ꓜ ꓫꓵꓸ ꓫꓵꓸ_ꓟ ꓔꓯ ꓥꓳꓽ

ꓜ ꓫꓵꓸ ꓫꓵꓸ_ꓟ ꓔꓯ ꓥꓳꓽ

Friday, January 29, 2021

ꓝꓮꓲ ꓬꓲ ꓡꓰ ꓐꓯ_ ꓡꓳ꓾ ꓪꓴ-ꓢ ꓗꓴꓷ ꓠꓬ ꓡ ꓞꓳ ꓕꓲ ꓣꓳ ꓡꓰ ꓟꓲ ꓠꓯ ꓗꓪ ꓜ ꓫꓵꓸ ꓫꓵꓸ ꓔ_ ꓟ_ ꓡꓰ ꓐꓰ ꓗ_ ꓡꓳ꓿ꓬꓲ ꓠꓬ ꓢ ꓘꓪ ꓬꓲꓼ ꓟꓶ꓾ ꓟꓳꓼ ꓡꓳ ꓔꓴ ꓡ꓿ ꓜ ꓫꓵꓸ ꓖꓳ ꓟ_ ꓟꓲ ꓣꓱꓻ ꓡ ꓪꓴꓽ ꓡ ꓔꓬ_ ꓡꓳ꓿ ꓮ ꓡꓲ ꓖꓳ ꓡꓱ ꓣꓱ ꓡ_ ꓟ ꓬꓲ ꓠꓽ ꓟꓽ ꓢꓷ꓿ ꓟꓲ ꓠꓯ ꓠꓬ ꓬꓲ ꓚꓲ ꓛꓬ ꓡꓰ ꓜ ꓪꓳ ꓡꓳ ꓪꓳ ꓓꓱꓼ ꓡ_ ꓡꓳ꓿ ꓬꓲ ꓪꓴꓸ ꓠꓬ ꓬꓲ ꓡꓯꓸ ꓒꓬꓽ꓾ ꓗ ꓠꓯ ꓠꓬ ꓬꓲꓸ ꓠꓱꓺ꓾ ꓖꓳ ꓗ ꓠꓯ ꓬꓲ ꓠꓱꓺ ꓗꓪ ꓟꓻ ꓔꓰꓹ ꓡꓰ_ ꓟ ꓬꓲ ꓟꓺ ꓢꓶꓽ꓿ꓜ ꓪꓳ ꓡꓳ ꓪꓳ ꓟꓲꓺ ꓡ ꓠꓬ꓾ ꓜ ꓫꓺ ꓝꓲꓸ ꓛꓲ ꓡ ꓠꓬꓲ꓾ ꓞꓼ ꓐꓰ ꓬꓲ ꓑꓽ ꓡꓰꓻ ꓡꓰ ꓶꓼ_ ꓡꓳ꓾ ꓐꓯ_ ꓡꓳ꓿ ꓝꓮꓲ ꓬꓲ ꓡꓰ ꓐꓯ_ ꓡꓳ꓾ ꓪꓴ-ꓢ ꓗꓴꓷ ꓠꓬ ꓣꓳ ꓮ ꓫꓵꓽ ꓔꓯ ꓔꓯꓺ ꓠꓯ_ ꓡꓳꓺꓽ꓿ ꓮ ꓫꓵ ꓔꓯꓺ ꓥꓳ ꓡꓰ ꓔꓯꓺ ꓟꓳꓸ ꓖꓶ ꓠꓯ_ ꓡꓳꓺꓽ꓿ ꓪꓳꓽ ꓒꓲꓻ ꓫꓵꓸ ꓕꓲ ꓢꓶꓽ_ ꓡꓰ ꓐꓰ ꓗ_ ꓡꓳ꓿ ꓟꓲ ꓠꓯ ꓗꓪ ꓫꓵꓸ_ ꓕꓯ꓾ ꓟꓲ ꓠꓯ ꓗꓪ ꓟ ꓬꓲ ꓫꓵꓸ ꓥ ꓕ ꓑꓳ ꓠꓯꓸ ꓘꓪ ꓣꓳꓺ_ ꓟ ꓥ_ ꓟꓲ꓾ꓫꓵꓸ ꓗꓷ ꓗ ꓠꓯ꓾ ꓪꓴꓽ ꓡ ꓢꓲ ꓪꓳꓽ ꓫꓵ ꓪꓳ ꓙꓰ ꓥ ꓕ ꓑꓳ ꓪꓴ ꓟꓽ ꓞꓲ ꓒꓬꓱꓼ ꓡ_ ꓡꓳ꓿ ꓟꓴ ꓗꓪ ꓗꓪ ꓟ ꓠꓬꓹ ꓤ ꓬꓲ ꓛꓺ ꓗꓴꓸ ꓗꓪ ꓥꓳꓽ ꓐ ꓡ ꓠ ꓛꓲ꓾ ꓡꓯꓼ ꓗꓸ ꓓꓽ ꓟ ꓒꓬꓱꓼ ꓡ_ ꓡꓳ꓾ ꓐꓯ_ ꓡꓳ꓿ꓬꓲ ꓪ ꓠ ꓠꓹ ꓗꓴ ꓠꓹ ꓟ꓾ ꓬꓲ ꓠꓬ ꓕꓱ ꓡꓱ ꓡꓴ ꓫꓵꓽ ꓔꓯꓺ ꓥꓳ ꓮ ꓟꓬꓹ ꓡꓰ꓾ ꓬꓲ ꓪ ꓔꓯ ꓪꓴ-ꓢ ꓐꓯ ꓘꓶ ꓚ ꓟꓸ ꓖꓶ_ ꓡꓳ꓿ꓔꓯꓺ ꓥꓳ ꓗꓪ ꓐꓰ ꓟꓽ ꓥ ꓠꓬ ꓬꓲ ꓡꓰ ꓬꓲ ꓪ ꓔꓯ ꓟꓽ ꓚ ꓖꓶ꓿ ꓬꓲ ꓚꓲ ꓛꓬ ꓛꓳ ꓒꓯꓹ ꓐꓴ ꓔꓯ ꓠꓽ꓾ ꓟꓸ ꓟꓲꓽ ꓮ ꓙꓵ ꓬꓲ ꓘꓳ ꓫꓱ ꓫꓱ_ ꓗꓪ ꓒꓶꓻ ꓟꓸ ꓖꓶ_ ꓡꓳ꓿