ꓢꓲ ꓫꓬ ꓕꓳ ꓶ ꓔꓱ, ꓕ ꓟ

ꓠꓬꓲꓸ ꓠꓬꓲ ꓣꓳ ꓔꓯ ꓢꓲ ꓫꓬ ꓕꓳ ꓶ ꓗꓪ ꓐꓰ ꓮ ꓫꓵ ꓔꓯ ꓥ ꓟꓲ ꓬꓲꓸ ꓡꓯꓽ ꓕꓲ ꓙꓳ ꓠꓹ ꓟ ꓐꓯ ꓔ ꓡꓳ= ꓬꓲꓸ ꓡꓯꓽ ꓕꓲ ꓟꓽ ꓙꓳ ꓟ ꓤꓶꓻ ꓠꓬ ꓮ ꓫꓵ ꓡꓲ ꓙꓲ ꓖꓴ ꓟꓽ ꓙꓳ_ ꓟ ꓡꓰ ꓐꓰ ꓥꓳ꓾ ꓝꓮꓲ ꓣꓳ ꓤꓶꓻ ꓗꓪ ꓮ ꓫꓵ ꓔꓯ ꓥ ꓟꓲ ꓔꓶꓻ ꓙꓱꓼ ꓥ ꓟꓲ ꓬꓰ ꓟꓽ ꓐ ꓡ꓾ ꓕꓲ ꓞꓲꓼ ꓕꓲ ꓑ ꓟꓴ ꓗꓪ ꓗꓴꓷꓼ ꓔꓬ ꓡꓳ꓾ ꓐꓯ ꓟ ꓥ ꓟꓲ ꓓꓵꓽ ꓙ ꓟ꓾ ꓙꓻ ꓟꓶ ꓟ ꓬꓲꓸ ꓦꓻ ꓥꓳꓽ ꓡꓰ ꓗꓷ ꓡꓰ ꓟ ꓥꓳ꓾

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓐꓯ ꓟꓳꓸ ꓖꓶ ꓔ ꓟ ꓠꓬ ꓬꓲꓸ ꓡꓯꓽ ꓕꓲ ꓙꓳ ꓠꓹ ꓟ ꓥꓳ꓾ ꓕꓲ ꓞꓲꓼ ꓕꓲ ꓑ ꓟꓴ ꓗꓪ ꓗꓴꓷꓼ ꓥ ꓟꓲ ꓚꓵ ꓚꓵ ꓔꓬ ꓟ ꓥꓳ꓾ ꓕꓱ ꓟ ꓔꓯ ꓪꓴ-ꓢ ꓡꓰ ꓖꓶ ꓔ ꓟ ꓙꓻ ꓜꓲꓼ ꓠꓲꓹ ꓢꓷꓸ ꓠꓲꓹ ꓗꓪ ꓐꓰ ꓣꓳ ꓢꓷꓸ ꓠꓹ ꓟ ꓥꓳ= ꓣꓳ ꓠꓲꓹ ꓟ ꓐꓰ ꓖꓳ ꓓꓱ ꓠꓬ ꓕꓲ ꓪ ꓡꓰ ꓗꓷ ꓠ ꓔ ꓡꓳ= ꓬꓲꓸ ꓦꓻ ꓥꓳꓽ ꓡꓰ ꓓꓵꓽ ꓙ_ ꓟ ꓤꓶꓻ ꓗꓪ ꓡꓰ ꓗꓹ ꓛꓲ ꓓꓴ ꓟꓽ ꓥ꓾ ꓡ ꓞꓳ ꓮ ꓟꓬꓹ ꓠꓲꓹ ꓟ ꓫꓸ ꓠꓬ ꓠꓲꓹ ꓟ ꓫꓸ ꓙ ꓗꓴꓸ ꓠ ꓔ ꓡꓳ꓾ ꓫꓱꓸ ꓤ ꓠꓲꓹ ꓙꓳ ꓠ ꓔ ꓟ ꓥꓳ꓾ ꓡ ꓞꓳ ꓮ ꓟꓬꓹ ꓗꓹ ꓛꓲ ꓠꓬ ꓗꓹ ꓛꓲ ꓗꓴꓸ ꓠ ꓔ ꓡꓳ꓾ ꓫꓱꓸ ꓖꓶ ꓗꓴꓸ ꓠ ꓔ ꓡꓳ꓾ ꓖꓳ ꓕꓱ ꓢꓲ ꓣꓳ ꓠꓲꓹ ꓫ ꓟꓬ ꓫꓸ ꓓꓴ ꓔꓳꓹ ꓜꓳ ꓕꓯ ꓥ ꓟꓲ ꓠꓱꓸ ꓐꓯꓼ ꓢꓴ ꓗꓪ ꓐꓰ ꓫꓱꓸ ꓤ ꓠꓲꓹ ꓐꓰ ꓠꓲꓹ ꓟ ꓗꓳꓸ ꓖꓶ ꓓꓴ ꓪ ꓟꓶ ꓡ ꓥꓳ꓾ ꓣꓳ ꓗꓹ ꓛꓲ ꓓꓴ ꓙꓳ ꓠꓬ ꓠꓱꓸ ꓐꓯꓼ ꓢꓴ ꓥ ꓟꓲ ꓗꓹ ꓛꓲ ꓟ꓾ ꓠꓲꓹ ꓘꓪ ꓫꓵ ꓓꓴ ꓙꓳ ꓡ ꓟ ꓥꓳ꓾

ꓪꓴ-ꓢ ꓡꓰ ꓖꓶ ꓔ ꓟ ꓙ ꓜꓲꓼ ꓠꓲꓹ ꓢꓷꓸ ꓠꓲꓹ ꓔꓯ ꓙꓲ ꓖꓴ ꓙꓳ ꓙꓳ ꓡꓰ ꓣꓱꓽ ꓗꓴꓸ ꓠꓹ ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓾ ꓙꓲ-ꓢꓴ ꓢꓲ ꓤ ꓕꓲ ꓣꓳ ꓗꓪ ꓐꓰ ꓪꓴ-ꓢ ꓐꓱ ꓶ ꓢꓷꓸ ꓙ ꓟꓳ ꓙ ꓓꓴ ꓬꓰ ꓡꓯ꓾ ꓢꓲ ꓒ ꓬꓰ-ꓢꓴ ꓠꓯꓼ ꓗꓪ ꓛꓳ_ ꓟ ꓙꓲ_ ꓟ ꓛꓳꓽ ꓒꓯꓹ ꓗꓷ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ꓾ ꓟꓲ ꓠꓯ ꓗꓪ ꓢꓲ ꓒ ꓬꓰ-ꓢꓴ ꓔꓯ ꓟꓽ ꓙꓵꓻ ꓬꓲ ꓔꓯ ꓟꓽ ꓓꓵꓽ ꓙ ꓟꓲ ꓡꓰ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓥ ꓟꓲ ꓣꓳ ꓔꓯ ꓟꓽ ꓓꓵꓽ ꓙ ꓒꓲꓹ ꓗꓷ ꓡ ꓥꓳ꓾ ꓕꓱ ꓟ ꓔꓯ ꓣꓳ ꓓꓵꓽ ꓙ ꓔ ꓓꓴ ꓬꓰ ꓡꓯ꓾ ꓖꓳ ꓡꓱ ꓠꓬꓲ ꓙꓲ ꓢꓴ ꓢꓲ ꓤ ꓤꓶꓻ ꓗꓪ ꓣꓳ ꓛꓳ ꓠ ꓔ ꓟ ꓙꓵꓽ ꓗ ꓔꓯ ꓥ ꓟꓲ ꓛꓳ ꓓꓴ ꓬꓰ ꓡꓯ꓾ ꓝꓴꓲ ꓔꓯ ꓥ ꓟꓲ ꓟꓽ ꓬꓰ ꓪ ꓡꓰ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ꓾ ꓪꓴ-ꓢ ꓔꓯ ꓣꓳ ꓠꓲꓹ ꓟ ꓘꓴꓽ ꓗꓪ ꓐꓰ ꓠꓲꓹ ꓠꓵ ꓢꓲ꓾ ꓣꓳ ꓠꓶꓽ ꓛꓳ ꓕꓲ ꓛꓳ ꓔꓯ ꓥ ꓟꓲ ꓚꓲ ꓛꓬ ꓡꓰ ꓐꓰ ꓠꓲꓹ ꓠꓵ ꓐ ꓡ ꓠꓹ ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓾ ꓢꓲ ꓒ ꓬꓰ-ꓢꓴ ꓡꓰ ꓟꓸ ꓖꓶ ꓡ_ ꓟ ꓔꓯ ꓬꓲꓸ ꓦ ꓥꓳꓽ ꓡꓰ ꓓꓵꓽ ꓙ ꓠꓹ ꓟ ꓟꓽ ꓥ ꓚꓵ ꓚꓵ ꓛꓳ ꓠꓹ ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ꓾ ꓐꓰ ꓢꓯꓼ ꓖꓶ ꓩꓴ ꓡ ꓥꓳ=