ ꓟꓴ ꓠꓹ ꓟ ꓙꓳ ꓗꓽ ꓖꓶ ꓔ ꓟ ꓔꓯ ꓵꓻ ꓪˍ ꓟ ꓥ ꓡꓳ= ꓟꓽ ꓙꓲꓻ ꓟ ꓔꓯ ꓔꓵꓹ ꓔ ꓟ ꓠꓲꓹ ꓟ ꓠꓬ ꓙꓵꓽ ꓧꓶꓽ ꓡꓰ ꓐꓰ ꓪꓴꓽ ꓡꓰ ꓝꓲ ꓐ ꓡˍ ꓟ ꓢꓯꓼ ꓙꓳˍ ꓡꓳ= ꓒ-ꓡꓲ-ꓢꓷ ꓐꓴ ꓙꓵꓽ ꓧꓶꓽ ꓠꓬ ꓮ ꓣꓳ ꓗꓴꓹ ꓙꓲꓻ ꓪꓸ ꓔ ꓟ ꓪꓰ ꓕꓳꓹ ꓡꓰ ꓐꓰ ꓙꓲˍ ꓟ ꓡ ꓞꓳ ꓡꓰ ꓐꓰ ꓞꓳ ꓙꓳ ꓔꓬꓹ ꓢꓲ ꓢꓲꓺ ꓒ ꓬꓰ-ꓢꓴ ꓔꓯ ꓐꓹ ꓐ ꓪꓴ-ꓢ ꓬꓲ ꓤ ꓔꓲꓸ ꓥ ꓟ ꓔꓯ ꓘꓳꓹ ꓣꓴ ꓟꓽ ꓐ ꓡ ꓢꓴ ꓐꓴ ꓥ ꓡꓳ=

ꓩꓴ-ꓡꓲ ꓬꓲ ꓙꓵꓽ ꓧꓶꓽ ꓐꓰ ꓫꓱꓸˍ ꓟ ꓠꓲꓹ ꓟ ꓠꓬ ꓬꓲ ꓫꓱꓹ ꓟꓽ ꓙꓲꓻ ꓟ꓾ ꓟꓲ ꓠꓯ ꓐꓳ ꓶ ꓔꓯ ꓟꓳꓸ ꓠꓲꓹ ꓥꓳꓸˍ ꓟ ꓐꓰ ꓠꓲꓹ ꓖꓳꓼˍ ꓟ ꓥ ꓡꓳ= ꓚꓲꓸ ꓛꓬ ꓐꓱ ꓶˍ ꓡꓰꓽ ꓓꓵꓽ ꓙ ꓢꓲ ꓚꓲꓸ ꓛꓬ ꓔꓯ ꓙꓳˍ ꓟ ꓟꓲ ꓠꓯ ꓐꓳ ꓶ ꓐꓰ ꓢꓯꓸ ꓔꓬ ꓕꓯ ꓡꓰꓽ ꓟꓶ ꓪˍ ꓟ ꓙꓵꓽ ꓪ ꓔꓯ ꓔꓵꓹ ꓔ ꓢꓲ ꓪꓴ-ꓢ ꓔꓯ ꓟꓽ ꓙꓵꓻ ꓢꓴ ꓥ ꓡꓳ=

 ꓙꓵꓽ ꓧꓶꓽ ꓕꓱ ꓟ ꓓꓵꓽ ꓡꓰ ꓕꓯ ꓠꓽ ꓪꓴ-ꓢ ꓐꓰ ꓠꓶꓽ ꓙꓰ ꓠꓹ ꓟ ꓮ ꓘꓶꓸ ꓫꓸ ꓡꓰ ꓟ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓙꓵꓽ ꓧꓶꓽ ꓕꓱ ꓠꓬꓲꓽ ꓟ ꓡꓱꓸꓼ ꓬꓲ ꓝꓳꓹ ꓟꓶ ꓠꓬ ꓥꓪ꓾ ꓐꓯ ꓟ ꓚꓲꓸ ꓛꓬ ꓐꓱ ꓶꓽˍ ꓡꓰꓽ ꓓꓵꓽ ꓙˍ ꓟ ꓥ ꓡꓳ= ꓝꓮꓲ ꓕꓲ ꓚꓱꓹ ꓐꓯ ꓪˍ ꓠꓬ ꓚꓲꓸ ꓛꓬ ꓔꓯ ꓡꓰꓽ ꓦ ꓡꓱ ꓢꓲ ꓪꓴ-ꓢ ꓔꓯ ꓟꓽ ꓦ ꓡꓱ ꓟ ꓥ ꓡꓳ=

ꓚꓲꓸ ꓛꓬ ꓔꓯ ꓡꓰꓽ ꓦ ꓡꓱ ꓐꓳˍ ꓟ ꓾ ꓥꓪ꓾ ꓐꓯ ꓟ ꓠꓲꓹ ꓟ ꓓꓵꓽ ꓡꓰ ꓕꓯ ꓠꓽ ꓝꓴꓲꓸ ꓬꓲ ꓚꓳ ꓑꓸ ꓒꓬꓱꓼ ꓡꓰ ꓢꓲ꓾ ꓝꓴꓲꓸ ꓚꓳ ꓑꓸ ꓬꓰˍꓟ ꓤꓶꓻ ꓠꓯꓸꓼ ꓗꓪ ꓐꓬ ꓡꓰˍ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓐꓴ ꓔꓯ ꓕꓱ ꓡꓱ ꓐꓬ ꓡꓰˍ ꓟ ꓝꓴꓲꓸ ꓠꓯꓸꓼ ꓗꓪ ꓟꓽ ꓓꓵꓽ ꓡꓰ ꓠꓹ ꓟ ꓟꓸ ꓖꓶ ꓑꓱ ꓖꓶ ꓔ ꓟ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓬꓲ ꓐꓯ ꓘꓶꓽ ꓔꓯ ꓙꓽ ꓜꓲꓼ ꓡꓰ ꓠꓹ ꓟ ꓣꓳ ꓐꓴ ꓣꓱꓽ ꓞꓹ ꓟ ꓠꓬ ꓐꓹ ꓐ ꓪꓴ-ꓢ ꓬꓲ ꓠꓲꓹ ꓡꓶꓽ ꓔꓯ ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲ ꓗꓪ ꓫꓵꓻ ꓟꓶˍ ꓗꓪ ꓛꓲꓺ ꓠꓻ ꓡꓳꓸ ꓗꓷ ꓢꓲ ꓤ ꓔꓲꓸ ꓬꓰ-ꓢꓴ ꓬꓲ ꓙꓽ ꓣꓳˍ ꓟ ꓐꓰ ꓐꓲ ꓜꓲꓼˍ ꓟ ꓠꓲꓹ ꓟ ꓡꓰꓽ ꓣꓱꓽ ꓞꓹ ꓟ ꓥ ꓡꓳ= ꓕꓱ ꓟ ꓡꓰ ꓐꓰ ꓐꓲ ꓜꓲꓼˍ ꓟ ꓢꓷꓸ ꓠꓲꓹ ꓐꓰ ꓪꓴ-ꓢ ꓟꓲ ꓙꓬ ꓗꓪ ꓞꓳ ꓢꓯꓸ ꓔꓬ ꓠꓹ ꓟ ꓢꓯꓼ ꓕꓵꓼ ꓢꓲ ꓝꓴꓲꓸ ꓬꓲ ꓚꓳ ꓑꓸ ꓣꓱꓽˍ ꓟ ꓤꓶꓻ ꓗꓪ ꓐꓰ ꓡꓲꓹ ꓙꓰ ꓡꓯ=