ꓙ ꓖꓴ ꓠꓬꓲꓽ ꓚꓱꓹ ꓟꓸ ꓟꓲꓽ

 ꓠꓬꓲꓸ ꓠꓬꓲꓸ ꓟꓸ ꓟꓲꓽ ꓗꓪ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓣꓳꓽ ꓔꓯ ꓐꓯ ꓖꓶꓽ ꓡ ꓟ ꓠꓬ꓾ ꓢꓲ ꓫꓬ ꓟ ꓔꓯ ꓮ ꓠꓽ ꓔꓯ ꓕ ꓖꓶ= ꓒꓵꓽ ꓶ ꓔꓯˍ ꓟꓲ ꓮ ꓪꓯꓼ ꓔꓯ ꓕꓽ ꓟꓳꓸ ꓖꓶꓽ ꓐꓰ ꓐꓯ ꓟꓸ ꓖꓶꓽ ꓡˍ ꓡꓳ= ꓒꓵꓽ ꓶ ꓔꓯ ꓮ ꓪꓯꓼ ꓔꓯ ꓟꓳꓸ ꓖꓶꓽ ꓠꓬ ꓕꓳꓼ ꓩꓴ ꓗꓷˍ ꓥꓳ=

ꓠꓬꓲ ꓠꓬꓲ ꓢꓲ ꓒ ꓡꓰ ꓣꓳꓽ ꓔꓯ ꓐꓯ ꓖꓶꓽ ꓡ ꓟ ꓠꓬ꓾ ꓟꓲꓺ ꓠꓯ ꓗꓪ ꓠꓬ ꓕꓲꓽ ꓐꓳ ꓙꓳˍ ꓟ ꓠꓬ ꓮ ꓪꓯꓼ ꓔꓯ ꓫꓱꓸˍ ꓡꓳ= ꓮ ꓡꓰ ꓫꓵꓽ ꓒꓵꓽ ꓶ ꓟꓸ ꓖꓶꓽ ꓟꓲ ꓒꓴꓽ ꓗ ꓚꓰ ꓟꓽ ꓗꓴꓸ ꓔ= ꓢꓷꓸ ꓠꓲꓹ ꓐꓯ ꓟ ꓮ ꓘꓶꓸ ꓒꓴ ꓥˍ ꓟꓲ ꓐꓯ ꓟꓳꓸ ꓖꓶꓽ ꓟ ꓠ= ꓪꓴ-ꓢ ꓶ ꓓꓳ ꓫꓱꓹ ꓓꓳ ꓠꓬ ꓟꓲ ꓠꓯ ꓗꓪ ꓒꓴ ꓓꓰ ꓡꓰ ꓟ ꓒꓴ ꓶ ꓥꓳ ꓐꓰ ꓐꓯ ꓟꓳꓸ ꓖꓶꓽˍ ꓟꓲ ꓠ ꓠ ꓟꓽ ꓗꓴꓸ ꓔ= ꓟꓲ ꓠꓯ ꓗꓪ ꓠꓬ ꓪꓴ-ꓢ ꓶ ꓓꓳ ꓫꓱ ꓓꓳꓽ ꓡꓰ ꓐꓰ ꓒꓵꓽ ꓫꓵꓽ ꓟꓽ ꓙꓳ= ꓟꓴ ꓗꓪ ꓟꓲ ꓠꓯ ꓚꓰꓼ ꓢꓴ ꓪꓴ-ꓢ ꓠꓬ ꓬꓲꓸ ꓤ ꓔꓲꓸ ꓖꓶꓽ ꓗꓷ ꓗꓪ ꓛꓲ ꓞꓳ ꓤ ꓔꓯ ꓠꓲꓹ ꓠꓵˍ ꓡꓳ= ꓞꓳ ꓤ ꓮ ꓙꓵꓽ ꓠꓬ ꓪꓴ-ꓢ ꓐꓰ ꓙ ꓡꓯꓼ ꓘꓳ ꓟꓶ ꓡꓰꓳ=

ꓣꓳ ꓫꓸ ꓙꓵ ꓔꓬꓹ ꓟ ꓠꓲꓹ ꓫ ꓟꓬꓺ ꓫ ꓓꓴ ꓔꓯ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓟꓯꓹ ꓙ ꓗꓷ ꓟ ꓑꓶꓸ ꓓꓴ ꓣꓳꓽ ꓠꓬ ꓠꓲꓹ ꓫ ꓟꓽ ꓛꓵ-ꓳ= ꓮ ꓙꓵꓽ ꓬꓲꓸ ꓔꓯ ꓡꓯ ꓙꓱ ꓗꓷ ꓕꓲꓽ ꓖ ꓡꓰꓽ ꓥꓳ=

ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓐꓰ ꓠꓬꓲꓽ ꓫꓵꓽ ꓕꓲꓽ ꓫꓵ ꓟꓸ ꓖꓶꓽ ꓡ ꓟ ꓠꓬ ꓣꓳꓽ ꓥˍ ꓟꓲ ꓕꓲꓽ ꓖ ꓕꓲꓽ ꓧꓪ ꓠꓬ꓾ ꓮ ꓪꓯꓼ ꓔꓯ ꓫꓱꓸ ꓡꓰ ꓗꓴꓸ ꓡꓳ ꓐꓯ ꓟ ꓢꓷꓸ ꓡꓰ ꓝꓲˍ ꓡꓳ= ꓣꓳꓽ ꓠꓬ ꓒꓴꓽ ꓶ ꓔꓯ ꓟꓽ ꓢꓷꓸ ꓫꓵꓽ꓾ ꓟꓽ ꓚꓬꓹ ꓪ ꓫꓵꓽ ꓮ ꓟꓬ ꓙꓳˍ ꓡꓳ= ꓪꓴ-ꓢ ꓔꓯ ꓙꓵˍ ꓡꓳ= ꓠꓲꓹ ꓠꓵ ꓡꓳ ꓐꓯ ꓟ ꓥˍ ꓟꓲ꓾ ꓣꓳꓽ ꓬꓰ ꓔꓬꓹ ꓟ ꓠꓬ ꓕꓲꓽ ꓙꓰ ꓥ ꓗꓴꓸ ꓡꓳ= ꓖꓳ ꓕꓯ ꓣꓳꓽ ꓠꓬ ꓮ ꓪꓯꓼ ꓔꓯ ꓫꓱꓸ ꓡꓰ ꓗꓴꓸ ꓡꓳ ꓟꓽ ꓥ ꓡ=

ꓝꓮꓲ ꓕꓲꓽ ꓫꓵꓽ ꓣꓳꓽ ꓔꓯ ꓢꓷꓸ ꓡꓰ ꓝꓲꓹ ꓠꓲꓹ ꓫꓵˍ ꓟ ꓠꓬ꓾ ꓒꓵꓽ ꓶ ꓗꓳ ꓟ ꓟꓶ ꓠꓹ ꓟ ꓮ ꓡꓰ ꓬꓰ ꓠꓯ ꓡ? ꓢꓲ ꓒ ꓡꓰ ꓣꓳꓽ ꓔꓯ ꓠꓬꓲꓸ ꓠꓬꓲ ꓐꓯ ꓟꓳꓸ ꓖꓶꓽ ꓡˍ ꓡꓳ= ꓣꓳꓺˍ ꓟ ꓗ ꓘꓶꓽ ꓗꓪ ꓓꓵꓽ ꓙꓰ ꓐꓰ ꓐꓯ ꓟ ꓥꓳ= ꓣꓳꓺ ꓟ ꓗ ꓘꓶꓽ ꓗꓪ ꓙꓰ ꓐꓯ ꓟ ꓠꓬ ꓒꓵꓽ ꓶ ꓖꓳ ꓟ ꓟꓶꓹ ꓠ ꓟ ꓠꓬ ꓮ ꓘꓶꓸ ꓫꓸ ꓡꓳ= ꓢ ꓢ ꓡꓰ ꓟꓶ ꓟꓽ ꓓ= ꓖꓳ ꓡꓱ ꓠꓬꓲ ꓒꓵꓽ ꓶ ꓖꓳ ꓟ ꓔꓯ ꓢꓷꓸ ꓔ ꓕꓲꓽ ꓖ ꓟꓽ ꓓ꓾ ꓜꓲꓽ ꓜꓲꓽ ꓑꓰ ꓑꓰ ꓢꓯꓼ ꓕꓵꓼ ꓠ ꓗˍ ꓡꓳ ꓐꓯ ꓟ ꓢꓷꓸ ꓝꓲ ꓠꓲꓹ ꓫꓵ ꓟ ꓥ ꓡꓳ=

 ꓠꓬꓲꓸ ꓠꓬꓲꓸ ꓟꓸ ꓟꓲ ꓗꓪ ꓢꓲ ꓒ ꓣꓳꓽ ꓔꓯ ꓐꓯ ꓟꓸ ꓖꓶꓽ ꓡ ꓟ ꓡꓰ ꓐꓰ꓾ ꓫꓸ ꓟ ꓗ ꓘꓶꓽ ꓗꓪ ꓓꓵꓽ ꓙꓰ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ= ꓖꓳ ꓟ ꓠꓬ ꓚꓵ ꓚꓵ ꓒꓵꓽ ꓶ ꓥꓳ ꓐꓯ ꓟ ꓢꓷꓸ ꓔ ꓓꓴ ꓥꓳ=