ꓛꓳ ꓒꓯ, ꓞꓲ ꓠꓬꓲꓽ ꓣꓳ ꓔꓯ ꓝꓲ ꓩꓴ ꓗꓷ_ ꓟ

ꓠꓬꓲꓸ ꓠꓬꓲ ꓟ ꓢꓲ ꓫꓬ ꓕꓳ ꓶ ꓝꓲꓸ ꓗꓪ ꓐꓰ ꓟꓲ ꓠꓯ ꓒꓴ ꓫꓵꓺ ꓖꓴꓽ ꓙꓴꓽ ꓠꓲꓹ ꓫꓬꓹ ꓔꓯ ꓠꓲꓹ ꓥꓳ_ ꓟ ꓠꓲꓹ ꓟ ꓔꓯ ꓟꓽ ꓟꓬ ꓠꓹ ꓟ ꓣꓳ ꓔꓯ ꓐꓯ ꓟꓳꓸ ꓖꓶ_ ꓡꓳ=

ꓡꓴ-ꓘ 9ꓽ 3-5 ꓗꓪ ꓬꓰ-ꓢꓴ ꓡꓰ ꓬꓲ ꓛꓳ ꓒꓯꓹ ꓐꓴ ꓔꓯ ꓝꓲ ꓩꓴ ꓗꓷ ꓕꓯ “ ꓠꓴ ꓪ ꓓꓴꓻ ꓓꓳ ꓙꓰ ꓕꓯ꓾ ꓙꓽ ꓥꓳ_ ꓟꓲ꓾ ꓜꓽ ꓓꓴ_ ꓟꓲ꓾ ꓒꓴ_ ꓟꓲ ꓕꓽ ꓔꓯꓹ= ꓐꓵ ꓞꓶꓽ_ ꓟꓲ ꓠꓬꓲꓽ ꓘꓳꓹ ꓕꓽ ꓖꓪꓽ= ꓮ ꓡꓲ ꓕꓲ ꓦꓲ ꓗꓪ ꓓꓵꓽ ꓙꓰ_ ꓟꓲ꓾ ꓖꓳ ꓗꓪ ꓐꓰ ꓟꓽ ꓓꓳ ꓙꓰ ꓕ ꓑꓳꓸ ꓖꓳ ꓗꓪ ꓔꓬ= ꓠꓴ ꓪ ꓔꓯ ꓟꓽ ꓘꓳ ꓣꓴ ꓡ ꓠꓬ꓾ ꓡꓳ ꓒꓱ ꓖꓳ ꓟ ꓗꓪ ꓐꓰ ꓓꓳ ꓙꓰ_ ꓕꓯ꓾ ꓬꓲ ꓪ ꓔꓯ ꓔꓳꓹ_ ꓟ ꓢꓷꓸ ꓙ ꓟꓳ ꓙ ꓓꓴ ꓬꓰ ꓠꓹ ꓟ꓾ ꓠꓴ ꓪ ꓛꓲ ꓒꓯꓹ ꓗꓪ ꓟ ꓠꓱꓸ ꓦꓱꓽ ꓧꓶꓽ ꓟꓱꓸ ꓞꓰ ꓩꓴ ꓗꓷ꓾” ꓐꓰ ꓐꓯ ꓔ ꓟ ꓥꓳ꓾

ꓢꓲ ꓒꓽ ꓬꓰ-ꓢꓴ ꓡꓰ ꓬꓲ ꓛꓳ ꓒꓯꓹ ꓐꓴ ꓔꓯ ꓝꓲ ꓩꓴ ꓗꓷ ꓕꓯ ꓮ ꓫꓵ ꓥ ꓟꓲ ꓟꓽ ꓔꓯꓹ ꓙꓰ ꓠꓹ ꓟ ꓐꓯ_ ꓡꓳ꓾ ꓟꓲ ꓠꓯ ꓒꓴ ꓫꓵꓺ ꓔꓯ ꓡꓰ ꓠꓲꓹ ꓥꓳ ꓔꓬ ꓠꓬ ꓪꓴ-ꓢ ꓐꓯ ꓘꓶꓽ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓚꓺ ꓒꓬꓱ ꓙꓰ ꓟ ꓗꓪ ꓥ ꓟꓲ ꓟꓬꓱꓽ ꓟꓽ ꓒꓬꓱꓼ ꓡ꓾ ꓖꓳ ꓟ ꓑꓶ ꓓꓴ ꓪꓴ-ꓢ ꓶꓼ ꓓꓳ ꓫꓱꓸ ꓓꓳ ꓔꓯ ꓚꓺ ꓒꓬꓱ ꓠꓹ ꓟ꓾ ꓠꓻ ꓢꓴ ꓔꓯ ꓫꓬꓹ ꓖꓶ ꓠꓹ ꓟ꓾ ꓠꓲꓽ ꓢ ꓓꓯ ꓔꓯ ꓗꓼ ꓓꓳ ꓖꓶ ꓐ ꓡ ꓟ ꓙꓵꓽ ꓪ ꓔꓯ ꓖꓶ_ ꓟ ꓥꓳ꓾ ꓠꓲꓹ ꓥꓳ ꓟ ꓠꓬ ꓣꓳ ꓡ ꓞꓳ ꓮ ꓙꓵ ꓠꓯꓼ ꓗꓪ ꓙꓳ_ꓡꓳ= ꓬꓲꓼ ꓤ ꓠꓬꓲ ꓤ꓾ ꓮꓽ ꓐ ꓮ ꓟ꓾ ꓫꓵ ꓤ ꓪꓳ ꓤ꓾ ꓟꓲ ꓠꓯ ꓒꓴ ꓫꓵꓺ꓾ ꓠꓲꓹ ꓠꓵ ꓢꓴ ꓕꓲ ꓣꓳ ꓣꓳ ꓕꓱ ꓡꓱ ꓫꓵ ꓠꓯꓼ ꓗꓪ ꓠꓲꓹ ꓥꓳ ꓢꓴ ꓡꓰ ꓥꓳ꓾ ꓖꓳ ꓡꓱ ꓥ ꓟꓲ ꓕꓱ ꓠꓲꓹ ꓥꓳ_ ꓟ ꓠꓬ ꓪꓴ-ꓢ ꓡꓰ ꓐꓯ ꓟꓳꓸ ꓖꓶ ꓡ ꓟ ꓗꓪ ꓐꓰ ꓙꓻ ꓡꓰ ꓠꓬ ꓪꓴ-ꓢ ꓔꓯ ꓣꓳ ꓠꓲꓹ ꓟ ꓘꓴꓽ ꓗꓪ ꓬꓲꓸ ꓖ ꓟꓽ ꓖꓶ ꓕꓱ ꓠꓲꓹ ꓥꓳ ꓟ ꓔꓯ ꓡꓰ ꓣꓳ ꓤꓶꓻ ꓗꓪ ꓬꓲꓸ ꓖ ꓣꓴ ꓡꓰ ꓓꓴ ꓗꓷ ꓡꓰ ꓡ ꓟ ꓥꓳ= ꓖꓳ ꓟ ꓑꓶ ꓓꓴ ꓣꓳ ꓟꓲ ꓠꓯ ꓗꓪ ꓙꓳ_ ꓟ ꓔꓯ ꓠꓲꓹ ꓥꓳ ꓓꓴ ꓟꓬ ꓡꓰ ꓠꓬ ꓟꓽ ꓙꓲ꓾ ꓣꓳ ꓢꓯꓼ ꓟꓬ ꓖꓴ ꓡꓰ ꓕꓯ ꓟꓲ ꓠꓯ ꓗꓪ ꓙꓳ_ ꓟ ꓮ ꓙꓵ ꓣꓳ ꓒꓰꓹ ꓗꓷ ꓠ ꓗꓷ ꓡꓰ ꓟ ꓥꓳ꓾

ꓟꓲ ꓠꓯ ꓗꓪ ꓙꓳ_ ꓟ ꓮ ꓙꓵ ꓔꓯ ꓠꓲꓹ ꓥꓳ ꓓꓴ ꓟꓽ ꓟꓬ ꓠꓹ ꓟ ꓤ ꓟꓳ ꓓꓴ ꓬꓰ ꓡꓯ꓾ ꓕꓱ ꓟ ꓮ ꓙꓵ ꓓꓲ ꓢ ꓪꓴ-ꓢ ꓐꓯ ꓘꓶꓽ ꓶꓼ ꓓꓳ ꓫꓱꓸ ꓓꓳ ꓔꓯ ꓡꓰ ꓠꓲꓹ ꓟ ꓘꓴꓽ ꓗꓪ ꓬꓲꓸ ꓖ ꓖꓶ ꓓꓴ ꓬꓰ ꓡꓯ꓾ ꓟꓲ ꓠꓯ ꓗꓪ ꓕꓲ ꓑꓹ ꓤ ꓡꓰ ꓔꓬ ꓠꓹ ꓟ ꓟꓲ ꓠꓯ ꓪꓰ ꓤ ꓥ ꓟ ꓑꓶ ꓓꓴ ꓕꓲ ꓑꓹ ꓤ ꓡꓰ ꓔꓬ ꓟ ꓙꓵꓹ ꓗꓪ ꓟꓲ ꓠꓯ ꓗꓪ ꓙꓳ_ ꓟ ꓔꓯ ꓟꓽ ꓠꓲꓹ ꓥꓳ꓾ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓣꓳ ꓦꓻ ꓐꓱ ꓶ ꓪꓴ-ꓢ ꓐꓯ ꓘꓶꓽ ꓶꓼ ꓓ ꓫꓱꓸ ꓓꓳ ꓔꓯ ꓡꓰ ꓠꓲꓹ ꓟ ꓘꓴꓽ ꓗꓪ ꓐꓰ ꓗꓷ ꓔ ꓓꓴ ꓬꓰ ꓡꓯ꓾ ꓛꓳ ꓫꓱꓽ ꓓꓴ ꓬꓰ ꓡꓯ꓾ ꓐꓰ ꓢꓯꓼ ꓖꓶ ꓩꓴ ꓡ ꓥꓳ=