ꓛꓬ ꓢꓴ ꓔꓯ ꓖꓽ ꓖꓶ ꓠꓯꓹ ꓟ ( Matthew 18:21-35)

ꓬꓰ-ꓢꓴ ꓙꓲ-ꓢꓴ ꓠꓯꓸꓼ ꓗꓪ ꓠꓲꓹ ꓠꓵˍ ꓟ ꓬꓲ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓔꓯ ꓧꓪꓸ ꓧꓪꓸꓼ= ꓠꓬꓲꓸ ꓠꓬꓲ ꓐꓱ ꓶ ꓓꓵꓽ ꓙ ꓓꓴ ꓠꓬ ꓟ-ꓕꓲ 18ꓽ21-35 ꓗꓪ ꓥ ꓡꓳ= ꓒꓲ-ꓕꓱ ꓡꓰ ꓢꓲꓺ ꓒ ꓬꓰ-ꓢꓴ ꓔꓬ ꓗꓪ ꓙꓰ ꓢꓲ ꓟꓸ ꓒꓽꓳ꓾ ꓡ ꓞꓳ ꓕꓲ ꓣꓳ ꓡꓰ ꓥꓪ ꓔꓯ ꓛꓬ ꓡ ꓕꓯ ꓥꓪ ꓠꓬ ꓮ ꓟꓬ ꓧꓪꓹ ꓖꓽ ꓖꓶ ꓠꓯꓹ ꓡ= ꓫꓵꓽ ꓧꓪꓹ ꓥ ꓡ꓾ ꓐꓰ ꓠꓺ ꓠꓬꓲˍ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓬꓲ ꓔꓯ ꓥꓪ ꓠꓬ ꓠꓴ ꓔꓯ ꓫꓵꓽ ꓧꓪꓹ ꓖꓽ ꓖꓶ ꓐꓰ ꓥꓪ ꓟꓽ ꓐꓯ= ꓫꓵꓽ ꓞꓲ ꓧꓪꓹ ꓫꓵꓽ ꓝ ꓖꓽ ꓖꓶ ꓠꓹ ꓟ ꓥꓪ ꓡꓰ ꓐꓯ ꓖꓶˍ ꓡꓳ꓾ ꓐꓰ ꓐꓯ ꓟ ꓦ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓟ ꓬꓲꓸ ꓬꓲ ꓢꓲ ꓠꓬ ꓢꓴ ꓡꓰ ꓣꓳ ꓔꓯ ꓛꓬ ꓡˍ ꓕ ꓑꓳꓸꓼ꓾ ꓢꓴ ꓡꓰ ꓣꓳ ꓔꓯ ꓗꓸ ꓧꓪ ꓡˍ ꓕ ꓑꓳꓸꓼ ꓖꓽ ꓖꓶ ꓠꓯꓹ ꓡꓳ ꓐꓯ ꓟ ꓬꓲꓸ ꓬꓲ ꓢꓲ ꓥ ꓡꓳ=

ꓬꓲ ꓡꓰ ꓔꓯꓺ ꓥꓳꓽ ꓕꓲ ꓟ ꓡꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡˍ ꓡꓳ= ꓮ ꓠꓱ ꓕꓯ ꓪ ꓔꓲ ꓕꓲ ꓣꓳ ꓙꓳˍ ꓡꓳ= ꓪ ꓔꓲ ꓖꓳ ꓟ ꓔꓯ ꓚꓳꓺ ꓑ ꓕꓲ ꓣꓳ ꓠꓬ ꓶꓻ ꓡꓯ ꓐꓵ ꓓˍ ꓟ ꓑꓶꓸ ꓓꓴ ꓚꓳꓺ ꓑ ꓖꓳ ꓟ ꓠꓬ ꓒꓴꓻ ꓚꓱꓹ ꓖꓶ ꓟꓶ ꓟꓽ ꓘꓴ= ꓖꓳ ꓕꓯ ꓪ ꓔꓲ ꓡꓰ ꓫꓱꓸ ꓤ ꓢꓲ ꓬꓲ ꓐꓵ ꓓꓹ ꓟ ꓮ ꓙꓵꓽ ꓩꓵ ꓦ ꓖꓶˍ ꓡꓳ= ꓚꓳꓺ ꓑ ꓠꓬ ꓗꓹ ꓛꓲꓽ ꓛꓲꓽ ꓡꓰꓽ ꓬꓲꓼ ꓙꓰ ꓗꓷꓳ= ꓖꓳ ꓡꓱ ꓥˍ ꓟꓲ ꓚꓳꓺ ꓑ ꓖꓳ ꓟ ꓠꓬ ꓬꓲ ꓔꓯ ꓒꓴꓻ ꓮ ꓔꓲꓸ ꓤ ꓐꓵ ꓓꓹ ꓟ ꓕꓲ ꓣꓳ ꓔꓯ ꓠꓬ ꓟꓽ ꓖꓽ ꓖꓶ ꓖꓶ ꓬꓲ ꓗꓶꓸ ꓝꓲ ꓗꓪ ꓛꓵˍ ꓢꓲ ꓓꓰꓽˍ ꓟ ꓟꓸ ꓟꓲꓽ ꓣꓳ ꓑ ꓙˍ ꓡꓳ= ꓬꓲ ꓔꓯ ꓪ ꓔꓲ ꓡꓰ ꓝꓴꓲꓸ ꓥꓸ ꓖꓶ꓾ ꓬꓲ ꓐꓵˍ ꓟ ꓮ ꓙꓵꓽ ꓩꓴ ꓦ ꓖꓶˍ ꓥ ꓟꓲ ꓬꓲ ꓠꓬ ꓬꓲ ꓠꓶꓽ ꓛꓳ ꓕꓲ ꓛꓳ ꓔꓯ ꓟꓽ ꓩꓴ ꓖꓶ= ꓟꓽ ꓫꓱꓸ ꓤ ꓤ ꓬꓰˍ ꓟ ꓑꓶ ꓓꓴ ꓪ ꓔꓲ ꓡꓰ ꓬꓲ ꓔꓯ ꓟꓸ ꓜꓽˍ ꓟ ꓟꓸ ꓟꓲꓽ ꓥ ꓡꓳ=

ꓣꓳ ꓠꓬꓲꓸ ꓠꓬꓲ ꓓꓵꓽ ꓙ ꓠꓬꓲˍ ꓕꓯ ꓖꓽ ꓖꓶ ꓠꓲꓹ ꓐꓯ ꓟ ꓮꓽ ꓟ ꓐꓱ ꓶ ꓥ ꓡ= ꓖꓽ ꓖꓶ ꓠꓲꓹ ꓠꓬ ꓣꓳ ꓐꓱ ꓶ ꓥ ꓡꓳ= ꓮ ꓫꓵꓽ ꓑꓶ ꓓꓴ ꓥ ꓡ= ꓣꓳ ꓠꓬ ꓢꓴ ꓔꓯ ꓖꓽ ꓖꓶˍ ꓕꓯ ꓧꓶꓸ ꓕꓯ ꓙꓲꓻ ꓖꓴ ꓙꓳˍ ꓟ ꓠꓬ ꓣꓳ ꓥ ꓡꓳ= ꓮ ꓡꓲꓳ ꓐꓯ ꓠꓬ ꓕꓲ ꓣꓳ ꓣꓳ ꓣꓳꓽ ꓔꓯ ꓛꓬ ꓡˍ ꓕꓯ ꓣꓳ ꓠꓬ ꓬꓲ ꓔꓯ ꓠꓲꓹ ꓟ ꓠꓯꓸꓼ ꓗꓪ ꓦꓶꓻ ꓢꓲ ꓮ ꓕꓯˍ ꓟꓲ ꓔꓯꓹ ꓔ ꓕꓯ ꓕꓱ ꓟ ꓠꓬ ꓮꓸ ꓔꓳꓸ ꓔꓯ ꓔꓯꓹ ꓔ ꓟ ꓔꓯ ꓫꓱˍ ꓡꓳ= ꓣꓳ ꓔꓯ ꓛꓬ ꓡ ꓢꓴ ꓔꓯ ꓮ ꓡꓲ ꓐꓰ ꓢꓲ ꓝꓮꓲ ꓕꓲ ꓧꓪꓹ ꓬꓲ ꓔꓯ ꓟꓸ ꓜꓽ ꓠꓯꓹ ꓡ= ꓥ ꓠꓬ ꓬꓲ ꓔꓯ ꓝꓮꓲ ꓕꓲ ꓧꓪꓹ ꓮ ꓡꓲ ꓐꓰ ꓛꓴꓽ ꓙꓳ ꓖꓶ ꓠꓯꓹ ꓥ ꓐꓰ ꓓꓵꓽ ꓙ ꓔꓬ ꓕꓯ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓢꓯꓼ ꓪ ꓔꓯˍ ꓟꓲ ꓣꓴ ꓔꓬ ꓡꓳ= ꓕꓲ ꓠꓬꓲ ꓡꓰ ꓕꓲ ꓣꓳ ꓕꓱ ꓡꓰ ꓞꓳ ꓙꓳ ꓙꓰˍ ꓕꓯ ꓟꓽ ꓜꓳꓽ ꓫꓵꓽ ꓮ ꓟꓬꓹ ꓗꓷ ꓡꓰˍ ꓥꓳ= ꓖꓳ ꓡꓱ ꓠꓬꓲ ꓖꓽ ꓖꓶˍ ꓐꓯ ꓟ ꓠꓬ ꓧꓶꓸ ꓕꓯ ꓣꓳ ꓔꓯ ꓩꓴ ꓗꓷˍ ꓟ ꓥ ꓡꓳ= ꓣꓳ ꓠꓬ ꓮ ꓫꓵꓽ ꓞꓳꓹ ꓞ ꓓꓴ ꓟꓽ ꓙꓳ ꓙꓳ ꓧꓶꓸ ꓕꓯ ꓩꓴ ꓗꓷ ꓟꓶˍ ꓟ ꓠꓬ ꓣꓳ ꓥ ꓡꓳ꓾ ꓐꓯ ꓟ ꓣꓳ ꓢꓷꓸ ꓠ ꓗˍ ꓡꓳ=

ꓮ ꓡꓲꓳ ꓐꓯ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓡꓰꓽ ꓫ ꓔ ꓢꓲ ꓠꓲꓹ ꓙꓳꓺ ꓔꓬ ꓕꓯ ꓠꓬ ꓓꓳꓼ ꓜꓽ ꓢꓲ ꓠꓱꓸ ꓐꓯ ꓕꓲ ꓣꓳ ꓔꓯ ꓫꓵꓻ ꓝꓲˍ ꓟ ꓔꓯ ꓫꓱˍ ꓡꓳ= ꓣꓳ ꓠꓬ ꓓꓳꓼ ꓜꓽ ꓔ ꓢꓲ ꓠꓬꓲ ꓠꓱ ꓐꓯ ꓢꓴ ꓮ ꓕꓯ ꓫꓵꓻ ꓟꓽ ꓫꓵꓻ ꓟ꓾ ꓛꓴꓽ ꓙꓳ ꓢꓴ ꓠꓲꓹ ꓙꓳꓺ ꓢꓴ ꓮ ꓕꓯ ꓫꓵꓻ ꓟꓽ ꓫꓵꓻ ꓟ ꓡꓳꓸ ꓔꓬ ꓕꓯ ꓠꓽ ꓬꓲ ꓖ ꓟꓽ ꓙꓳ= ꓓꓳꓼ ꓜꓽ ꓢꓴ ꓠꓬ ꓣꓳ ꓥ ꓟ ꓑꓶꓸ ꓓꓴ ꓣꓳ ꓧꓶꓸ ꓕꓯ ꓫꓵꓻ ꓡˍ ꓥꓳ= ꓖꓳ ꓡꓱ ꓠꓬꓲ ꓠꓯꓸ ꓐꓯ ꓢꓴ ꓔꓯ ꓖꓽ ꓖꓶˍ ꓠꓬ ꓣꓳ ꓚꓲ ꓛꓬ ꓣꓳ ꓖꓽ ꓖꓶ ꓟꓶˍ ꓥꓳ ꓐꓯ ꓟ ꓣꓳ ꓢꓷꓸ ꓪˍ ꓡꓳ= ꓟꓸ ꓟꓲꓽ ꓗꓪˍ ꓟꓲ ꓣꓳ ꓑ ꓙ ꓪˍ ꓟ ꓕꓱ ꓟ ꓥ ꓡꓳ=

ꓣꓳ ꓠꓬ ꓣꓳ ꓔꓯ ꓪꓴ-ꓢ ꓡꓰ ꓖꓽ ꓖꓶ ꓔ ꓟ꓾ ꓪꓴ-ꓢ ꓡꓰ ꓣꓳ ꓝꓴꓲ ꓮ ꓙꓵꓽ ꓔꓯ ꓒꓬ ꓦ ꓗꓷ ꓟ ꓬꓲ ꓣꓱꓽ ꓛꓰꓽ ꓠꓬ ꓵ ꓖꓴ ꓟꓽ ꓓ= ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓓꓵꓽ ꓙ ꓚꓱꓹ꓾ ꓣꓳ ꓫ ꓕꓱ ꓚꓱꓹ꓾ ꓬꓰ ꓠ ꓔ ꓟ ꓔꓯ ꓟꓽ ꓬꓰ ꓟ ꓚꓱꓹ ꓮ ꓙꓵꓽ ꓠꓬ ꓪꓴ-ꓢ ꓐꓰ ꓠꓶꓽ ꓛꓳ ꓕꓲ ꓛꓳ ꓔꓯ ꓕꓲꓺ ꓗꓷˍ ꓟ ꓝꓴꓲ ꓥ ꓟ ꓑꓶ ꓓꓴ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓔꓯ ꓪꓴ-ꓢ ꓡꓰ ꓝꓴꓲ ꓖꓽ ꓖꓶ ꓔꓬ ꓟ ꓠꓬ ꓠꓵꓻ ꓠꓲꓹ ꓓꓽ ꓟ ꓥ ꓡꓳ=

Add new comment

4 + 15 =